Beblia

Bible in one year September 1

1. Гилы́ гилендыр, сави́ счхудя о Соломо́но.

2. Мэк ёв тэ чамудэл ман пэ́скирэ уштэ́нца; пал-дова́ со лэ́скиро пирамнипэ́н (камибэн) исын фэды́р, сыр мол (вино).

3. Пал-дова́ со, сыр куч драб тэ кхосэн дэ́ла гудлы́ сунг(арома́то); тыро́ лав исын куч драб тэ кхосэн, со чхувэ́лапэ анги́л, палдава́ патывалэ́ тэрнэ́ джувля́ отдэна ило́ пал ту́тэ.

4. Приты́рдэ ман кэ пэ, и амэ нашаса ту́са. Кра́ли яндя́ ман дрэ пэ́скирэ-кралитка коморы (харомы), соб (кай) амэ тэ явас ра́да и зоралэ́с тэ радынаспэ; амэ ява́са тэ рипирас тыро́ пирамнипэ́н (камибэн) буты́р, сыр мол. Нанэ ди́во, со патывалэ́ чхая́ отдэна ило́ пал ту́тэ.

5. Ерусалимо́скирэ чхая́лэ! Мэ сом цьмяно, нэ мэ сом шукарни джувлы́, мэ сом сыр Кидароскирэ ша́тры, мэ сом сыр зачхудэ (завесы) Соломоно́скирэ.

6. На дыкхэ́н адя́кэ пэ ма́ндэ, со мэ сом калёри, пал-дова́ со кхаморо пэкця ман. Мирэ́-да́кирэ чхавэ́ холясынэ пэ ма́ндэ; ёнэ чхудэ́ ман тэ ракхав винаграды́тко у́нта [(дракхин)] (садо), нэ мэ на ракхцём мири́ винаграды́тко у́нта.

7. Пхэн ту ма́нгэ, конэ́с мэ кама́м, кай ту чаравэса пэ́скирэ бакрэнгири ста́ды, кай ёнэ явэ́на тэ откхинён дро паш дывэ́с? Со́скэ ма́нгэ трэй тэ чаравав палэ тырэ́ дрогонэ́-малэнгирэ (другэнгирэ) ста́ды.

8. Ко́ли ту на джинэсас, най гожэдыр машки́р джувлендэ, джа́ пир бакрэ́нгирэ шпэры (сляды), и чарав пэ́скирэ бузнорэн (козлорэн) пашы́л чхупнарьенгирэ ша́тры,

9. Мэ приравниндём (припарудём) тут, мири́ пирамни́е (камлы), мирэ́ най дрогэдыр грасняса дро Фараоно́скиро марибны́тко вурдэ́н.

10. Тырэ́ чхама (шчоки) исын гожэдыр мириклендыр, Тыри́ мэн исын ґожакирды сувнакунэ́ зандирорьенца.

11. Амэ кэра́са ту́кэ шука́р сувнакуны́ веригори (подвязка) рупувэ́ якхорьенца.”

12. Ке́ли кра́ли исын бэшто́ пал лэ́скиро сками́нд, миро нардо дэ́ла лачхэ́-сунгакиро кхандыпэн.

13. Сы́рбы дро́го бужоро миростыр ваш ма́нгэ, миро пирамно́ (камло), ке́ли ёв исын пашто́ раты́ пашы́л мирэ́ колына.

14. Миро пирамно́ ваш ма́нгэ исын сы́рбы рандёри хнатыр (киперостыр), сави́ лулудёла (цвэцинэла), дрэ винаграды́тко у́нта [(дракхин)] Енгеда (Эн-Геда).

15. О, сави́ гожо-шука́р ту сан, мири́ пирамни́е, – тырэ́ якхорья исын сыр голумбицатэ.

16. О, саво́ гожо-шука́р ту сан, миро пира́но, саво́ гудло́ и амаро́ чхуибэ́н исын адя́кэ-паць сыр вычхудо зэлэныбэн.

17. Амарэ́ кхэрэ́скирэ стрэхи исын сыр кедрытко вэш, и амарэ́-бэргакирэ бэльки (стропилы) исын сыр кипарисоскирэ кашта́!

Song of Solomon 2:1-17

1. Мэ сом Шароноскиро нарцысо, мэ сом лилия машки́р долы.

2. Сыр лилия исын машки́р пхусады́тка хру́сты, адя́кэ-паць исын мири́ пирамни машки́р патывалэ́ тэрнэ́ джувлендэ.

3. Сыр пхабэлын, сави́ исын машки́р вэшытка кашта́ (дрэвы), адя́кэ-паць исын миро пирамно́ машки́р тэрнэндэ. Ма́нгэ исын пир ило́ тэ бэшав дрэ ла́кири зэр (тень), и ла́кирэ барьякирдэ́ (пло́ды) исын гудлэ́ ваш миро муй.

4. Ёв яндя́ ман дро кхэр, саво́ сыс пхэрдо́ моля́са (виноса), ёв сы́рбы чхудя́ сцяго, со лэ́скэ дро́го сом мэ.

5. Подрикэ́р ман тэ на пэрав моля́са (вино́са), нэвякирэ́н ман пхабэ́нца, пал-дова́ со мэ на́бут со на мэра́ва пирамнипна́стыр (камлыпнастыр).

6. Лэ́скиро зэ́рво (ле́во) васт исын тэл миро шэро́, и лэ́скиро чачо́ (право) васт облэла ман.

7. Мэ засовлахава тумэн, Ерусалимо́скирэ чхая́лэ, газэленца ци фэлдакирэ миргэ́нца (сернэнца), соб (кай) тумэ́ тэ на джангавэн, тэ на ґаздэ́н рат анги́л дова́, сыр явэ́ла лачхо́ лэ́скэ.

8. Акэ, мирэ́ пирамнэ́скири зан. Ѓа́да, ёв джа́ла? Ёв пириухтэла пир бэ́рги? Ёв ухтэла пир бэ́ргицы.

9. Миро дру́го (мал) исын сыр газэль, ци сыр тэрно́ шынгуно (оленё). Акэ, ёв исын тэрдо́ пал ва́нта, Ёв дыкхэ́ла пирда́л фэштры, Ёв продыкхэла пирда́л саструнэ́ ратни́цы (ставни).

10. Миро пирамно́ лыя́ тэ ракирэ́л и пхэндя́ ма́нгэ: “Ушты́, мири́ пирамни́е, мири́ шукарни, и яв яври́.

11. Дыкх жа! Ивант (зима) прогия́ (накхтия), брышы́нд пирияця́ и нанэ буты́р:

12. лулудя́ сыкадёна пэ пхув, и чирикля́ лынэ́ тэ бага́н, ла́киро багипэн шунэ́ла амари́ пхув.

13. Инжыритконэ-каштэнгирэ зэлэна пхаба́ лолёна, и винаграды́тко кашторо лулудёла и дэ́ла лачхэ́-сунгакиро кхандыпэн. Ушты́, мири́ пирамни́е, мири́ шукарни, и яв кэ мэ.

14. Мири́ голумбица исын дрэ скалэнгирэ нишы, дрэ гарадэ́ штэ́ты пир са́мо крутыма, ма́нгэ тэ дыкха́в тыро́ муй, ма́нгэ тэ шунав тыри́ занори, пал-дова́ со тыри́ зан (глос) исын гудлы, тыро́ муёро исын шука́р.”

15. Ухтылэ́н локхнен (лисицэн), тыкнэ́ локхнорьен, савэ́ хасякирэна винаграды́тко бар; пал-дова́ со амарэ́ винаграды́тка барья лулудёна.

16. Миро пирамно́ исын миро, и мэ сом лэ́скири. Ёв чаравэла (лэ́скирэ-бакрэнгири стада) машки́р лилии,

17. Анги́л, сыр дывесёла, и зэрья́ (тени) нашэ́на, рисёв, миро пира́мне: яв сыр газэль, ци сыр тэрно́ шынгуно машки́р бэ́рги.

Psalms 104:1-9

1. Славин и парикир Ра́скэ-Дэвлэ́скэ, миро ди. О, Раё Дэ́вла, миро Дэвэ́л, Саво́ баро́ Ту сан! Ту учхакирдян Пэс патыва́са и райканэ слава́са.

2. Ту сан учхакирдо дудэса (свэтоса) сыр урибнаса, Ту росчхудян трусця́л (кругом) болыбэ́н сыр шатракирэ рига́.

3. Ту чхудя́н бэльки (страпилы) тэл стрэ́ха (чхаки́н) ваш шука́р шту́бы (комо́ры), со исын тэл паня́, Ту кэрдя́н облокэндыр Пэ́скэ марибны́тко вурдэ́н, Ту псирэса ўсендзе (везде) пэ балвалякирэ пхака́,

4. Ту создыян Тырэ́ Янголэн духэ́ндыр, Ту создыян Пэ́скэ бутярнэн ягакирэ чибэндыр.

5. Ту чхудя́н пхув пэ фунда́менто адя́кэ, со ёй на чилавэлапэ штэто́стыр ние́кхвар.

6. Ту учхакирдян пхув хорэ штэтэнца сыр урибнаса; паня́ тэрдинэ́ вучэды́р бэргэндыр.

7. Сыр Ту бангякирэса лэн, ёнэ нашлэ, ёнэ дэнапэ тэ прастан Тырэ́-громоскирэ занятыр (глосятыр),

8. Ёнэ пириджана бэ́рги, ёнэ змэкэнапэ пэ долы, пэ штэ́ты, со Ту зачхудян ваш лэ́нгэ.

9. Ту чхудя́н кусты́к (граница), со ёнэ на пириджана, соб (кай) ёнэ на могиндлэ́ нэвэ́стыр (нэвэ́с) тэ чхакирэн пхув.

Proverbs 24:15-16

15. На подракх тэ замарэс (на придумин биба́хт), пашы́л кхэр, кай исын чачуно́ ману́ш, ту сан фуй ману́ш, на пхагир лэ́скиро откхиныбнытко штэ́то;

16. пал-дова́ со чачуно́ ману́ш сашты́ (могинэ́ла) тэ пэрэ́л эфта́ (битринэ́нгиро дэш) мо́лы и ёв уштэ́ла, нэ фуй ману́ш пэрэ́ла дрэ бари би́да.

1 Korinťanenge 11:17-34

17. Нэ, сыр мэ да́ва упхэныбэ́н тумэ́нгэ, мэ на шарава тумэн; пал-дова́ со тумэ́ кэдэнапэ на ваш лачхипэ́н, а сы́рбы буты́р ваш чорипэ́н.

18. Палдава́, дро пэ́рво, ке́ли тумэ́ явэ́на пэ скэдыибэ́н, тумэ́ роспэрэнапэ пир групы тэ чингардэспэ, сыр мэ шундём, и мэ на́бут патя́ва дро дава́.

19. Ваш дава́ трэй, соб (кай) тэ явэ́н ра́зна групы машки́р тумэ́ндэ, соб (кай) тэ сыкавэ́н пэс одолэ́ мануша́, кон исын тэрдэ́ пэ чачуно́ дром машки́р тумэ́ндэ.

20. Ке́ли тумэ́ кэдэнапэ дро екх штэ́то, дава́ на подджа́ла, соб (кай) тумэ́ тэ хан Ра́скирэ-Дэвлэ́скири вечэ́ря.

21. Палдова́ – со кажно ману́ш камэ́ла сыгэды́р тэ хал пэ́скиро хабэ́н англэды́р явирэндыр и екх ману́ш исын бокхало, а яви́р исын мато.

22. Нау́што нанэ тумэ́ндэ кхэра́ тэ хан и тэ пьен? Ци тумэ́ дыкхэ́на вучипна́стыр пэ Кхангирья́киро скэдыибэ́н, со тумэ́ ладжакирэна чорорэ́ манушэ́н. Со ма́нгэ тэ пхэна́в тумэ́нгэ? Тэ шара́в ма́нгэ тумэн? Над, мэ на шарава тумэн.

23. Пал-дова́ со мэ Кокорэстыр Ра́стыр-Дэвлэ́стыр прилыём дова́ сыклякирибэ́н, саво́ мэ пиридава тумэ́нгэ, со Рай Дэвэ́л дрэ кодоя рат, ке́ли Ёв сыс здыно, лыя́ маро́,

24. парикирдя Дэвлэ́скэ, пхагирдя́ лэс и пхэндя́: “Дава́ исын Мирэ́ Маса́, савэ́ исын отдынэ́ ваш тумэ́нгэ: кэрэ́н адя́кэ тэ рипирэ́н Ман.”

25. Адя́кэ-паць и тахта́й пало́ вечэря и пхэндя́: “Дава́ тахта́й исын нэво́ Дэвлэ́скиро завето пир миро рат: кэрэ́н дава́ ада́кицы мо́лы, кицы́ мо́лы тумэ́ явэ́на тэ пьен лэ́стыр (ла́тыр), соб (кай) тэ рипирэ́н Ман.”

26. Пал-дова́ со ада́кицы мо́лы, кицы́ мо́лы тумэ́ явэ́на тэ хан дава́ маро́ и тэ пьен дава́ тахта́й, тумэ́ пирипхэнэна чачипэ́н пал Ра́скирэ-Дэвлэ́скиро мэрибэ́н, пака Ёв явэ́ла.

27. Палдава́, ко́ли вари-кон ха́ла маро́ ци пьела Ра́скирэ-Дэвлэ́скиро тахта́й би патыва́киро (би дара́киро) анги́л Лэ́стэ, одова́ ману́ш явэ́ла банго́, со ёв на кутякирэла Ра́скирэ-Дэвлэ́скирэ маса́ и рат.

28. А мэк кажно ману́ш тэ пропатякирэл пэс и пир дава́ ха́ла маро́ и пьела тахтастыр.

29. Палдава́, кон ха́ла и пьела тахтастыр би дара́киро анги́л Дэвлэ́стэ, одова́ ману́ш сы́рбы ха́ла и пьела Дэвлэ́скиро сэ́ндо пэ пэ́стэ, и сы́рбы отлыджалапэ би патыва́киро кэ Христосо́скирэ Маса́.

30. Палдава́ бут тумэ́ндыр исын бизорья́кирэ и насвалэ, и бут мынэ́.

31. Палдава́, ко́ли амэ сэндинасас пэс, тэды амэн на сэндинэнас.

32. Нэ Дэвэ́л сэндякирэ́ла и чхувэ́ла хась (ка́ра) пэ амэ́ндэ, соб (кай) амэн тэ на сэндинэ́н кхэтанэ́ свэтоса.

33. Палдава́, пшала́лэ мирэ́, ке́ли тумэ́ скэдэ́напэ тэ хан вечэря, ужакирэн екх екхэ́с.

34. Ко́ли вари-кон исын бокхало, мэк ёв тэ хал кхэрэ́, соб (кай) тумэ́ тэ на скэдэ́нпэ пэ Дэвлэ́скиро сэ́ндо. А саро́ яви́р мэ кэра́ва, сыр трэй, ке́ли мэ ява́ва кэ тумэ́.

Romani Bible Baltic 2019

Maintained by the United Bible Societies for the Baltic Romani Mission