Beblia

1. Ангилпхэныбэ́н пал Вавило́но, саво́ пхэндя́ Исаё, Амососкиро чхаво́.

2. Ѓаздэн сцяго (прикхарибэн) пэ откэрды бэ́рга, годлэн, сыкавэ́н лэ́нгэ вастэ́са, соб (кай) ёнэ тэ джа́н дрэ рангири по́рта (вра́ты).

3. Мэ дыём припхэныбэ́н кодолэ́нгэ, конэ́с выкэдыём, прикхардём, соб (кай) тэ выкэрэлпэ (тэ сполнинэ́лпэ) Мири́ холы́ Мирэ́ зоралэнгири, савэ́ радынэ́напэ Мирэ́ барипнастыр.

4. Баро́ шумо исын пэ бэ́рги, сы́рбы бутэ́ народо́стыр; шумо, саво́ ґаздынэ́ кралипэна́ и народо, скэдыно́ кхэтанэ́: Рай Дэвэ́л, болыбна́скирэ-янголэ́нгиро, обдыкхэла халадэ́нгиро строё.

5. Ёнэ джа́на дуратунэ́ рига́тыр, болыбна́скирэ ягоро́стыр (краёстыр) Рай Дэвэ́л и струме́нты Лэ́скирэ холя́тыр, соб (кай) тэ хасякирэ́н сари́ пхув.

6. Ровэ́н, джа́ла Ра́скирэ-Дэвлэ́скиро дывэ́с, джа́ла, сыр зор, сави́ пхагирэ́ла саро́, Сарэзорьякирэстыр.

7. Палдава́ васта́ сарэ́ндэ обмэкнэпэ и замыя́ ило́ кажнонэ́ манушэ́стэ.

8. Пиридарандынэ, занасвалынэ дара́тыр, мэнчинэнапэ, сыр джувлы́, ко́ли ёй биянэ́ла; ничи́ на ґалёна, дыкхэ́на екх пэ екхэ́стэ, муя́ лэ́нгирэ хачона.

9. Акэ, явэ́ла Ра́скирэ-Дэвлэ́скиро дывэ́с, захало, барэ́ хачкирдэ́ холямипнаса, соб (кай) тэ кэрэ́л пхувья́тыр чхучи́ пхув, тэ хасякирэ́л пэ ла́тэ ла́кирэ грэхитконэ́ манушэ́н.

10. Болыбна́скирэ чэргэня́ буты́р на хачона, кхам мурдия, ко́ли газдэлапэ, чхон на сыкавэ́ла пэ́скиро дуд (свэ́то).

11. Мэ отхава (отда́ва) палэ свэтоскэ пал налачхэ́ рэ́нды, а грэхитконэ́ манушэ́нгэ – пал лэ́нгирэ грэ́хи; Мэ хасякира́ва пхутькирибэ́н кодолэнгиро, кон древа́н задэлапэ, Мэ хасякира́ва пхутькирибэ́н кодолэнгиро, кон притасавэла чорорэн.

12. Мэ кэра́ва адя́кэ, со мануша́ явэ́на кучэдыр (дрогэдыр), сыр исын мол жужо́ сувнака́й, и мурша́ – кучэдыр Офироскирэ сувнака́стыр.

13. Ваш дава́ Мэ чилавава болыбэ́н, и пхув зджа́ла пэ́скирэ штэто́стыр, ко́ли холясо́ла Рай Дэвэ́л, болыбна́скирэ-янголэ́нгиро, дро дывэ́с, ко́ли захачола Лэ́скири холы́.

14. Тэ́ньци кажно, сыр затрадыны серна, сыр чхурдынэ́ бакря́, рисёла кэ пэ́скиро народо и кажно прастала пэ пэ́скири пхув.

15. Нэ кон попэрэлапэ, одолэ́с замарэна, конэ́с ухтылэна, одова́ пэрла куртала́тыр.

16. Лэ́нгирэ чхаворэ́ явэ́на розмардэ анги́л лэ́нгирэ якха́, лэ́нгирэ кхэра́ явэ́на розчордэ, лэ́нгирэ ромня́ явэ́на ладжакирдэ́.

17. Акэ, Мэ ґазда́ва пэ лэ́ндэ Мидянэн, конэ́скэ на трэй руп, и кон исын на скэмпо (кон наґалко кэ сувнака́й).

18. Лэ́нгирэ луки домарэна тэрнэн, на потангинэна (на пожалинэна) биятэ́н, лэ́нгири якх на потангинэла чхаворэ́н.

19. Вавило́но, шукарипэ́н пир саро́ кралипэ́н, Халдеёскиро пхутькирибэ́н, Дэвэ́л хасякирэ́ла сыр Содо́мо и Гомо́ра.

20. Нико́н одо́й на явэ́ла тэ дживэ́л, на явэ́на тэ дживэ́н мануша́ одо́й николи; на чхувэ́ла Аравитянино пэ́скири ша́тра, чхупна́рья бакрэнца на явэ́на одо́й тэ откхинён.

21. Нэ явэ́на тэ дживэ́н одо́й рискирибна́скирэ мурдала́ (звери) чхучэ́ пхувья́тыр; кхэра́ явэ́на пхэрдэ́ чирикленца; чирикля́ и мурдала́ явэ́на тэ ухтэн одо́й.

22. Шакалы явэ́на тэ выинэн дрэ лэ́нгирэ тхагаритка коморы, гиены забэшэна дрэ кхэра́, кай ґарэдыр радынэнаспэ.

1. Пашылэды́р исын лэ́скиро часо, на явэ́на тэ тырдэнпэ лэ́скирэ дывэса́, пал-дова́ со потангинэла Рай Дэвэ́л Яково́с, ишчо (инкэ́) явэ́ла пир ило́ Лэ́скэ Израилё, и Ёв дэ́ла, соб (кай) тэ дживэ́н ёнэ пэ Лэ́скири пхув, явэ́на кэ ёнэ явирэ-рига́тыр мануша́, припхандэнапэ кэ кхэр Яково́скиро.

2. Залэна лэн народы, янэ́на пэ лэ́нгиро штэ́то, и кхэр Израилёскиро прилэ́ла лэн кэ пэ Ра́скирэ-Дэвлэ́скири пхув дынарье́нца и дынарицэнца, заухтылэла одолэ́н, кон ухтылдя дро пле́но Израилёс, явэ́ла рай машки́р одолэ́ндэ, кон лэс тасавэлас.

3. Явэ́ла адя́кэ дро дова́ дывэ́с: ко́ли Рай Дэвэ́л залэла ту́тыр тыри́ дукх, тыри́ дар, тыро́ пхарипэ́н, дрэ саво́ ту са́нас,

4. то ту багаса пхутькирды гилы́ пал Вавилоно́скирэ крали́стэ и пхэнэ́са: “Нанэ одолэ́с, кон ман мэнчынэлас, пирияця́ чорибэн!

5. Пхагирдя́ Рай Дэвэ́л грэхитконэ́-манушэ́нгиро дэсто́, дэсто́ крали́тко,

6. саво́ холя́са замарэлас народы, холя́са исыс баро́ Рай дрэ кхэри́тка ро́ды, и традэлас лэн.

7. Сари́ пхув откхинёла, яця́ штыл, годлэла бахтятыр.

8. Кипарисы радынэ́напэ пал ту́тэ и кедры Ливаноскирэ; ёнэ ракирэ́на: “Ко́ли ту засутян, нико́н на явэ́лас тэ чингирэл амэн.”

9. Лю́но (адо), саво́ исын тэла́л, ґаздыя́пэ ваш ту́кэ, соб (кай) ёнэ тэ дыкхэ́с тут, ке́ли ту заджаса; джангадя ваш ту́кэ Рефаимэн, сарэ́н пхувитконэн ран, ґаздыя́ сарэ́н Наюдытконэ́-нацыенгирэ кралье́н тхагаритконэ штэтэ́ндыр.

10. Сарэ́ лэ́на тэ ракирэ́н ту́кэ: “Ту яця́н бизорья́киро, сыр амэ, ту зджаса пэ амэ́ндэ!

11. Дро лю́но (адо) исын чхурдыно́ тыро́ пхутькирибэ́н сарэ́ тырэ́ шумоса, тэлэ́ ту́тэ пашто́ исын кирмо, кирмэ тут учхакирэна.

12. Сыр пыян ту болыбна́стыр, дывэсы́тко чэргэн, чхаво́ зорьякиро! Розмардянпэ пир пхув, кон пэ народы ґаздэласпэ.

13. А пхэнэсас ту дро пэ́скиро ило́: “Ѓаздавапэ пэ болыбэ́н, вучэды́р, сыр чэргэня́ Дэвлытка, мэ ґазда́ва миро тхагаритко штэ́то (троно), бэшава пэ бэ́рга машки́р пэ́скирэ дэвлэндэ, одо́й, кай кончынэлапэ паш-дывэ́с (северо).

14. Ѓаздавапэ мэ пэ болыбнытко вучипэ́н, ява́ва мэ тэ зджав (подджав) пэ Сарэвучэдырэскирэ Дэвлэ́стэ.”

15. Нэ ту сан чхурдыно́ дро лю́но (адо), дро лэ́скиро хорипэ́н.

16. Кон тут дыкхця́, роздыкхэна тут, думинэ́на пал ту́тэ: “Ци кодова́ исын ёв, кон тринскирэлас пхув, конэ́стыр кралипэна́ издранас?

17. Кон кэрдя́ далэ́ барэ́ свэто́стыр чхучи́ пхув, кон пхагирэлас фо́рья, кон ухтылэлас манушэ́н дро пле́но и кхэрэ́ на мэкэлас?”

18. Сарэ́ кра́лья манушэ́нгирэ, сарэ́ исын паштэ́ патыва́са, кажно дрэ пэ́скири копли́ца [дро пэ́скиро кхэр-ю.о.].

19. А ту сан чхурдыно́ коплицатыр (гробницатыр), сыр налачхи рандь, сыр урибэ́н кодолэнгиро, конэ́с замардэ́, замардэ́ куртала́са, конэ́с гарадэ́ дрэ пхув, ту сан сыр вычхурдыно тру́по.

20. Нэ ту явэ́са кхэтанэ́ лэ́нца дрэ маґила (кула), пал-дова́ со ту обчордян пэ́скири пхув, замардян тыро́ народо, николи на пририпирэлапэ лачхипна́са чорэнгиро ро́до.

21. Скэдэ́н лэ́скирэ чхавэ́н пэ мэрибэ́н, пал лэ́нгирэ дадэ́нгиро грэ́хо, соб (кай) ёнэ тэ на ґаздэ́нпэ, тэ на залэн пхув, тэ на биянэн вэргэ́н (врогэн) пэ свэ́то.

22. “Ѓаздавапэ Мэ пэ лэ́ндэ, – пхэнэ́ла Рай Дэвэ́л, болыбна́скирэ-янголэ́нгиро, – Мэ хасякира́ва, Вавилоно́скиро лав, и саро́ ячаибэ́н, и чхавэ́с и лэ́скирэ ўнукос,” – ракирэ́ла Рай Дэвэ́л.

23. “Мэ кэра́ва адя́кэ, соб (кай) тэ явэ́н дой сапа и бла́та, и Мэ вышулавава лэс хасибнытконэ веникаса (шуладяса)”, – ракирэ́ла Рай Дэвэ́л, болыбна́скиро-янголэ́нгиро.

24. Совлахала Рай Дэвэ́л, болыбна́скирэ-янголэ́нгиро: “Сыр Мэ подуминдём, адя́кэ явэ́ла, сыр Мэ пхэндём, адя́кэ кэрэ́лапэ.

25. Соб (кай) Мэ тэ розмарав Асуро пэ Мири́ пхув, тэ ростасавав лэс пэ Мирэ́ бэ́рги; и пэрла лэ́ндыр лэ́скиро ґа́мо, злэлапэ пхарипэ́н лэ́нгирэ псикэндыр.”

26. Дасаво исын припхэныбэ́н пал сари́ пхув, акэ, исын васт, протырдыно кэ сарэ́ народы.

27. Палдова́, со Рай Дэвэ́л, болыбна́скирэ-янголэ́нгиро припхэндя́, и кон сашты́ (могинэ́ла) тэ отпарувэл дава́? Лэ́скиро васт исын протырдыно, тэ кон лэс отрискирэла.”

28. Дро дова́ бэрш, ке́ли мыя́ кра́ли Аха́зо, сыс дасаво лав пророкостыр:

29. “На ра́дынпэ Филистиякири пхув, со пхадёла дэсто́, саво́ тут марэлас, пал-дова́ со сапитконэ родо́стыр выджа́ла сап, а далэ́ сапэстыр – сап, саво́ явэ́ла тэ вурнял.

30. Тэ́ньци чорорэ́ явэ́на чалэ, кон мангэлас ловэ́ – куч задживэна, а тыро́ ро́до Мэ хасякира́ва бокхаса, бокх домарэла тыро́ ячаибэ́н.

31. Ров, по́рта (вра́ты)! Го́дла дэ, фо́ро! Роспэрэсапэ ту, сари́ пхув Филистимиякири, пал-дова́ со тхув джа́ла паш-ратитконэ́ (шылалэ) рига́тыр (северостыр), нико́н на ячэ́лапэ пэ лэ́нгирэ скэдыибэна.

32. Со ж пхэнэ́на одолэ́, савэ́ янэ́на нэвипэна́ ваш народоскэ? – Дова́, со Рай Дэвэ́л кэрдя́ Сио́но зоралэса, одо́й зракхэнапэ чорорэ́ Лэ́скирэ народо́стыр.”

19. Ёнэ кэрдэ́ гуруво́рэс дро Хориво (Харебо) и дынэ́ паты́в далэ́ идолоскэ, со ёнэ выбиладэ,

20. и ёнэ заме́ст дова́, соб (кай) тэ славинэ́н Дэвлэ́с, парудынэ тэ славинэ́н гуруво́рэс, со ха́ла чар.

21. Ёнэ бистырдэ Дэвлэ́с, лэ́нгирэ Зракхибнаскирэс, Саво́ кэрдя́ барэ́ рэ́нды дро Еги́пто,

22. ди́вы пэ Хамоскири пхув, славутна кэ дар ваканцыи (случаи) пашы́л Лоло́ мо́рё (дэрья́в).

23. И Ёв пхэндя́, со Ёв хасякирэлас лэн, тэ на явэ́л Мо́йза, савэ́с Дэвэ́л выкэдыя́, саво́ тэрдия́ муршканэ́с тэ уракирэл Дэвлэ́с, и тэ рискирэ́л лэ́скиро хасякирибэн, соб (кай) Ёв тэ на хасякирэ́л лэн.

6. На сыка́в пэс барэ́ манушэ́са анги́л кралье́ндэ, и на тэрдёв пэ штэ́то, саво́ исын ваш барэ́ манушэ́нгэ;

7. пал-дова́ со исын фэды́р, ке́ли пхэнэ́на ту́кэ: “Яв вучэды́р адари́к,” сыр тут чхувэ́на тэлэды́р анги́л крали́скирэ барыдырэндэ, конэ́с тырэ́ якха́ дыкхнэ́.

1. Ци нэвэ́стыр амэ ява́са тэ шарас пэс, савэ́ амэ сам? Ци амэ́нгэ трэй допхэныбны́тка (рекоменды́тка) лыла́ кэ тумэ́ ци тумэ́ндыр?

2. Тумэ́ сан кокорэ́ сы́рбы амаро́ лыл, зачхиндло́ дро амаро́ ило́, соб (кай) сарэ́ мануша́ тэ уджинэ́н и тэ гинэн дава́ лыл;

3. тумэ́ сыкавэ́на пэс, со тумэ́ сан Христосо́скиро лыл, саво́ амэ бичхадям; дава́ лыл исын чхиндло́ на чэрниласа, а Джидэ́ Дэвлэскирэса Духо́са, и на пэ барунэ́ плиты, а пэ манушы́тка илэ, дрэ савэ́ амэ зоралэ́с патя́са.

4. Амэ зоралэ́с патя́са дрэ Дэвлэ́стэ пир Христосо́стэ:

5. пал-дова́ со амэ кокорэ́ на могиндям тэ думинас дава́ кокорэ́ пэ́стыр, нэ амаро́ тала́но исын Дэвлэ́стыр;

6. Саво́ дыя́ амэ́нгэ тала́но тэ служынас (тэ дынарина́с) роспхэныбна́са Нэвонэ́ Завето́скэ, нэ на маму́й (прямэс), сыр буква ракирэ́ла, а сыр Ду́хо (Фа́но); пал-дова́ со буква Законо́стыр янэ́ла мэрибэ́н, а Ду́хо (Фа́но) дэ́ла джиибэ́н.

7. А ко́ли тэ дынаринэ́н (тэ служынэ́н) буквэ́нгэ, савэ́ сыс вычхиндлэ́ пэ барунэ́ плиты, и савэ́ янэ́нас мэрибэ́н, сыс подынэ адя́кэ Дэвлэ́скирэ слава́са, со Израилёскирэ чхавэ́ на могиндлэ́ тэ дыкхэ́н пэ Израилёскиро муй пал Мойза́скирэ-москири яркима, саво́ джа́лас кэ ко́нцо (кэ яго́ро),

8. то ци пэ бут буты́р явэ́ла сла́ва Духо́скирэ бутя́тыр!

9. Ко́ли тэ дынаринэ́н скэдыибна́скэ сыс славу́тно, тэды дынарибэ́н (служэниё) тэ приджинэл манушэ́н чачунэнца явэ́ла буты́р славу́тно.

10. Пал-дова́ со сла́ва, со исын какана́, барэды́р долэ́ славатыр и палдава́ ёй исын яркэдыр долэ́ славатыр.

11. Пал-дова́ со, ко́ли дова́, со сыс пэ кротко часо, исын дрэ сла́ва, тэды буты́р дрэ сла́ва дова́, со ячэ́лапэ ве́чнэс.

12. Палдава́ амэ ракираса муршканэ́с пал дасаво лачхо́ ужакирибэ́н, со исын амэ́ндэ:

13. амэ на сам дасавэ́ сыр Мо́йза сыс, кон учхакирдя́ пэ́скиро муй, соб (кай) Израилёскирэ чхавэ́ тэ на дыкхэ́н сыр слава́кири я́ркима мурдёлас.

14. Нэ лэ́нгири годы́ штылыя, пал-дова́ со кэ ададывэ́с дова́-паць похтан на злэлапэ, ке́ли ёнэ гинэ́на Пхурано́ Завето, пал-дова́ со екх ману́ш, саво́ патя́ла дрэ Христосо́стэ, могинэ́ла тэ злэл дава́ похтан.

15. Нэ кэ/жы́ко ададывэсатуно дывэ́с, ке́ли ёнэ гинэ́на Мойза́скиро Зако́но, похтан сы́рбы зачхакирэла лэ́нгиро ило́.

16. Нэ ко́ли вари-кон рисёла кэ Рай Дэвэ́л, тэ́ньчи дова́ похтан (учхакирибэн) пэ шэро́ злэлапэ.

17. Рай Дэвэ́л исын Ду́хо (Фа́но). Кай исын Ра́скирэ-Дэвлэ́скиро Ду́хо (Фа́но), одо́й исын вольныма.

18. Нэ амэ сарэ́ откэрдэ муе́нца сы́рбы дро гиндало (зеркало) пиридаса Ра́скирэ-Дэвлэ́скири сла́ва и парудёва́са дрэ Лэ́скири патри́н (о́бразо) екхэ́ слава́тыр дро яви́р пир Ду́хо (Фа́но), Саво́ джа́ла Ра́скирэ-Дэвлэ́скирэ, Духо́стыр.

Romani Bible Baltic 2019

United Bible Societies for the Baltic Romani Mission