Bible in one year - Пэ Балтитко Романи чиб

Bible in one year September 12

1. Ангилпхэныбэ́н пал Моавостэ. – Адя́кэ! Ратя́киро явэ́ла обчордо и хасякирдо Ар-Моа́во; адя́кэ! Ратя́киро-Кир-Моа́во явэ́ла обчордо и хасякирдо!

2. Ёв ґаздэ́лапэ кэ Баито и Дивоно, ґаздэ́лапэ пэ вучэ́ штэ́ты, соб (кай) ёв тэ ровэл; ровэла Моа́во пал Нэво́ и Медева, лэ́ндэ сарэ́ндэ исын обчхиндлэ́ бала́, сарэ́ндэ исын вымурадэ чхора (брода).

3. Пэ вули́цы (га́сы) лэ́нгирэ обпхандэнапэ балытконэ гонэса, пэ лэ́нгирэ барэ́ дрома́ [пэ форуня́-р.с.] и пэ стрэхи сарэ́ ровэна, саро́ исын дрэ ясва.

4. Годлэла Есево́но и Елеала, зан лэ́нгири исын шундлы кэ Иааца, пал лэ́ндэ лынэ́ тэ ровэ́н халадэ́ Моавостыр, ди лэ́скиро ґаздыя́пэ дрэ лэ́стэ.

5. Ровэла миро ило́ пало́ Моа́во; праста́на лэ́стыр кэ Сигоро, кэ три́то Эгла, ґаздэ́напэ пэ Лухито роибнаса; даранэс годлэна пир дром Хоронаимоскиро.

6. Пал-дова́ со пирияця́ тэ тхадэл Нимримоскиро пани́, вышутинэ фэ́лды, выхачия чар, нанэ зэлэныбэн.

7. Пал-дова́ ёнэ исын ячаибэ́н барвалыпнастыр; со зракхнэ́ ёнэ – дова́ пирилыджана палэ рэка (лэнь) Аравиякири.

8. Годлэна пир саро́ Моа́во кэ ме́жы, кэ Эглаимо исын лэ́скиро роибэ́н, кэ Беэр-Элимо исын лэ́скиро роибэ́н.

9. Пал-дова́ со дро пани́ Димоноскиро тхадэ́ла рат, а Мэ лыджа́ва пэ Дивоно ишчо (инкэ́) нэвипэн-шчэрэн (левэн), пэ одолэ́ндэ, кон настя́ Моавостыр и яця́пэ пэ дая́ пхув.

Isaiah 16:1-14

1. Бичхавэн бакрорэ́н ра́скэ, конэ́скири исын дая́ пхув, Селатыр бичхавэн пэ чхучи́ пхув пэ Сионоскирэ-чхакири бэ́рга.

2. Сыр заблудно (заблэндындлы) чириклы, вычхурдыны пэ пхув, явэ́на чхая́ Моавитоскирэ пашы́л броды Арноноскирэ.

3. “Чхув совето (скэдыибэ́н), обдумин, со тэ кэрэ́н, учхакир амэн дывэсэ́, сыр раты́ тырэ́ урибнаса, прилэ́ вытрадынэн, на выдэ бикхэрэскирэн.

4. Мэк тэ дживэ́н на́бут ту́тэ мирэ́ вытрадынэ́ Моавитяни, зра́кх лэн чорэстыр, пал-дова́ со явэ́ла часо, ко́ли на ячэ́ла битангипнаскирэс, пириячэ́ла чорибэн, одолэ́, кон ґаздыя́пэ пэ ту́тэ, хасёна далэ́ пхувья́тыр.”

5. Крали́тко штэ́то явэ́ла зорало́ лачхипна́са, и бэшэ́ла пэ лэ́стэ дро чачипэ́н, дрэ ша́тра Давидоскири, сэнда́ри, саво́ родэ́ла чачипэ́н, кэрэ́ла чачо́ сэ́ндо.

6. Амэ шундя́м пал Моавоскиро пхутькирибэ́н, пал баро́ лэ́скиро пхутькирибэ́н, пал лэ́скирэ шарибэна и холы́, ёв пхэнэ́ла хоханэ́ лава́.

7. Палдава́ заровэла Моа́во пал Моа́во, сарэ́ лэ́на тэ ровэ́н пал кхэра́ Кирхарешэтоскирэ: ёнэ исын сарэ́са пхагирдэ́.

8. Фэлды Есевоноскирэ вышутинэ, адя́кэ исын Севамоскирэ винаградникоса, народэнгирэ раё вычхиндлэ́ лэ́скирэ лачхэ́ кашта́, савэ́ барьёнас кэ Иаезеро, тырдэнаспэ пир чхучи́ пхув лэ́скирэ рандя́ (вэ́тки) буґлёнас, ёнэ пириджанас пало́ мо́рё (дэрья́в).

9. Палдава́ и мэ ява́ва тэ ровав пал кашт Севамоскиро Язероскирэ роибнаса, мэ вычхувава Мирэ́ ясва пэ ту́тэ, Есево́но и Елеала, пал-дова́ со ко́ли скэдэ́на тыро́ винаградо (дракх), сыр скэдэ́на тыро́ маро́, нанэ буты́р ра́дыма.

10. Хасия́ далэ́ лачхэ́ пхувья́тыр сабэн радыма́са, на багана, на радынэ́нпэ дрэ винаградники; на кэрэ́ла винаградари мол (вино) дро пресо: Мэ кэрдём адя́кэ.

11. Палдова́ тангинэла миро ило́ сыр башады (гусли) пал Моа́во, и ило́ Миро – пал Кирхарешэто.

12. И адя́кэ явэ́ла: ке́ли явэ́ла бицяло́, со Моа́во кхинёла пэ вучэ́ штэ́ты, тэ́ньчи ёв явэ́ла пэ свэ́нто штэ́то тэ мангэ́лпэ Дэвлэ́скэ, нэ лэ́стэ нисо́ на выджа́ла.

13. Акэ, исын лав, со пхэндя́ Рай Дэвэ́л пал Моа́во ишчо (инкэ́) дрэ ґаратунэ́ долэ́ дывэса́:

14. Нэ акана́, акэ, со Рай Дэвэ́л пхэндя́: “Пир далэ́ трин бэрша́ сы́рбы бутярнэстэ, конэ́с лынэ́ пэ буты́, бут мануша́ явэ́на тэ дыкхэ́н вучипна́са пэ сла́ва Моавоскири, и на́бут бизорья́кирэ мануша́ ячэ́напэ.”

Psalms 106:24-31

24. Нэ ёнэ на прилынэ́ барвалы пхув, ёнэ на патяндынэ́ Дэвлэ́скирэ лавэ́скэ,

25. а ёнэ зэмбиндлэ холямэс дрэ пэ́скирэ ша́тры; ёнэ на шундлэ́ Ра́скирэ-Дэвлэ́скири зан.

26. И Ёв ґаздыя́ Лэ́скиро васт пэ лэ́ндэ, сыр совла́х, со Ёв пэкавэла лэн пэ чхучэ́ прахи,

27. и со Ёв росчхувэла лэ́нгиро ро́до машки́р Наюды́тка на́цыи, и со Ёв росчхурдэла лэн машки́р тхэма (страны).

28. И ёнэ адя́кэ-паць скэдынэ́пэ кхэтанэ́ пашы́л Фегоро тэ дэн паты́в Ваалоскэ, ёнэ ханэ́ свэ́нта яныбэна́ (жэртвы), со кэрдэ́ мулэ́ идолэ́нгэ,

29. ёнэ прэзэнтындлэ Лэс одолэса, со ёнэ кэрдэ́, и фра́нсы пынэ́ пэ лэ́ндэ.

30. Тэ́ньци уштыя́ Пинэхасо и сэндякирдя одолэ́н, кон сыс банго́, и фра́нсы пириячнэ.

31. И адалэ́ мануша́ загиндлэ лэ́скэ, со ёв кэрдя́ пир чачипэ́н и сарэ́ ро́ды явэ́на ўса́ды (сак) тэ рипирэ́н дава́.

Proverbs 25:8-10

8. На джа́ сы́гэс пэ сэ́ндо, пал-дова́ со ту на джинэ́са, со явэ́ла дро ко́нцо (дро яго́ро), ке́ли тыро́ пашатуно ладжакирэла тут.

9. Пириракир тыро́ рэ́ндо тырэ́ пашатунэса кокорэса, и на выпхэн чораханыбэн явирэскэ,

10. соб (кай) одова́, кон шунэ́ла лэс, тэ на сыкавэ́л сарэ́нгэ тыри́ ладж, и мавлы́н (малва) пал ту́тэ тэ на явэ́л бэдытко (налачхи).

2 Korinťanenge 4:1-18

1. Ко́ли Дэвэ́л сыкадя́ Пэ́скиро лачхипэ́н кэ амэ и дыя́ дасави́ буты́ амэ́нгэ, тэды амэ на пэраса илэ́са.

2. Нэ амэ дурьёваса ґарадэ́ ладжаипнытконэ рэндэ́ндыр, амэ на мэндринаса, на пирикэраса Дэвлэ́скиро лав, а амэ ракираса чачипэ́н и сыкаваса пэс, сыр амэ сам, пэ манушы́тка якха́ анги́л Дэвлэ́стэ.

3. А ко́ли амари́ Ева́нгелия исын гарады, тэды ёй исын ґарады ваш одолэ́нгэ, савэ́ исын хасибны́тка,

4. пал-дова́ со лэ́ндэ, напатяибнаскирэндэ, дава́ свэтоскиро хохано́ дэвлоро штылякирдя лэ́нгири годы́, соб (кай) ёнэ тэ на дыкхэ́н дуд (свэ́то) и тэ на ґалён роспхэныбэн пал бахталы́ зан (звесь) пал Христососкири ярко сла́ва, а Христо́со исын Дэвлэ́скири патри́н (о́бразо).

5. Пал-дова́ со амэ на роспхэнаса пал пэ́стэ, а пал Христосо́стэ, амарэ́ Растэ-Дэвлэ́стэ, и амэ сам Христосо́скирэ писха́рья.

6. Адава́ исын Дэвэ́л, Саво́ пхэндя́: “Тэ зяинэл дуд (свэ́то) цямлыпнастыр”, исын дова́-паць Дэвэ́л, Кон зачхудя дава́ дуд тэ зяинэл дро амаро́ ило́, соб (кай) амэ тэ ґалёвас Дэвлэ́скири ярко сла́ва, сави́ зяинэла Исусо́стыр Христосостыр.

7. А дава́ кучипэ́н амэ рикираса дрэ ґлэя́на (глины́тка) пирья, соб (кай) тэ сыкавас зорьякиро барипэ́н, саво́ исын Дэвлэ́стыр, а на амэ́ндыр:

8. амэн тасавэна сарэ́ ригэ́ндыр, нэ амэ́нгэ нанэ цясно (танго); амэ кунинасапэ, нэ амэ на пэраса Духо́са;

9. амэн традэ́на, нэ амэ на сам бистырдэ; амэн вычхурдэна яври́, нэ амэ на хасёваса.

10. Амэ дрэ маса́ ўса́ды (сак) лыджа́са Христосо́скиро мэрибэ́н дрэ пэ́стэ, сыр Ису́со мыя́ ваш дова́, соб (кай) тэ явэ́л бицяло́ Исусо́скиро джиибэ́н пир ду́хо (фа́но) дрэ амэ́ндэ.

11. Амэн джидэн ўса́ды (сак) здэна пэ мэрибэ́н пал Христосо́стэ, соб (кай) тэ сыкадёл Христосо́скиро джиибэ́н пир амари́ лоч (плоть), сави́ мэрэ́ла.

12. Мэрибэ́н, чачэс, кэрэ́ла буты́ дрэ тумэ́ндэ, а джиибэ́н дрэ амэ́ндэ.

13. Нэ амэ́ндэ исын дасаво-паць патяибнаскиро ду́хо (фа́но), сыр исын чхиндло́: “Мэ упатяндыём, палдава́ мэ ракирдём” и амэ адя́кэ патя́са, палдава́ амэ адя́кэ-паць и ракираса,

14. и амэ джина́са, со Одова́, Кон отджидякирдя́ Рас-Дэвлэ́с, Исусо́с Христосо́с, адя́кэ-паць отджидякирэла и амэн пир Исусо́стэ Христосо́стэ и чхувэ́ла амэн тумэ́нца кхэтанэ́ анги́л Пэ́стэ.

15. Пал-дова́ со саро́ дава́ исын ваш тумаро́ лачхипэ́н ваш дова́, соб (кай) Дэвлэ́скиро бахталыпэ́н, саво́ доджа́ла кэ бут-бут манушы́тка илэ, тэ янэл парикирибэн ваш Дэвлэ́скири сла́ва.

16. Палдава́ амэ ние́кхвар на пэраса дро ило́. Нэ хоць амарэ́ маса́ яврестыр хасякирэна зор, то амарэ́-Духоскири андратуны́ паш со дывэ́с зоралёла.

17. Пал-дова́ со амарэ́ кро́тка и локхэ́ пиридживибэна янэ́на бут-бут барэды́р ве́чно сла́ва,

18. и амэ думинаса на пал дова́, со исын бицяло́, а пал дова́, со нанэ бицяло́; пал-дова́ со саро́ бицяло́ исын пэ наборо (кротко) часо, а набицяло исын ве́чно.

Romani Bible Baltic 2019

Maintained by the United Bible Societies for the Baltic Romani Mission