Bible in one year - Пэ Балтитко Романи чиб

Bible in one year September 14

1. Ангилпхэныбэ́н пал Еги́пто. – Акэ, Рай Дэвэ́л исын бэшто́ пэ болыбэ́н и явэ́ла дро Еги́пто. И издрана Лэ́скирэ мо́стыр и́долы Египто́скирэ, и ило́ Египто́скиро биладёла (ростаинэла) дрэ лэ́стэ.

2. “Мэ ґазда́ва Египтянэн пэ Египтянэндэ, явэ́на тэ марэ́нпэ пшал пшалэса, мал малэса, фо́ро фороса, кралипэ́н кралипнаса.

3. И ду́хо (фа́но) Египто́скиро хасёла, Мэ розмарава лэ́скиро годыпэ́н (совето) и праста́на ёнэ кэ и́долы, кэ мануша́, савэ́ исын човаханэ (маги), савэ́ выкхарэна мулэн, савэ́ зумавэна.

4. И отда́ва Мэ Египтянэн дрэ захалэ крали́скирэ васта́; захало кра́ли явэ́ла хула́й лэ́нгиро”, – ракирэ́ла Рай Дэвэ́л, Рай Дэвэ́л, болыбна́скиро-янголэ́нгиро.

5. И вышутёла пани́ дро мо́рё (дэрья́в), и рэка (лэнь) пириячэ́ла тэ тхадэл и вышутёла.

6. И зашутёна рэ́ки (лэня́), и дрэ каналы Египто́скирэ, кай пани́ тхадэлас саро́ вышутёла; зашутёна сил (камышо) и тришчына (троснико).

7. Фэ́лда пашы́л рэка (лэнь), пиро́ брэги пашы́л рэка (лэнь) и саро́, со пашы́л рэка (лэнь) барьёлас, зашутёла, роспхурдэлапэ и хасёла.

8. И заровэна мачхибнарья, заровэна одолэ́, кон зачхурдэлас вэндка дрэ рэка (лэнь) и одолэ́, кон чхувэлас кхудя (сетки) дро пани́, пэрэ́на пэ́скирэ деса.

9. И явэ́на тэ ладжан одолэ́, кон барьякирэ́ла чар, савья́тыр сывэна и одолэ́, кон кэрэ́ла (кхувэла) парнэ́ похтана.

10. И явэ́на роскушнэ кхудя и сарэ́, конэ́стэ исын мирежы тэ ухтылэ́н джидэ́ мачхэн, пэрэ́на дро ду́хо (фа́но) [р.с.]

11. Адя́кэ! Згинэ годятыр тхага́рья (кня́зи) Цоаноскирэ; годыпэ́н (совето) годьварэ́ манушэ́нгиро, савэ́ подпхэнэнас Фараоно́скэ, яця́ дылыно́. Сыр тумэ́ пхэнэ́на Фараоно́скэ: “Мэ сом чхаво́ годьварэ́-манушэ́нгиро, ґаратунэ́-кральенгиро чхаво́.”

12. Кай исын ёнэ? Кай исын тырэ́ годьварэ́ мануша́? Мэк ёнэ тэ пхэнэ́н ту́кэ акана́; мэк тэ ґалён, со Рай Дэвэ́л, болыбна́скирэ-янголэ́нгиро, припхэндя́ пал Еги́пто.

13. Згинэ годятыр тхага́рья (кня́зи) Цоаноскирэ, хохадэ исын тхага́рья (кня́зи) Мемфисостыр, домардэ́ шэралэ́ манушэ́с пэ кхэри́тка ро́ды Египто́скирэ дромэ́стыр.

14. Рай Дэвэ́л бичхадя́ дрэ лэ́стэ ду́хо (фа́но) матыбнаскиро; ёнэ хохадэ Еги́пто дрэ сарэ́ лэ́скирэ рэ́нды, адя́кэ, сыр мато псирэ́ла пир бла́та, савья́са ёв чхадыя.

15. И на явэ́ла дрэ Еги́пто дасави́ буты́, сави́ б кэрэ́нас шэро́ и пори, пальма и дэсто́.

16. Дро дова́ дывэ́с ячэ́на Египтя́ни сыр джувля́, издрана и явэ́на тэ дарэ́н (даран) Ра́скирэ-Дэвлэ́скирэ, болыбна́скирэ-янголэ́нгирэ вастэ́стыр, саво́ Ёв ґаздэ́ла пэ лэ́ндэ.

17. Пхув Юдаскири явэ́ла дара́са ваш Еги́пто; кон пририпирэла пал ла́тэ, одова́ издрала Ра́стыр-Дэвлэ́стыр, Лэ́скирэ припхэныбнастыр, саво́ Рай Дэвэ́л отдыя́ пал Еги́пто.

18. Дро дова́ дывэ́с пандж фо́рья пэ пхув Египто́скиро явэ́на тэ ракирэ́н Ханаанытконэ чиба́са и тэ совлахан Ра́са-Дэвлэ́са, болыбна́скирэ-янголэнгирэса; екх лэ́ндыр кхарлапэ кхамитконэ фороса.

19. Дро дова́ дывэ́с штэ́то, кай янэ́на дыибэна́ Ра́скэ-Дэвлэ́скэ явэ́ла машки́р пхув Египто́скири и рипирибнытко штэ́то пал Растэ-Дэвлэ́стэ – пашы́л пхувья́кирэ рига́.

20. Ёв явэ́ла сыр ґерты́к (знаме́ниё) и сыр досыкаибэн пал Растэ-Дэвлэ́стэ, янголэ́нгирэ-болыбнаскирэстэ, пэ пхув Египто́скири; пал-дова́ со ёнэ прикхарэна Рас-Дэвлэ́с, ко́ли явэ́на вэ́рги, и Ёв бичхавэ́ла лэ́нгэ зракхибнарис и затэрдыпнаскирэс (застэмпникос) и зракхэ́ла лэн.

21. И Рай Дэвэ́л сыкавэ́ла Пэс дро Еги́пто: и Египтя́ни дро дова́ дывэ́с уджинэна Рас-Дэвлэ́с, и янэ́на свэ́нта дыибэна́ и дэ́на лав (совла́х) Ра́скэ-Дэвлэ́скэ и сполнинэна.

22. И лэ́лапэ Рай Дэвэ́л пал Еги́пто мэрибнытконэ дукхаса, лэ́лапэ и высастякирэла; ёнэ обрисёна кэ Рай Дэвэ́л и Ёв шунэ́ла лэн и высастякирэла.

23. Дро дова́ дывэ́с явэ́ла баро́ дром Египто́стыр кэ Асирия; и заджа́ла Асуро дро Еги́пто, а Египтя́ни дрэ Асирия, и Египтя́ни кхэтанэ́ Асириянэнца явэ́на тэ дынаринэ́н Ра́скэ-Дэвлэ́скэ.

24. Дро дова́ дывэ́с Израилё явэ́ла тритонэ Египтоса и Асирияса; бахтякирибэ́н явэ́ла машки́р пхув,

Isaiah 20:1-6

1. Дро дова́ бэрш, ко́ли Тартано явдя́ кэ Азото, а лэс бичхадя́ Саргоно, кра́ли Асирия́киро, ёв и марэласпэ Азотоса и лыя́ лэс.

2. Дро дова́ дывэ́с пхэндя́ Рай Дэвэ́л Исаёскэ, Амосо́скирэ чхавэ́скэ: “Джа́, злэ тыро́ урибэ́н, злэ тривики тырэ́ ґэрэндыр.” Ёв кэрдя́ адя́кэ; псирдя́ нанго и пиранго.

3. И пхэндя́ Рай Дэвэ́л: “Сыр Миро писха́ри (рабо) Исаё псирэлас нанго и пиранго трин бэрш, соб (кай) тэ сыкавэ́л и тэ дэл ангилпхэныбэ́н пал Еги́пто и Эфиопия,

4. адя́кэ лыджа́ла Асирия́киро кра́ли заухтылдэ манушэ́н пленонэн Египто́стыр, манушэ́н, савэ́ пиритрадынэ Ефиопиятыр; лыджа́ла тэрнэн и пхурэн, ёнэ джа́на нангэ и пирангэ, соб (кай) тэ ладжакирэн Еги́пто.

5. Тэ́ньци явэ́на тэ дарэ́н и тэ ладжан Ефиопиятыр, пэ́скирэ надеятыр, и Египто́стыр, савэ́са ёнэ шарэнаспэ.

6. И пхэнэ́на дро дова́ дывэ́с мануша́, савэ́ одо́й дживэ́нас: “Акэ, савэ́ исын одолэ́, пэ конэ́стэ исыс амари́ наде́я, кэ кон прастандыям пал подрикирибэ́н, соб (кай) тэ зракхаспэ Асирия́кирэ крали́стыр! И сы́рбы амэ зракхасапэ?”

Psalms 106:40-48

40. Палдава́ Ра́скирэ-Дэвлэ́скири холы́ росхачия пэ Лэ́скирэ манушэ́ндэ и ёнэ ячнэ́ джунгалэ́ (збрыдиндлэ) Лэ́скэ, сыр лэ́скиро мэкно́ миштыпэ́н.

41. И Ёв отдыя́ лэн дрэ Наюдэнгирэ-нацыенгирэ васта́, и одолэ́, савэ́ зоралэ́с на вырикирдэ лэн, рикирдэ зор пэ лэ́ндэ:

42. и лэ́нгирэ вэ́рги притасавэнас лэн и ёнэ пэ́скирэ вастэ́нца чхувэ́нас ґа́мо пэ лэ́ндэ.

43. Бут мо́лы Ёв выракхэлас лэн; нэ ёнэ бунтуинэнас проти Лэ́стэ дрэ пэ́скирэ ду́мы, и ёнэ пэрэнас тэлэ́ пал пэ́скиро фуипэ́н.

44. И Дэвэ́л прилыя́ дро ило́, со притасадэ Лэ́скирэ манушэ́н, ке́ли Ёв шундя́, со ёнэ ровэна годла́са;

45. и Ёв пририпирдя Пэ́скиро Завето, со Ёв дыя́ лэ́нгэ, и Ёв потангиндя лэн Лэ́скирэ барэ́ лачхэ́-илыткиматыр;

46. И Ёв кэрдя́ адя́кэ, со одолэ́, савэ́ притасавэнас лэн, лынэ́ тэ тангинэн лэн.

47. Зра́кх амэн, о Раё Дэ́вла, амаро́ Дэвэ́л и скэ́дэ амэн кхэтанэ́ сарэ́ Наюдэнгирэ нацые́ндыр, соб (кай) тэ парикирас и тэ вышарас зоралэ́с Тыро́ свэ́нто лав,

48. мэк саро́ тэ парикирэл и тэ вышарэл Рас-Дэвлэ́с, Израилёскирэ Дэвлэ́с, дрэ сарэ́ ве́ки и мэк сарэ́ мануша́ тэ пхэнэ́н: “Ами́нь! Аллилуя.”

Proverbs 25:13-13

13. Сыр шылыпэн ивэса дро часо (цы́ро), ке́ли укэдэна гив, исын адя́кэ-паць патяибнаскиро бичхадо́ ману́ш ваш одолэ́нгэ, савэ́ бичхадэ́ лэс; пал-дова́ со ёв сы́рбы панякирэла ди пэ́скирэ ра́скиро.

2 Korinťanenge 6:1-18

1. Сыр амэ кэра́са буты́ кхэтанэ́ Дэвлэ́са, амэ манга́са тумэн тэ на бистрэн пал Дэвлэ́скиро бахталыпэ́н, со тумэ́ прилынэ́ лэс на ивья́ (на напра́снэс):

2. и, ґа́да, Дэвэ́л ракирэ́ла: “Ке́ли лачхо́ часо явдя́, мэ шундём тумэн: и ке́ли явдя́ дывэ́с тэ зракхав тумэн, Мэ дыём васт (помогиндём) ту́кэ.” Ѓа́да, исын лачхо́ мардо́ (шту́нда); ґа́да, исын дывэ́с тэ зракхэспэ:

3. амэ на чхуваса бар пэ дром ниекхэ́скэ, соб (кай) нико́н тэ на бангякирэл амари́ буты́;

4. нэ дро саро́ амэ сыкаваса пэс сыр Дэвлэ́скирэ бутярнэ́: зорало́ вырикирибэн дро пиридживибэн, дрэ трэ́бима, дро пхарипэ́н;

5. ке́ли марэна амэн чупняса, чхувэ́на дро штарибэ́н, ґаздэ́на манушэ́н пэ амэ́ндэ, ке́ли кэра́са буты́ пхарэ́с, би соибнаскиро, бокхалэ́;

6. дро жужыпэн, дро джиныбэ́н, дро длэнго вырикирибэн, дро лачхипэ́н пир Свэ́нто Ду́хо (Фа́но), пир чачуны́ пшалы́тко паты́в;

7. пир чачипна́скиро лав, Дэвлэ́скирэ зорья́са, чачипна́скирэ мардытконэ́са дро чачо́ и дро зэ́рво (ле́во) васт;

8. слава́са и ладжакирибнаса, пир на́лачхо лав и шарибэ́н; амэн гинэ́на пал хоханэ́ манушэ́ндэ, нэ амэ ракираса чачипэ́н;

9. амэ сам сы́рбы наджиндлэ и сам джиндлэ́ сарэ́нгэ, сы́рбы мануша́ кэ мэрибэ́н, нэ ґа́да, амэ сам джидэ́; чхувэ́на хась (ка́ра) пэ амэ́ндэ, на ишчо (инкэ́) на мулякирдэ́;

10. амэ сам сы́рбы смэнтна (скучна), нэ амэ ўса́ды (сак) радынасапэ; амэ сам сы́рбы бо́ги, нэ амэ кэра́са бут манушэ́н барвалэнца; амэ́ндэ нанэ ничы́, нэ адя́кэ-паць амэ́ндэ сы́рбы саро́ исын.

11. Амарэ́ ушта́ ракирэ́на чачипэ́н тумэ́нгэ. Коринфиня́лэ, амаро́ ило́ исын откэрдо.

12. Амарэ́ рига́тыр амэ сам сарэ́ илэ́стыр кэ тумэ́, а тумэ́ сы́рбы запхандлэ пэ́скиро ило́ амэ́ндыр,

13. нэ отлыджанпэ адя́кэ-паць кэ амэ (мэ да́ва ракира́ва сыр чхавэ́нгэ): отпхандэн пэ́скиро ило́ буґлэс, сыр и амэ.

14. На кэрэ́н буты́ кхэтанэ́ напатяибнаскирэнца; пал-дова́ со саво́ исын кхэтаныпэн машки́р чачипэ́н и грэ́хо? Со исын кхэтанэ́ машки́р дуд (свэ́то) и калыпэ́н?

15. И саво́ доракирибэ́н исын машки́р Христосо́стэ и Велиаро́стэ? Ци саво́ кхэтаныпэн исын машки́р патяибнаскирэстэ и напатяибнаскирэстэ?

16. Саво́ кхэтаныпэн исын машки́р Дэвлэ́скири кхангири́ и идолэ́нгирэ – мангипны́тко кхэр? Пал-дова́ со тумэ́ сан кхангири́ джидэ́ Дэвлэ́скири, сыр Дэвэ́л Кокоро́ пхэндя́: “Мэ ява́ва тэ джива́в машки́р лэ́ндэ и Мэ ява́ва тэ псирав машки́р лэ́ндэ. И Мэ ява́ва лэ́нгиро Дэвэ́л, и ёнэ явэ́на Мирэ́ мануша́.”

17. “Палдава́ мэкэ́н адалэ́ манушэ́н и явэ́н дрэ риг, – ракирэ́ла Рай Дэвэ́л, – и тэ на явэ́л тумэ́ндэ ничы́ кхэтанэ́ нажужэса, и Мэ прилава тумэн;

18. и Мэ ява́ва ваш тумэ́нгэ и тумэ́ явэ́на мирэ́ чхавэ́ и чхая́, – ракирэ́ла Рай Дэвэ́л Сарэзорья́киро.”

Romani Bible Baltic 2019

Maintained by the United Bible Societies for the Baltic Romani Mission