Beblia

1. Ангилпхэныбэ́н пал шуки́ пхув пашы́л мо́рё (дэрья́в), пал Вавило́но. – Сыр зоралэ́ балваля вурняна пэ паш-дывэ́с (юго), адя́кэ джа́ла ёв шукэ́ пхувья́тыр, даранэ и чхучэ́ пхувья́тыр.

2. Дарано дыкхибэ́н сыкадэ ма́нгэ: о чор чорэла, о прахари отлэла; заджа́, Еламо, ґаздэпэ, Мидо, сарэ́ ясва мэ залава.

3. Далэ́стыр издрана мирэ́, Исаёскирэ, маса́ пэ трушу́л; мэ мэнчынавапэ, сыр джувлы́, ко́ли ёй биянэ́ла, мэ на латхава штэ́то долэ́стыр, со мэ шунава; мэ пиридживава долэ́стыр, со мэ дыкха́ва.

4. Издрала миро ило́; марэла ман издраны; мири́ лачхи́ рат яця́ ваш ма́нгэ дара́са.

5. Кэрэ́на сками́нд, росчхувэна похтана, ха́на, пьена. Уштэ́н, раёлэ-тхага́рья, выджа́н по марибэ́н!

6. Адя́кэ пхэндя́ ма́нгэ Рай Дэвэ́л: “Джа́, чхув ракхибнарис, мэк ёв тэ роспхэнэл, со ёв дыкхэ́ла.”

7. Ёв дыкхця́, со традэ́на уклистэ́ мануша́ пэ грэ́ндэ, мануша́ пэ ослэндэ, мануша́ пэ верблюдэндэ, традэ́на пиро́ дуй, и зоралэ́с ёв пришунэласпэ.

8. И загодлыя сыр шчэр (ле́во): “Раё миро! Мэ ракхавас саро́ дывэ́с, и ратенца пэ миро штэ́то мэ ячаваспэ.

9. Акэ, традэ́на мануша́, традэ́на уклистэ́ пэ грэ́ндэ, пир дуе манушэ́ндэ.” Тэ́ньци ёв загодлыя и пхэндя́: ‘Пыя́, пыя́ Вавило́но, и сарэ́ лэ́скирэ и́долы, сарэ́ дэвлорэ́ исын паштэ́ пэ пхув розмардэ.’”

10. О, домардо миро, чхаво́ мирэ́ фэлдатыр! Со шундём Ра́стыр-Дэвлэ́стыр, болыбна́скирэ-янголэнгирэстыр, Израилёскирэ Дэвлэ́стыр, дова́ и пхэндём мэ тумэ́нгэ.

11. Ангилпхэныбэ́н пал Дума. – Годлэна ма́нгэ, Сеиростыр: “Ракхибнари! Кицы́ часо ратятыр яця́пэ? Ракхибнари! Кицы́ часо ратятыр яця́пэ?”

12. Пхэнэ́ла ракхибнари: “Сыг явэ́ла зло́ко (ра́нко), нэ ишчо (инкэ́) исын рат, ко́ли тумэ́ адя́кэ домарэнпэ тэ пхучэнпэ, тэ́ньчи обрисён и явэ́н.”

13. Ангилпхэныбэ́н пал Аравия. – Ратькирэн дро вэш Аравиякиро, караваны Деданостыр!

14. Мануша́лэ Фемаскирнэ пхувья́тыр! Лыджа́н пани́ одолэ́нгэ, кон исын дрэ смэга (трушало), выджа́н марэ́са кэ одолэ́, кон прастала.

15. Пал-дова́, со ёнэ куртала́тыр нашэ́на, куртала́тыр и лукостыр и захалэ марибнастыр.

16. Адя́кэ пхэндя́ ма́нгэ Рай-Дэвэ́л: “Ишчо (инкэ́) бэрш дасаво, сыр бэрш бутяристэ (бутярнэстэ), саво́ кэрэ́ла буты́ пал ловэ́, и саро́ барипэ́н Кидароскиро хасёла.

1. Ангилпхэныбэ́н пал до́ло [фэ́лда-ю.о.], кай сыс дыкхибэ́н. – Со ту́са, фо́ро, со ту саро́ ґаздыянпэ пэ стрэ́ха (чхаки́н) [кхэр-р.с.]?

2. Фо́ро, саво́ шуминэла, саво́ годлэла, саво́ радынэ́лапэ. Тырэ́ мулэн на курта́ла домардя́, на пэ марибэ́н ёнэ мынэ́.

3. Сарэ́ тырэ́ пхурыдыра́ прастанас кхэтанэ́, нэ халадэ́ лэн спхандлэ; сарэ́, кон ту́тэ латхяпэ, пхандлэ кхэтанэ́, сы́рбы дур ёнэ на прастанас.

4. Палдава́ Мэ, Исаё, ракира́ва: ‘Ячкирэн ман, мэ ла́ва тэ ровав киркэ ясвэ́нца, на подрикирэн ман, ко́ли обчхорды исын чхай мирэ́-народоскири.’

5. Палдава́, со исын дывэ́с, ко́ли на джинэ́на, со тэ кэрэ́н, ко́ли пхагирэна саро́ и ґаздэ́лапэ го́дла пэ до́ло дыкхибнаскиро Ра́стыр-Дэвлэ́стыр. Пхагирэна ва́нта, и ґаздэ́лапэ го́дла пэ бэ́рги.

6. И Еламо лыджа́ла курта́ла. Мануша́ исын бэштэ́ пэ вурдэна́ и Киро дорэсэ́ла шчы́то.

7. Акэ, тырэ́ лачхэ́ фэ́лды исын пхэрдэ́ вурдэнэнца; мануша́, савэ́ исын бэштэ́ уклистэ́, скэдынэ́пэ паш вудара́.

8. И лэ́на криг Юдэя́тыр учхакирибэн; и ту дро дова́ дывэ́с дыкхэ́са, со исын дро кхэр кедростыр (мардярня) дова́, со́са выджа́на пэ марибэ́н.

9. Нэ тумэ́ дыкхэ́на, со бут мо́лы исын роспхагирды ва́нта дро фо́ро Давидо́скиро и тумэ́ скэдэ́на пани́ дрэ тэлатуны вэндэри́н (прудо).

10. И тумэ́ придыкхэна тэ рипирэ́н (лэ́на пэ якх) кхэра́ дро Ерусалимо, и спхагирэна тэлэ́ кхэра́, соб (кай) тэ зорьякирэн ва́нта;

11. и кэрэ́на машки́р дуй ва́нты вэндэри́н [рово (хохо́й)-ю.о.], соб (кай) тэ ракхэ́н пани́ пхуранэ́ вэндэриня́тыр. А пэ Одолэ́стэ, Кон кэрэ́ла дава́, тумэ́ на явэ́на тэ дыкхэ́н; и тумэ́ на дыкхэ́на пэ Одолэ́стэ, Кон ґара́ припхэндя́, соб (кай) адя́кэ тэ явэ́л.

12. И Рай Дэвэ́л, Рай Дэвэ́л, болыбна́скирэ-янголэ́нгиро, кхарэ́ла кэ Пэ тумэн, соб (кай) тумэ́ тэ ровэ́н, тэ годлэн дро дава́ дывэ́с, соб (кай) тумэ́ тэ обчхинэн бала́, соб (кай) тэ обпхандэнпэ гонэса праскаса, саво́ урьена дрэ биба́хт.

13. Нэ, акэ, исын ра́дыма (лош) и сабэн! Замарэ́н гурувэ́н, чхинэн бакрэ́н, хан мас и пьен мол (вино): “Ла́са тэ хас и тэ пьяс, пал-дова́, со атася́ мэраса!”

14. И откэрдя кэ мирэ́ кана́ Рай Дэвэ́л, болыбна́скирэ-янголэ́нгиро: “На отмэкэлапэ тумэ́нгэ дава́ грэ́хо, пака тумэ́ на мэрэ́на”, – пхэндя́ Рай Дэвэ́л, болыбна́скирэ-янголэ́нгиро.

15. Адя́кэ пхэндя́ Рай Дэвэ́л, Рай Дэвэ́л, болыбна́скирэ-янголэ́нгиро: “Джа́, заджа́ кэ адава́ крали́скиро дына́ри, кэ Севна, саво́ исын пхурыдыро пэ крали́скиро кхэр и пхэн лэ́скэ:

16. Со ту́тэ исын ада́й, кон ту́тэ исын ада́й, со́скэ ту кэрэ́са ада́й копли́ца ваш пэ́скэ? Ёв кэрэ́ла пэ́скэ копли́ца по вучо́ штэ́то, пэ бэ́рга кэрэ́ла пэ́скэ кхэр.

17. Акэ, Рай Дэвэ́л чхурдэ́ла тут, сыр зорало́ ману́ш чхурдэ́ла, притасавэла тут.

18. Ёв скрэнцынэла тут, чхурдэ́ла тут пэ буґлы пхув и одо́й ту мэрэ́са, одо́й тырэ́ лачхэ́ марибны́тка вурдэна́ ладжакирэна кхэр, тырэ́-хуласкиро.

19. И чхурдава тэлэ́ Мэ тут тырэ́ штэто́стыр, и ту пэрэса пэ́скирэ пхутькирибнастыр.

20. И явэ́ла дро кодова́ дывэ́с: Мэ кхара́ва Мирэ́ дынари́с Елиакимос, Хелкииноскирэ чхавэ́с.

21. Урьявава лэс дро тыро́ урибэ́н, обпхандава Мэ лэс тырэ́ кустыкаса, зор тыри́ отда́ва дрэ лэ́скирэ васта́; ёв дадэ́са явэ́ла ваш манушэ́нгэ дро Ерусалимо и ваш кхэр Юда́скиро.

22. И клыдын Давидо́скирэ кхэрэ́стыр Мэ чхува́ва дрэ лэ́скирэ васта́: ёв откэрэла (псиравэла) и нико́н на закэрэла (на пхандэла); ёв закэрэла и нико́н на откэрла (псиравэла).

23. Мэ кэра́ва лэс зоралэса, сыр гвоздё (карфин) дро наковло (твардо) штэ́то; явэ́ла ёв ваш пэ́скирэ-дадэ́скиро кхэр сыр хулаитко пиралы́ (кладовая).

24. Явэ́ла тэ ублавэлпэ лэ́стэ саро́ барипэ́н кхэрэ́стыр, лэ́скирэ-дадэ́скиро; саро́ кхэри́тко хулаибэн, кэ сарэ́ палатунэ́ (последня) башадя.

25. “Дро дова́ дывэ́с,” – ракирэ́ла Рай Дэвэ́л, болыбна́скирэ-янголэ́нгиро, – “кунинэлапэ гвоздё (карфин), примардо пэ наковло (твардо) штэ́то, и явэ́ла вымардо, и пэрэ́ла, и пэрэ́ла саро́ пхарипэ́н, со исын пэ лэ́стэ”, пал-дова́, со адя́кэ ракирэ́ла Рай Дэвэ́л.

1. Парикирэ́н Ра́скэ-Дэвлэ́скэ, пал-дова́ со Ёв исын лачхо́ и Лэ́скири лачхэ́-илы́ткима ячэ́лапэ пэ сарэ́ ве́ки.

2. Мэк сарэ́, конэ́с выракхця Рай Дэвэ́л, тэ пхэнэ́н адя́кэ, конэ́с Ёв выракхця вэргоскирэ вастэ́стыр,

3. и скэдыя́ кхэтанэ́ Ёв пхувьендыр: чачэ́ рига́тыр (вастоко́стыр) и зэрвонэ́ / пал-панитконэ́ (западо́стыр), паш-ратитконэ́ (севернонэ) рига́тыр и паш-дывэсытконэ́ (южнонэ) рига́тыр.

4. Ёнэ псирдэ́ пир чхучэ́ прахи (пустыни) пир чхучо́ дром, ёнэ на ракхнэ фо́ро, кай тэ дживэ́н мануша́,

5. ёнэ сыс бокхалэ́ и трушалэ (жаждындлэ), лэ́нгиро ди замыя́;

6. ёнэ рондлэ́ годла́са анги́л Растэ-Дэвлэ́стэ дро пхарипэ́н и Ёв выракхця лэн барэ́ дара́тыр,

7. и Ёв лыджия́ лэн лачхэ́ дромэ́са тэ доджан кэ фо́ро, соб (кай) тэ дживэ́н одо́й.

8. Мэк сарэ́ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима и сарэ́ Лэ́скирэ ди́вна бутя́ манушэ́нгирэ чхавэ́нгэ,

9. пал-дова́ со Ёв дыя́ чалэ́с одолэнгирэ диенгэ, кон сыс трушало (смэгитко) и пхэрдякирдя́ бокхало ди лачхипна́са.

14. Сыр о́блоки и балва́л исын бибрышындэскирэ, адя́кэ-паць исын одова́, саво́ шарэлапэ, со ёв дэ́ла хохано́ да́ро.

15. Кон длу́гэс (ґара́) вырикирэ́ла, одова́ сашты́ тэ патякирэл барыдырэ́с, и ковлы чиб пхагирэ́ла кокалы́.

16. Ци латхян (ластян) ту авги́н (мэда)? На ада́кицы, кицы́ ту́кэ трэй, соб (кай) ту тэ на пирихас, и тэ на чхадэс.

1. Павли́стыр, Исусо́скирэ Христосо́скирэ Апостоло́стыр пир Дэвлэ́скири во́ля, и Хима́стыр (Тимофеёстыр), пшалэ́стыр, Дэвлэ́скирэ кхангирья́кэ, со исын дро Коринфо, сарэ́ свэнтонэ́нца пир сари́ Ахая.

2. Мэк Дэвэ́л Дад амаро́ и Рай Дэвэ́л Ису́со Христо́со тэ дэн тумэ́нгэ бахталыпэ́н и рама́нё (миро).

3. Тэ явэ́л бахтякирдо́ Дэвэ́л и амарэ́ Ра́скирэ-Дэвлэ́скиро Дад, Саво́ дэ́ла тангипны́тко (жалосно) ило́; Дэвэ́л, Саво́ подрикирэ́ла дро саро́;

4. Саво́ подрикирэ́ла амэн дрэ сарэ́ амарэ́ пиридживипэна ваш дова́, соб (кай) амэ могинасас тэ подрикирас одолэ́н, дро саво́ пхарипэ́н ёнэ тэ на явэ́н, подрикирибнаса, саво́ амэ кокорэ́ дорэсцям Дэвлэ́стыр:

5. Пал-дова́ со, сыр амэ буты́р мэнчынасапэ пал Христосо́стэ, адя́кэ-паць амэ буты́р дорэсаса подрикирибэ́н Лэ́стыр.

6. Ко́ли амэ пиридживаса, амэ пиридживаса ваш тумаро́ подрикирибэ́н и зракхибэ́н; ко́ли Дэвэ́л подрикирэ́ла амэн, тэды и амэ подрикираса тумэн, ке́ли тумэ́ пирилыджана дасавэ́-паць мэ́ньки, савэ́ амэ вырикираса,

7. и амаро́ лачхо́ ужакирибэ́н пал тумэ́ндэ исын зорало́: ко́ли Дэвэ́л подрикирэ́ла амэн, дава́ исын ваш тумаро́ подрикирибэ́н и зракхибэ́н: амэ джина́са, ко́ли тумэ́ пирилыджана дасавэ́-паць мэ́ньки, сыр и амэ, тэды Дэвэ́л подрикирэ́ла тумэн, адя́кэ-паць сыр и амэн.

8. Палдава́ амэ камаса, соб (кай) тумэ́ тэ джинэ́н, пшала́лэ, со амэ пиридживдям дрэ Асия, кай амэ́нгэ сыс одо́й адя́кэ пхаро́ на пир зор, со амэ хасякирдям лачхо́ ужакирибэ́н тэ ячаспэ джидэ́нца.

9. А амэ чуиндям пэс сы́рбы амэ сам приракирдэ кэ мэрибэ́н, соб (кай) амэ тэ на розгинас пэ кокорэндэ, а пэ Дэвлэ́стэ, Саво́ отджидякирэла мулэн,

10. Саво́ зракхця́ амэн мэрибнытконэ́ дара́тыр (дарьятыр), и Кон зракхэ́ла; пэ Лэ́стэ амэ чхудям амаро́ лачхо́ ужакирибэ́н, со Ёв ишчо (инкэ́) адя́кэ-паць зракхэ́ла;

11. пал-дова́ со тумэ́ адя́кэ-паць мангэ́напэ Дэвлэ́скэ ваш дова́, соб (кай) бут мануша́ парикирэнас Дэвлэ́скэ пал амаро́ бахтякирдо́ зракхибэ́н пир патерья (молитвы) Дэвлэ́скэ бутэ́ манушэ́ндыр.

12. Пал-дова́ со амэ радынасапэ далэ́стыр, ке́ли амари́ ладж патякирэла амэн, со амэ свэнтымаса и Дэвлытконэ́ чачипна́са на пир манушы́тко годы́, а пир Дэвлэ́скиро бахталыпэ́н дживдям пэ дава́ свэ́то, и буты́р сарэ́стыр, сыр амэ отлыджиямпэ кэ тумэ́.

13. Палдава́ амэ чхинаса екх дава́, со тумэ́ джинэ́на и ґалёна; и мэ ужакирава лачхипэ́н, со тумэ́ ґалёна хор;

14. и адя́кэ-паць, сыр тумэ́ сы́рбы ґалынэ́ паш, со тумэ́ могинэ́на тэ радынэ́нпэ пал амэ́ндэ, адя́кэ-паць, сыр и амэ радынасапэ пал тумэ́ндэ дро дывэ́с, ке́ли Рай Дэвэ́л Ису́со явэ́ла нэвэ́стыр.

15. Палдава́ ма́ндэ сыс дасаво зорало́ патяибэ́н тэ явав ґарэдыр кэ тумэ́, соб (кай) тумэ́ могиндлэ́ тэ прилэ́н бахталыпэ́н яви́р мо́ло;

16. соб (кай) мэ тэ джав кэ Македония пир тумарэ́ штэ́ты, и нэвэ́стыр Македониятыр тэ явав кэ тумэ́, и соб (кай) тумэ́ тэ лыджа́н ман дурэды́р кэ Юдэ́я.

Romani Bible Baltic 2019

United Bible Societies for the Baltic Romani Mission