Bible in one year September 16Isaiah 23:1-181. Ангилпхэныбэ́н пал Ти́ро. – Ровэ́н, па́рмы (корабли) Фарсисостыр, пал-дова́, со ёв исын роспхагирдо; нанэ кхэра́, нико́н дрэ кхэра́ на заджа́ла. Адя́кэ пхэндло́ лэ́нгэ Китимоскирэ пхувья́тыр.2. Явэ́н штыл, мануша́лэ, кон дживэ́ла пэ пхув машки́р мо́рё (дэрья́в), кай пхэрдо́ сыс Сидоноскирэ тылгарьенца (купцэнца), савэ́ пир мо́рё (дэрья́в) традэнас.3. Пир баро́ пани́ янэ́нас лэ́скэ зя́рки (семяны) Сихороскирэ, умалото (урожаё) барэ́ рэка́тыр (лэня́тыр), сыс дая́ пхув штэтоса, кай народы бикнэнас.4. Ладжа, Сидоно, пал-дова́ со адя́кэ ракирэ́ла мо́рё (дэрья́в), зоралыпэ́н морёскиро (дэрьявэ́скиро): “Сы́рбы мэ на мэнчынаваспэ, ко́ли мэ и на биянавас, и на барьякиравас чхавэ́н и чхае́н, и мэ на давас палэ патывалэ́ джувле́н.”5. Ко́ли шунэ́на нэвипэн (вестя) Египтя́ни, ко́ли шунэ́на пал Ти́ро, то страхадёна ёнэ!6. Пиритрадэн дро Фарсисо, ровэ́н, мануша́лэ, савэ́ дживэ́на пэ островы!7. Ци дава́ исын тумаро́ фо́ро, фо́ро, саво́ зяинэлас радыма́тыр, фо́ро ґаратуно? Лэ́скирэ ґэра́ лыджа́на лэс тэ стенькинэлпэ (тэ псирэ́л би рэндоскиро) пэ чу́жо риг.8. Кон припхэндя́, соб (кай) тэ явэ́л адя́кэ Тироса, саво́ роздэлас вянки, лэ́скирэ ку́пцы (тылга́рья) сыс тхага́рья (кня́зи), кофарья (торговцы) пир манушэ́ндэ, савэ́ одо́й бикнэнас, и сари́ пхув джинэлас лэн.9. Рай Дэвэ́л, болыбна́скирэ-янголэ́нгиро, припхэндя́ дава́, соб (кай) тэ на пхутёл нисаво́ барипэ́н, соб (кай) тэ ладжан сарэ́, кон прилэ́ла паты́в пэ пхув.10. Псир пир тыри́ пхув, чхай Фарсисоскири, псир, сыр рэка (лэнь): нико́н буты́р пэ тыро́ дром на тэрдёла.11. Ёв протырдыя́ Пэ́скиро васт пэ мо́рё (дэрья́в), Ёв пиритринскирдя кралипэна́; Рай Дэвэ́л припхэндя́ пал Ханаано, соб (кай) тэ роспхагирэн лэ́скирэ тва́рдыми (крепости).12. И пхэндя́: “На явэ́са ту буты́р тэ радынэспэ, патывалы́ тэрны́ джувлы́, сави́ сыс ладжакирды, чхай Сидоноскири! Ушты́, джа́ дрэ Китимо, нэ и одо́й ту на откхинёса.”13. Акэ, исын пхув Халдеенгири. На сыс англэды́р дава́ народо; Асуро кэрдя́ лэс манушэ́ндыр, савэ́ дживэ́нас пэ шуки́ пхув. Ёнэ чхувэ́на пэ́скирэ вучардя (башни), роспхагирэна лэ́скирэ райканэ кхэра́, пхагирэна лэн сарэ́са.14. Ровэ́н, па́рмы Фарсисоскирэ! Ровэ́н, пал-дова́ со зор тумари́ исын пхагирды.15. И явэ́ла дро дова́ дывэ́с: бистрэна Ти́ро пэ эфтадэша́ бэрш, пэ ада́кицы, сыр екх кра́ли дживэ́ла. А ко́ли проджа́на далэ́ дывэса́, явэ́ла Тироса дова́, со багана пал биладжакунэ́ джувля́тэ.16. “Лэ башады, псир пир фо́ро, бистырды биладжакуны джувлы́! Башав куч, бага бут гиля́, соб (кай) тэ пририпирэн пал ту́тэ.”17. И явэ́ла: ко́ли эфтадэша́ бэрш проджа́на, то Рай Дэвэ́л заджа́ла кэ Ти́ро, ёв лэ́ла пэ́скири бажын, ёв лэ́ла нэвэ́с тэ кэрэ́л биладжакирэ рэ́нды сарэ́ кралипнэнца пир сари́ пхув.18. Нэ лэ́скиро бикныбэн и лэ́скири бажын явэ́на отдынэ́ Ра́скэ-Дэвлэ́скэ; ёнэ на явэ́на гарадэ́, пал-дова́ со кэ одолэ́, кон дживэ́ла анги́л Дэвлэ́скиро муй, пириджала бажын, соб (кай) тэ хан и тэ чалён, соб (кай) тэ явэ́л лэ́ндэ зорало́ урибэ́н, саво́ ґара́ сашты́ тэ урьел.Isaiah 24:1-231. Акэ, Рай Дэвэ́л хасякирэ́ла пхув кэ чхучипэн (пусто), кэрэ́ла адя́кэ, соб (кай) тэ на янэл ёй барьякирдо́ (пло́до), и пирипарувэла, роспхурдэла кодолэ́н, кон дживэ́ла пэ ла́тэ.2. И со явэ́ла народоса, дова́-паць (тожэ) явэ́ла раша́са; со явэ́ла дынариса, дова́-паць явэ́ла лэ́скирэ хула́са; со явэ́ла дынарицаса, дова́-паць явэ́ла ла́кирэ хуланяса; со явэ́ла одолэса, кон кинэла, дова́-паць явэ́ла одолэса, кон бикнэла; со явэ́ла манушэ́са, саво́ залэла ловэ́, дова́-паць явэ́ла одолэса, кон дэ́ла лэ́скэ ловэ́.3. Пхув исын обчорды сарэ́са и чхучи́, пхув сарэ́са исын росчорды, пал-дова́ со Рай Дэвэ́л пхэндя́ дава́ лав.4. Тангинэла, ровэла пхув; пыя́ духо́са, на радынэ́лпэ баро́ свэ́то, дрэ биба́хт (би́да) исын мануша́, савэ́ ґаздэнаспэ пэ пхувья́киро народо.5. Пхув исын магирды манушэ́ндыр, савэ́ дживэ́на пэ ла́тэ, пал-дова́ со ёнэ отчхурдынэ зако́ны, парудэ стату́то (уставо), ёнэ пхагирдэ́ ве́чно завето.6. Палдава́ прокошыбэ́н ха́ла пхув, прилэ́на биба́хт мануша́, савэ́ пэ пхув дживэ́на; схачкирдэ́ исын мануша́, савэ́ дживэ́на пэ пхув и набутка лэн яця́пэ.7. Ровэла со́ко (хум) (нэви́ мол) нэвонэ́-мурьенгиро пэ сэнко (суко); дукхала рандь винаградоскири; ґаздэ́на ди пхарэ́с сарэ́, кон радынэласпэ илэ́са.8. Пирияця́ ра́дыма (лош) башаибнаса пэ бубны, на радынэ́нпэ буты́р мануша́, кон радынэласпэ, ёнэ на башавэна буты́р пэ цымбалы.9. На пьена буты́р мол (вино) и на багана, кирки исын бравинта ваш одолэ́нгэ, кон пьела ла.10. Роспхагирдо исын чхучо́ фо́ро, сарэ́ кхэра́ закэрдэ пэ клыдын, нашты́ тэ заджас.11. Ровэна пэ вули́цы (га́сы) пал мол (вино), гия́ криг ра́дыма, вытрадынэ́ весёлыма (лош) пхувья́тыр.12. Чхучо́ исын фо́ро и по́рты исын роспхадинэ.13. А машки́р пхув, машки́р народы, явэ́ла адя́кэ, сыр сыс, ке́ли обмарэнас маслины и скэдэнас винаградо, ко́ли саро́ укэдэнас.14. Загодлэна зоралэ́ заня́са, явэ́на тэ радынэ́нпэ дро Ра́скирэ-Дэвлэ́скиро райканыпэн, и явэ́на тэ годлэн морёстыр (дэрьявэстыр).15. Шарэ́н Рас-Дэвлэ́с пэ васто́ко, пэ островы, шарэ́н Ра́скирэ-Дэвлэ́скиро, Израилёскирэ-Дэвлэ́скиро лав!16. Пхувья́кирэ ягоро́стыр (концостыр) шунаса амэ гилы́: “Тэ славинэлпэ Чачипна́скиро Дэвэ́л!” И пхэндём мэ: “Бида ма́нгэ, би́да ма́нгэ! Чора чорэна, чора чорэна злыдниткэс.”17. Дар, ґанби́н (яма) и фэлы́ ухтылэна тут, ману́ш, саво́ дживэ́ла пэ пхув!18. Тэ́ньци одова́, кон праста́ндыя, ко́ли загодлынэ дара́тыр, пэрэ́ла дро хор штэ́то, а кон выджа́ла одотхы́р, попэрла дрэ фэлы́, пал-дова́ со фэнштры болыбна́скирэ вучипна́стыр псирадёна (роскэрнапэ) и пхув издрала.19. Пхув издрала, пхув роспэрэлапэ, пхув издрала барэ́ зорья́са.20. Кунинэлапэ (качынэлапэ) пхув, сыр мато ману́ш, кунинэлапэ и грэ́хо ла́киро пэ ла́тэ: ёй пэрэ́ла и буты́р на уштэ́ла.21. И явэ́ла дро дова́ дывэ́с: зджа́ла Рай Дэвэ́л тэ кэрэ́л ка́ра пэ налачхэ́ ду́хи, савэ́ исын дро болыбэ́н и пэ пхувитконэ кралье́ндэ, савэ́ исын пэ пхув.22. И явэ́на ёнэ скэдынэ́ кхэтанэ́ дро рово (хохо́й), и явэ́на закэрдэ дро бэшыбэн, и прилэ́на ка́ра, ко́ли проджа́на бут дывэса́ явэ́на тэ сэндинэ́н.23. И чхон лолёла, и кхам ладжала, ко́ли явэ́ла Рай Дэвэ́л, болыбна́скирэ-янголэ́нгиро крали́са пэ бэ́рга Сио́но и дро Ерусалимо, и анги́л лэ́скирэ пхурыдырэндэ явэ́ла барипэ́н (сла́ва).Psalms 107:10-2210. Адасавэ́ мануша́ дживдэ́ дро калыпэ́н (цямлыпэ́н) и дрэ мэрибнаскири зэр (тенё), ёнэ сыс пхандлэ и притасадэ,11. пал-дова́ со ёнэ ґаздынэ́ бу́нто проти Дэвлэ́скирэ лава́ и на прилынэ́ кэ годы́ Самонэ (Най) Вучэдырэскирэ-Дэвлэ́скири дума;12. и Ёв бандякирдя лэ́нгирэ илэ пхарэ́ бутяса; ёнэ пынэ́ и на сыс нико́н тэ подэл васт:13. тэ́ньчи ёнэ дынэ́ го́дла ясвэ́нца кэ Рай Дэвэ́л дрэ пэ́скири бари дар, и Ёв зракхця́ лэн лэ́нгирэ барэ́ дара́тыр,14. Ёв вылыджия́ лэн калыпна́стыр и мэрибнаскирэ зэрьятыр (тенёстыр) и Ёв пхагирдя́ пэ котэра́ (куски) лэ́нгирэ састыра́,15. мэк ёнэ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима, и Лэ́скирэ ди́вы манушэ́нгирэ чхавэ́нгэ,16. пал-дова́ со Ёв пхагирдя́ харкуны (медно) по́рта и роскусця саструнэ́ шыберы (запоры).17. Дылынэ́ манушэ́н притасавэнас пал лэ́нгирэ грэ́хи и пал лэ́нгиро чорипэ́н;18. лэ́нгиро ило́ отрискирдяпэ кажнонэ́ хабнастыр, и ёнэ джа́нас пашы́л кэ по́рта мэрибнаскири:19. тэ́ньчи ёнэ дынэ́ го́дла ясвэ́нца кэ Рай Дэвэ́л, ке́ли сыс пхаро́ лэ́нгэ, и Ёв зракхця́ лэн барэ́ дара́тыр.20. Ёв бичхадя́ Пэ́скиро лав и высастякирдя́ лэн и выракхця лэн лэ́нгирэ хасибнастыр.21. Мэк ёнэ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима и пал Лэ́скирэ ди́вна бутя́ манушэ́нгирэ чхавэ́нгэ.22. И мэк ёнэ тэ парикирэ́н Ра́скэ-Дэвлэ́скэ свэнтонэ́ дыибнаса тэ парикирэ́н, и мэк ёнэ тэ роспхэнэ́н сарэ́нгэ пал Лэ́скирэ бутя́ радымакирэ гиляса.Proverbs 25:17-1717. На псир бут мо́лы кэ тыро́ пашатуно кхэрэ́, соб (кай) ёв тэ на кхинёл ту́тыр, и, соб (кай) ёв тэ на лэл древа́н тэ на камэл тут.2 Korinťanenge 1:8-248. Палдава́ амэ камаса, соб (кай) тумэ́ тэ джинэ́н, пшала́лэ, со амэ пиридживдям дрэ Асия, кай амэ́нгэ сыс одо́й адя́кэ пхаро́ на пир зор, со амэ хасякирдям лачхо́ ужакирибэ́н тэ ячаспэ джидэ́нца.9. А амэ чуиндям пэс сы́рбы амэ сам приракирдэ кэ мэрибэ́н, соб (кай) амэ тэ на розгинас пэ кокорэндэ, а пэ Дэвлэ́стэ, Саво́ отджидякирэла мулэн,10. Саво́ зракхця́ амэн мэрибнытконэ́ дара́тыр (дарьятыр), и Кон зракхэ́ла; пэ Лэ́стэ амэ чхудям амаро́ лачхо́ ужакирибэ́н, со Ёв ишчо (инкэ́) адя́кэ-паць зракхэ́ла;11. пал-дова́ со тумэ́ адя́кэ-паць мангэ́напэ Дэвлэ́скэ ваш дова́, соб (кай) бут мануша́ парикирэнас Дэвлэ́скэ пал амаро́ бахтякирдо́ зракхибэ́н пир патерья (молитвы) Дэвлэ́скэ бутэ́ манушэ́ндыр.12. Пал-дова́ со амэ радынасапэ далэ́стыр, ке́ли амари́ ладж патякирэла амэн, со амэ свэнтымаса и Дэвлытконэ́ чачипна́са на пир манушы́тко годы́, а пир Дэвлэ́скиро бахталыпэ́н дживдям пэ дава́ свэ́то, и буты́р сарэ́стыр, сыр амэ отлыджиямпэ кэ тумэ́.13. Палдава́ амэ чхинаса екх дава́, со тумэ́ джинэ́на и ґалёна; и мэ ужакирава лачхипэ́н, со тумэ́ ґалёна хор;14. и адя́кэ-паць, сыр тумэ́ сы́рбы ґалынэ́ паш, со тумэ́ могинэ́на тэ радынэ́нпэ пал амэ́ндэ, адя́кэ-паць, сыр и амэ радынасапэ пал тумэ́ндэ дро дывэ́с, ке́ли Рай Дэвэ́л Ису́со явэ́ла нэвэ́стыр.15. Палдава́ ма́ндэ сыс дасаво зорало́ патяибэ́н тэ явав ґарэдыр кэ тумэ́, соб (кай) тумэ́ могиндлэ́ тэ прилэ́н бахталыпэ́н яви́р мо́ло;16. соб (кай) мэ тэ джав кэ Македония пир тумарэ́ штэ́ты, и нэвэ́стыр Македониятыр тэ явав кэ тумэ́, и соб (кай) тумэ́ тэ лыджа́н ман дурэды́р кэ Юдэ́я.17. Палдава́, ко́ли мэ адя́кэ камамас тэ кэра́в, ци мэ лыджиём пэс балвали́ткэс? Ци дова́, со мэ скэдавпэ тэ кэра́в, мэ кэра́ва кокоро́ пэ́стыр сы́рбы мэ ракира́ва усае́кх “нэ, нэ”, и “над, над”?18. Нэ Дэвэ́л исын патяибны́тко, амаро́ лав “нэ”, исын на дова́-паць, со лав “над.”19. Пал-дова́ со Дэвлэ́скиро Чхаво́, Ису́со Христо́со, пал Конэ́стэ амэ пхэнасас лав тумэ́нгэ – мэ, Силуано, Тимофеё (Хи́ма) – на сыс Одова́, Конэ́стэ лав “нэ” исын дова́-паць, со и лав “над”; а Лэ́стэ сыс лав “нэ”:20. Ёв кэрэ́ла кэ ко́нцо/яго́ро (сполнинэлас) саро́, со Ёв ракирдя́. Пал-дова́ со Дэвлэ́скирэ дынэ́ лава́ сполнинэнапэ пир Лэ́скиро “нэ”, пир Лэ́стэ амэ ракираса “ами́нь” ваш Дэвлэ́скири сла́ва.21. Дава́ исын Кокоро́ Дэвэ́л, Кон чхувэ́ла зоралыпэ́н машки́р амэ́ндэ дро екхипэ́н Христосо́са и Кон свэнцякирэла амэн,22. дава́ исын Дэвэ́л, Кон сы́рбы чхудя́ чэргэнори́ (печать), со амэ сам Лэ́скирэ, и дыя́ Ду́хо (Фа́но) амэ́нгэ сы́рбы сымады́.23. Нэ мэ ява́ва тэ кхарав Дэвлэ́с тэ допхэнэл, со исын пэ миро ило́, со мэ ваш тумаро́ миштыпэ́н на псирдём дро Коринфо.24. Амэ на рикираса упралыпэ́н пэ тумаро́ патяибэ́н, нэ амэ кэра́са буты́ кхэтанэ́ ваш тумари́ ра́дыма, пал-дава́ со тумаро́ патяибэ́н исын зорало́. Romani Bible Baltic 2019 Maintained by the United Bible Societies for the Baltic Romani Mission