Bible in one year September 17Isaiah 25:1-121. Раё Дэ́вла! Ту сан миро Дэвэ́л, мэ ла́ва тэ шара́в Тут, мэ шарава кэ вучипэ́н Тыро́ лав, пал-дова́ со Ту кэрдя́н ди́во; дова́, со припхэндян ґара́, дава́ исын чачипэ́н, ами́нь.2. Ту роспхагирдян зоралы́ тва́рдыма сарэ́са, райкано кхэр (харомо), саво́ кэрдэ́ мануша́, буты́р нанэ дро фо́ро, буты́р николи лэс на ґаздэ́на.3. Палдава́ явэ́на тэ шарэ́н Тут зоралэ́ народы; фо́рья, кай даранэ кхэри́тка ро́ды дживэ́на, явэ́на тэ дарэ́н Ту́тыр.4. Ту са́нас зракхибнаса ваш чорорэскэ, зракхибнаса ваш чорорэ́ манушэ́скэ, сыр сыс пхаро́ лэ́скэ; зракхибнаса зоралэ́ балвалятыр, и кхамэстыр. А холямо́ пхурдыпэн налачхэ́ манушэ́ндыр сыс сыр балва́л, ко́ли ёй пэ ва́нта ґаздэ́лапэ.5. Сыр хачкирибэ́н пэ штэ́то бипанескиро, Ту розмардян вэргэнгиро шумо; сыр чачипэ́н пириячэ́ла брышындэстыр, адя́кэ Ту притасадян ра́дыма одолэнгири, савэ́ притасавэ́на.6. И кэрэ́ла Рай Дэвэ́л, болыбна́скирэ-янголэ́нгиро пэ дая́ бэ́рга лачхо́ хабэ ваш сарэ́ народы; одо́й явэ́ла жужы мол (вино), тхулыпэн кокалэндыр; са́мо жужы (чысто) мол.7. И хасякирэ́ла пэ дая́ бэ́рга учхакирибэн, саво́ учхакирэ́ла сарэ́ народы, саво́ пэ сарэ́ ро́ды исын пашло.8. Мэрибэ́н хасёла сарэ́са, и выкхосэла Рай Дэвэ́л, Дэвэ́л ясва сарэ́ муендыр и злэла ладж Пэ́скирэ народо́стыр пир сари́ пхув, пал-дова́ со адя́кэ ракирэ́ла Рай Дэвэ́л.9. И пхэнэ́на дрэ дова́ дэвэс: “Акэ, Ёв исын амаро́ Дэвэ́л! Пэ Лэ́стэ сыс амаро́ лачхо́ ужакирибэ́н и Ёв зракхця́ амэн! Кадава́ исын Рай Дэвэ́л; пэ Лэ́стэ сыс амаро́ лачхо́ ужакирибэ́н; ла́са тэ радынаспэ Лэ́скирэ Зракхибнастыр.”10. Васт Ра́скирэ-Дэвлэ́скиро пасёла пэ дая́ бэ́рга и Моа́во явэ́ла домардо пэ пэ́скиро штэ́то, сыр пхус змарэна ґэрэ́нца дро гнэё.11. Мэк тэ протырдэл ёв пэ́скирэ васта́, сыр ману́ш, саво́ плывинэла (дэ́ла плима) акана́, ростырдэла васта́ тэ плывинэл (тэ дэл плима), нэ чхувэ́ла тэлэ́ Дэвэ́л пал лэ́скиро пхутькирибэ́н, пал хохаибэ́н, саво́ лэ́скирэ васта́ кэрэ́нас.12. И тва́рдыма, тырэ́ зоралэ́ и вучэ́ вантэндыр роспхагирэла, Ёв розмарэла, чхурдэ́ла пэ пхув, дро пра́хо.”Isaiah 26:1-211. Дро дова́ дывэ́с явэ́на тэ бага́н дая́ гилы́ пэ пхув Юдаскири: “Зорало́ фо́ро исын амэ́ндэ; на дыя́ Ёв амэ́нгэ ва́нты и вало, а дыя́ зракхибэ́н.2. Одкэрэн (псиравэн) по́рта (вра́ты), мэк тэ заджа́л народо патывало, народо, саво́ ракхэ́ла чачипэ́н.3. Манушэ́с, зоралэ́ духо́са Ту ракхэса дрэ пхэрдо́ рама́нё (миро), пал-дова́ со пэ Ту́тэ исын лэ́скири наде́я,4. На ячкирэн (на ячавэн) Рас-Дэвлэ́с николи, пал-дова́ со Рай Дэвэ́л исын зоралыпэ́н ве́чно.5. Ёв чхудя́ тэлэ́ одолэ́н, кон пэ вучо́ штэ́то дживэ́ла, чхурдыя́ тэлэ́ фо́ро, саво́ вучэ́с тэрдёлас, чхурдыя́ тэлэ́ пэ пхув, чхурдыя́ дро пра́хо.6. Ѓэра́ лэс (дава́ фо́ро) марэна, гэра чорорэскирэ-манушэ́нгирэ, и одолэнгирэ пирэ́ (сто́пы), савэ́ ловэ́ вымангэна.7. Дром Дэвлытконэ́-манушэ́скиро исын чачуно́; Ту кэрэ́са ваш лэ́скэ чачуно́ дром.8. И пэ дром, кай исын Тыро́ сэ́ндо, Раё Дэ́вла, сыс амэ́ндэ лачхо́ ужакирибэ́н пэ Ту́тэ; кэ Тыро́ лав, кэ рипирибэ́н пал Ту́тэ тырдэла амэн амаро́ ди.9. Мирэ́ деса тырдавас мэ кэ Ту тэ явав раты́, мирэ́ духо́са лава́ мэ тэ родав Тут дрэ пэ́стэ тася́рлэс (ра́нэс) пэ зло́ко (ранкоса); пал-дова́ со, ко́ли сэ́ндо Тыро́ кэрэ́лапэ пэ пхув, тэ́ньчи одолэ́, кон дживэ́ла дро свэ́то, сыклёна чачипнаскэ.10. Ко́ли грэхитконэ́ манушэ́с потангинэна, тэ́ньчи на ґалёла ёв чачипэ́н: ёв явэ́ла тэ кэрэ́л накуч дурэды́р пэ пхув патывалэнгири и на подыкхэла пэ Ра́скирэ-Дэвлэ́скиро барипэ́н.11. Раё Дэ́вла! Тыро́ васт сыс вучэ́с ґаздыно́, нэ ёнэ лэс на дыкхнэ́; дыкхэ́на и ладжана, кон бидыкхэла (нашты́ тэ дыкхэ́л) пэ Тыро́ народо; яг ха́ла Тырэ́ вэргэ́н.12. Раё Дэ́вла! Ту подэса амэ́нгэ рама́нё (миро), и сарэ́ амарэ́ рэ́нды Ту кэрэ́са ваш амэ́нгэ.13. Раё Дэ́вла, Дэ́вла амаро́! Сыс кэ амэ и яви́р тхага́рья, нэ пир Ту́тэ амэ шарасас Тыро́ лав.14. Мулэ́ на отджидёна, Рефаимы на уштэна, пал-дова́, со Ту явдя́н и хасякирдян лэн; хасякирдян рипирибэ́н пал лэ́ндэ.15. Ту барьякирдян народо, Раё Дэ́вла, барьякирдян народо, шардян Кокоро́ Пэс; буґлякирдян сарэ́ рига́ пхувья́кирэ.16. Раё Дэ́вла! Дрэ биба́хт би́да ёв Тут родэлас; мангэласпэ, ко́ли холы́ Тыри́ сыс пэ лэ́стэ.17. Сыр пхари́ джувлы́ годлэла и ровэла пэ́скирэ дукхатыр, ко́ли ёй биянэ́ла, кадасавэ́ амэ са́мас анги́л Ту́тэ, Раё Дэ́вла!18. Пхарэ́ амэ са́мас, страдынасас амэ и бияндям сы́рбы балва́л; амэ на зракхцям дава́ свэ́то, и на бия́ндынэ пэ свэ́то нэвэ мануша́.19. Отджидёна Тырэ́ мулэ́, мулэ́ маса́ уштэна! Ѓаздэнпэ, радынэ́нпэ, тумэ́, савэ́н чхурдынэ́ дро пра́хо, пал-дова́ со пахлын (роса) Тыри́ састякирэла и пхув чхурдэ́ла яври́ мулэн.20. Джа́, миро народо, заджа́ дро тыро́ кхэр, закэр вудара́ пал пэ́стэ, гарадёв пэ на́бут, анги́л сыр проджа́ла холы́.21. Акэ, Рай Дэвэ́л выджа́ла Пэ́скирэ штэто́стыр тэ чхувэ́л ка́ра пэ манушэ́ндэ, савэ́ дживэ́на пэ пхув, пал лэ́нгирэ грэ́хи, и пхув откэрэла рат, саво́ прилыя́ дрэ пэ́стэ и на гаравэла пэ́скирэ замардэн.Psalms 107:23-3223. Одолэ́, савэ́ плывинэнас (дэ́нас пли́ма) пир мо́ри (дэрьява́) пэ па́рмы, ци савэ́ кэрэ́на ко́фо (польза) пир барэ́ паня́,24. ёнэ дыкхэ́на Ра́скирэ-Дэв-лэ́скирэ бутя́ и Лэ́скирэ ди́вна рэ́нды пэ хор штэ́ты.25. Пал-дова́ со Ёв пхэнэ́ла и ґаздэ́лапэ штормитко балва́л, сави́ вучэ́с ґаздэ́ла морёскирэ (дэрьявэ́скирэ) валны:26. па́рмы (корабли) манушэ́нца джа́на упрэ́ кэ болыбэ́н, тэ́ньчи ёнэ пэрэ́на тэлэ́ кэ хор штэ́ты; а манушэ́ндэ, со одо́й бэштэ́, ди биладёла барэ́ дара́тыр;27. ёнэ крэнжынэна одори́к и палэ и ёнэ кунинэ́наспэ (шатынэнапэ) сыр матэ, а лэ́нгиро годыпэ́н нисо́ на мол:28. тэ́ньчи ёнэ дэ́на го́дла ясвэ́нца Ра́скэ-Дэвлэ́скэ, ке́ли сыс пхаро́ лэ́нгэ и Ёв зракхэ́ла лэн лэ́нгирэ пхарипнастыр;29. Ёв штылякирэла штормо адя́кэ, со лэ́нгирэ валны (вэлны) ячэ́на штыл (тиха),30. и ёнэ исын ра́да, пал-дова́ со паня́ ячэ́на штыл и Ёв вылыджала лэн кэ приячытко (пристань), кэ со ёнэ тырдынэпэ.31. Мэк адалэ́ мануша́ тэ парикирэ́н Ра́скэ-Дэвлэ́скэ пал Лэ́скири лачхэ́-илы́ткима и Лэ́скирэ ди́вна бутя́ ваш манушэ́нгирэ чхавэ́нгэ;32. мэк ёнэ тэ барьякирэ́н кэ вучыпэн Лэс адя́кэ-паць пэ манушэ́нгиро скэдыибэ́н и тэ шарэ́н Лэс пэ годэпхурэнгиро ракирибэ́н.Proverbs 25:18-1918. Ману́ш, саво́ допхэнэ́ла хохаибэ́н пэ пэ́скирэ пашатунэстэ, исын сы́рбы кило, курта́ла и марибны́тко буст (стрела).19. Зоралэ́с тэ патяс дрэ напатяибнытконэ манушэ́стэ исын сы́рбы на́лачхо данд ци лангалы ґэро́й.2 Korinťanenge 1:9-159. А амэ чуиндям пэс сы́рбы амэ сам приракирдэ кэ мэрибэ́н, соб (кай) амэ тэ на розгинас пэ кокорэндэ, а пэ Дэвлэ́стэ, Саво́ отджидякирэла мулэн,10. Саво́ зракхця́ амэн мэрибнытконэ́ дара́тыр (дарьятыр), и Кон зракхэ́ла; пэ Лэ́стэ амэ чхудям амаро́ лачхо́ ужакирибэ́н, со Ёв ишчо (инкэ́) адя́кэ-паць зракхэ́ла;11. пал-дова́ со тумэ́ адя́кэ-паць мангэ́напэ Дэвлэ́скэ ваш дова́, соб (кай) бут мануша́ парикирэнас Дэвлэ́скэ пал амаро́ бахтякирдо́ зракхибэ́н пир патерья (молитвы) Дэвлэ́скэ бутэ́ манушэ́ндыр.12. Пал-дова́ со амэ радынасапэ далэ́стыр, ке́ли амари́ ладж патякирэла амэн, со амэ свэнтымаса и Дэвлытконэ́ чачипна́са на пир манушы́тко годы́, а пир Дэвлэ́скиро бахталыпэ́н дживдям пэ дава́ свэ́то, и буты́р сарэ́стыр, сыр амэ отлыджиямпэ кэ тумэ́.13. Палдава́ амэ чхинаса екх дава́, со тумэ́ джинэ́на и ґалёна; и мэ ужакирава лачхипэ́н, со тумэ́ ґалёна хор;14. и адя́кэ-паць, сыр тумэ́ сы́рбы ґалынэ́ паш, со тумэ́ могинэ́на тэ радынэ́нпэ пал амэ́ндэ, адя́кэ-паць, сыр и амэ радынасапэ пал тумэ́ндэ дро дывэ́с, ке́ли Рай Дэвэ́л Ису́со явэ́ла нэвэ́стыр.15. Палдава́ ма́ндэ сыс дасаво зорало́ патяибэ́н тэ явав ґарэдыр кэ тумэ́, соб (кай) тумэ́ могиндлэ́ тэ прилэ́н бахталыпэ́н яви́р мо́ло; Romani Bible Baltic 2019 Maintained by the United Bible Societies for the Baltic Romani Mission