Beblia

1. Дро дова́ дывэ́с чингирэла Рай Дэвэ́л пэ́скирэ куртала́са, сави́ исын пхари́, бари и зоралы́ Левиафонос (драконос), сапэс, саво́ маму́й (прямэс) прастала, и Левиафонос, сапэс, саво́ выкрэнцынэлпэ (диндькирэлапэ), и мулякирэ́ла Рай Дэвэ́л долэ́ даранэ рупучос, саво́ дживэ́ла дро мо́рё (дэрья́в).

2. Дро дова́ дывэ́с “Бага́н пал лэ́стэ пал винагра́днико, саво́ исын пир ило́ ма́ндэ.

3. Мэ, Рай Дэвэ́л, ракхава лэс; кажно мэнта (минута) Мэ да́ва лэ́скэ пани́; раты́ и дывэсэ́ Мэ ракхава лэс, соб (кай) нико́н одори́к тэ на джал.

4. Нанэ Ма́ндэ холы́. Нэ ко́ли вари-кон чхувэ́ла проти Ма́ндэ дрэ лэ́стэ пхусадэ́ чарья́, то Мэ джа́ва пэ лэ́стэ марибна́са, сарэ́са лэс схачкирава.

5. Нэ ко́ли ёв/ёй помангэла Миро зракхибэ́н, и явэ́ла тэ мангэ́л рама́нё (миро) Ма́нца, мэк тэ́ньчи ёнэ тэ прилэ́н рама́нё (миро) Ма́нца.”

6. Дрэ дывэса́, савэ́ явэ́на, зорало́ явэ́ла Яково, выбарьёла и розмэкэлапэ лулуденца (цвэтэнца) Израилё, баро́ свэ́то явэ́ла пхэрдо́ барьякирдэса (плодоса).

7. Ци марэлас лэс Рай Дэвэ́л адя́кэ сыр явирэ манушэ́н? Ци замарэлас лэс адя́кэ, сыр явирэ́н замарэлас?

8. Ту пхуцян лэ́стыр, сыр трэй, ко́ли Ту, Дэ́вла, отгиян лэ́стыр; вычхурдыян лэс Пэ́скирэ зоралэ́ пхурдыпнаса, сыр дро дывэ́с, ко́ли пхурдэла васточно балва́л.

9. И далэ́са злэлапэ (выкхосэлапэ) грэ́хо Яково́скиро, злэлапэ грэ́хо лэ́стыр, ко́ли ёв розмарэла сарэ́ бара́ алтарёстыр (жэртвеникостыр) дрэ котэра́ звёскакирэ, на явэ́на тэрдэ́ дэмбитка вэладиня (рошчы) и и́долы кхамэскэ.

10. Пал-дова́ со зорало́ фо́ро чхучо́ явэ́ла, кхэра́ явэ́на чхурдынэ́, сыр чхучи́ пхув. Одо́й гуруворо явэ́ла тэ чаравэлпэ, одо́й ёв явэ́ла тэ пасёл и тэ хал лэ́скирэ рандя́.

11. Ко́ли лэ́скирэ рандя́ зашутёна, лэн обпхагирэна; явэ́на джувля́ (манушня) и схачкирэна лэн. Пал-дова́ со ёнэ исын народо бигодякиро, Ёв на потангинэла лэн, Одова́, Кон саро́ создыя́.

12. Нэ явэ́ла дрэ дова́ дывэ́с адя́кэ: Рай Дэвэ́л лэ́лапэ пало́ саро́, барэ́ рэка́тыр (лэня́тыр) кэ рэка (лэнь) Египто́скири, и тумэ́, чхавэ́ Израилёскирэ, скэдэ́напэ екх кэ екх.

13. И явэ́ла дрэ дова́ дывэ́с: баро́ роґо (труба) забашавэла и явэ́на одолэ́, кон нашадяпэ пэ пхув Асириякири, конэ́с вытрадынэ́ пэ пхув Египто́скири. Сарэ́ ёнэ пэрэ́на анги́л Растэ-Дэвлэ́стэ тэ дэн паты́в пэ свэ́нто бэ́рга дрэ Ерусалимо.

1. Бида пхутькирдэ́ кралитконэ вянкакэ [коронакэ-ю.о.], сави́ исын пэ матэ Ефремлянэндэ, лулудякэ (цвэтоскэ) лэ́скирэ гожонэ урибнастыр, саво́ зашутия, саво́ исын пэ лачхи́ фэ́лда, кай пасёна матэ моля́тыр (виностыр).

2. Акэ, састо́ и зорало́ исын Растэ-Дэвлэ́стэ сыр баро́ брышы́нд барэ́нца, сыр хасякирибнытко балва́л, сыр шумно пани́, саво́ ґаздыя́пэ и зорья́са чхурдэ́ла пэ пхув.

3. Марэна мануша́ ґэрэ́нца пхутькирды вя́нка матэ Ефремлянэндыр.

4. И зашутинэ лулудяса лэ́скирэ гожонэ урибнастыр, сави́ исын пэ лачхи́ фэ́лда, кэрэ́на адя́кэ, сыр смокваса, сави́ сы́гэс выбария анги́л сроко, и палдава́, кон дыкхэ́ла ла, екха́тыр (сра́зу) лэ́ла вастэ́са и ха́ла екхэ ґлытанкоса.

5. Дро дова́ дывэ́с Рай Дэвэ́л, болыбна́скирэ-янголэ́нгиро, явэ́ла гожонэ вянкаса и шукаронэ диадэмаса ваш ячаибэ́н Лэ́скирэ народо́стыр.

6. И духо́са, саво́ сэндинэла пир чачипэ́н ваш кодолэ́скэ, кон бэшэ́ла пэ сэ́ндо, и муршыпнаса ваш одолэ́нгэ, кон марэлапэ вэргэнца.

7. Нэ кадалэ́ пэрэ́на моля́тыр (виностыр), змарэнапэ дромэ́стыр, пал-дова́ со пинэ́ сикера (бравинта); раша́й и проро́ко матинэ, згинэ годятыр; на дыкхэ́на дыкхибэ́н, ёнэ на сэндякирэна, сыр трэй.

8. Сарэ́ скаминда ёнэ замакхнэ, исын нажужо (чысто) штэ́то.

9. И ишчо (инкэ́) ракирэ́на: “Конэ́с камэ́ла ёв тэ сыклякирэ́л, конэ́скэ исын пир ило́ тэ ракирэ́л лав? Одолэ́нгэ, кон наґара пирияця́ тэ пьел да́киро тхуд?”

10. Акэ: припхэныбэ́н пало́ припхэныбэ́н, припхэныбэ́н пало́ припхэныбэ́н екх зако́но пало́ яви́р зако́но, ада́й на́бут и одо́й на́бут.

11. Пало́ дова́ явирэ уштэ́нца и явирэ чиба́са (чибьяса) лэ́на тэ ракирэ́н кэ дава́ народо.

12. Лэ́нгэ ракирэ́нас: “Акэ, исын откхиныбэн, дэн, соб (кай) тэ откхинёл кхино ману́ш, акэ, исын штылыпэн.” Нэ ёнэ на закамлэ тэ шунэ́н.

13. И яця́ лэ́нгэ лав Ра́скирэ-Дэвлэ́скиро: “Припхэныбэ́н пало́ припхэныбэ́н, припхэныбэ́н пало́ припхэныбэ́н, екх зако́но пало́ яви́р зако́но, екх зако́но пало́ яви́р зако́но,” пал-дова́ ёнэ джа́на и пэрэ́на, и розмарнапэ, и ёнэ явэ́на ухтылдэ́.

14. Шунэ́н Ра́скирэ-Дэвлэ́скиро лав, кошыбнарья, далэ́ раё начачипнаскирэ народоскирэ, савэ́ дживэ́на кэ Ерусалимо.

15. Пал-дова́, со тумэ́ ракирэ́на: “Амэ доракирдямпэ хорэ штэтоса тэл пхув люноса (адоса) и мэрибнаса: ко́ли проджа́ла чхупны, сави́ хасякирла саро́, кэ амэ ёй на доджа́ла, пал-дова́ со хохаибнаса амэ зракхасапэ и начачипнаса пэс закэраса (пхандасапэ).”

16. Адя́кэ ракирэ́ла Рай Дэвэ́л: “Акэ, Мэ чхува́ва бар по Сио́но, бар вырикирдо, дро́го (куч), бар зорало́: кон патя́ла дрэ лэ́стэ, на явэ́ла тэ ладжал.

17. Мэ кэра́ва адя́кэ, со явэ́на тэ меринэн сэндоса и чачипна́са; бара́ хасякирэна штэ́то, кай хохаибэ́н гарадяпэ, пани́ зачхувэла дава́ штэ́то.

18. Тумаро доракирибэ́н мэрибнаса роспэрэлапэ, доракирибэ́н люноса (адоса) на вытэрдёла. Ко́ли джа́ла чхупны тэ хасякирэ́л, то домарэла тумэн кэ ґэра́.

19. Ко́ли сыг ёй (чхупны) явэ́ла то ухтылэл тумэн; явэ́ла тэ псирэ́л кажно дывэ́с и кажно рат, сыр шунэ́на пал ла́тэ, то лэ́ла дар.”

20. Набаро́ явэ́ла чхуибэ́н, соб (кай) тэ пасён, набуглы учхакирды явэ́ла, соб (кай) ла́са тэ запатькираспэ (тэ закрэнцынаспэ).

21. Ѓаздэлапэ Рай Дэвэ́л, сыр пэ бэ́рга Перацымо, холясо́ла сыр пэ фэ́лда Гаваоскири, соб (кай) тэ кэрэ́л Пэ́скиро рэ́ндо (де́ло), баро́ рэ́ндо, соб (кай) тэ кэрэ́л Пэ́скири буты́, бари буты́.

22. На кэрэ́н пэраса / шутки (на прэзэнтынэнпэ), соб (кай) тэ на прилэ́н ишчо (инкэ́) буты́р, пал-дова́ со мэ шундём Ра́стыр-Дэвлэ́стыр, Ра́стыр-Дэвлэ́стыр болыбна́скирэ-янголэнгирэстыр, со хасибэ́н пэ сари́ пхув явэ́ла, адя́кэ припхэндло.

23. Пришунэн канэнца, пошунэн мири́ зан, вышунэн и лав, со мэ пхэна́ва тумэ́нгэ.

24. Ци сарэ́ дывэса́ кэрэ́ла буты́ ману́ш, саво́ обкэрэла пхув тэ чхувэ́л зя́рка, саво́ розрискирэла (розмарэла) комки и рандэла пхув?

25. Над, ко́ли ёв розроўнинэла пхув, то ёв чхувэ́ла дрэ ла́тэ вика, ци росчхувэла кмино, ёв барьякирэ́ла гив рядэнца, барьякирэ́ла джов дро штэ́то, саво́ ваш дава́ выкэдыя́, барьякирэ́ла пашы́л лэ́стэ просо.

26. Адя́кэ исын, сыр сыклякирэ́ла Дэвэ́л лэ́скиро; Дэвэ́л дэ́ла годы́ лэ́скэ.

27. Пал-дова́ со на вымарэна вика ротаса, и укэдыбнытка ро́ты на катынэна пир кмино, а каштэса вымарэна гив и кмино.

28. Вымелинэна маро́, нэ на розмарэна лэс и лыджа́на пир лэ́стэ обмарибнытка ро́ты лэ́нгирэ грэнца и на роскхосэна (на ростринскирэна) лэс.

29. Саро́ дава́ – Ра́стыр-Дэвлэ́стыр, болыбна́скирэ-янголэскирэстыр, ди́вна ду́мы Лэ́скирэ, бари исын Лэ́скири годы́!

33. Рай Дэвэ́л пирикэрэла рэ́ки (лэня́) пэ чхучэ́ прахи и панескирэ ґанынгорья пэ шуки́ пхув:

34. умалотна пхувья́ пэ лондо шуко штэ́то – пал долэ́ манушэ́нгиро фуипэ́н, кон дживэ́ла одо́й.

35. Ёв пирискирэла шукэ́ пхувья́ дрэ зеро (озеро) и шуки́ пхув дрэ панескири ґанынгори (крыница).

36. Ёв чхувэ́ла бокхалэн тэ дживэ́н одо́й, соб (кай) ёнэ могиндлэ́ тэ ґаздэ́н фо́ро тэ дживэ́н,

37. и соб (кай) ёнэ тэ почхувэн зя́рки дрэ фэ́лды и тэ чхувэ́н винаграды́тка унты (сады), соб (кай) ёнэ тэ дэн умалотно прибарипэн (аплодо).

38. Ёв адя́кэ-паць бахтякирдя́ лэн, соб (кай) ёнэ тэ розбарьён зоралэ́с, и Ёв на домэкэла, соб (кай) тэ явэ́л тыкнэды́р мурдалэ́н лэ́ндэ.

39. Нэ ке́ли лэн яця́ тыкнэды́р, и ёнэ ячнэ́ штыл (тиха) – лэн тэлякирэнас, притасавэнас и калякирэнас,

40. тэды Рай Дэвэ́л чхудя́ ладж пэ барэ́ рандэ Наюдытконэ́ нацые́ндыр и кэрдя́ адя́кэ, со ёнэ гинэ́ тэ псирэ́н одори́к, палэ пэ чхучи́ пхув, кай нанэ дром.

41. Нэ Ёв ґаздыя́ чорорэ́ манушэ́н притасаибнастыр и зачхудя Лэ́нгирэ сэм΄и (ирья́) тэ явэ́н сыр гурты.

42. Патяибнаскирэ дыкхэ́на дава́ и радынэ́напэ, а сарэ́ чорэ́ мануша́ пхандэна пэ́скирэ муя́.

43. Кон исын годо́, мэк ёв тэ рикирэлпэ кэ саро́ дава́, мэк ёв тэ ґалёл Ра́скирэ-Дэвлэ́скири лачхэ́-илы́ткима.

20. Тэ багас гиля́ смэнтнонэ илэскэ исын сы́рбы тэ лэс криг лэ́стыр и́дя, ци тэ чхувэ́с шут (уксусо) пэ даб (рана).

1. А мэ, Па́вли, кокоро́, манга́ва тумэн пир напхувитко ковлыпэн Христосо́скиро, мэ, саво́ сом ковлэ́-илы́тко тумэ́нца, нэ саво́ сом муршкано́, ке́ли мэ на сом тумэ́нца;

2. мэ манга́ва тумэн, ке́ли мэ ява́ва, соб (кай) ма́нгэ тэ сыкавав муршыпэн дасавэ́-паць зорья́са, савья́са мэ думинава пэ́скэ тэ сыкавав вари-савэ́ манушэ́нгэ, кон ракирэ́ла, со амэ, хачи, кэра́са пир далэ́ свэто́скирэ-манушы́тко годы́.

3. Пал-дова́ со амэ дживаса пэ дава́ свэ́то, нэ амэ на марасапэ далэ́-свэто́скирэ годя́са.

4. И амаро́ марды́тко (оружыё), савэ́са амэ марасапэ, исын на далэ́ свэто́скирэ-манушытконэ́ годятыр, нэ амэ сам зоралэ́ Дэвлэ́скирэ зоралыпнаса, савья́са амэ пхагираса форо́скирэ рикирибэна;

5. хоханэ́ допхэныбэна и саро́, со пхутёла проти Дэвлэ́скиро дынарибэ́н; амэ пхандаса кажно годя́кири мы́сля, соб (кай) тэ явэ́л кандуны Христосо́скэ;

6. и амэ сам скэдынэ́ тэ чхувас хась (ка́ра) пэ кажно накандыпэн пало́ (после) дова́, ке́ли тумэ́ допхэнэна пэ́скиро кандыпэн.

7. Ци дыкхэ́на тумэ́ пэ манушы́тко муй? Ко́ли вари-кон зоралэ́с патя́ла дро дова́, со ёв исын Христосо́скиро, мэк ёв нэвэ́стыр тэ пиридуминэл пал дова́; лэ́скэ трэй тэ ґалёл, со амэ дасавэ́-паць сам Христосо́скирэ.

8. Нэ, ко́ли мэ буты́р ява́ва тэ шаравпэ пэ́скирэ правоса, саво́ Дэвэ́л дыя́ тэ дав васт, соб (кай) тэ барьёл тумаро́ патяибэ́н, а на ваш дова́, соб (кай) тэ чхував тэлэ́ тумэн, тэды ма́нгэ на явэ́ла ладжаво;

9. мэк дава́ тэ на здэлпэ тумэ́нгэ, со мэ камдём тэ дарьякирав (тэ страхакирав) тумэн лылэ́нца:

10. вари-савэ́ ракирэ́на, со мирэ́ лыла́ исын строга и зорьякирэна ду́хо (фа́но), нэ ке́ли ёв исын амэ́нца, нэ лэ́стэ маса́ исын бизорья́кирэ и лэ́скиро лав исын наджиндло.

11. Мэк дасаво ману́ш тэ думинэл пэ́скэ, со, савэ́ амэ сам дрэ лыла́, сыр амэ чхиндям дур тумэ́ндыр, адасавэ́-паць амэ сам пир рэ́ндо, ке́ли амэ сам тумэ́нца.

12. Палдава́ амэ́ндэ нанэ муршыпэн тэ дас чол (тими́н) пэ́скэ ци тэ припарувас (тэ зроўнина́с) пэс вари-савэ́ явирэ манушэ́нца; нэ кон дэ́ла чол и припарувэла пэс кокоро́ пэ́са, исын бигодякиро ману́ш.

13. И амэ на ява́са тэ шараспэ би меракиро, нэ пир ме́ра бутякири, сави́ Дэвэ́л выкэдыя́ ваш амэ́нгэ и сави́ доджа́ла кэ тумэ́.

14. Амэ на выджаса зорья́тыр, со амэ сы́рбы на догиям кэ тумэ́, пал-дова́ со амэ догиям кэ тумэ́ Христосо́скирэ бахталэ́ заня́са (звесяса);

15. и амэ на шарасапэ буты́р мера́тыр явирэ́-манушэ́нгирэ бутяса, нэ амэ́ндэ исын лачхо́ ужакирибэ́н, со, ко́ли тумаро́ патяибэ́н выбарьёла, то и амэ могинаса тэ кэра́с буты́ буты́р машки́р тумэ́ндэ, нэ амэ на пириджаса ме́ра, сави́ Дэвэ́л выкэдыя́ ваш амэ́нгэ,

16. тэды, соб (кай) амэ́нгэ тэ роспхэнас бахталы́ зан (звесь) пир рига́, савэ́ исын дур пал тумэ́ндэ, пал-дова́ со амэ на камаса тэ шараспэ бутяса, сави́ ужэ кэрды пир яви́р рига́.

17. А одова́, кон шарэлапэ, мэк ёв тэ шарэлпэ долэса, со Рай Дэвэ́л кэрдя́.

18. Пал-дова́ со на кодова́ ману́ш исын лачхо́, кон шарэла пэс, а кодова́, конэ́с Рай Дэвэ́л шарэла.

Romani Bible Baltic 2019

United Bible Societies for the Baltic Romani Mission