|
|
| 1. Бида Ариилоскэ, Ариилоскэ, фороскэ, кай дживдя́ Дави́до! Причхувэ́н бэрш кэ бэрш, мэк тэ замарэ́н дова́, со джа́ла, сы́рбы свэ́нто дыибэ́н. |
| 2. Нэ Мэ тасавава Ариило, явэ́на тэ годлэн, явэ́на тэ ровэ́н, и ёв ячэ́лапэ Ма́ндэ, сыр Ариило. |
| 3. Мэ ґаздавапэ пэ Ту́тэ трусця́л (кругом) марибнытконэ́ табороса, и Мэ стасавава тут стрэгаса тэ дыкхэ́н пал ту́тэ, и Мэ чхува́ва зоралы́ вучарды́ (башня) проти ту́тэ. |
| 4. Ту явэ́са тыкнякирдо кэ ладж, ту лэ́са тэ ракирэ́с пхувья́тыр, зан тыри́ на шунэ́на прахостыр, зан тыри́ явэ́ла сыр зан мулэскири; прахостыр явэ́ла тэ шэпчынэл (тэ зэмбинэл) тыри́ чиб. |
| 5. Тырэ́-вэргэнгиро бутыпэн ячэ́ла сыр дробно пра́хо, и захало; баро́ кэ дар халадыбэ́н роспхурдэлапэ, саво́ сыр пхуса, саро́ дава́ явэ́ла, ко́ли на ужакирэ́на, екха́тыр, дрэ екх мэнта (минута). |
| 6. Рай Дэвэ́л, болыбна́скирэ-янголэ́нгиро, явэ́ла кэ ту громоса и зоралэ́ заня́са, со пхув явэ́ла тэ издрал, зоралэ́ балваляса, яга́са, сави́ саро́ схачкирэ́ла. |
| 7. Сыр суно́, сыр дыкхибэ́н ратя́киро, ячэ́ла народонэнгиро бутыпэн, савэ́ явэ́на тэ марэ́нпэ Ариилоса, савэ́ явэ́на тэ ґаздэ́напэ пэ лэ́стэ и стасавэна лэс. |
| 8. И сыр бокхалэ́ манушэ́скэ, саво́ дыкхэ́ла сунэ́, со ёв ха́ла, а уштыя́ – ничи́ нанэ, сыр саво́ древа́н камэ́ла тэ пьел манушэ́скэ, саво́ дыкхэ́ла сунэ́, со ёв пьела, нэ уштыя́ и ничи́ нанэ, ди лэ́скиро млеинэла (исын трушало), адя́кэ явэ́ла народо лэ́нгирэ бутыпнаса, савэ́ марэнапэ бэргаса Сионоса. |
| 9. Прилэ́н дава́ пал ди́во: ёнэ корьякирдэ явирэ́н и кокорэ́ коринэ, ёнэ исын матэ, нэ на пал-дова́, со пинэ́ мол (вино), ёнэ кунинэнапэ (качынэнапэ), нэ на палдова́, со сикера (бравинта) пинэ́. |
| 10. Дыя́ тумэ́нгэ Рай Дэвэ́л соибнытко, закэрдя тумарэ́ якха́, проро́ки, закэрдя тумарэ́ шэрэ́, джиныбнарья (маги). |
| 11. И кажно ангилпхэныбэ́н ваш тумэ́нгэ исын сыр лава́ дрэ закэрды лылвари́. Ла подэна манушэ́скэ, саво́ гинэ́ла и ракирэ́на: “Гин ла!” Нэ ёв пхэнэ́ла: “На прогинава, пал-дова́ со ёй исын закэрды (пхандлы).” |
| 12. Тэ́ньци пиридэна лылвари́ одолэ́скэ, кон на джинэ́ла тэ гинэл и ракирэ́на: “Гин ла!”, – нэ ёв ракирэ́ла: “Мэ на джина́в тэ гинав.” |
| 13. И пхэндя́ Рай Дэвэ́л: “Палдова́ со дава́ народо джа́ла кэ Мэ пэ́скирэ уштэ́нца и шарэла Ман пэ́скирэ чиба́са, нэ ило́ лэ́скиро дур отгия́ Ма́ндыр, и дова́, со ёнэ ґаздэ́на Ма́нгэ паты́в дрэ дар долэса, со сыклякирэ́на манушэ́нгирэ упхэныбэна́, |
| 14. то, акэ, Мэ адя́кэ кэра́ва далэ́ народоса дивнэс, сыр николи на сыс; хасёла годы́ лэ́скирэ годьварэ́ манушэ́ндэ, залэлапэ (на явэ́ла) годы́ годэ́ манушэ́ндэ.” |
| 15. Бида кодолэ́нгэ, кон думинэ́ла тэ гарадёл дро хор штэ́то, соб (кай) тэ на джинэ́л Рай Дэвэ́л лэ́нгирэ ду́мы, савэ́ кэрэ́на пэ́скирэ рэ́нды дро калыпэ́н и ракирэ́на: “Кон дыкхэ́ла амэн? Кон ґалёла пал амэ́ндэ?” |
| 16. Саво́ дылныпэ́н! Ци прилэ́на бутярис пир ґлэя (глина) пал лэ́скири буты́ ґлэятыр? Ци пхэнэ́ла создыно́ предмето пал Кодолэстэ, Кон лэс создыя́: “На Ёв создыя́ ман”, – ци пхэнэ́ла пал пэ́скирэ хуластэ: “Ёв на ґалёла?” |
| 17. Ишчо (инкэ́) на́бут, сарэ́са на́бут, и ци на пирикэрэлапэ Лива́но дрэ у́нта (садо), на явэ́на ци тэ шарэ́н у́нта, сыр вэш? |
| 18. Дро дова́ дывэ́с кашукэ мануша́ шунэ́на лава́ лылварьятыр, корорэнгирэ якха́ лэ́на тэ дыкхэ́н. |
| 19. И раманёна (мирна) мануша́ ишчо (инкэ́) буты́р явэ́на тэ радынэ́нпэ пал Растэ-Дэвлэ́стэ, чорорэ́ мануша́ явэ́на зоралэ́с тэ радынэ́нпэ пал Свэнтонэ́-Израилёскирэ Дэвлэ́стэ. |
| 20. Пал-дова́ со нико́н буты́р лэ́нгэ на явэ́ла тэ кэрэ́л биба́хт, кошыбнари хасёла, и хасякирэна сарэ́н, кон на кэрэ́ла пир чачипэ́н. |
| 21. Ци кон запэнтынэла манушэ́с дрэ лава́, ци ухтылэ́ла манушэ́с, саво́ мангэ́ла сэ́ндо пашы́л по́рта, кон на прилэ́ла чачунэ́ манушэ́с. |
| 22. Палдава́ адя́кэ ракирэ́ла пал кхэр Яково́скиро Рай Дэвэ́л, Саво́ выкиндя Авраамос: “Тэ́ньци Яково на явэ́ла тэ ладжал и муй лэ́скиро на парнёла. |
| 23. Ко́ли дыкхэ́ла ёв пэ́стэ пэ́скирэ чхаворэ́н, савэ́н дыём Мэ лэ́скэ, ёнэ дэ́на паты́в Мирэ́ лавэ́скэ, дэ́на паты́в Свэнтонэ́ Израилёскирэ Дэвлэ́скэ, и ёнэ явэ́на тэ дарэ́н радыма́са Израилёскирэ Дэвлэ́стыр. |
| 24. Тэ́ньци одолэ́, кон блэндынэла духо́са, прилэ́ла годы́, а кодолэ́, кон на кандэ́ла, сыклёна, сыр тэ кандэ́н.” |
|
|
| 1. Гилы́ Давидо́скиро Пса́лмо. |
| 2. Миро ило́ исын скэдымо: о Дэ́вла! Мэ ява́ва тэ бага́в и тэ шара́в Тут. |
| 3. Джангадён гусли и арфа: мэ джангавава кхам, сыр дывэсёла. |
| 4. Мэ ява́ва тэ шара́в Тут машки́р манушэ́ндэ, о Раё Дэ́вла, мэ ява́ва тэ бага́в Ту́кэ машки́р манушыпнаскирэ на́цыи: |
| 5. пал-дова́ со Тыри́ лачхэ́-илы́ткима исын вучэды́р болыбна́стыр и Тыро́ патяибэ́н доджа́ла кэ о́блоки. |
| 6. Тэ барьякирэл Тут саро́ вучэды́р болыбна́стыр, о Дэ́вла, мэк тэ явэ́л Тыри́ сла́ва вучэды́р пхувья́тыр, |
|
|
| 21. Ко́ли тыро́ вэ́рго исын бокхало, дэ лэ́скэ маро́ тэ хал; ци ко́ли ёв камэ́ла тэ пьел, дэ лэ́скэ пани́ тэ пьел: |
| 22. палдава́, кэри дава́, ту кэдэса хачкирдэ́ вангара пэ лэ́скиро шэро́ и Рай Дэвэ́л отдэ́ла мазу́ри (награда) пал дова́, со ту са́нас лачхо́ кэ вэ́рго. |
|
|
| 1. Мэ камамас, соб (кай) тумэ́ мэк на́бут тэ вырикирэн миро бигодякирибэн; тэды вырикирэн и ман. |
| 2. Пал-дова́ со ма́ндэ сыс илэ́скиро хачкирибэ́н пал тумэ́ндэ Дэвлэ́скирэ хачкирибнаса, пал-дова́ со мэ дыём лав (ангрустякирдём тумэн) Екхэ́ Манушэ́скэ, Христосо́скэ, соб (кай) тумэ́ тэ явэ́н анги́л Лэ́стэ сы́рбы патывалы́ тэрнори́. |
| 3. Нэ мэ дарава, со, сыр сап хохадя Ева пэ́скирэ фротыма́са, адя́кэ-паць, соб (кай) и тумари́ годы́ тэ на пошкодинэлпэ и, соб (кай) тумэ́ тэ на отрисён простонэ патяибнастыр дрэ Христосо́стэ. |
| 4. Пал-дова́ со, ко́ли вари-кон яви́р, чачэс, явэ́лас кэ тумэ́ и роспхэнэлас пал сы́рбы явирэ́ Христо́стэ, конэ́с амэ на роспхэндям, ци ко́ли тумэ́ прилынэ́ яви́р Ду́хо (Фа́но), Савэс тумэ́ ґарыдыр на прилэнас; и тумэ́ прилэнас яви́р бахталы́ зан (звесь), сави́ тумэ́ ґарэдыр на приджинэнас, – дыкхэ́н: сыр тумэ́ локхэс прилэнас дасавэ́ манушэ́с! |
| 5. И мэ гинава, со мэ ни дро со на сом тэлэды́р кадалэ́ барэ́ Апостолэндыр |
| 6. И ко́ли миро ракирибэ́н исын нагожо, нэ ма́ндэ исын джиныбэ́н дро дова́, со мэ ракира́ва: тумэ́ ж кокорэ́ дыкхнэ́ дава́ пир саро́. |
| 7. Нау́што кэрдём мэ грэ́хо, ко́ли мэ чхудём пэс тэлэды́р, соб (кай) тэ чхував тумэн вучэды́р, ке́ли мэ роспхэнавас Дэвлэ́скири бахталы́ зан (звесь) и мэ на лавас ловэ́ лэ́ндыр? |
| 8. Мэ обкэдыём явирэ-кхангирья́кирэ скэдыибэна, со мэ лавас ловэ́ лэ́ндыр пал пэ́скири буты́, соб (кай) тэ дынаринав тумэ́нгэ. И ке́ли мэ со́мас тумэ́нца и ма́ндэ сыс трэ́бима дро вари-со, ма́ндыр на сыс ни саво́ пхарипэ́н тумэ́нгэ, |
| 9. пал-дова́ со пша́ла Македониятыр дынэ́ ма́нгэ саро́, дро со ма́ндэ сыс трэ́бима, и мэ причхудём зор дро саро́ и мэ дурэды́р ява́ва тэ причхував зор, соб (кай) тэ на явэ́л ни саво́ пхарипэ́н ма́ндыр тумэ́ндэ. |
| 10. И пир Христосо́скиро чачипэ́н, саво́ исын дрэ ма́ндэ, мэ на́ пирияча́ва тэ шаравпэ сыр биловэнгиро дына́ри пир Ахаякирэ рига́. |
| 11. Со́скэ адя́кэ? Ци тумэ́ на сан дро́га ма́нгэ? Дэвэ́л джинэ́ла, со мэ кэра́ва. А со мэ кэра́ва, мэ дурэды́р ява́ва тэ кэра́в, |
| 12. соб (кай) ма́нгэ тэ на дав саштыпэн (возможность/ваканцыя) одолэ́нгэ, савэ́ шарэна пэс, со ёнэ кэрэ́на адя́кэ-паць, сыр и амэ. |
| 13. Пал-дова́ со кадалэ́ мануша́ исын хоханэ́ Апо́столы, начачунэ бутярнэ́, савэ́ выдэна пэс пал Христосо́скирэ Апостолэндэ. |
| 14. И дава́ нанэ баро́ ди́во, пал-дова́ со на́лачхо кокоро́ выдэла пэс пал Янголостэ дудэ́стыр (свэто́стыр). |
| 15. Дава́ исын набаро́ рэ́ндо, ко́ли лэ́скирэ бутярнэ́ выдэна пэс пал дынарье́ндэ пир чачипэ́н; нэ ёнэ дорэсэ́на пэ́скиро пир лэ́нгири буты́ дро ко́нцо (дро яго́ро). |
|
|
| Romani Bible Baltic 2019 |
| United Bible Societies for the Baltic Romani Mission |