Bible in one year September 20Isaiah 30:1-331. “Бида чхавэ́нгэ, савэ́ на кандэ́на,” – ракирэ́ла Рай Дэвэ́л, – “савэ́ обракирэна рэ́нды (де́лы) би Миро, доракирэнпэ на пир Миро ду́хо (фа́но), а соб (кай) тэ причхувэ́н грэ́хо кэ грэ́хо.2. На пхучэнапэ Ма́ндыр, а джа́на дро Еги́пто, соб (кай) тэ подрикирэн пэс фараоно́скирэ зорья́са и тэ гарадён дро Еги́пто.3. Нэ зор фараоноскири ячэ́ла ваш тумэ́нгэ ладжаса, и ко́ли тумэ́ гарадёна дро Еги́пто, то ладжаво тумэ́нгэ явэ́ла.4. Пал-дова́, со тхага́рья (кня́зи) лэ́скирэ исын дро Цоано, бичхадэ́ мануша́ (послы) лэ́скирэ догинэ́ кэ Ханесо.5. Сарэ́ ёнэ явэ́на ладжакирдэ́ пал народо, саво́ лэ́нгэ на трэй, нисаво́ подрикирибэ́н лэ́стыр на явэ́ла, екх ладж и бизладо.”6. Пхарипэ́н пасёла пэ грэ́ндэ, савэ́ джа́на пэ паш-дывэ́с (юго), пир пхув, кай тасавэна и притасавэ́на, каты́р выджа́на саплыня и кармуса (мышы), савэ́ вурняна; ёнэ лыджа́на пэ ослэндэ пэ́скиро барвалыпэ́н и пэ верблюдэндэ пэ́скиро кучипэ́н, лыджа́на кэ народо, савэ́стыр ничи́ лачхо́ на прилэ́на (нисаво́ лачхипэ́н на явэ́ла).7. На подрикирэ́ла лэн Еги́пто, палдава́ Мэ пхэндём лэ́нгэ: “Лэ́нгири зор – штылэ́с тэ бэшэ́н.”8. Акана́ подджа, зачхин саро́ дава́ пэ пхал, зачхин дрэ лылвари́, соб (кай) тэ ячэ́лпэ дава́ пэ дывэса́, савэ́ явэ́на, пэ саро́ часо (цы́ро).9. Пал-дова́, со ёнэ исын бунтяритко народо, (саво́ никонэ́с на кандэ́ла), хоханэ́ чхаворэ́, савэ́ на камэ́на тэ шунэ́н Ра́скирэ-Дэвлэ́скиро Зако́но.10. Савэ ракирэ́на одолэ́нгэ, кон дыкхэ́ла чачипэ́н: “Пириячэн тэ дыкхэ́н!”, – а кэ проро́ки: “На ангилпхэнэн амэ́нгэ чачипэ́н, ракирэ́н амэ́нгэ лачхэ́ лава́.11. Зджан дромэ́стыр, уджан дромэ́стыр, залэн амарэ́ якхэ́ндыр Свэнтонэ́-Израилёскирэ Дэвлэ́с.”12. Палдава́ адя́кэ ракирэ́ла Свэ́нто Израилёскиро Дэвэ́л: “Ко́ли тумэ́ на прилэ́на кэ годы́ дава́ лав, а исын тумари́ наде́я пэ хохаибэ́н и начачипэ́н, со дава́ тумэн подрикирэ́ла,13. то тэ́ньчи дава́ грэ́хо явэ́ла ваш тумэ́нгэ, сыр роспхагирды ва́нта, сави́ пхадёла, ко́ли на ужакирэ́на.14. Ёв роспхагирэла ла, сыр розмарэна кхоро́, розмарэна и на тангинэна тэ розмарэн адя́кэ, со на ячэ́лапэ котэроро, со буты́р на лэ́са, вангар ягатыр ци пани́ ганынгатыр.”15. Адя́кэ ракирэ́ла Рай Дэвэ́л, Дэвэ́л Свэ́нто Израилёскиро: “Ко́ли б тумэ́ ячнэ́пэ пэ екх штэ́то, тэ́ньчи бы тумэ́ зракхнэпэ; штылыпэн и наде́я исын зор тумари́, нэ тумэ́ на закамлэ.16. И ракирэ́нас: “Над, амэ пэ грэ́ндэ нашаса”, – пал дава́ и нашэ́на”, “Нашаса пэ лачхэ́ грэ́ндэ”, – палдава́ потрадэнапэ пал тумэ́ндэ сы́гэс.17. Екхэ манушэ́стыр, дара́тыр нашэла тысёнцо, панджэ́ манушэ́ндыр нашэ́на адя́кэ, со ячаибэ́н тумаро́ явэ́ла сыр дэсто́ пэ вучи́ бэ́рга, сыр марибны́тко шпэ́ра пэ бэ́ргица.18. Палдава́ Рай Дэвэ́л ишчо (инкэ́) ничи́ на кэрэ́ла (ужакирэ́ла), соб (кай) Ёв тэ потангинэл тумэн, ужакирэ́ла, соб (кай) тэ тангинэ́л тумэн; Рай Дэвэ́л исын Дэвэ́л чачипна́скиро; бахталэ́ сарэ́, конэ́стэ исын наде́я пэ Лэ́стэ!19. Народо явэ́ла тэ дживэ́л пэ Сио́но кэ Ерусалимо, ту бут на явэ́са тэ ровэс, – Ёв потангинэла (пожалинэла) тут, ко́ли ту загодлэса, Ёв шунэ́ла тыри́ зан и отпхэнэ́ла ту́кэ.20. И дэ́ла тумэ́нгэ Рай Дэвэ́л маро́ дрэ биба́хт и пани́ дрэ би́да; тырэ́ сыкляибнарья на явэ́на тэ гаравэнпэ и якха́ тырэ́ явэ́на лэн тэ дыкхэ́н.21. И кана́ тырэ́ шунэ́на лав, саво́ ракирэ́ла пала́л ту́тэ: “Акэ, исын дром, джа́н пир лэ́стэ”; ко́ли ту зджаса дромэ́стыр пэ чачи́ (право) риг ци пэ зэ́рво (ле́во) риг.22. Тэ́ньци тумэ́ ґалёна, со на́лачхо исын идолэнгиро укэдыибэн тырэ́ рупэ́стыр и тырэ́ сувнака́стыр; ту чхурдэса пэ́скирэ и́долы, сыр магирипэ́н, и пхэнэ́са лэ́нгэ: “Джа́н криг адатхы́р.”23. И Ёв дэ́ла ту́кэ брышы́нд, ко́ли засеинэса фэ́лда и маро́, саво́ янэ́ла пхув сыр барьякирдо́ (пло́до), лачхо́ маро́ дэ́ла ту́кэ; тырэ́ гурува лэ́на тэ чаравэнпэ дро дова́ дывэ́с пэ лачхэ́ фэ́лды.24. Гурува и граё, савэ́ кэрэ́на буты́ пэ фэ́лда, лэ́на тэ хан лондо хабэ́н, хабэ́н жужакирдо и пиривеиндло ґандладяса (лопатаса).25. И пэ кажно бэ́рга, пэ кажно бэ́ргица тхадэ́ла пани́, дава́ явэ́ла дрэ баро́ марибны́тко дывэ́с, ко́ли вучэ́ кхэра́ пэрэ́на.26. Чхон явэ́ла тэ хачол сыр кхам, а кхамитко яг явэ́ла дрэ эфта́ мо́лы яснэдыр (зоралэды́р); саро́ дава́ явэ́ла дро дова́ дывэ́с, ко́ли обпхандэла Рай Дэвэ́л дукхано штэ́то лэ́скирэ народоскиро, высастякирэла лэ́скирэ дукха́.27. Акэ, лав Ра́скирэ-Дэвлэ́скиро джа́ла дура́л, хачола Лэ́скири холы́, хачола зоралэ́с; ушта́ Лэ́скирэ пхэрдэ́ холя́са, чиб Лэ́скири сыр яг, сави́ саро́ схала.28. Лэ́скиро пхурдыпэн – сыр пани́, саво́ ишчо (инкэ́) кэ мэн ґаздэ́лапэ, соб (кай) тэ розпхурдэл народы сарэ́са; дрэ лэ́нгиро муй явэ́ла савари, со лыджа́ла кэ хохаибэ́н (блэ́ндо).29. А кэ тумэ́ явэ́на гиля́ сыр ратя́киро пэ свэ́нто свэ́нко, и явэ́ла радыпнытко (лошало) / тэ радынэ́лпэ ило́ сыр одолэ́стэ, кон башавэла и ґаздэ́лапэ пэ бэ́рга Ра́скирэ-Дэвлэ́скири свиролькаса, кэ зоралыпэ́н Израилёскиро.30. И дэ́ла Рай Дэвэ́л, соб (кай) тэ шунэ́н бари зан Лэ́скири и сыкавэ́ла васт Пэ́скиро, саво́ змэкэлпэ дрэ зоралы́ холы́, дрэ яг, сави́ саро́ схала, дрэ холями балва́л, дро пани́, саво́ ґаздэлпэ пэ пхув, дро брышы́нд барэ́нца.31. Ра́скирэ-Дэвлэ́скирэ занятыр издрала Асуро, савэ́с марэна дэстэса.32. И пэкавэла лэс дава́ дэсто́, дэсто́, саво́ Рай Дэвэ́л вылыджала пэ лэ́стэ бубнэнца и арфэнца; и Ёв явэ́ла пэ Лэ́стэ барэ́ марибна́са.33. Пал-дова́ со Тофето ґара́ кэрдо́; ёв сыс кэрдо́ ваш крали́скэ, ёв исын хор и бугло; дрэ яг лэ́скири бут кашта́ чхудэ́; пхурдыпэн Ра́скирэ-Дэвлэ́скиро лэс захачкирэла лэс сыр хачкирды се́ра (дзэвэ́ля).Isaiah 31:1-91. Бида одолэ́нгэ, савэ́ джа́на дро Еги́пто пал подрикирибэ́н, наде́я лэ́нгири пэ грэ́ндэ и пэ марибны́тка вурдэна́, пал-дова́ со бут лэн исын, пэ манушэ́ндэ, савэ́ традэ́на уклистэ́ пэ грэ́ндэ, савэ́ исын зоралэ́, а пэ Свэ́нто Израилё ёнэ на дыкхэ́на, и кэ Рай Дэвэ́л ёнэ на джа́на!2. Нэ Ёв исын са́мо годьваро́, и янэ́ла биба́хт (би́да), и Ёв на отпарувэла Пэ́скирэ лава́; ґаздэ́лапэ пэ грэхитконэ́-манушэ́нгиро кхэр, пэ подрикирибэ́н одолэнгиро, кон кэрэ́ла грэ́хи.3. Египтя́ни исын мануша́, а на Дэвэ́л, дрэ грэ́ндэ лэнгирэндэ нанэ ду́хо (фа́но), а екх маса́. И протырдэла Рай Дэвэ́л Пэ́скиро васт, и явэ́ла тэ лангал зракхибнари и пэрэ́ла одова́, конэ́с зракхэна и хасёна сарэ́ кхэтанэ́.4. Пал-дова́ со адя́кэ пхэндя́ ма́нгэ Рай Дэвэ́л: “Сыр шчэр (ле́во), сыр лэ́скиро тыкноро, саво́ на отдэ́ла пэ́скиро дорэсыбэ́н (добыча), мэк и годлэн пэ лэ́стэ чхупна́рья, адя́кэ Рай Дэвэ́л, болыбна́скирэ-янголэ́нгиро, джа́ла тэ марэ́лпэ пал бэ́рга Сио́но, пал бэ́ргица лэ́скири.5. Сыр чирикля́ учхакирэна пэ́скирэ чхавринэн (птенцэн), адя́кэ Рай Дэвэ́л, болыбна́скирэ-янголэ́нгиро, учхакирэ́ла Ерусалимо, зракхэ́ла и потангинэла (пожалинэла) лэс.”6. Рисён кэ Одова́, Конэ́стыр тумэ́ отгинэ́ пэ́скэ, чхавэ́ Израилёскирэ!7. Дро дова́ дывэ́с вычхурдэла кажно ману́ш пэ́скирэ руповэ и сувнакунэ́ и́долы, савэ́ васта́ тумарэ́ кэрдэ́ пэ грэ́хо тумэ́нгэ.8. “И Асуро пэрэ́ла на манушэ́скирэ куртала́тыр, на манушэскири курта́ла лэс хасякирла; ёв зракхэ́лапэ куртала́тыр, тэрнэ́ чхавэ́ лэ́скирэ ячэ́на писхарье́нца (рабэнца).9. И дара́тыр пирипрастала ёв пашы́л пэ́скири тва́рдыма (крепость), и раё лэ́скирэ дарэ́на сыкаибнастыр” – ракирэ́ла Рай Дэвэ́л, Конэ́скири яг исын пэ Сио́но, Конэ́скиро бов исын дро Ерусалимо.Isaiah 32:1-201. Акэ, кра́ли явэ́ла тэ кралинэ́л пир чачипэ́н и тхага́рья (кня́зи) явэ́на тэ хулаинэн пир зако́но.2. Кажно лэ́ндыр явэ́ла сыр зракхибэ́н балвалятыр, сыр зракхибэ́н брышындэстыр, сыр пани́ пэ шуки́ (чхучи́) пхув, сыр бэ́рга, сави́ закэрэла кхамэстыр чхучи́ пхув.3. И якха́ одолэнгирэ, кон дыкхэ́ла, на закэрнапэ, и кана́ одолэнгирэ, кон шунэ́ла, явэ́на тэ шунэ́н.4. Ило́ одолэнгиро, кон ни палсо́ на думинэ́ла, прилэ́ла годы́; бичибакирэ (кон фуес ракирэ́ла) лэ́на тэ ракирэ́н яснэс.5. Одолэ́скэ, кон ничи́ на джинэ́ла на дэ́на буты́р паты́в, пал хохаибнаристэ [захалэстэ-р.с.] на пхэнэ́на, со ёв кэрэ́ла пир чачипэ́н.6. Пал-дова́ со буро ману́ш (невежда), ракирэ́ла дылныпэ́н, лэ́скиро ило́ думинэ́ла пал чорипэ́н, соб (кай) тэ кэрэ́л хохаибнаса, тэ калякирэл Рас-Дэвлэ́с, тэ лэл маро́ бокхалэстыр и пибэ́н манушэ́стыр, саво́ камэ́ла пани́.7. Фрэнто (холямо́) ману́ш кэрэ́ла хасибны́тка рэ́нды: ёв думинэ́ла, пал фуипэ́н, соб (кай) тэ хасякирэ́л чорорэс хоханэ́ лавэ́нца и тэды, ко́ли чороро́ кэрэ́ла пир чачипэ́н.8. А патывало ману́ш думинэ́ла пал паты́в; ёв твардэс тэрдо́ дро чачипэ́н.9. Джувлялэ (манушнялэ) балвалитка! Уштэ́н, шунэ́н куты́ (на́бут) мири́ зан! Чхаялэ, савэ́ ни палсо́ на думинэ́на! Шунэ́н мирэ́ лава́!10. Ишчо вари-кицы́ дывэса́ буты́р бэршэстыр и ячэ́на тэ дарэ́н, балвалитка (биракхибнаскирэ)! Пал-дова́ со на явэ́на тэ скэдэ́н винаградо, на явэ́на тэ кэдэн маро́.11. Дарэ́н, балвалитка (биракхибнаскирэ), дарэ́н одолэ́, кон ни палсо́ на думинэ́ла (наракхибнытка)! Злэн и́дя, розурьенпэ, обпхандэн пэ́скирэ маса́ пэ трушу́л.12. Дро колы́н явэ́на пэс тэ марэ́н пал лачхэ́ фэ́лды, пал лачхи́ рандь винаградоскири.13. Пэ мирэ́-народоскири пхув явэ́ла тэ барьёл пхусады чар и хру́сты сувьенца, сыр и пэ сарэ́ радымакирэ кхэра́ дро фо́ро, саво́ радынэ́лапэ.14. Райканэ кхэра́ (харомы) ячкирэна, фо́ро, саво́ шуминэла, ёв чхурдыно́ явэ́ла. Офело и вучарды́ (башня) явэ́на штэтоса, кай гаравэнапэ ослы (мега́рья) и ста́ды, савэ́ чаравэнапэ.15. Кэ дова́ дывэ́с, ко́ли чхувэ́лапэ пэ амэ́ндэ Ду́хо (Фа́но) упралэстыр и чхучи́ пхув пирикэрлапэ дрэ у́нта (садо), а у́нта (садо) на явэ́на тэ прилэ́н (тэ гинэн) пал вэш.16. Тэ́ньци сэ́ндо явэ́ла тэ рикирэ́л зор пэ кадая́ чхучи́ пхув, и чачуно́ сэ́ндо явэ́ла тэ дживэ́л пэ лачхи́ фэ́лда.17. И явэ́ла рама́нё (миро) кажнонэ́ чачипнаскирэ рэндостыр, а чачуно́ сэ́ндо янэ́ла штылыпэн, и на явэ́на тэ дарэ́н никонэстыр дрэ сарэ́ дывэса́ (ве́ки).18. Тэ́ньци миро народо явэ́ла тэ дживэ́л пэ штэ́то, кай исын рама́нё (миро), пэ штэ́то, кай на дарэ́на, пэ бахталэ́ штэ́ты, кай откхинёна.19. На дыкхи́, со градо пэрэ́ла пэ вэш, фо́ро пэ до́ло тэлэ́ змэкэлапэ.20. Бахталэ́ исын тумэ́, кон сеинэла пашо пани́, и кон бичхавэ́ла одори́к гурувэ́с и осло́с.Psalms 108:7-137. соб (кай) тэ зракхэнпэ одолэ́, конэ́с Ту выкэдыян Пэ́скэ. Помо́гин (посо́бин) тэ зракхэнпэ Тырэ́ чачэ́ вастэ́са и отпхэн ма́нгэ.8. Дэвэ́л пхэндя́ пэ Пэ́скиро Свэ́нто Штэ́то: “Мэ ґаздавапэ радыма́са, Мэ роскэрава пэ паша́ Сихемо, и Мэ розмеринава Сукотоскиро до́ло.9. Миро исын Галаа́до, и Миро исын Мана́сия, Ефре́мо исын тва́рдыма тэ ракхэ́л Миро шэро́; Юда исын Мирэ́–крали́скиро дэсто́ (жэзло).10. Моа́во исын Миро чаро́ москэ (умывальница), Мэ чхурдава Мири́ шкорня пир Эдо́мо: пир Филистимия Мэ ява́ва тэ дав го́дла радыма́са.11. Кон янэ́ла Ман дро зорало́ фо́ро? Кон лыджа́ла Ман кэ Эдо́мо?12. Ци Ту чхурдыян амэн дрэ риг, чачэс, Дэ́вла? Ци Ту на джа́са анги́л амарэ́ халадыбнэндыр?13. Дэ васт тэ тэрдёвав проти пхарипэ́н, палдова со хартытко (подхалимо) исын, ке́ли мануша́ дэ́на васт тэ зракхэн.Proverbs 25:23-2423. Паш-ратякири (шылалэ-ригакири) балва́л лыджа́ла кэ брышы́нд, и бэдытко (чораханы) чиб лыджа́ла кэ холямо́ муй.24. Фэды́р исын тэ дживэ́с пэ кунто пэ кхэрэ́скири стрэ́ха (чхаки́н), сыр тэ явэс кхэтанэ́ джувля́са, сави́ чингардэлапэ.2 Korinťanenge 11:16-3316. Нэвэ́стыр мэ пхэна́ва: мэк нико́н тэ на думинэл пал ма́ндэ сыр пал дылынэстэ, прилэ́н ман адасавэса, саво́ мэ сом – сы́рбы дылынэса, соб (кай) ма́нгэ на́бут тэ шаравпэ.17. А дова́, со мэ какана́ ракира́ва, дава́ исын на пир Дэвлэ́скиро чачипэ́н, а сы́рбы пир дылыно́ муршыпэн.18. Пал-дова́ со бут мануша́ шарэнапэ пир далэ́-свэто́скирэ манушы́тко годы́, тэды и мэ адя́кэ-паць ява́ва тэ шаравпэ.19. А тумэ́ ж сан годьварэ́ мануша́, и тумэ́ локхэс вышунэна дылынэн.20. Ци вырикирэна тумэ́, ке́ли вари-кон лэ́ла упралыпэ́н пэ тумэ́ндэ, ци дживэ́ла пал тумарэ́ ловэ́, ци обчорэла тумэн, ци пхутёла, ци марэла тумэн пир муй?21. И мэ ракира́ва дава́ кэ мири́ ладж, со на ухтылдя амэ́ндэ зор ваш дава́; а ко́ли вари-конэ́стэ исын муршыпэн пэ дава́, то адя́кэ-паць исын муршыпэн и ма́ндэ на пир бари годы́.22. Исын ёнэ Юды? Мэ адя́кэ-паць сом. Исын ёнэ Израилёскирэ? Мэ адя́кэ-паць сом. Исын ёнэ Авраамо́скирэ родо́стыр? Мэ адя́кэ-паць сом.23. Исын ёнэ Христосо́скирэ дына́рья? Пир миро бигодякирибэн пхэна́ва, со мэ буты́р сом дасаво: буты́р дрэ пхари́ буты́, дрэ фра́нсы (ра́ны) би меракиро, мэ буты́р со́мас дро штарибэ́н, и частэс мэ сом дрэ дар кэ мэрибэ́н.24. Юды мардэ́ ман пандж мо́лы пир штардэша́ пэкаибэна би екхэскиро.25. Трин мо́лы ман мардэ́ каштэнца, е́кхвар ман шулякирдэ барэ́нца, трин мо́лы мэ тасадёвавас пэ пхагирды́ па́рма (кораблё), мэ со́мас дывэ́с и рат пэ са́мо тэнибэ́н (дно) дро морёскири пани́:26. мэ со́мас бут мо́лы дрэ дрома́, дрэ дар пэ рэка (лэнь), дрэ розмарибнэнгирэ васта́, дрэ дар пэ́скирэ манушэ́ндыр, дрэ дар Юдэндыр, дрэ дар Наюдэндыр: дрэ дар дро фо́ро, пэ чхучи́ пхув, дрэ дар пэ мо́рё (дэрья́в), дрэ дар хоханэ́ пшалэ́ндыр;27. мэ бут кэрдём буты́ и со́мас залыно (залымо) пхарэ́ бутяса, со́мас бисоибнаскиро, бокхало. Ма́ндэ сыс труш (смэга); мэ постиндём пир шыл и би идякиро.28. Апри́ч далэ́ сарэ́ пиридживибэна рига́тыр, ма́ндэ со дывэ́с сыс пхэрдо́ мануша́ и мэ пхарэ́с думинавас пал кхангирья́кирэ скэдыибэна.29. Ко́ли вари-кон исын бигодякиро, тэды и мэ сом бигодякиро; ке́ли вари-кон кэрэ́ла грэ́хо, тэды и миро ило́ хачола пиридживипнастыр.30. Ко́ли ма́нгэ трэй тэ шаравпэ вари-со́са, мэ ява́ва тэ шаравпэ долэса, дро со мэ сом бизорья́киро.31. Дэвэ́л и Дад амарэ́ Ра́скирэ-Дэвлэ́скиро, Исусо́скирэ Христосо́скиро – ґа́да, Ёв, тэ явэ́л бахтякирдо́, тэ явэ́л Лэ́скиро лав пэ сарэ́ бэрша́, джинэ́ла, со мэ на хохавава.32. Дро Дама́ско Крали́скирэ Аретаскиро рикирэлас стрэ́га пир Дама́ско, ками́ тэ запхандэл ман;33. [дава́ стихо нанэ дрэ-р.с.], и пир фэнштра дро кхудо́ (корзина) ман змэкнэ упралэ́стыр и адя́кэ мэ насцём лэ́нгирэ вастэ́ндыр. Romani Bible Baltic 2019 Maintained by the United Bible Societies for the Baltic Romani Mission