Bible in one year September 21Isaiah 33:1-241. Бида ту́кэ одова́, кон исын мижэх чор, конэ́стыр на отлэнас, и чор, конэ́стыр на чорэнас! Ко́ли обчорэса саро́ [мэкэса тэ чорэс-р.с.], ту́тыр отлэна, ко́ли пириячэса тэ чорэс, ту́тыр чорэна.2. Раё Дэ́вла! Зра́кх амэн! Пэ Ту́тэ исын амари́ наде́я. Яв тася́рлэс (ра́нэс) амарэ́ вастэ́са, амарэ́ зракхибнаса дро пхаро́ часо.3. Тырэ́ даранэ занятыр нашэ́на народы, ко́ли уштэса, роспрастанапэ кхэри́тка ро́ды (пле́ми).4. И явэ́на тэ кэдэн тумаро́ дорэсыбэ́н, сыр кирмо скэдэ́ла, чхурдэнапэ пэ лэ́стэ, сыр пхакитка скочки (саранча) чхурдэнапэ.5. Баро́ исын Рай Дэвэ́л, саво́ дрэ вучипэ́н дживэ́ла; Ёв пхэрдякирэла Сио́но сэндоса и чачипна́са.6. И явэ́ла часо, ко́ли на явэ́на тэ дарэ́н никонэстыр, ко́ли явэ́ла баро́ зракхибэ́н, годы́ и джиныбэ́н, а дар Дэвлэ́скири явэ́ла тырэ́ кучипнаса.7. Акэ, лэ́нгирэ зоралэ́ мурша́ годлэна пэ вули́цы (га́сы); бичхадэ́ ваш рама́нё (миро) ровэна киркэ ясвэ́нца.8. Нанэ никонэ́с пэ дрома́, нико́н одо́й на традэ́ла; ёв отгия́ доракирибнастыр, роспхагирдя́ фо́рья, ёв никонэ́с на гинэ́ла пал манушэ́ндэ (ни дро со чхувэ́ла манушэ́н).9. Пхув сы́рбы тугинэла, шутёла. Лива́но ладжакирдо́, зашутия, Сароно яця́ сыр чхучи́ пхув, Васа́но и Кармило счхурдынэ пэ́скирэ патря (листы).10. “Акана́ Мэ ґаздавапэ, – ракирэ́ла Рай Дэвэ́л, – “Мэ ґаздавапэ акана́.11. Тумэ́ сан пхарэ́ кхасэса, тумэ́ биянэна пхус; тумаро́ пхурдыпэн-яг, сави́ тумэн схала.12. И явэ́на народы сыр хачкирды звёска, сыр пхусады чар, сави́ счхиндлэ; и явэ́на зхачкирдэ яга́са.13. Шунэ́н, дуратунэ́, со Мэ кэра́ва, и тумэ́, пашатунэ́, галён Миро зоралыпэ́н.”14. Пиридарандынэ (страха́дынэ) грэхи́тка мануша́ пэ Сио́но, дарэ́на и издрана бидэвлыткарья! “Кон амэ́ндыр выдживэла паш яг, сави́ саро́ похала, кон выдживэла паш яг, сави́ хачола ве́чнэс?”15. Одова́, кон псирэ́ла дро чачипэ́н и ракирэ́ла чачуно́ лав, кон на камэ́ла тэ отлэл пэ́скирэ пшалэстыр, кон обрикирэла пэ́скирэ васта́, соб (кай) тэ на лэл мыто (да́ро) манушэ́ндыр пал налачхэ́ рэ́нды, кон закэрэла пэ́скирэ кана́, соб (кай) тэ на шунэ́л, сыр рат чхувэ́лапэ, и закэрэла пэ́скирэ якха́, соб (кай) тэ на дыкхэ́л, сыр кэрэ́лапэ фуипэ́н.16. Одова́ задживэла пэ вучипэ́н; гарадёла пэ бэ́рги, карик нико́н на ґаздэ́лапэ; маро́ лэ́скэ дэ́лапэ, пани́ лэ́стэ на пириячэ́ла тэ тхадэл.17. Тырэ́ якха́ дыкхэ́на Крали́с дро Лэ́скиро гожыпэн, ёнэ явэ́на тэ дыкхэ́н дуратуны пхув.18. Ило́ явэ́ла тэ пририпирэл екх пал дар, сави́ буты́р на дыкхэ́са: “Кай одова́, саво́ пиригинэлас манушэ́н дрэ лылвари́? Кай исын одова́, саво́ важынэла притасады (дань)? Кай исын одова́, саво́ вучардя (башни) обдыкхэлас?”19. На дыкхэ́са буты́р холямо́ народо, народо, чиб конэ́скири ту на ґалёса, и на розлэса.20. Подыкх пэ Сио́но, фо́ро, кай проджа́ла амаро́ свэнкитко скэдыибэ́н; тырэ́ якха́ явэ́на тэ дыкхэ́н Ерусалимо, штэ́то, кай нанэ марибэ́н, ша́тра, сави́ на пэрэ́ла, бэранда ла́кирэ николи на роспхадёна, и ни екх шыло на чхинэлапэ [на роскушэлапэ-р.с.].21. Одо́й явэ́ла кэ амэ баро́ Рай Дэвэ́л сыр рэ́ки (лэня́), сыр пани́: одори́к на затрадэла ни екх бари па́рма (кораблё).22. Пал-дова́ со Рай Дэвэ́л исын амаро́ Сэнда́ри, Рай Дэвэ́л дэ́ла амэ́нгэ Зако́но, Рай Дэвэ́л исын амаро́ Кра́ли, Ёв зракхэ́ла амэн.23. Роспхандэнапэ тырэ́ шылэ, Асуро, на вырикирна мачты. Тэ́ньци явэ́на тэ роскэрэн дорэсыбэ́н, и лангалэ джа́на тэ чорэн.24. И нико́н манушэ́ндыр, савэ́ одо́й дживэ́на, на пхэнэ́ла: “Мэ сом насвало́”, – манушэ́нгэ, савэ́ одо́й дживэ́на, отмэкэнапэ сарэ́ грэ́хи.Isaiah 34:1-171. Явэ́н, народы! Шунэ́н и прилэ́н, кхэри́тка ро́ды (пле́ми)! Мэк тэ шунэ́л пхув и саро́, со исын пэ ла́тэ, баро́ свэ́то (лот) и саро́, со бияндёла дрэ лэ́стэ!2. Холы́ Ра́скирэ-Дэвлэ́скири ґаздыя́пэ пэ сарэ́ народы, пэ сарэ́ лэ́нгирэ халадыбэна (халадэ́ндэ). Ёв совлахадя́ пал лэ́ндэ, отдыя́ лэн пэ хасибэ́н.3. Лэ́нгирэ замардэ́ мануша́ явэ́на росчхурдынэ, и закхандэна лэ́нгирэ тру́пы, бэ́рги явэ́на киндлэ лэ́нгирэ ратэстыр.4. Хасёла болыбнытко халадыбэ́н (болыбны́тка халадэ́), и болыбэ́н закэрэлапэ (пхандэлапэ), сыр лылвари́; чэргэня́ пэрэ́на, сыр патри́н (листо) винаградоскирэ рандятыр, сыр шуки́ патри́н смоковнытконэ каштэ́стыр.5. Скэдыны исын пэ болыбэ́н Мири́ курта́ла, акэ, ваш сэ́ндо змэкэлпэ ёй пэ Едомо, и пэ народо, конэ́с Мэ отдыём прокошыбнаскэ.6. Курта́ла Ра́скирэ-Дэвлэ́скири пхэрдёла ратэ́са, тхулёла бакрэскирэ и бузнэскирэ ратэстыр, бакрэскирэ тхулыпнастыр, пал-дова́ со свэ́нто дыибэ́н (жэ́ртва) исын кэ Рай Дэвэ́л дрэ Восоро, баро́ замарибэн исын пэ Едомоскири пхув.7. Гурува пэрэ́на лэ́нца, и гуруворэ кхэтанэ́ гурувэнца; чалякирэлапэ (панякирэлапэ) пхув лэ́нгирэ ратэ́са; пра́хо чалёла лэ́нгирэ тхулыпнаса.8. Явдя́ дывэ́с, ко́ли отхала (отдэ́ла) палэ Рай Дэвэ́л, ко́ли пхучэлапэ Ёв пал Сио́но.9. Рэ́ки лэ́скирэ сыр смола ячэ́на, пра́хо лэ́скиро ячэ́ла дзэвэляса (сераса) и явэ́ла пхув лэ́скири сыр хачкирды смола.10. На пириячэна тэ хачон ни дывэсэ́, ни раты́; ве́чнэс явэ́ла тэ ґаздэлпэ (тэ джал) тхув ла́тыр, явэ́ла пхув чхучэ́ пхувья́са саро́ часо, нико́н одо́й на проджа́ла николи.11. Чирикля́ одо́й явэ́на тэ дживэ́н хуланца, филино и корако явэ́на тэ дживэ́н пэ доя́ пхув и протырдэна пир ла́тэ хасибнаскиро шыло и хасякирибнытко отвесо (уровнё).12. На ячэ́лапэ пэ ла́тэ никонэ́с лачхэ́-родоскирэ манушэ́ндыр, конэ́с кхарэ́на, соб (кай) тэ явэ́н ёнэ кральенца сарэ́ тхага́рья (кня́зи) ла́кирэ явэ́на сыр чхучо́ штэ́то.13. Ла́кирэ барэ́ фэлатиня́ / колова (дворцы), ла́кирэ тва́рдыми (крепости) забарьёна пхусадэ́ чарьенца; явэ́ла пхув штэтоса, кай шакалы явэ́на тэ дживэ́н и явэ́ла грэдаса (двороса) ваш страусэнгэ.14. Рискирибна́скирэ мурдала́ (звери), со дживэ́на пэ шуки́ пхув, явэ́на тэ дыкхэнпэ вэшытконэ мыцэнца; одо́й бэнга явэ́на тэ годлэн, создыибэн (сыкаибэ́н) рати́тко одо́й явэ́ла тэ откхинёл, попэрла пэ́скэ штэ́то.15. Сап пхакэнца (крылэнца) одо́й явэ́ла тэ дживэ́л, дрэ гня́зда (ку́фо) явэ́ла тэ барьякирэл пэ́скирэ тыкныдорэн, явэ́ла тэ скэдэл лэн кэ пэ тэл пхака́, и одо́й скэдэ́напэ каґнялэ (коршуны).16. Породэн дрэ Ра́скирэ-Дэвлэ́скири лылвари́ и прогинэн. Саро́ дава́ явэ́ла, ничи́ на отпарувэлапэ и ние́кх на парувэлапэ явирэса, пал-дова́ со ушта́ Лэ́скирэ припхэндлэ и ду́хо (фа́но) Лэ́скиро лэн скэдэ́ла.17. Ёв Кокоро́ выкэдыя́ лэн пир жрэбиё, Ёв роздыя лэ́нгэ дая́ пхув пир меракири ме́жа; ёнэ залэна ла и явэ́на тэ дживэ́н одо́й ве́чнэс.Psalms 109:1-51. Хоро́скирэ Дирижоро́скэ. Давидо́скиро Пса́лмо. На яв штыл, о Дэ́вла, сла́ва Ту́кэ!2. Пал-дова́ со чорэ́ и хоханэ́ мануша́ ракирэ́на пэ ма́ндэ: ёнэ роспхэнэна пал ма́ндэ хоханэ́ чиба́са (чибьяса),3. ёнэ обчхувэна ман, кай камэ́на, хоханэ́ лавэ́нца и холя́са, и ёнэ джа́на марибна́са пэ ма́ндэ би причынакиро.4. Пал миро ило́ ёнэ ячнэ́ ма́нгэ мирэ́ вэ́рги, нэ мэ мангавпэ Дэвлэ́скэ пал лэ́ндэ.5. И мэ дорэсцём лэ́ндыр фуипэ́н пал миро лачхипэ́н, и ёнэ бидыкхэна ман пал мири́ паты́в кэ яви́р.Proverbs 25:25-2625. Сыр шылало пани́ ваш ди, савэ́стэ сыс труш (смэга), адя́кэ-паць исын лачхи́ зан (звесь) дуратунэ́ тхэмэстыр.26. Чачуно́ ману́ш, саво́ пэрэ́ла анги́л фуе́ манушэ́ндэ, исын сыр мэлалы ґанынгори, и блатуны ґаны́нг.2 Korinťanenge 12:1-211. Ѓа́да, нанэ ни сави́ льго́та ма́нгэ тэ шаравпэ. Нэ мэ роспхэнава пал дыкхибэна и сыкадыипэна ма́нгэ Ра́стыр-Дэвлэ́стыр.2. Мэ джино́м екхэ́ патяибнаскирэс дрэ Христосо́стэ (дэшуштар бэрш палэ, ци ёв сыс дро пэ́скирэ маса́, мэ на джино́м, ци дова́ сыс лэ́скиро ду́хо (фа́но), мэ на джино́м, Дэвэ́л джинэ́ла); адасаво́ ману́ш сыс ґаздыно́ кэ три́то болыбэ́н.3. И мэ джино́м (джина́в) дасавэ́ манушэ́с, (ци ёв сыс дро пэ́скирэ маса́, ци дова́ сыс лэ́скиро ду́хо (фа́но) мэ на джино́м, Дэвэ́л джинэ́ла:)4. со ёв сыс ґаздыно́ дро Болыбна́скиро Раё, и шундя́ дасаво, со нашты́ тэ пиридэл лавэ́нца, савэ́ манушытконэ́ уштэ́нца фэды́р тэ на выпхэнэн.5. Кадасавэ́ манушэ́са мэ ява́ва тэ шаравпэ, нэ на пэ́са кокорэса, а екх со екхэ́ мирэ́ бизоралыпна́са.6. Пал-дова́ со, ко́ли мэ камамас тэ шаравпэ, тэды мэ на ява́ва дылынэса. Пал-дова́ со мэ пхэна́ва чачипэ́н, соб (кай) ние́кх ману́ш тэ на подуминэл кучэдыр пал ма́ндэ далэ́стыр, со ёв дыкхэ́ла дрэ ма́ндэ и шунэ́ла пал ма́ндэ.7. Соб (кай) ма́нгэ тэ на пхутёвав дивоскирэ дыкхибнаса, ма́нгэ исын дыны́ пхусады́ буст (колючка) дрэ лоч сы́рбы дына́ри (слу́га) налачхэ́стыр, соб (кай) ёв тэ мэнчынэл ман ваш дова́, соб (кай) ма́нгэ тэ на пхутёвав.8. Палдава́ мэ и мангдём паты́в Ра́стыр-Дэвлэ́стыр трин мо́лы, соб (кай) Ёв тэ дурьякирэл буст ма́ндыр.9. И Ёв пхэндя́ ма́нгэ: “Ухты́лла (до́си) ваш ту́кэ Миро бахталыпэ́н, саво́ сыкавэлапэ со най фэдэды́р, ке́ли мэ сом бизорья́киро!” Палдава́ ма́нгэ буты́р пир ило́ тэ шаравпэ мирэ́ бизоралыпнаса, соб (кай) Христососкири зор тэ заджа́л дрэ ма́ндэ.10. Палдава́ мэ радынавпэ пэ́скирэ бизоралыпнастыр, со ман ладжакирэна; трэбиматыр, традыпнастыр, пхарэ́ джиибнастыр ваш Христосо́скэ, пал-дова́ со, ке́ли мэ сом бизорья́киро, тэды мэ сом зорало́.11. Мэ яцём дылыно́, тумэ́ зачхудэ ман: пал-дова́ со тумэ́нгэ трэиндя́ тэ шарэ́н ман; мэ на сом ни дро со фуеды́р кадалэ́ барэ́ Апостолэндыр, хоць мэ и адя́кэ-паць на сом мол ничы́.12. Чачэс, ґэртыка (знаме́нии), савэ́ допхэнэна, со мэ сом Апостоло, сыкадэ пэс барэ́ вырикирибнаса, дивэнца и зорья́са пир ди́вна бутя́.13. Сыр жа тэды кэ тумэ́ тэ отлыджавпэ фуеды́р явирэ кхангирьендыр, апри́ч дова́, со мэ на яндём пхарипэ́н тумэ́нгэ. Примангэн ма́нгэ, со мэ выпхэндём дасави́ холы́.14. Ѓа́да, мэ скэдыёмпэ тэ джав кэ тумэ́ три́то мо́ло. И мэ на яна́ва пхарипэ́н дрэ ловэ́ тумэ́нгэ, пал-дова́ со мэ на родава вари-сави́ льго́та тумэ́ндыр, а тумэ́ кокорэ́ трэй ма́нгэ. И на чхавэ́ скэдэ́на ловэ́ ваш дадэ́нгэ, а дада́ ваш чхавэ́нгэ.15. Какана́ мэ фэды́р ява́ва тэ розмэкав пэ́скиро и тэ отдав пэс пал тумаро́ ило́. Ко́ли мэ кама́м тумэн бутэды́р, нау́што тумэ́ явэ́на тэ сыкавэ́н паты́в ма́нгэ кутэдыр (набутэдыр)?16. А ко́ли тэ явэ́л адя́кэ, ци мэ яндём пхарипэ́н тумэ́нгэ? Нэ вари-кон пхэнэ́ла, со мэ сом мэндро, и мэ, хай, лыём вари-со тумэ́ндыр хохаибнаса?17. Ци лыём мэ вари-со тумэ́ндыр пир вари-конэ́стэ, конэ́с мэ бичхадём кэ тумэ́?18. Мэ мангдём Титос и бичхадём пшалэ́с лэ́са: ци лыя́ Тито вари-со тумэ́ндыр? Ци на кэрдя́м амэ дро екх ду́хо (фа́но)? Ци на псирдям амэ екхэ дромэ́са?19. Ци думинэ́на тумэ́, со амэ, хачи, затэрдёваса пал пэ́стэ? Дава́ амэ ракираса анги́л Дэвлэ́стэ дро екхипэ́н Христосо́са пир сарэ́ рэ́нды ваш тумаро́ подрикирибэ́н.20. Пал-дова́ со мэ дарава, со, ке́ли мэ нэвэ́стыр ява́ва, мэ могина́ва тэ латхав тумэн адасавэнца, сыр мэ на кама́м, и тумэ́ могинэ́на тэ латхэ́н ман адасавэса, сыр мэ на кама́м: мэ дарава, со могинэ́на тэ явэ́н кошыбэна, зэвлыныпэна, холякирибэна, роспэрибэна пэ групки, гундякирибэна, пхутькирибэна, бизлады;21. соб (кай) миро Дэвэ́л тэ на́ чхувэ́л тэлэ́ ман пал тумэ́ндэ, ке́ли мэ ява́ва нэвэ́стыр, и, соб (кай) ма́нгэ тэ на рова́в пал бутэ́ндэ тумэ́ндэ, савэ́ кэрдэ́ грэ́хо и на отрисинэ нажужыпнастыр, биладжаипнастыр, ладжавэ рэндэ́ндыр, савэ́нца ёнэ залэнаспэ. Romani Bible Baltic 2019 Maintained by the United Bible Societies for the Baltic Romani Mission