Bible in one year - Пэ Балтитко Романи чиб

Bible in one year September 22

1. Обрадынэлапэ чхучи́ пхув, и пхув шуки́, и обрадынэлапэ риг, кай нико́н на дживэ́ла, и розмэкэлапэ (розцвэтинэла), сыр лулуди́ (цвэто) нарцысо.

2. И явэ́ла пхув гожэс тэ розмэкэлпэ и тэ радынэ́лпэ, явэ́ла радыма́са и годлэнца барипэ́н Ливаноскиро ла́кэ дэ́лапэ, Кармилоскиро и Сароноскиро бариканыпэн; ёнэ явэ́на тэ дыкхэ́н Ра́скирэ-Дэвлэ́скиро, амарэ́ Дэвлэ́скиро барипэ́н.

3. Ѓаздэн зорья́са васта́, савэ́ обмэкнэпэ, мэк тэ на издран тумарэ́ чанга́!

4. Пхэнэ́н одолэ́нгэ, кон дарэ́ла илэ́са: “Явэ́н зоралэ́, на дарэ́н! Акэ, исын тумаро́ Дэвэ́л, Ёв отхала (отдэ́ла) палэ, Дэвэ́л спхучэла. Ёв явэ́ла и зракхэ́ла тумэн.”

5. Тэ́ньци откэрнапэ якха́ корорэнгирэ и кана́ кашукэнгирэ явэ́на тэ шунэ́н.

6. Тэ́ньци лангало сыр оленё явэ́ла тэ ухтэл, бичибакиро (немо) забагала, пал-дова́, со промарлапэ пани́ пэ чхучи́ пхув и пэ мал (степ) промарнапэ сыгна рэкицы.

7. Одо́й, кай на сыс пани́, зеро (озеро) явэ́ла; дрэ пхув шуки́ бут пани́ скэдэлапэ; пэ штэ́то, кай шакалы дживэ́нас, явэ́на вучэ́ чарья́ и сил (камышо) тэ барьён.

8. И явэ́ла одо́й баро́ дром, ёв явэ́ла тэ кхарэлпэ свэнтонэ́ дромэ́са. Нажужо одо́й на явэ́ла тэ псирэ́л, явэ́ла дава́ дром фэ́ни (то́ка) ваш одолэ́нгэ, кон патя́ла, и кон на джинэ́ла нисо́; нико́н лэ́ндыр далэ́ дромэ́стыр на змарлапэ.

9. И шчэр (ле́во) на явэ́ла одо́й, и януро (хишчно мурда́л) на заджа́ла одори́к, лэс на латхэ́на одо́й, а зракхнэ́ мануша́ явэ́на тэ псирэ́н.

10. И рисёна одолэ́, конэ́с зракхэ́ла Рай Дэвэ́л и явэ́ла пэ Сио́но радымакирэ годла́са; ра́дыма явэ́ла лэ́нца саро́ часо (цы́ро); и лош (веселиё) ёнэ латхэ́на, а биба́хт бидаса лэ́ндыр отджала.

Isaiah 36:1-22

1. И сыс дава́ пэ дэшуштарто бэрш, ко́ли дживэлас кра́ли о Езэки́я. Гия́ о Сенахиримо, кра́ли Асирия́киро пэ сарэ́ зоралэ́ Юдэя́кирэ фо́рья и лыя́ лэн.

2. И бичхадя́ Асирия́киро кра́ли Лахисостыр дро Ерусалимо кэ кра́ли Езэки́я, Рабсакос халадэнца; ёв тэрдия́ одо́й, кай тхадэлас пани́ панипролыджаибнытконэстыр упратунэ вэндэриньятыр (прудостыр), пэ дром пашы́л фэ́лда, кай парнякирэнас похтана.

3. И выгия́ кэ ёв Елиакимо, Хелкияскиро чхаво́, пхурыдыро пэ крали́тко кхэр, и Севна, чхиныбнари, и Иоахо, Асафоскиро чхаво́, канцэляри (саво́ зачхинэлас саро́, со кэрдя́пэ).

4. И пхэндя́ лэ́нгэ Рабсако: “Пхэнэ́н Езэкияскэ: адя́кэ ракирэ́ла баро́ кра́ли, кра́ли Асирия́киро: ‘Сави́ наде́я исын ту́тэ, и конэ́стыр ту ужакирэса лачхипэ́н?

5. Мэ думинава, со дава́ исын чхучэ́ лава́, а ваш марибэ́н трэй годы́ и зор, пэ конэ́стэ исын тыри́ наде́я, со ту отгиян ма́ндыр?

6. Акэ, ту думинэса, со тут подрикирла Еги́пто, пхагирдо́ дэсто́, ко́ли лэ́ла лэс вари-кон дро васт, ёв васт пхусавэла. Адасаво́ исын фарао́но, кра́ли Египто́скиро ваш одолэ́нгэ, конэ́с ёв подрикирэ́ла, и кон чхувэ́ла наде́я пэ лэ́стэ.

7. А ко́ли ту пхэнэ́са ма́нгэ: “Пэ Растэ-Дэвлэ́стэ исын амари́ наде́я”, – Ци нанэ одова́ дэвэл, конэскирэ вучэ́ штэ́ты и алта́ри отпарудя Езэки́я и пхэндя́ Юдэякэ и Ерусалимоскэ: “Мангэ́нпэ анги́л екх дава́ алта́рё, анги́л яви́р на мангэ́нпэ?”

8. Доракирпэ мирэ́ ра́са, Асирия́кирэ крали́са, мэ да́ва ту́кэ дуй тысенцы грэн, ци дорэсэса ту ада́кицы манушэ́н, соб (кай) тэ бэшэ́н пэ лэ́ндэ?

9. И ту камэ́са, соб (кай) тэ отджал барыдыро́, екх тыкнэ́ писхарьендыр Мирэ́ хуласкирэн, ко́ли ту́тэ исын наде́я пэ екх Еги́пто, пэ лэ́скирэ грэ́ндэ и марибны́тка вурдэна́?

10. Ту думинэса, со на сыс Дэвлэ́скири во́ля тэ джав ма́нгэ пэ дая́ пхув, соб (кай) тэ хасякира́в и обчорав ла? Рай Дэвэ́л пхэндя́ ма́нгэ: “Джа́ пэ дая́ пхув и обчор кэ хасибэ́н (хасякир) ла.’”

11. И пхэндя́ Елиакимо, и Севна и Иоахо Рабсакоскэ: “Ра́кир тырэ́ писхарье́нгэ пир арамеитко (сириитко) чиб, амэ ґалёваса дая́ чиб, а пир юды́тко чиб амэ́нца на ра́кир, пал-дова́ со мануша́ шунэ́на, савэ́ скэдынэ́пэ пэ ва́нта.

12. И пхэндя́ Рабсако: “Ци ман бичхадэ́ екх/ фэ́ни (то́ка) кэ ту и кэ тыро́ рай, соб (кай) тэ пхэна́в далэ́ лава́? Над, мэ сом бичхадо́ и кэ мануша́, савэ́ исын бэштэ́ пэ ва́нта, соб (кай) ёнэ тэ прилэ́н ладжаипэ́н и магирипэ́н кхэтанэ́ тумэ́нца.”

13. И уштыя́ Рабсако и пхэндя́ зоралэ́ заня́са пир юды́тко чиб: “Шунэ́н лав барэ́-крали́скиро, Асирия́кирэ крали́скиро лав!

14. Адя́кэ ракирэ́ла кра́ли: ‘Мэк тэ на хохавэ́л тумэн о Езэки́я, пал-дова́ со ёв тумэн на зракхэ́ла.’

15. Мэк тэ на подрикирэ́л тумэн Езэки́я Ра́са-Дэвлэ́са, ко́ли ёв ракирэ́ла: ‘Зракхэ́ла амэн Рай Дэвэ́л, на отдэна дава́ фо́ро дрэ Асирия́кирэ-крали́скирэ васта́.’

16. На шунэ́н Езекияс, пал-дова́ со адя́кэ ракирэ́ла Асирия́киро кра́ли: “Явэ́на бахталэ́ тумэ́ ма́нца дро рама́нё (миро), выджа́н кэ мэ и, мэк кажно ману́ш тумэ́ндыр тэ хал пэ́скирэ винаградоскирэ каштэ́стыр и смоковнытконэ каштэ́стыр, мэк кажно тэ пьел пани́ пэ́скирэ ґанынгатыр.

17. А тэ́ньчи мэ ява́ва и лава́ тумэн пэ дасави́ пхув, сави́ зджа́ла (подджа́ла) пэ пхув тумари́, пэ пхув, кай исын маро́ и мол (вино), кай барьёла винаградо (дракх) и яви́р барьякирдэ́ (пло́ды).

18. Мэк тэ на хохавэ́л тумэн Езэки́я, ко́ли ракирэ́ла: ‘Рай Дэвэ́л амэн зракхэ́ла.’ Ци зракхнэ́ явирэ-народоскирэ дэвэла́ пэ́скири пхув Асирия́кирэ-крали́скирэ вастэ́стыр?

19. Кай исын Емафоскирэ и Ариадоскирэ дэвэла́? Кай исын дэвэла́ Сепарваимоскирэ? Ци зракхнэ́ ёнэ Сама́рия мирэ́ вастэ́стыр?

20. Кон сарэ́ далэ́ дэвлорэндыр зракхця́ пэ́скири пхув мирэ́ вастэ́стыр? И тумэ́ думинэ́на, со Рай Дэвэ́л зракхэ́ла ма́ндыр Ерусалимо?”

21. Нэ ёнэ ничи́ на пхэндлэ́ лэ́скэ, пал-дова́ со кра́ли припхэндя́: “Ничи лэ́скэ на ракирэ́н.”

22. И явнэ́ Елиакимо чхаво́ Хелкияскиро, пхурыдыро пэ крали́тко фэлатин и Севна, чхиныбнари, Иоахо, чхаво́ Асафоскиро, канцэляри, (саво́ зачхинэлас саро́, со кэрдя́пэ) кэ Езэки́я дрэ розрискирдэ и́ди и пирипхэндлэ лэ́скэ Рабсакоскирэ лава́.

Psalms 109:6-13

6. Чхув чорэ́ манушэ́с пэ мирэ́ вэргостэ, мэк на́лачхо тэ тэрдёл пэ лэ́скири чачи́ риг;

7. ке́ли лэс явэ́на тэ сэндякирэн, мэк тэ приджинэн лэс, со ёв исын банго́;

8. мэк лэ́скиро мангипэ́н тэ ячэ́л грэхоса;

9. мэк лэ́скирэ дывэса́ тэ явэ́н кротка, соб (кай) яви́р мануша́ тэ лэн лэ́скири буты́;

10. мэк лэ́скирэ чхавэ́ ўса́ды (сак) тэ мангэ́н дыибэ́н и тэ псирэ́н би штэтоскиро, и тэ родэ́н маро́ дур штэтэ́ндыр, кай вытрадынэ́ лэн;

11. мэк одова́, кон залэла ловэ́ лэ́скэ, тэ чхувэ́л фэлы́ (петля), соб (кай) тэ отлэл саро́ лэ́стыр, и мэк чу́жа мануша́ тэ обчорэн саро́, со ёв закэрдя,

12. мэк нико́н тэ на сыкавэ́л лачхэ́-илы́ткима анги́л лэ́стэ, мэк нико́н тэ на отлыджалпэ илэ́са кэ лэ́скирэ пиро́ты (сироты),

13. мэк лэ́скири сэмэ́нца тэ хасёл, мэк тэ на явэ́н лэ́нгирэ вурмы (фамилии) машки́р яви́р ро́до.

Proverbs 25:27-28

27. Дава́ исын намишто тэ хас бут авги́н, адя́кэ-паць и барипэ́н, со ману́ш кокоро́ родэ́ла пэ́скэ, нанэ барипэ́н.

28. Кон на рикирэ́ла зор пэ пэ́скиро ду́хо (фа́но), одова́ исын сы́рбы фо́ро, со исын пхагирдо́ тэлэ́, и саво́ исын би вантэнгиро.

2 Korinťanenge 13:1-14

1. Дава́ явэ́ла три́то мо́ло мэ джа́ва кэ тумэ́. “Трэй дуй ци трин якхи́тка (свиде́тели), соб (кай) тэ чхувэ́н зор (тва́рдыма) пэ лав пир дава́ рэ́ндо.”

2. Мэ пхэндём тумэ́нгэ ґарэдыр и мэ пхэна́ва анги́л какана́ (адя́кэ-паць, сыр мэ ракирдём, ке́ли мэ со́мас кэ тумэ́ яви́р мо́ло, какана́ мэ на сом тумэ́нца чачунэ́с) одолэ́нгэ, кон кэрдя́ грэ́хо анги́л и сарэ́ явирэ манушэ́нгэ, со ке́ли мэ ява́ва нэвэ́стыр, мэ на потангинава (на пожалинава) лэн.

3. Ци родэ́на тумэ́ допхэныбэ́н, со Христо́со ракирэ́ла пир ма́ндэ? Ёв исын на бизорья́киро ваш тумэ́нгэ, а Ёв сыкавэ́ла Пэ́скири зор машки́р тумэ́ндэ;

4. пал-дова́ со Ёв сыс примардо пэ трушу́л Пэ́скирэ бизоралыпнаса, нэ Ёв исын джидо́ Дэвлэ́скирэ зорья́тыр; пал-дова́ со амэ, чачэс, сам бизорья́кирэ дро екхипэ́н Лэ́са; нэ амэ ява́са тэ джива́с Лэ́са пир Дэвлэ́скири зор, сави́ исын дыны́ тумэ́нгэ;

5. пропатякирэн пэс, ци дживэ́на тумэ́ пир патяибэ́н; отпхэнэн кокорэ́ пэ́скэ: ци джинэ́на тумэ́ кокорэ́, со тумэ́ сан Христосо́скирэ? Ко́ли на адя́кэ, тэды тумэ́ на сан лачхэ́.

6. Ма́ндэ исын лачхо́ ужакирибэ́н, соб (кай) тумэ́ тэ джинэ́н, со тумэ́ сан лачхэ́.

7. Нэ мэ мангавпэ Дэвлэ́скэ, соб (кай) тумэ́ тэ на кэрэ́н чорипэ́н на ваш дова́, соб (кай) амэ́нгэ тэ сыкавас, со амэ прогиям пропатякирибэн, нэ соб (кай) тумэ́ тэ кэрэ́н пир чачипэ́н, – ничы́, ко́ли амэ и на ява́са приджиндлэ сыр лачхэ́.

8. Пал-дова́ со амэ́ндэ нанэ зор проти чачипэ́н, а пал чачипэ́н.

9. Палдава́ амэ радынасапэ, ке́ли амэ сам бизорья́кирэ, а тумэ́ сан зоралэ́. И амэ адя́кэ-паць мангасапэ Дэвлэ́скэ, соб (кай) тумэ́ тэ явэ́н бидошакирэ.

10. Палдава́ мэ чхиндём дава́, со, пака мэ на сом тумэ́нца; а ке́ли мэ ява́ва кэ тумэ́, ма́нгэ тэ на отлыджавпэ строгимаса тумэ́нца пир право, саво́ Рай Дэвэ́л дыя́ ма́нгэ тэ подрикирав тумэн, а над, соб (кай) тэ хас тумаро́ ило́.

11. Палатуно́ лав, пшала́лэ: радынэ́нпэ, явэ́н бидоша́кирэ, подрикирэ́н екх екхэ́с, явэ́н екхэ́-годя́кирэ, явэ́н дро рама́нё (миро) екх екхэ́са.

12. Пиридэ́н “рама́нё” екх екхэ́скэ свэнтонэ́ чамудыпнаса.

13. Сарэ́ свэ́нта пиридэна “рама́нё” тумэ́нгэ.

14. Мэк бахталыпэ́н амарэ́ Ра́скирэ-Дэвлэ́скиро, Исусо́скирэ-Христосо́скиро, Дэвлэ́скири ла́ска и паты́в и Свэнтонэ́ Духо́скиро кхэтаныпэ́н тэ явэ́н тумэ́нца. Ами́нь.

Romani Bible Baltic 2019

Maintained by the United Bible Societies for the Baltic Romani Mission