Bible in one year - Пэ Балтитко Романи чиб

Bible in one year September 24

1. Дро дова́ часо (цы́ро) о Меродахо, чхаво́ Валадоноскиро, кра́ли Вавилонскиро шундя́, со Езэки́я сыс насвало́ и высастия и бичхадя́ лэ́скэ лыл и да́ры.

2. Сыс бахтало́ радыма́са далэ́стыр Езэки́я и сыкадя́ бичхадэ́ манушэ́нгэ кхэр, кай ракхэлас пэ́скирэ кучипэна (сокровишчы), руп, сувнака́й, куч кхандыпэна, сарэ́ марибны́тка (арсенало), саро́, со сыс лэ́стэ дрэ пираля́ кучипнаскирэ, саро́, со лэ́стэ сыс, лэ́нгэ сыкадя́, ничи́ на яця́пэ лэ́скирэ миштыпна́стыр.

3. И явдя́ проро́ко Исаё кэ кра́ли Езэки́я и пхэндя́ лэ́скэ: “Со ракирэ́нас адалэ́ мануша́? Каты́р ёнэ явнэ́?” Езэки́я пхэндя́: “Дурал явнэ́ ёнэ кэ мэ, явнэ́ Вавилоно́стыр.”

4. И пхэндя́ Исаё: “Со ёнэ дыкхнэ́ дро тыро́ кхэр?” Езэки́я пхэндя́: “Саро́ дыкхнэ́, саро́ миро барвалыпэ́н мэ сыкадём лэ́нгэ, ничи́ на яця́пэ дрэ мирэ́ кучипнаскирэ пираля́, со мэ на сыкадём лэ́нгэ.”

5. И пхэндя́ Исаё Езэкияскэ: “Шун лав Ра́стыр-Дэвлэ́стыр, болыбна́скирэ-янголэнгирэстыр.’

6. ‘Акэ, явэ́на дывэ́с и саро́, со исын дрэ тыро́ кхэр, со скэдынэ́ тырэ́ дада́, лыджа́на криг дро Вавило́но, ничи́ на ячэ́лапэ, – ракирэ́ла Рай Дэвэ́л.

7. Отлэна тырэ́ чхавэ́н, кон ту́тэ латхэ́ла, ёнэ явэ́на евнухэнца дрэ Вавилоно́скирэ-крали́скиро кхэр.’

8. И пхэндя́ Езэки́я Исаёскэ: “Лачхо́ исын Ра́скирэ-Дэвлэ́скиро лав, саво́ ту пхэндя́н, пал-дова́ со дрэ Мирэ́ дывэса́ Ёв бичхавэ́ла ишчо (инкэ́) рама́нё (миро) и зракхибэ́н”.

Isaiah 40:1-31

1. “Подрикирэн, подрикирэн ду́хо (фа́но) дро Миро народо,” – ракирэ́ла тумаро́ Дэвэ́л.

2. Ракирэ́н кэ Ерусалимоскиро ило́, пхэнэ́н лэ́скэ, со пирияця́ лэ́скиро марибэ́н, со на отдэлапэ палэ лэ́скэ пал грэ́хо, пал-дова́ со ёв прилыя́ Ра́скирэ-Дэвлэ́скирэ вастэ́стыр пал сарэ́ грэ́хи дрэ дуй мо́лы буты́р, сыр трэиндя́.

3. Зан, сави́ годлэла пэ чхучи́ пхув: “Кэрэ́н дром Ра́скэ-Дэвлэ́скэ, кэрэ́н пэ мал (степ) маму́й дрома́ ваш амарэ́ Дэвлэ́скэ.

4. Кажно до́ло мэк тэ пхэрдёл, кажно бэ́рга и бэ́ргица мэк тэ пэрэ́н, дова́, со исын банго́, тэ ячэ́л роўно (во́рто), и бангэ́ дрома́ тэ кэрэнпэ гладконэ дромэ́нца.

5. И сыкадёла Ра́скирэ-Дэвлэ́скиро барипэ́н, и кажно лочь (плоть) дыкхэ́ла зракхибэ́н Ра́скирэ-Дэвлэ́скиро, пал-дова́, со адя́кэ пхэндлэ́ Ра́скирэ-Дэвлэ́скирэ ушта́.”

6. Зан ракирэ́ла: “Пхэн!” “Нэ со ма́нгэ тэ пхэна́в?” “Кажно лоч (плоть) – чар, а гожыпэн ла́киро – сыр лулуди́ (цвэто) фэлдытко.

7. Чар зашутёла, лулуди́ (цвэто) зашутёла, а ко́ли пхурдэла пэ лэ́стэ Рай-Дэвэ́л, адя́кэ и народо – ёв исын чар.

8. Чар зашутёла, лулуди́ зашутёла, а лав амарэ́ Ра́скирэ-Дэвлэ́скиро ячэ́лапэ ве́чнэс.”

9. Джа́ пэ вучи́ бэ́рга, Сио́но, саво́ мишто́ пхэнэ́ла Дэвлэ́скиро лав! Ѓаздэ зорья́са зан тыри́, Ерусалимо, саво́ ракирэ́ла лав Дэвлэ́скиро! Ѓаздэ зан, на дар! Пхэн кэ фо́рья Юда́скирэ: “Акэ, исын тумаро́ Дэвэ́л!”

10. Акэ, Рай Дэвэ́л, Дэвэ́л явэ́ла зорья́са и Лэ́скиро васт исын зорья́са. Акэ, мазу́ри (награда) Лэ́скири исын Лэ́са, Ёв отдэ́ла палэ сарэ́нгэ анги́л Пэ́скиро муй.

11. Сыр чхупна́ри Ёв ракхэ́ла Пэ́скирэ бакрэ́н; а бакрорэ́н лэ́ла Ёв пэ васта́ и явэ́ла тэ лыджа́л пэ Пэ́скиро колы́н, и савэ́ дэ́на тхуд тэ лыджа́л.

12. Кон вычхудя́ пани́ пэ́скирэ вастэ́са, выгиндя́ болыбэ́н и пра́хо пхувья́киро, зважындя пэ ублады́тка (весы) бэ́рги и бэ́ргицы пэ ублады́тка чарэ́?

13. Кон ґалыя́ ду́хо (фа́но) Ра́скирэ-Дэвлэ́скиро, кон подпхэнэлас Лэ́скэ и сыклякирэлас Лэс?

14. Конэ́стыр мангэ́ла Ёв годыпэ́н (совето), и кон дэ́ла годы́ Лэ́скэ, чхувэ́ла Лэс по дром чачуно́, кон дэ́ла Лэ́скэ джиныбэ́н и сыкавэ́ла дром, кай исын годы́.

15. Акэ, народы – сыр чолыня (капли) пани́ вэдратыр и гинэнапэ сыр пра́хо пэ ублады́тка (весы). Акэ, островы (пхувья́ машки́р мо́рё (дэрья́в)), Ёв ґаздэ́ла сыр пра́хо.

16. На ухты́лла (на́доси) Ливанос, соб (кай) тэ кэрэ́л яг ваш свэ́нто дыибэ́н, на ухты́лла (на́доси) мурдалэ́н пэ лэ́стэ, соб (кай) тэ янэл дыибэна́ ваш цэ́ло схачкирибэ́н.

17. Сарэ́ народы, сыр нисо́ исын анги́л Лэ́стэ, сыр ничи́, сыр чхучо́ штэ́то Лэ́стэ гинэнпэ.

18. Пэ конэ́стэ зджа́ла (поджала) Дэвэ́л, со тумэ́ пхэнэ́на? И со пэ Лэ́стэ зджа́ла (поджала)?

19. Спецо тэ вычхинэл кэрэ́ла идоло, сувнакунари учхакирэ́ла лэс сувнака́са, прикэрэла кэ ёв руповэ зандирорья (цэпочки).

20. А кон исын чороро́, одова́ выкэдэ́ла кашт, саво́ на кирнёла, родэ́ла сыклякирдэ́ манушэ́с-спецос тэ вычхинэл гожэс, соб (кай) тэ кэрэ́л идоло, саво́ б твардэс тэ тэрдёл.

21. Ци тумэ́ на джинэ́на? Ци тумэ́ на шундлэ́? Ци на ракирэ́нас тумэ́нгэ англэды́р сарэ́стыр, ци на ґалынэ́ тумэ́ пхувья́кирэ создыибнастыр?

22. Ёв исын Одова́, Кон бэшэ́ла упра́л пэ крэнглыпэн пхувья́киро и пэ манушэ́ндэ, савэ́ пэ пхув дживэ́на, и, савэ́ исын сыр кирмэ анги́л Лэ́стэ. Ёв протырдыя́ болыбэ́н, сыр сано похтан, чхудя́ лэн сыр ша́тра.

23. Дро нисо́ Ёв пирикэрэла тхагарьен (князьен), сыр вари-со чхучо́ кэрэ́ла ёв пхувья́кирэ сэндарьен.

24. Акэ, ёнэ наґара чхудэ́, наґара барьякирдэ́, наґара дрэ пхув придживдэпэ, нэ сыр Ёв пхурдыя пэ лэ́ндэ, и ёнэ вышутинэ, и балва́л лыджия́ лэн криг, сыр пхус.

25. Со ж тумэ́ пхэнэ́на пал Ма́ндэ, пэ конэ́стэ Мэ зджава (поджава)? Конэса тумэ́ прироўнинэна (припарувэна) Ман,” – ракирэ́ла Свэ́нто.

26. Ѓаздэн тумарэ́ якха́ кэ вучо́ болыбэ́н и подыкхэн? Кон лэс создыя́? Кон вылыджала Пэ́скирэ чэргэня́ и гинэ́ла лэн? Сарэ́ чэргэня́ Ёв кхарэ́ла пир лав, ничи́ на хасёла Лэ́стэ, пал-дова́ со исын лэ́стэ бари зор и зоралыпэ́н.

27. Со́скэ ж ту ракирэ́са, Яково, со́скэ ту выпхэнэса, Израилё: “Ѓарадо исын миро дром Ра́стыр-Дэвлэ́стыр, бистырдо исын миро рэ́ндо Мирэ́ Дэвлэ́стэ”?

28. Ци ту на джинэ́са, ци ту на шундя́н, со ве́чно исын Рай Дэвэ́л, Саво́ создыя́ пхув, николи на кхинёла, и на нашавэла зор, нэ ту на ґалёса Лэ́скири годы́.

29. Кон кхиныя – одолэ́скэ Ёв дэ́ла зор, и кон исын бизорья́киро – одолэ́с Ёв подрикирэ́ла.

30. И тэрнэ́ чхавэ́ кхинёна, хасякирэна зор, и тэрнэ́ мануша́ пэрэ́на.

31. А одова́, конэ́стэ пэ Растэ-Дэвлэ́стэ исын наде́я, прилэ́на нэви́ зор, ґаздэ́на пхака́ (крылы), сыр киды (орлы), нашэ́на и на явэ́на кхинэ, праста́на и на кхинёна.

Psalms 109:21-25

21. Нэ Ту, Дэ́вла, Рае Дэ́вла, помо́гин мангэ ваш Тыро́ лав, зра́кх ман: пал-дова́ со Тыри́ ла́ска исын дро́го.

22. Пал-дова́ со ман притасавэ́на и ма́нгэ исын пхаро́, и миро ило́ исын дукхадо дрэ ма́ндэ.

23. Сыр зэр (тенё) мэ хасёвава, ке́ли ёй кэрлапэ диндькирдэдыр, ман традэ́на сыр скочкос.

24. Мирэ́ чанга́ ячнэ́ бизорья́кирэ, пал-дова́ со мири́ лоч (плоть) вышуция би тхулыпнаскиро.

25. И кадалэ́ мануша́ обракирэна ман: ёнэ дыкхэ́на пэ ма́ндэ и кунинэна шэрэнца.

Proverbs 26:2-2

2. Сыр чириклы, сави́ вурняла одори́к и палэ и сыр бахирка (ласточка), сави́ вурняла, и сави́ на бэшэ́ла, адя́кэ-паць и бипричынакиро прокошыбэ́н на рисёла дро чачипэ́н.

Galaťanenge 2:1-21

1. Тэ́ньци пало́ дэшуштар бэрш мэ нэвэ́стыр гиём дро Ерусалимо Варнаваса, и лыём адя́кэ-паць ма́нца Титос;

2. и мэ гиём одори́к пир Дэвлэ́скиро упхэныбэ́н и пирипхэндём бахталы́ зан (звесь), сави́ мэ роспхэнавас анги́л Наюдэ́ндэ, нэ екх пэ екх кодолэ́нгэ, кон сыс дрэ паты́в машки́р манушэ́ндэ, пал-дова́ со, ци на ивья́ (напра́снэс) мэ сыклякиравас манушэ́н и ґарэдыр сыклякирдём;

3. нэ аж Тито, кон сыс ма́нца, саво́ сыс Гре́ко (Баламо́), на сыс зачхудо тэ обчхинэлпэ;

4. дава́ сыс пал хоханэ́ пшалэ́ндэ, савэ́ явнэ́ чораханэ́с тэ уджинэ́н пал амари́ вольныма, со амэ́ндэ исын пир екхипэ́н Исусо́са Христосо́са ваш дова́, соб (кай) тэ кэрэ́н амэн писхарье́нца;

5. а лэ́нгэ амэ на поддыямпэ, ни пэ екх мардоро (штундыца), соб (кай) бахталэ́-занякиро (звесякиро) чачипэ́н тэ ячэ́лпэ ваш тумэ́нгэ.

6. И кодолэ́, савэ́ сыс дрэ паты́в, – савэ́ ёнэ тэ на явэ́н, – ваш ма́нгэ ёнэ сарэ́ исын сыр екх – Дэвэ́л на дыкхэ́ла пэ манушы́тко муй, – на пхэндлэ́ ни саво́ нэво́ лав кэ миро роспхэныбэн;

7. а пэфроми (хроми), ке́ли ёнэ дыкхнэ́, со Дэвэ́л дыя́ буты́ ма́нгэ тэ роспхэнав бахталы́ зан (звесь) Наюдэ́нгэ, адя́кэ-паць сыр и Пэтрискэ Юдэ́нгэ;

8. пал-дова́ со Дэвэ́л чхудя́ Пэ́скирэ зорья́са ман Апостолоса Наюдэ́нгэ, адя́кэ-паць сыр Пэтрис Апостолоса ваш Юдэ́нгэ,

9. и ке́ли Яково, Пэ́три и Иа́но, конэ́с гиндлэ́ пал шэралэндэ, шундлэ́, со ма́нгэ сыс дыно́ бахталыпэ́н пэ дасави́ буты́, ёнэ подынэ васт ваш кхэтаныпэн ма́нгэ и Варнаваскэ, соб (кай) амэ тэ джас кэ На́юды, а ёнэ тэ джа́н кэ Юды;

10. нэ екх ёнэ помангнэ амэн, соб (кай) амэ тэ на бистрас пал чорорэндэ, со мэ адя́кэ-паць и причхудём зор тэ кэра́в.

11. А ке́ли Пэ́три явдя́ дрэ Антио́хия, мэ выштадём маму́й (проти) лэ́стэ, сыр ёв сыс банго́:

12. пал-дова́ со анги́л дова́, сыр явнэ́ мануша́ Яковостыр, ёв халас Наюдэнца; а ке́ли ёнэ явнэ́, ёв дыяпэ палэ и рикирдя пэс дро риг, пал-дова́ со ёв дарандыя Юдэндыр;

13. и яви́р Юды адя́кэ-паць сыс кхэтанэ́ лэ́са дрэ дуемуиткима, со аж и Варнава упатяндыя дрэ лэ́нгири фрэнтыма.

14. Нэ ке́ли мэ дыкхцём, со ёнэ кэрэ́на на сыр трэй пир чачипэ́н бахталэ́ занятыр (звесятыр), мэ пхэндём Пэтрискэ анги́л сарэ́ндэ: “Ко́ли ту сан Юдо, со́скэ ту дживэса сыр Наюдо, а на сыр Юдо; со́скэ ту зачхувэса Наюдэн тэ дживэ́н сыр Юдэ́н?”

15. Амэ сам Юды пир рат, а амэ на сам грэхи́тка На́юды,

16. нэ амэ джина́са, со Дэвэ́л приґалёла чачунэса манушэ́с на пир Законо́скирэ бутя́, а пир патяибэ́н дрэ Исусо́стэ Христосо́стэ; амэ адя́кэ-паць упатяндыям дрэ Исусо́стэ Христосо́стэ, со амэ могинаса, соб (кай) Дэвэ́л тэ приґалёл чачунэнца амэн пир патяибэ́н дрэ Христосо́стэ, а на пир Законо́скирэ бутя́, пал-дова́ со пир Законо́скирэ бутя́ Дэвэ́л на приґалёла чачунэса пир лоч (плоть) ни екхэ манушэ́с.

17. Нэ ко́ли амэ родаса саштыпэн (возможность/ваканцыя), соб (кай) Дэвэ́л тэ приґалёл чачунэнца амэн пир Христосо́стэ, нэ выджа́ла, со амэ сам грэхи́тка мануша́, то нау́што Христо́со дынаринэла грэхоскэ? Мэк ние́кхвар дава́ тэ на явэ́л!

18. Пал-дова́ со, ке́ли мэ нэвэ́стыр пирикэрава Законоскиро сыклякирибэ́н, со мэ роспхагирдём, мэ сыкава́ва пэс, со мэ сом проштавибнари (преступнико).

19. Мэ сы́рбы мыём пир Законоскиро сыклякирибэ́н, соб (кай) тэ джива́в дурэды́р пир Зако́но, соб (кай) ма́нгэ тэ джива́в Дэвлэ́са.

20. Мэ со́мас примардо пэ трушу́л Христосо́са, и мэ буты́р сы́рбы на джива́ва, нэ дава́ Христо́со дживэ́ла дрэ ма́ндэ; нэ дова́, со мэ джива́ва дрэ лоч (плоть), мэ джива́ва пир патяибэ́н дрэ Дэвлэ́скирэ Чхавэ́стэ, Савэ́скэ яцём дро́го мэ, и Саво́ отдыя́ Пэс пал ма́ндэ.

21. Мэ на отпхэнавапэ Дэвлэ́скирэ бахталыпнастыр, нэ, ко́ли Дэвэ́л приґалёла амэн чачунэнца пир дова́, со амэ ракхаса Зако́но, тэды ивья́ (напра́снэс) мыя́ Христо́со.

Romani Bible Baltic 2019

Maintained by the United Bible Societies for the Baltic Romani Mission