Bible in one year September 25Isaiah 41:1-291. “Явэ́н штыл анги́л Ма́ндэ, островы, и мэк манушы́тка на́цыи тэ кэдэн нэвэ́стыр пэ́скиро зоралыпэ́н! Мэк ёнэ тэ явэ́н пашы́л, и мэк ёнэ тэ пхэнэ́н: ‘Тэрдёваса кхэтанэ́ пашылэды́р пэ сэ́ндо.’2. Кон ґаздыя́ чачипнаскирэ манушэ́с вастоко́стыр? Кон кхардя́ лэс тэ джал пал пэ́стэ? Кон дыя́ лэ́скэ тэл васт манушэ́нгирэ на́цыи и кэрдя́ лэс, екхэ́с тэ хулаинэ́л пэ кралье́ндэ? Кон отдыя́ лэн сы́рбы пра́хо ваш лэ́скири курта́ла, сы́рбы пхус, со вурняла, ваш лэ́скиро лу́ко?3. Ёв традэ́ла лэн, и джа́ла бидарипнаскирэ дромэ́са, пир саво́ Ёв на псирдя́ ние́кхвар пэ́скирэ ґэрэ́нца.4. Кон создыя́ и кэрдя́ саро́ дава́? Кон кхарэлас кэ Пэ манушы́тка ро́ды англыпна́стыр! Мэ сом Рай Дэвэ́л, Пэ́рво, и дрэ палатунэ́ (последня) Мэ адя́кэ-паць Сом.”5. Островы дыкхнэ́ дава́ и трашандынэ, яго́ры (краи́) пхувья́кирэ страха́дынэ, ёнэ подтырдэнапэ пашылэды́р и явнэ́.6. Кажно дэ́лас васт пэ́скирэ пашатунэ́ манушэ́скэ, и ракирэ́лас пэ́скирэ пшалэ́скэ: “Рикирпэ муршканэ́с.”7. О пэталэнгиро (ковалё) поддэла ду́хо (фа́но) сувнакунэ́ спецоскэ, и ёв, кон, роўнинэла барэ́ млоткоса листы ґаздэ́ла ду́хо (фа́но) кодолэ́скэ, кон марэла пэ кавадло (амони), саво́ ракирэ́ла пал спайка: “Исын мишто́,” тэ́ньчи ёв зоралякирэла гвоздэнца (карфинэнца), соб (кай) тэ явэ́л саро́ зорало́ пэ штэ́то.’8. Нэ ту, Израилё, сан Миро писха́ри, Яково, конэ́с Мэ выкэдыём, Аврамос, Мирэ́ малэс (другос).9. Ту, конэ́с Мэ выкэдыём пхувья́кирэ ягорэндыр, и конэ́с кхардём Мэ кэ пэ самонэ дуратунэ́ штэтэ́ндыр, и конэ́скэ Мэ пхэндём: ‘Ту сан Миро писха́ри,’ Мэ выкэдыём тут и на дурьякирдём тут криг.”10. На дар, пал-дова́ со Мэ сом ту́са: на нашадёв дро ду́хо (фа́но), пал-дова́ со Мэ сом Дэвэ́л тыро́. Мэ ява́ва тэ зорьякирав тут, и, Мэ подава васт ту́кэ, Мэ подрикирава тут Мирэ́ чачипнаскирэ чачэ́ вастэ́са.”11. Акэ, сарэ́, кон гия́ холя́са пэ ту́тэ, явэ́на ладжакирдэ́ и пэрэ́на патыватыр, явэ́на сыр нисо́, и одолэ́, кон чингардыяпэ ту́са, одолэ́ хасёна.12. Ту явэ́са тэ родэс лэн, и ту на латхэса лэн, кодолэ́, савэ́ камлэ́ тэ марэ́нпэ ту́са, савэ́ гинэ́ марибна́са пэ ту́тэ – ёнэ явэ́на сыр нисо́, сыр дова́, со буты́р на дживэ́ла.13. Пал-дова́ со Мэ, Рай Дэвэ́л, Дэвэ́л тыро́, ява́ва тэ рикирав тут пал чачо́ васт, и пхэна́ва ту́кэ: “На дар, Мэ да́ва васт (помогинава) ту́кэ.”14. “На дар, ту сан кирмо Яково́скиро, тумэ́, на́бут, мануша́лэ Израилёскирэ! Мэ подава васт ту́кэ”, – ракирэ́ла Рай Дэвэ́л, и Мэ сом тыро́ Выкиныбнаскиро (Выракхибнаскиро), Свэ́нто Израилёскиро.15. Акэ, Мэ кэра́ва ту́тыр нэви́ обмарибнаскири (молотилка) востронэ дандэнца, ту явэ́са тэ обмарэс бэ́рги и ту розмарэса лэн пэ котэра́, и ту пирикэрэса бэ́ргицы дрэ шприя (мякина).16. Ту явэ́са тэ пирикэдэс (тэ веинэс) лэн пэ балва́л, и балва́л лыджа́ла криг лэн, и рискирибнаскири балва́л сыр вихро роспхурдэла лэн, ту явэ́са древа́н тэ радынэспэ пал Растэ-Дэвлэ́стэ, и ту явэ́са барикано (тэ шарэспэ) Свэнтонэса Израилёса.17. Ке́ли чорорэ́ и бо́ги (мануша́ дрэ трэ́бима) явэ́на тэ родэ́н пани́, и нанэ пани́, и лэ́нгирэ чиба́ (чибья́) явэ́на тэ шутён трушатыр (смэгатыр), то Мэ, Рай Дэвэ́л, ява́ва тэ шунав лэн; Мэ Дэвэ́л Израилёскиро, на мэкава лэн.18. Мэ откэрава рэ́ки (лэня́) пэ чхучэ́ бэргицакирэ вучипэна́ и ґанынгорья машки́р долоскирэ фэ́лды Мэ кэра́ва чхучэ́ пхувья́тыр зеро (озеро), Мэ кэра́ва шукэ́ пхувья́тыр ґанынгорья пане́са.19. Мэ чхува́ва тэ барьёл кедро, акацыя, мирта и оливи́тко кашт дрэ чхучи́ пхув, и Мэ чхува́ва тэ барьёл дрэ прахитко пхув кипарисо, сосна и буко кхэтанэ́,20. соб (кай) ёнэ тэ дыкхэ́н и тэ доджинэнпэ (тэ ґалён), тэ рискирэ́н пэ́скиро ило́ и тэ ґалён, со васт Ра́скирэ-Дэвлэ́скиро создыя́ дава́, и со Свэ́нто Израилёскиро создыя́ дава́.21. “Сыкавэ́н (пхэнэ́н) пал пэ́скиро рэ́ндо (де́ло)”, – ракирэ́ла Рай Дэвэ́л. “Подэн (янэ́н) тумарэ́ допхэныбэна”, – ракирэ́ла Кра́ли Яково́скиро.22. “Мэк ёнэ тэ пхэнэ́н и тэ сыкавэ́н амэ́нгэ, со явэ́ла мэк ёнэ тэ сыкавэ́н англатунэ́ (пэ́рва) причыны, савэ́ исын, соб (кай) амэ тэ розлас (тэ роз ґалёвас) лэн, и соб (кай) амэ тэ джинас, со́са кончынэлапэ кадава́ рэ́ндо, ци со тэ пхэнэ́н анги́л сарэ́ндэ, со явэ́ла анги́л.23. Пхэнэ́н амэ́нгэ дова́, со явэ́ла анги́л, соб (кай) амэ тэ джинас, со тумэ́ сан дэвэла́, ци кэрэ́н лачхипэ́н ци фуипэ́н, соб (кай) амэ тэ кэра́с барэ́ якха́ (тэ дивинасапэ) и тэ дыкхас дава́ кхэтанэ́ тумэ́нца.24. Чачэс, нанэ нисаво́ лачхипэ́н тумэ́ндыр, и тумари́ буты́ ничы́ на мол; джунгало́ (брыдко) исын кодова́, кон выкэдэ́ла тумэн.25. Мэ ґаздыём лэс паш-ратитконэ́ (севернонэ) рига́тыр, и ёв явэ́ла, ёв явэ́ла тэ кхарэл Миро лав пэ ра́нко (пэ зло́ко), ке́ли кхам ґаздэ́лапэ, и ёв явэ́ла тэ тасавэл тхагарьен сы́рбы бла́та (растворо), сы́рбы пиритконэнгиро тасавэла ґлэя (глина).26. Кон пхэндя́ анги́л сарэ́ндэ самонэ англыпна́стыр, соб (кай) тэ джинас амэ́нгэ, и ґара́ анги́л дава́, соб (кай) амэ́нгэ сашты́ тэ пхэнас: “Дава́ исын чачипэ́н.” Нэ нанэ никонэ́с, кон тэ пхэнэ́л анги́л сарэ́ндэ, ци вари-кон тэ шунэ́л тумарэ́ лава́.27. Мэ пэ́рво пхэндём Сионоскэ: “Дыкхэ́н, кай ёв исын!” И Мэ дыём Ерусалимоскэ екхэ́с, кон янэ́ла бахталы́ зан (звесь).28. Пал-дова́ со Мэ дыкхцём, и на сыс ние́кх ману́ш, и Мэ лыём тэ дыкха́в машки́р лэ́ндэ, нэ на сыс юнкаро (советнико), саво́, ке́ли Мэ пхучавас лэ́ндыр, то тэ дэл ра́да тэ отпхэнэл пэ лав.29. Чачэс, ёнэ сарэ́ ничы́ на мол; лэ́нгирэ бутя́ нисо́, а лэ́нгирэ выбиладэ муя́ (истуканы), исын балва́л и чхучипэн.Isaiah 42:1-251. “Акэ исын Миро писха́ри, Конэ́с Мэ рикирава пал васт, Конэ́с Мэ выкэдыём, кэ Кон пасёла Миро ило́, Мэ чхува́ва пэ Лэ́стэ Миро ду́хо (фа́но), и Ёв пхэнэ́ла пал сэ́ндо кэ народы.2. Ёв на загодлэла, на ґаздэ́ла Пэ́скири зан, и Ёв на дэ́ла тэ шунэ́н ла пэ вули́цы (га́сы).3. Спхагирдо дэсто́ Ёв на пхагирэ́ла, яг сави́, сыг мурдёла, Ёв на мурдякирэла, Ёв явэ́ла тэ кэрэ́л сэ́ндо чачипна́са.4. На пэрэ́ла Ёв бизорьякоро, на кхинёла кэ дова́ часо, сыр Ёв кэрэ́ла сэ́ндо пхувьякэ; и пэ Зако́но Лэ́скиро ужакирэ́на лачхипна́са островы.”5. Адя́кэ ракирэ́ла Рай Дэвэ́л, Саво́ создыя́ болыбэ́н и штэ́ты лэ́нгирэ, Саво́ создыя́ пхув ла́кирэ джиибнаса, Саво́ дэ́ла, соб (кай) тэ дживэ́л ла́киро народо, Саво́ дэ́ла ду́хо (фа́но) одолэ́нгэ, кон пир пхув псирэ́ла.6. Мэ, Рай Дэвэ́л, прикхардём Тут пир чачипэ́н, Мэ ла́ва тэ рикирав Тут пал васт, Мэ ла́ва тэ ракхав Тут, и Мэ чхува́ва Тут сыр завето ваш манушэ́нгэ, соб (кай) тэ дыкхэ́н дуд (свэ́то) Наюды́тка мануша́ (язычники),7. соб (кай) тэ откэрэс якха́ корорэнгэ, соб (кай) тэ вылыджас пэ во́ля одолэ́н, кон дрэ наволя исын бэшто́, а одолэ́н, кон исын бэшто́ дро калыпэ́н, Мэ вылыджава лэ́нгирэ бэшыбнастыр.8. Мэ сом Рай Дэвэ́л, дава́ исын Миро лав, и Мэ на дава́ паты́в Мирэ́ явирэ манушэ́нгэ, и барипэ́н Миро Мэ на дава́ идолэ́нгэ.9. Акэ, кэрдя́пэ дро джиибэ́н, со пхэндлэ́ англэды́р, и нэво́ лав Мэ пхэна́ва; анги́л дова́, сыр ёв кэрэ́лапэ чачипна́са, Мэ откэрава тумэ́нгэ.”10. Бага́н Дэвлэ́скэ нэви́ гилы́, шарэ́н Лэс сарэ́ пхувья́кирэ ягорэндыр; тумэ́, кон традэ́ла пир мо́рё (дэрья́в), сарэ́, кон дживэ́ла одо́й, островы и одолэ́, кон пэ лэ́ндэ дживэ́ла!11. Мэк тэ ґаздэл пэ́скири зан чхучи́ пхув ла́кирэ форьенца, кай Кидаро дживэ́ла; мэк тэ радынэ́нпэ одолэ́, кон дживэ́ла пэ бэ́рги, мэк тэ шарэ́н бэргакирэ упралыпнастыр!12. Мэк тэ дэн паты́в Ра́скэ-Дэвлэ́скэ, мэк тэ шарэ́н Лэс пэ островы.13. Рай Дэвэ́л выджа́ла сыр древа́н зорало́ мурш, сыр мурш марибны́тко, Ёв ґаздэ́ла зэвлыныпэ́н, Ёв кхарэ́ла кэ Пэ и дэ́ла го́дла марибныткэс, Ёв сыкавэ́ла Лэ́скирэ вэргэ́нгэ, со Ёв исын зорало́.14. Длу́гэс (ґара́) Мэ ничи́ на ракиравас, Мэ вырикиравас саро́, акана́ Мэ ла́ва тэ годлав, сыр джувлы́ (манушны), ко́ли ёй биянэ́ла, лава́ тэ розмарав, Мэ ла́ва тэ пхагирав саро́.15. Шутькирава Мэ бэ́рги и бэ́ргицы, вышутькирава сари́ чар, со барьёла пэ лэ́ндэ; вышутькирава рэ́ки (лэня́) и ґанынга́.16. И лыджа́ва Мэ корорэн долэ́ дромэ́са, саво́ ёнэ на джинэ́на; Мэ лыджа́ва лэн долэ́ дроморэнца, кай на псирэнас. Мэ пирикэрава калыпэ́н дро дуд (свэ́то) и бангэ́ дрома́ Мэ кэра́ва чачэ́ дромэ́нца; акэ, со Мэ кэра́ва ваш лэ́нгэ и Мэ на ячавава лэн.17. Тэ́ньци рисёна палэ и древа́н ладжана одолэ́, конэ́скири наде́я сыс пэ и́долы, кон ракирэ́ла кэ кэрдэ́ дэвлорэ́: “Тумэ́ – амарэ́ дэвэла́.”18. Шунэ́н, кашукэ, дыкхэ́н, корорэ́, соб (кай) тэ дыкхэ́н.19. Кон исын ишчо (инкэ́) адасаво́ короро́, сыр Миро писха́ри, исын адасаво́ исын кашуко, сыр одова́, конэ́с Мэ бичхадём? Кон исын адасаво́ короро́, сыр одова́, кон яця́ пир ило́ Ма́нгэ, сыр писха́ри Ра́скирэ-Дэвлэ́скиро?20. Ту бут дыкхэсас, нэ на дыкхця́н, со трэй; кана́ сыс откэрдэ, нэ ту на шундя́н.21. Ра́скэ-Дэвлэ́скэ сыс пир ило́ ваш Пэ́скиро чачипэ́н тэ ґаздэл Зако́но и тэ дэл лэ́скэ паты́в.22. Нэ кадалэ́ мануша́ исын обчордэ и облынэ кэ хасибэ́н, сарэ́ ёнэ исын спхандлэ и гарадэ́ дро бэшыбэн; лэн облынэ и нико́н лэн на зракхэ́ла; обчордэ, и нико́н на раки́рла: “Отдэ́ палэ!”23. Кон тумэ́ндыр шундя́ миштэ́с пал дава́ пэ́скирэ канэнца, ґалыя́ и вышундя ваш англыпэ́н?24. Кон отдыя́ Яково́с чорэнгэ тэ хасякирэ́н, Израилё, соб (кай) тэ росчорэн? Ци на кэрдя́ Рай Дэвэ́л, пал-дова́ со амэ кэрдя́м грэ́хи анги́л Лэ́стэ? Ёнэ на камэнас тэ псирэ́н Лэ́скирэ дромэ́нца и ёнэ на шунэнас Лэ́скиро Зако́но.25. И Ёв вычхудя́ пэ лэ́ндэ Пэ́скири холы́ и марибны́тко холямипэн; ёй хачола яга́са сарэ́ ригэ́ндыр, нэ ёнэ на дыкхнэ́; хачолас лэ́ндэ, нэ ёнэ на ґалынэ́ дава́ илэ́са.Psalms 109:26-3126. Помогин ма́нгэ, Раё Дэ́вла, миро Дэ́вла; зра́кх ман пир Тыри́ лачхэ́-илы́ткима:27. соб (кай) ёнэ тэ джинэ́н, со дава́ исын Тыро́ васт, со Ту, Раё Дэ́вла, кэрдя́н дава́.28. Мэк ёнэ тэ прокошэн, нэ Ту явэ́са тэ бахтякирэс: ёнэ ґаздэ́напэ пэ ма́ндэ и явэ́на ладжакирдэ́, и Тыро́ писха́ри явэ́ла тэ радынэ́лпэ.29. Мэк мирэ́ вэ́рги тэ урьен пэ пэ́стэ ладж сыр и́дя, и учхакирэн пэс ладжаса сыр кулькоса (тхаликоса).30. Мэ ява́ва зоралэ́с тэ парикира́в Ра́скэ-Дэвлэ́скэ мирэ́ мо́са и мэ ява́ва тэ шара́в Лэс машки́р манушэ́ндэ.31. Пал-дова́ со Ёв явэ́ла тэ тэрдёл пир чачи́ риг пашы́л чорорэндэ, Ёв явэ́ла тэ зракхэ́л одолэ́ манушэ́с, савэ́с сэндякирэна.Proverbs 26:3-43. Чхупны трэй грэскэ, а швар (узда) трэй ослоскэ, и ран (рандь) трэй ваш дылынэскиро думо.4. На отпхэн дылынэскэ пир лэ́скиро дылныпэ́н, соб (кай) ту тэ на явэс дасаво, сыр ёв исын.Galaťanenge 3:1-291. Нэ, Галаты, савэ́ тумэ́ бигодякирэ сан! Кон дава́ човаханякирдя тумэн, соб (кай) тумэ́ тэ на кандэ́н патяибэ́н; анги́л жа тумарэ́ якха́ Христо́со сыс сы́рбы сыкадо примардо пэ трушу́л?2. Екх рэ́ндо (де́ло), со мэ кама́м тэ уджинав тумэ́ндыр: ци тумэ́ дорэснэ́ (долынэ) Ду́хо (Фа́но) пир Законо́скирэ бутя́? Ци шуныбнастыр пир патяибэ́н?3. Савэ тумэ́ сан бигодякирэ! Тумэ́ лынэ́ тэ дживэ́н нэвэ́стыр пир Ду́хо (Фа́но), а какана́ тумэ́ кончынэна пир пэ́скирэ-лочакири зор.4. Ци тумэ́ пирилыджинэ ада́кицы ивья́ (напра́снэс)? Ко́ли тэ явэ́л дава́ чачунэ́с ивья́?5. Дэвэ́л дыя́ Ду́хо (Фа́но) тумэ́нгэ и кэрдя́ ди́вы машки́р тумэ́ндэ, ци сыс дава́ пир Законо́скирэ бутя́, ци шуныбнастыр пир патяибэ́н?6. Адя́кэ Авраа́мо патяндыя Дэвлэ́скэ и Дэвэ́л прилыя́ лэс чачунэса пал лэ́скиро патяибэ́н.7. Палдава́, джинэ́н, со одолэ́, кон исын патяибнастыр, ёнэ исын Авраамо́скирэ чхавэ́.8. И Свэ́нто Чхиныбэ́н анги́л дыкхця́, со Дэвэ́л приджинэла чачунэнца Наюдэн пир патяибэ́н, и анги́л роспхэндя́ бахталы́ зан (звесь) Авраамо́скэ: “Дэвэ́л бахтякирэ́ла сарэ́ манушэ́н пир ту́тэ.”9. Палдава́, сарэ́, кон исын патяибнаскирэ, исын бахтякирдэ, сыр Ёв сыс.10. А сарэ́, кон розгинэла пэ Законо́скирэ бутя́, исын прокошнэ, пал-дова́ со исын чхиндло́: “Кажно ману́ш, кон на рикирлапэ сарэскэ, соб (кай) саро́ тэ кэрэ́л, со исын чхиндло́ дрэ Свэнтонэ́-Чхиныбнаскири лылвари́, соб (кай) тэ явэ́л прокошно́!”11. а ни екхэ манушэ́с Дэвэ́л на приджинэла чачунэса анги́л Лэ́стэ, пал-дова́ со: “Чачуно́ ману́ш дживэ́ла пир патяибэ́н.”12. Дро Зако́но нанэ ни саво́ кхэтаныпэн патяибна́са, екх со дова́: “Кон сполнинэла саро́ Зако́но, одова́ явэ́ла тэ дживэ́л.”13. Христо́со выкиндя амэн Законо́скирэ прокошыбнастыр, ке́ли Ёв лыя́ Законоскиро прокошыбэ́н пэ Пэ́стэ, сыр исын чхиндло́ дро Зако́но: “Кажно ману́ш, кон исын убладо пэ кашт, тэ явэ́л тэл Дэвлэ́скиро прокошыбэ́н”,14. соб (кай) Авраамо́скиро бахтякирибэ́н тэ явэ́л пэ Наюдэ́ндэ пир патяибэ́н дрэ Исусо́стэ Христосо́стэ ваш дова́, соб (кай) амэ могинасас тэ дорэсас (тэ долас) Ду́хо (Фа́но), пал Саво́ Дэвэ́л дыя́ лав пир патяибэ́н.15. Пшала́лэ! Мэ ракира́ва пир манушы́тко годы́: ние́кх ману́ш дуендыр на отпарувэла ци дочхувэла вари-со кэ подчхиндло завето, саво́ анги́л сыс счхудо машки́р дуендэ.16. Нэ Дэвэ́л дыя́ Лэ́скиро лав Авраамо́скэ и лэ́скирэ-чхавэ́нгирэ чхавэ́нгэ: дро Свэ́нто Чхиныбэ́н ракирлапэ на пал “сэмэнцэндэ” сы́рбы пал бутэ́ манушэ́ндэ, а пал екхэ “сэмэнцатэ”, пал Христосо́стэ.17. Мэ пхэна́ва какана́: Зако́но, саво́ сыс дыно́ штаршэла́ трия́нда бэрш коригэды́р (позжэды́р), на отпарувэла завето, саво́ Дэвэ́л дудвалякирдя (утвердиндя), и лэ́скиро дыно́ лав на хасякирэ́ла зор.18. Ко́ли мэкно́ миштыпэ́н исын пир Зако́но, тэды нанэ буты́р пир дыно́ лав, а Дэвэ́л дыя́ лэс Авраамо́скэ пир дыно́ лав.19. Ваш со тэды сыс дыно́ Зако́но? Ёв сыс дочхудо, соб (кай) тэ сыкавэ́л, со дасаво чорипэ́н исын, пака на явэ́ла Авраамо́скирэ-родоскири сэмэ́нца, ваш конэ́скэ сыс дыно́ лав; Янго́лы пиридынэ Зако́но пир машкиратунэстэ (посредникостэ) – Мойзастэ.20. Нэ Дэвлэ́скэ на трэиндя́ машкиратуно, ке́ли Ёв дыя́ лав Авраамо́скэ екх пэ екх.21. Со ж тэды Зако́но исын проти Дэвлэ́скирэ дынэ́ лава́? Сарэ́са над! Пал-дова́ со, ко́ли тэ явэ́л дасаво Зако́но, саво́ могинэлас тэ дэл ве́чно джиибэ́н, тэды амэ могинасас тэ дорэсас чачипэ́н Законо́стыр;22. нэ Свэ́нто Чхиныбэ́н ракирэ́ла, со сарэ́ мануша́ исын тэл грэхоскири зор, палдава́ бахталыпэ́н, пал саво́ Дэвэ́л дыя́ лав, пир патяибэ́н дрэ Исусо́стэ Христосо́стэ, тэ явэ́л дыно́ одолэ́нгэ, савэ́ патя́на.23. Нэ анги́л патяибэ́н дрэ Исусо́стэ Христосо́стэ, амэ са́мас сы́рбы запхандлэ тэл Законоскиро ракхибэн ваш дова́, соб (кай) тэ ужакирас, ке́ли откэрэлапэ патяибэ́н.24. Палдава́ Зако́но дыкхця́ пал амэ́ндэ и сыс сы́рбы сыкляибнари (воспитателё), саво́ лыджия́ амэн кэ Христо́со ваш дова́, соб (кай) Дэвэ́л тэ приджинэл амэн чачунэнца пир патяибэ́н.25. А ке́ли явдя́ Христо́со, амэ́нгэ какана́ буты́р на трэй сыкляибнари тэ дыкхэ́л пал амэ́ндэ;26. пал-дова́ со амэ сарэ́ сам Дэвлэ́скирэ чхавэ́ пир патяибэ́н, дро екхипэ́н Исусо́са Христосо́са.27. И сарэ́ тумэ́, савэ́ болдэпэ дро екхипэ́н Исусо́са Христосо́са, тумэ́ сы́рбы кхэтанякирдэпэ Христосо́са пир Свэ́нто Ду́хо (Фа́но).28. Нанэ ни Юдос, ни Грекос; нанэ ни писхари́с, ни вольнонэ манушэ́с; нанэ ни муршэ́с, ни джувля́; пал-дова́ со тумэ́ сарэ́ сан екх дро екхипэ́н Исусо́са Христосо́са.29. А ко́ли тумэ́ сан Христосо́скирэ, тэды тумэ́ сан Авраамо́скирэ родо́стыр; мануша́, савэ́ дорэсэ́на дова́, пал со Дэвэ́л дыя́ лав. Romani Bible Baltic 2019 Maintained by the United Bible Societies for the Baltic Romani Mission