Beblia

1. Акана́ адя́кэ ракирэ́ла Рай Дэвэ́л, Саво́ создыя́ тут, Яково, и Саво́ дыя́ джиибэ́н ту́кэ, Израилё: “На дар, пал-дова́ со Мэ выкиндём тут, кхардём тут тырэ́ лавэ́са, ту сан Миро.

2. Ко́ли ту явэ́са тэ пириджас пир пани́, Мэ сом ту́са; ци пир рэ́ки (лэня́) – ёнэ тут на тасадякирэна; подджаса кэ яг – ёй тут на схачкирла.

3. Пал-дова́ со Мэ сом Рай Дэвэ́л, тыро́ Дэвэ́л, Свэ́нто Израилёскиро, Зракхибнари тыро́; Мэ Еги́пто, Ефиопия, Савея (Шэба) отдыём пал ту́тэ, соб (кай) тэ выкинав тут.

4. Пал-дова́ со ту сан дро́го дрэ Мирэ́ якха́, и яця́н древа́н куч и Ма́нгэ ту яця́н пир ило́, то Мэ отда́ва явирэ манушэ́н пал ту́тэ и народы пал тыро́ ди.

5. На дар, дыкх, Мэ сом ту́са; вастоко́стыр Мэ яна́ва тыро́ кхэри́тко ро́до, западостыр скэда́ва тут.

6. Кэ паш-рат (северо) пхэна́ва: “Отдэ́!” – и кэ паш-дывэ́с (юго): “На рикир, лы́джа дуралыпнастыр Мирэ́ чхаворэ́н и Мирэ́ чхае́н пхувья́кирэ ягорэндыр (краендыр);

7. кажнонэс, кон кхарэ́лапэ Мирэ́ лавэ́са, конэ́с Мэ создыём ваш Миро барипэ́н, конэ́скэ Мэ дыём джиибэ́н.”

8. Вылыджа народо, конэ́стэ исын якха́, нэ ёв короро́, исын кана́, нэ ёв исын кашуко.

9. Мэк сарэ́ народы тэ скэдэ́нпэ кхэтанэ́, и сарэ́ кхэри́тка ро́ды тэ явэ́н кхэтанэ́. Кон машки́р лэ́ндэ дава́ анги́л пхэндя́? Мэк тэ пхэнэ́н, со сыс англэды́р сарэ́стыр, мэк тэ дэн кхэри́тка пэ́скирэ манушэ́н тэ досыкавэн (тэ допхэнэн) пал дава́, мэк тэ пхэнэ́н пал пэ́стэ чачипэ́н, соб (кай) тэ шунэ́с и тэ пхэнэ́с: “Чачо́!”

10. А Мирэ́ мануша́, савэ́ допхэнэна, пал чачипэ́н, – пхэнэ́ла Рай Дэвэ́л, – тумэ́ и Миро писха́ри, конэ́с Мэ выкэдыём, соб (кай) тумэ́ тэ джинэ́н и тэ патя́н Ма́нгэ, со дава́ Мэ сом; англэды́р на сыс николи явирэ Дэвлэ́с и на явэ́ла.

11. Мэ, Мэ сом Рай Дэвэ́л и нанэ явирэ́с Зракхибнарис апри́ч Ма́ндэ.

12. Мэ ангилпхэндём, и зракхцём и пхэндём пал дава́, а явирэ́с нанэ кэ тумэ́, и тумэ́ – Мирэ́ мануша́, савэ́ допхэнэна, со Мэ – Дэвэ́л, – ракирэ́л Рай Дэвэ́л.

13. Англэды́р сарэ́стыр Мэ со́мас адасаво́, нико́н на зракхэ́ла Мирэ́ вастэ́стыр; Мэ кэра́ва, и кон дава́ отпарувэла?

14. Адя́кэ ракирэ́ла Рай Дэвэ́л, Саво́ выкиндя (выракхця) тумэн, Свэ́нто Израилёскиро: “Ваш тумэ́нгэ Мэ бичхадём кэ Вавило́но, роспхагирдём саро́, со сыс закэрдо и Халдеен, савэ́ сыс пхутькирдэ́ пэ́скирэ пармэнца (корабленца).

15. Мэ сом Рай Дэвэ́л, тумаро́ Свэ́нто, Кодова́, Кон создыя́ Израилё, тумаро́ Кра́ли.

16. Адя́кэ ракирэ́ла Рай Дэвэ́л, Саво́ откэрдя дром пэ мо́рё (дэрья́в), Саво́ откэрдя дром пир зоралэ́ паня́.

17. Саво́ вылыджия́ грэн и марибны́тка вурдэна́, халадэ́н и зор; сарэ́ пасинэ кхэтанэ́, на уштынэ́, мурдинэ, сыр момолытка (светильники), хасинэ́.

18. Нэ тумэ́ на пририпирэна пал прогинэ́ дывэса́, на думинэ́на пал дова́, со сыс ґара́.

19. Акэ, Мэ кэра́ва нэви́ буты́, акана́ ёй сыкадёла, ци тумэ́ на камэ́на тэ джинэ́н пал дава́? Мэ кэра́ва дром пэ фэ́лда, рэ́ки (лэня́) пэ чхучи́ пхув.

20. Фэлдытка мурдала́ (звери) пэ фэ́лда Ман вышарэна, шарэна шакалы и чирикля́ (страусы), пал-дова́ со Мэ пэ чхучи́ пхув дава́ пани́, Мэ кэра́ва рэ́ки (лэня́) пэ шуки́ мал (степ), соб (кай) тэ пьел Миро народо, саво́ Мэ выкэдыём.

21. Дава́ народо Мэ создыём ваш Пэ́скэ; ёв дэ́ла паты́в Ма́нгэ.

22. А ту, Яково, на кхардян Ман, ту, Израилё, на кэрдя́н ничы́ ваш Ма́нгэ.

23. Ту на яндян ма́нгэ бакрорэ́н ваш цэ́ло схачкирибэ́н, на вышардян Ман тырэ́ свэнтонэ́ дыибнаса. Мэ на зачхувавас тут, соб (кай) тэ дынаринэс (служынэс) Ма́нгэ марэскирэ яныбнаса, на припхэндём, соб (кай) тэ янэс фимиа́мо.

24. Ту на киндян Ма́нгэ дэсто́ лачхэ́ сунгаса пал руп, Ту на чалякирдян Ман тхулыпнаса тырэ́ свэнтонэ́ дыибна́стыр, нэ тырэ́ грэхэ́нца кэрдя́н Ма́нгэ пхарипэ́н; Ма́нгэ исын пхаро́ тырэ́ налачхэ́ рэндостыр.

25. Мэ, Мэ Кокоро́, отмэка́ва тырэ́ грэ́хи ваш Пэ́скэ Кокорэскэ, Мэ на пририпирава грэ́хи тырэ́ буты́р.

26. Дэ Ма́нгэ тэ пририпирав; амэ ява́са тэ кэра́с сэ́ндо (тэ сэндякираспэ); ра́кир ту, соб (кай) тэ допхэнэс тыро́ чачипэ́н.

27. Тырэ́-дадэ́скиро дад кэрдя́ грэ́хо и одолэ́, кон мангдя́пэ пал ту́тэ, отгинэ́ Ма́ндыр.

28. Палдова́ Мэ раша́нгирэ барыдырэндыр пэ свэ́нто штэ́то залыём лэ́нгири буты́, и отдыём пэ хасибэ́н Яково́с, и отдыём Израилё, соб (кай) лэс тэ магирэ́н.

1. “Акана́ шун, Яково, Миро писха́ри, шун, Израилё, саво́ Мэ выкэдыём.

2. Адя́кэ ракирэ́ла Рай Дэвэ́л, Саво́ создыя́ тут, Саво́ подрикирэлас тут да́кирэ лочовя́тыр: ‘На дар, Миро писха́ри, Яково, на дар, дро́го Израилё, саво́ Мэ выкэдыём.

3. Мэ вычхувава пани́ пэ одолэ́стэ, кон древа́н камэ́ла пани́, и барэ́ панинга́ пэ дова́, со вышутия; Мэ вычхувава Миро ду́хо (фа́но) пэ тыро́ кхэри́тко ро́до и бахтякирибэ́н Миро пэ тырэ́ чхаворэндэ, савэ́ ишчо (инкэ́) явэ́на анги́л.

4. И явэ́на ёнэ тэ барьён машки́р чар, сыр вербы (ивы) пашы́л пани́.

5. Екх ману́ш пхэнэ́ла: ‘Мэ сом Ра́скирэ-Дэвлэ́скиро’, яви́р кхарэ́ла пэс Яково́скирэ лавэ́са, три́то чхинэла пэ́скирэ вастэ́са ‘Мэ сом Ра́скирэ-Дэвлэ́скиро,’ и лэс кхарэ́на Израилёскирэ лавэ́са.”

6. Адя́кэ ракирэ́ла Рай Дэвэ́л, Кра́ли Израилёскиро, Саво́ выкиндя лэс. Рай Дэвэ́л, болыбна́скирэ-янголэ́нгиро: “Мэ сом пэ́рво и Мэ сом палатуно́ (последнё), нанэ явирэ Дэвлэ́с, апри́ч (кроме) Ма́ндэ.

7. Кон исын ишчо (инкэ́) адасаво́, сыр Мэ сом? Мэк ёв тэ пхэнэ́л, мэк тэ роспхэнэл Ма́нгэ екх пал екх саро́ долэ́ часостыр, сыр Мэ создыём ґаратуно народо, ци мэк ёнэ тэ ангилпхэнэн пал дова́, со явэ́ла.

8. На дарэ́н, и на трашан: ци на пхэндём Мэ ту́кэ ґара́, ци на ангилпхэндём? И тумэ́ досыкавэна (допхэнэна) пал Ма́ндэ. Ци исын яви́р Дэвэ́л апри́ч Ма́ндэ? Нанэ ни сави́ яви́р ска́ла [нанэ яви́р Дэвэ́л-ю.о.], ни со буты́р Мэ на джина́в.

9. Одолэ́, кон кэрэ́ла и́долы, одолэ́ кэрэ́на дылныпэ́н, и долэ́ и́долы, савэ́ исын дро́га ваш лэ́нгэ, кэ савэ́ ёнэ тырдэнапэ, на янэ́на лэ́нгэ нисаво́ лачхипэ́н; адалэ́ мануша́ ґалёна дава́ дрэ пэ́стэ. Ёнэ на дыкхэ́на, на ґалёна, палдава́ явэ́на ладжакирдэ́.

10. Кон кэрдя́ явирэ дэвлорэс, кон вычхудя́ идоло, савэ́стыр нанэ ни саво́ лачхипэ́н?

11. Сарэ́, кон кэрэ́ла дава́, явэ́на ладжакирдэ́, пал-дова́ со спецы тэ вычхинэн пэ кашт, савэ́ кэрэ́на и́долы, исын кокорэ́ фэ́ни мануша́. Мэк сарэ́ ёнэ тэ скэдэ́напэ, мэк тэ явэ́н тэрдэ́: ёнэ пиридарэна (страхадёна) и явэ́на ладжакирдэ́.

12. Фаурнари (ковалё) кэрэ́ла састырэстыр товэр, и ёв обкэрэла пэ вангара лэс; выкэрэла лэс барэ́ млотэнца и обкэрэла лэс пэ́скирэ зоралэ́ вастэ́са; адя́кэ кэрэ́ла буты́, со ёв ячэ́ла бокхало и бизорья́киро, ёв на пьела пани́, и ёв кхинёла.

13. Кхэра́-кэрибнаскиро (плотнико), сыр выкэдыя́ кашт, и протырдэла пир лэ́стэ мамуитко (линия) и отчэртинэла лэс ярьяса, обчхинэла востронэ струментоса, обкрэнглякирэла лэс и кэрэ́ла лэ́стыр гожонэ манушорэс, соб (кай) тэ чхувэ́л лэс дро кхэр.

14. Адава́ ману́ш пхагирэ́ла пэ́скэ кедры, выкэдэ́ла машки́р кашта́ дро вэш эгли и дэмбо; чхувэ́ла ясенё, дрэ пхув, а брышы́нд дава́ кашт барьякирэ́ла.

15. Далэ́ каштэ́стыр ману́ш татёла, хачкирэ́ла лэс дрэ яг и пэкэла маро́. И далэ́ каштэ́стыр кэрэ́ла дэвлорэс и мангэлапэ лэ́скэ; кэрэ́ла идоло и пэрэ́ла анги́л лэ́стэ пэ чанга́.

16. Ёв хачкирэ́ла пашы́л кашт дрэ яг, пэ яви́р паш ёв кэравэла мас, чалёла и татёла, и ракирэ́ла: “Куч татиём, лачхи́ яг.”

17. А долэ́стыр, со каштэ́стыр яця́пэ, кэрэ́ла дэвлорэс, кэрэ́ла пэ́скирэ идоло, мангэлапэ лэ́скэ, пэрэ́ла анги́л лэ́стэ пэ чанга́ и ракирэ́ла лэ́скэ: “Зра́кх ман, ту сан миро дэвла!”

18. Ёнэ ничи́ на джинэ́на и на ґалёна: Рай Дэвэ́л закэрдя лэ́нгирэ якха́, соб (кай) тэ на дыкхэ́н и лэ́нгирэ илэ, тэ на ґалён.

19. И на прилэ́ла ману́ш кэ ило́, и нанэ лэ́стэ годы́, соб (кай) тэ пхэнэ́л: “Мэ схачкирдём кашт пэ яг и пэ вангара пэкцём маро́, кэрадём мас ци трэй ма́нгэ тэ кэра́в налачхипэн каштэ́стыр, со яця́пэ? Ци трэй тэ мангавпэ каштэскэ?”

20. Ёв ха́ла, хохавэлапэ, хохадо ило́ лыджа́ла явирэ дромэ́са лэс; и нисыр ёв на вырискирэла пэ́скиро ило́, на пхэнэ́ла: “Ци нанэ хохаибэ́н дро Миро чачо́ васт?”

21. Рипирэн дава́, и Израилё, тумэ́ сан Мирэ́ писха́рья. Мэ создыём тут, Израилё, ту сан Миро писха́ри, на бистыр пал Ма́ндэ.

22. Мэ скхосава (злава) тыро́ чорипэ́н сыр мигла (тумано), тырэ́ грэ́хи сыр о́блоко, обрисёв кэ Мэ, пал-дова́ со Мэ выкиндём тут.

23. Мэк тэ радынэ́лпэ кэ багаипэн болыбэ́н, пал-дова́ со Рай Дэвэ́л кэрдя́ дава́! Мэк тэ годлэл пхувитко хорипэ́н, мэк тэ шуминэн бахтятыр бэ́рги, вэш, сарэ́ кашта́ дро вэш, пал-дова́ со Рай Дэвэ́л выкиндя Яково́с, Ёв ґаздэ́ла Пэ́скири паты́в дро Израилё.

24. Адя́кэ ракирэ́ла Рай Дэвэ́л, Саво́ выкиндя тут, и Саво́ создыя́ тут дрэ дакири лочови́: “Мэ сом Рай Дэвэ́л, Саво́ создыя́ саро́, Мэ екхджино́ протырдыём болыбэ́н и Пэ́скирэ зорья́са росчхудём пхув.

25. Мэ, Дэвэ́л, Саво́ кэрэ́ла адя́кэ, со гертыка (знаме́нии), савэ́ дэ́на хоханэ́ ангилпхэныбнарья, нэ саро́ ивья́ (напра́снэс), Саво́ сыкавэ́ла, сыр зджана годятыр човаханэ мануша́, савэ́ кэрэ́на чорахано пхэныбэ́н, Саво́ вытрадэла годьварэн манушэ́н (магэн) и лэ́нгиро джиныбэ́н кэрэ́ла дылныпнаса.

26. Мэ, Дэвэ́л, Саво́ дэ́ла зор лавэ́скэ, со пхэндя́ Миро писха́ри, Саво́ кэрэ́ла пир лава́, со пхэнэ́на бичхадэ́ мануша́ Лэ́скэ, Саво́ ракирэ́ла кэ Ерусалимо: “Явэ́на тэ дживэ́н дрэ ту́тэ”, – и кэ фо́рья Юда́скирэ: “Тумэ́ на явэ́на буты́р роспхагирдэ́, Тумэ́ явэ́на нэвэ́стыр чхудэ́, и Мэ нэвякирава тумарэ́ руи́ны.”

27. Мэ, Дэвэ́л, Саво́ ракирэ́ла кэ панескиро хорипэ́н (бездна): “Вышутёв, и тырэ́ рэ́ки (лэня́) Мэ вышутькирава.”

28. Саво́ ракирэ́ла пал Кирастэ: “Миро чхупна́ри; ёв кэрэ́ла саро́ пир Мири́ во́ля, ёв пхэнэ́ла кэ Ерусалимо. “Ту на явэ́са буты́р роспхагирдо, пхэнэ́ла кэ Кхангири́: “Ту явэ́са чхуды́ пэ штэ́то!”

1. Давидо́скиро Пса́лмо. Рай Дэвэ́л пхэндя́ мирэ́ Ра́скэ-Дэвлэ́скэ: “Бэш пашы́л ма́ндэ чачэ́ рига́тыр, пака мэ чхува́ва тэлэ́ Тырэ́ вэргэ́н тэл ґэра́.”

2. Рай Дэвэ́л бичхавэ́ла Тырэ́-зорьякиро крали́тко дэсто́ Сионо́стыр: “Ту хулаин машки́р Тырэ́ вэргэ́ндэ.”

3. Тырэ́ мануша́ янэ́на пэс дро Тырэ́-зоралыпнаскиро дывэ́с свэнтонэ́ райканэ слава́са: Тырэ́ тэрнэ́ бияндёна сыр пахлын (роса), сави́ сыс пэ зло́ко (пэ ра́нко).

4. Рай Дэвэ́л совлахадя́, и Ёв наявэла тэ тангинэ́л (на пожалинэла): “Ту сан раша́й пэ сарэ́ ве́ки, дасаво-паць сыр Мелхисэдэко.”

5. Рай Дэвэ́л исын пашо Тыро́ чачо́ васт и Ёв пхагирэ́ла кралье́н дро дывэ́с, ке́ли Ёв холясо́ла.

6. Ёв явэ́ла тэ сэндякирэ́л машки́р Наюды́тка на́цыи; Ёв ячкирэ́ла пэ сарэ́ штэ́ты пир пхув тру́пы; Ёв злэла шэрэ́ барыдырэндэ, кон хулаинэла пир бари пхув.

7. Ёв выпьела пани́ сыгнонэ рэкицатыр (лэнорьятыр) пир дром, и Ёв ґаздэ́ла шэро́.

5. Отпхэн дылынэскэ пир лэ́скиро дылныпэ́н, соб (кай) ёв тэ на явэ́л годо́ дрэ пэ́скирэ якха́.

6. Кон бичхавэ́ла дылынэ́ манушэ́с тэ пиридэл зан (звесь), одова́ сы́рбы подчхинэла ґэра́ пэ́скэ и кэрэ́ла биба́хт (налачхипэн).

7. Сы́рбы ґэра́ лангалэ манушэ́скэ, савэ́ на псирэ́на маму́й (роўнэс), адя́кэ-паць исын годопхэныбэн дро дылынинэскиро муй.

8. Тэ кэрэ́с паты́в дылынэскэ, исын дова́-паць сыр тэ пхандэс куч бар дрэ марибны́тко раґатка.

9. Годопхэныбэн дрэ дылынэскирэ ушта́ исын дова́-паць, сыр пхусадытко хру́сто (терно) дрэ матымарискирэ ушта́.

1. И мэ ишчо (инкэ́) пхэна́ва: пака дадэ́скиро чхаво́, савэ́скэ дад мэкэ́ла пэ́скиро миштыпэ́н, исын тыкно́, кэ ёв отлыджанапэ адя́кэ-паць сыр и кэ дадэ́скиро писха́ри, мэк ёв исын сы́рбы хула́й пэ саро́ миштыпэ́н;

2. нэ пака ёв барьёла, пашы́л лэ́стэ псирэ́на ра́зна хулаибнытка и кхэрэ́скирэ барыдыра́ кэ/жы́ко кэ долэ́ бэрша́, савэ́ дад упхэнэла.

3. Адя́кэ-паць и амэ сам, ке́ли амэ са́мас сы́рбы бияторэ пир патяибэ́н, тэды амэ са́мас сыр писха́рья анги́л далэ́ свэто́скирэ – духоскири зор;

4. а ке́ли явдя́ часо, саво́ Дэвэ́л выкэдыя́, Ёв бичхадя́ Пэ́скирэ Екхэ Чхавэ́с, Савэс джувлы́ бияндя́ и Саво́ дживдя́ тэл Юды́тко Зако́но,

5. ваш дова́, соб (кай) Ёв могинэлас тэ выкинэл одолэ́н, савэ́ исын писха́рья анги́л Зако́но, соб (кай) амэ могинасас тэ ячас Дэвлэ́скирэ чхавэ́нца.

6. Нэ пал-дова́, со тумэ́ сан Лэ́скирэ чхавэ́, Дэвэ́л бичхадя́ Лэ́скирэ-Чхавэ́скиро Ду́хо (Фа́но) дро амаро́ ило́, Саво́ дэ́ла го́дла: “Авва! Да́до!”

7. Палдава́ ту на сан какана́ буты́р писха́ри, а чхаво́, а ко́ли чхаво́, тэды Дэвэ́л дэ́ла ту́кэ саро́, со исын Лэ́стэ ваш чхавэ́нгэ.

8. А тэды, ґарэдыр (вагэдыр), ке́ли тумэ́ на джиндлэ́ Дэвлэ́с, тумэ́ са́нас писха́рья анги́л одолэ́ дэвлорэндэ, савэ́ сарэ́са нанэ натуралэ дэвэла́;

9. а какана́ тумэ́ приджиндлэ Дэвлэ́с, а фэды́р тэ пхэнас, со Дэвэ́л приджиндя тумэн; сыр дава́ тумэ́ нэвэ́стыр рисинэ́ кэ бизорья́кирэ и бэда ду́хи, савэ́нгэ свэ́то поклонинэлапэ, сы́рбы тумэ́ камэ́на тэ ячэн нэвэ́стыр писхарье́нца анги́л кадалэ́ ду́хи.

10. Тумэ́ ракхунэс (дрэ дуй якха́) придыкхэнапэ кэ дывэса́, чхона́, часы и бэрша́.

11. Мэ дарава, со ци на ивья́ (напра́снэс) мэ кэрдём буты́ машки́р тумэ́ндэ.

12. Пшала́лэ! Мэ манга́ва тумэн, соб (кай) тумэ́ тэ явэ́н дасавэ́, сыр мэ сом, пал-дова́ со мэ сом дасаво, сыр тумэ́ сан: тумэ́ на кэрдэ́ ма́нгэ ни саво́ чорипэ́н.

13. Нэ тумэ́ джинэ́на, со мэ со́мас насвало́, ке́ли мэ роспхэндём бахталы́ зан (звесь) тумэ́нгэ дро пэ́рво мо́ло,

14. а тумэ́ на гиндлэ́ ман фуеды́р пэ́стыр, на рисинэ́ ма́ндыр, ке́ли дыкхнэ́ миро бизоралыпэн, а тумэ́ прилынэ́ ман сыр Дэвлэ́скирэ Янголо́с, сыр Исусо́с Христосо́с.

15. Савэ ж бахталэ́ тумэ́ са́нас! И мэ пхэна́ва сыр якхи́тко (свидетелё), со ко́ли тэ явэ́л трэ́бима, тумэ́ вылэнас пэ́скирэ якха́ и отдэнас лэн ма́нгэ.

16. Со ж, ци мэ яцём вэргоса тумэ́нгэ, ко́ли мэ пхэндём чачипэ́н тумэ́нгэ?

17. Лэ́ндэ исын илэ́скиро хачкирибэ́н пал тумэ́ндэ, нэ дава́ ёнэ кэрэ́на на сарэ́ илэ́стыр, а ёнэ камэ́на тэ пиритырдэн тумэн кэ пэ, соб (кай) тумэ́ндэ тэ явэ́л дасаво илэ́скиро хачкирибэ́н пал лэ́ндэ.

18. Дава́ исын мишто́ ўса́ды (сак), соб (кай) тэ явэ́л илэ́скиро хачкирибэ́н пал чачипэ́н, а на фэ́ни тэды, ке́ли мэ сом тумэ́нца,

19. мирэ́ чхаворэнца, ваш конэ́скэ мэ кэрдём буты́ дасавэ́ дукхэнца, со исын джувля́тэ, ке́ли ёй биянэ́ла тыкнорэс, пака дро тумаро́ джиибэ́н на явэ́ла бицяло́ Христосо́скиро бахтякирибэ́н:

20. мэ камамас тэ явав кэ тумэ́ и тэ парував мири́ зан, пал-дова́ со мэ на джиндём, со сыс тумэ́нца.

21. Пхэнэ́н тумэ́ ма́нгэ, савэ́ древа́н камэ́на тэ кандэ́н Зако́но: ци шунэ́на тумэ́, со Зако́но ракирэ́ла?

22. Пал-дова́ со исын чхиндло́, со Авраамостэ сыс дуй чхавэ́, екх писхарицатэ, екх вольнонэ джувля́тэ.

23. Нэ одова́, саво́ сыс писхарицатэ, бия́ндыя, сыр и сарэ́ бияндёна, а кодова́, саво́ сыс вольнонэ джувля́тэ, бия́ндыя пир Дэвлэ́скиро дыно́ лав.

24. Кадалэ́ дуй чачипэна́ исын сы́рбы сыкаибэ́н: пал-дова́ со исын дуй заветы – екх пэ Бэ́рга Синаё, пир саво́ бияндёна писха́рья и саво́ упхэнэла пэ Агарьятэ.

25. Палдава́ Агарь значинэла Бэ́рга Синаё дрэ Аравия и исын сы́рбы аканатуно Ерусалимо, саво́ исын дро писхарибэн пэ́скирэ манушэ́нца,

26. а Ерусалимо, саво́ исын дро Болыбна́скиро Раё исын во́льно, – дава́ фо́ро исын амари́ дай.

27. Пал-дова́ со исын чхиндло́: “Ра́дынпэ, джувлие бичхавэнгири, конэ́стэ на сыс никели чхаворэ́; дэ го́дла радыма́са и выпхэн лошалэс (весёлэс), сави́ на джинэ́ла бияныпнытка дукха́; пал-дова́ со джувля́тэ, савья́ ром мэкця́, явэ́на бутэды́р чхаворэ́, сыр кодолятэ джувля́тэ, савьятэ исын ром.”

28. Нэ тумэ́, пшала́лэ, адя́кэ-паць сыр и амэ сам, сан Дэвлэ́скирэ чхаворэ́ пир дыно́ лав, адя́кэ-паць сыр и Исаа́ко сыс.

29. Сыр сыс и тэды, ке́ли чхаворо́, саво́ бия́ндыя пир лочакиро камибэн, традыя́ яври́ одолэ́с, саво́ бия́ндыя Дэвлэ́скирэ Духо́стыр.

30. Нэ со ракирэ́ла Свэ́нто Чхиныбэ́н? “Вытрадэ писхарица ла́кирэ чхавэ́са, пал-дова́ со писхарицакирэ чхавэ́скэ на явэ́ла паш Дадэ́скирэ мэкнэ́ миштыпна́стыр кхэтанэ́ вольнонэ – джувлякирэ чхавэ́са.”

31. Палдава́, пшала́лэ, амэ на сам писхарицакирэ чхаворэ́, а амэ сам вольнонэ-джувлякирэ чхаворэ́.

Romani Bible Baltic 2019

United Bible Societies for the Baltic Romani Mission