Bible in one year
September 27

1. Адя́кэ ракирэ́ла Рай Дэвэ́л кэ Кира, савэ́с Ёв помакхця: Мэ рикирава тут пал чачо́ васт, соб (кай) тэ отдав ту́кэ народы, Мэ злава кустыка, со сыс пэ трушула кралье́ндэ, соб (кай) тэ откэрэн ту́кэ вудара́, и соб (кай) по́рта тэ на запхандэлпэ.
2. ‘Мэ джа́ва анги́л ту́тэ, бэ́рги роспхагирава, харкунэ́ (меди́тка) вудара́ розмарава, и штабы (запоры) саструнэ́ пирипхагирава.
3. И Мэ отда́ва ту́кэ гарадэ́ дро калыпэ́н (цёмныма) кучипэна (сокровишчы) и приракхнэ барвалыпэна, соб (кай) ту тэ ґалёс, со Мэ сом Рай Дэвэ́л, Саво́ кхарэ́ла тут пир лав, Саво́ исын Дэвэ́л Израилёскиро.
4. Ваш Яково́скэ, Мирэ́ писхари́скэ, ваш Израилё, Конэ́с Мэ выкэдыём, Мэ кхардём тут пир лав, дыём ту́кэ паты́в, мэк (хоть) ту на джиндян Ман.
5. Мэ сом Рай Дэвэ́л и явирэ́с нанэ; нанэ Дэвлэ́с апри́ч Ма́ндэ, Екх Мэ сом. Мэ выкэдыём тут, ко́ли ту на джиндян Ман,
6. соб (кай) тэ джинэ́н вастоко́стыр, кай кхам ґаздэ́лапэ и кэ западо (пал-панитко риг), кай кхам бэшэ́ла, со нанэ явирэ Дэвлэ́с: Мэ сом Рай Дэвэ́л и явирэ́с нанэ.
7. Мэ кэра́ва дуд (свэ́то) и кэра́ва калыпэ́н (цёмныма), Мэ да́ва рама́нё (миро) и кэра́ва бари би́да (биба́хт); Мэ, Рай Дэвэ́л, кэра́ва дава́.
8. Мэк болыбэ́н тэ дэл брышы́нд, мэк тэ чхувэлпэ чачипэ́н болыбна́стыр, мэк тэ откэрэлпэ пхув, соб (кай) тэ дэл зракхибэ́н, мэк кхэтанэ́ тэ барьёл чачипэ́н. Мэ, Рай Дэвэ́л, кэра́ва саро́ дава́.
9. Бида кодолэ́скэ, кон чингардэлапэ Дэвлэ́са: Саво́ создыя́ лэс, кон исын чэрепко чэрэпкэндыр пэ пхув. Ци пхэнэ́ла ґлэя (глина) пэ́скирэ мастероскэ: “Со ту кэрэ́са?”, ци пхэнэ́ла тыри́ буты́ пал ту́тэ: “Лэ́стэ нанэ васта́?”
10. Бида одолэ́скэ, кон пхэнэ́ла пэ́скирэ дадэ́скэ: “Со́скэ ту дыя́н ма́нгэ джиибэ́н?”, а да́кэ ци пхэнэ́ла ёв: “Со́скэ ту бияндян ман?”
11. Адя́кэ ракирэ́ла Рай Дэвэ́л, Свэ́нто Израилёскиро, Саво́ создыя́ лэс: “Тумэ́ пхучэна Ма́ндыр, со явэ́ла Мирэ́ чхавэ́нца? И тумэ́ камэ́на тэ подпхэнэн, со трэй Ма́нгэ тэ кэра́в?”
12. Мэ создыём пхув и манушэ́с пэ ла́тэ; Мэ – Мирэ́ васта́ протырдынэ болыбэ́н и Мэ дыём припхэныбэ́н кэ сарэ́ болыбны́тка чэргэня́ (болыбнытко халадыбэ́н).
13. Мэ чхудём лэс дро чачипэ́н, Мэ кэра́ва сарэ́ лэ́скирэ дрома́ маму́й (Мэ мамуякирава). Ёв кэрэ́ла Миро фо́ро, отмэкэ́ла пэ во́ля Мирэ́ манушэ́н плено́стыр, на лэ́ла лэ́ндыр нисаво́ выкиныбэ́н, ни да́ры”, – ракирэ́ла Рай Дэвэ́л, болыбна́скирэ-янголэ́нгиро.”
14. Адя́кэ ракирэ́ла Рай Дэвэ́л: “Египтя́ни, савэ́ кэрэ́на буты́, и Ефиопляни, савэ́ бикнэна, и Савейцы, вучэ́ мануша́, явэ́на тырэ́ манушэ́нца; ёнэ пал ту́тэ явэ́на тэ джа́н пхандлэ зандирьенца (цэпэнца), явэ́на, пэрэ́на пэ чанга́, лэ́на тэ мангэ́н тут, ракири́: “Екх (фэ́ни) ту́тэ исын Екх Дэвэ́л, и явирэ нанэ Дэвлэ́с.”
15. Чачо́, Ту сан, Дэвэ́л гарадо́? Дэвэ́л Израилёскиро, Зракхибнари.
16. Сарэ́ ёнэ явэ́на ладжакирдэ́; кхэтанэ́ лэ́нца джа́на ладжаса и одолэ́, кон кэрэ́ла и́долы.
17. А Израилё явэ́ла зракхно пир ве́чно зракхибэ́н дро Растэ-Дэвлэ́стэ; тумэ́ на явэ́на ладжакирдэ́ никели.
18. Адя́кэ ракирэ́ла Рай Дэвэ́л, Саво́ создыя́ болыбэ́н; Ёв – Дэвэ́л, Саво́ счхудя пхув и дыя́ зор ла́кэ; на ивья́ (напра́снэс) счхудя ла, а соб (кай) тэ дживэ́н пэ ла́тэ; Мэ сом Рай Дэвэ́л и явирэ́с нанэ.
19. На чораханэ́с Мэ ракиравас, Мэ на ракирдём пэ кало́ (тёмно) пхувья́киро штэ́то; Мэ на ракирдём кэ кхэри́тко ро́до Яково́скиро: “Ивья́ (напра́снэс) тумэ́ Ман родэ́на.” Мэ сом Рай Дэвэ́л, Саво́ ракирэ́ла чачипэ́н и сыкавэ́ла чачипэ́н.
20. Скэдэ́нпэ, явэ́н, подджан сарэ́, кон зракхцяпэ народо́стыр. Мэк тэ явэ́н одолэ́ дылынэ́ и бура, кон лыджа́ла каштуно идоло, кон мангэлапэ дэвлорэскэ, саво́ на зракхэ́ла.
21. Дэн тэ джинэ́н манушэ́нгэ и пхэнэ́н: “Кон пхэндя́ дава́ дро ґаратуно часо, кон ангилпхэндя дава́? Ци на Мэ, Рай Дэвэ́л, и нанэ явирэ Дэвлэ́с апри́ч Ма́ндэ, а исын екх Дэвэ́л – Мэ сом Дэвэ́л чачуно́, Саво́ зракхэ́ла и нанэ никонэ́с явирэ́с апри́ч Ма́ндэ.
22. Кэ Мэ обрисён и тумэ́ зракхэнапэ, сарэ́ яго́ры (краи́) пэ пхув, пал-дова́ со Мэ сом Дэвэ́л и нанэ явирэ́с.
23. Мэ Кокоро́ Пэ́са совлахава: Мирэ́ уштэндыр выджа́ла чачипэ́н, лав, саво́ на парудёла, со анги́л Ма́ндэ пэрэ́ла пэ чанга́ кажно ро́дыцо, пэ Ма́ндэ совлахала кажно екхэ-чибакири ири (чиб).
24. И явэ́на тэ ракирэ́н пал Ма́ндэ адя́кэ: “Фэ́ни (то́ка) Екхэ Растэ-Дэвлэ́стэ исын зор и чачипэ́н; кэ Ёв явэ́на и явэ́на тэ ладжан сарэ́ Лэ́скирэ вэ́рги.
25. Рай Дэвэ́л зракхэ́ла и пир Лэ́стэ явэ́ла тэ славинэлпэ кхэри́тко ро́до Израилёскиро.
1. Пыя́ Вило [Бэл-ю.о.], пыя́ Нево; лэ́нгирэ и́долы пасёна пэ грэ́ндэ и гурувэндэ, пхаро́ лэ́нгэ дава́ тэ лыджа́н кхинэ мурдалэ́нгэ!
2. Пынэ́, пынэ́ кхэтанэ́, на зракхнэ́ одолэ́н, кон лэн лыджалас, и кокорэ́ гинэ́ дро пле́но.
3. Шунэ́н ман, кхэр Яково́скиро, сарэ́, кон яця́пэ Израилёскирэ кхэрэ́стыр, конэ́с Мэ прилыём бияныпнастыр и Мэ лыджавас да́кирэ лочовя́тыр.
4. Тумэ́ пхурьёна, а Мэ адасаво́ ява́ва; парнёна тумарэ́ бала́, а Мэ ява́ва тэ лыджав тумэн. Мэ создыём тумэн и лава́ тэ лыджав, Мэ ла́ва тэ подрикирав, Мэ ява́ва тэ ракхав тумэн.
5. Пэ конэ́стэ Мэ зджава (поджава), сыр тумэ́ думинэ́на, кон исын Адасаво́, сыр Мэ сом?
6. Мануша́ дорэсэ́на сувнака́й кисыкатыр, ублавэна руп и кхарэ́на манушэ́с, соб (кай) ёв тэ кэрэ́л лэ́стыр дэвлэс; мангэ́нпэ дэвлэскэ и пэрэ́н пэ чанга́ анги́л лэ́стэ.
7. Ёнэ лэ́на лэс пэ псикэ́, лыджа́на лэс, чхувэ́на пэ лэ́скиро штэ́то, ёв исын тэрдо́, ёв на зджа́ла штэто́стыр; мануша́ годлэна, нэ ёв ничи́ на пхэнэ́ла, на ракхэ́ла бидатыр.
8. Пририпирэн дава́ и сыкавэ́н пэс муршэнца; прилэ́н дава́ кэ ило́, мануша́лэ, савэ́ отгинэ́ чачунэ́ Дэвлэ́стыр.
9. Пририпирэн дова́, со сыс англэды́р сарэ́стыр, пал-дова́ со Мэ сом Дэвэ́л и нанэ явирэ Дэвлэ́с, нанэ никонэ́с, кон зджа́ла (поджала) пэ Ма́ндэ.
10. Мэ пхэна́ва англэды́р сарэ́стыр, со тэ́ньчи дро ко́нцо (дро яго́ро) явэ́ла, ґаратунэ́ часостыр Мэ ракира́ва пал дова́, со ишчо (инкэ́) на кэрдя́пэ: Явэ́ла пир Миро годыпэ́н (совето); Мэ кэра́ва саро́, со Ма́нгэ исын пир ило́.
11. Мэ кхардём орло́с (кидо́с) вастоко́стыр; дуратунэ́ рига́тыр Мэ кхардём одолэ́с, кон кэрэ́ла пир Миро припхэныбэ́н. Мэ пхэндём и кэра́ва кэ ко́нцо (яго́ро); ангилпхэндём и явэ́ла адя́кэ.
12. Пошунэн Ман, мануша́ холямэ́ илэ́са, савэ́ отгинэ́ чачипнастыр.
13. Подги́я Миро чачипэ́н, ёв исын на́дур, сы́гэс явэ́ла Миро зракхибэ́н; Мэ да́ва зракхибэ́н Сионоскэ, а Израилёскэ – Мири́ паты́в.
1. Аллилуя. Мэ ява́ва тэ славинав и тэ парикира́в Ра́скэ-Дэвлэ́скэ сарэ́ мирэ́ илэ́са машки́р чачипнаскирэндэ и пэ скэдыибэ́н.
2. Савэ барэ́ бутя́ кэрдя́ Рай Дэвэ́л. Сарэ́, конэ́скэ ячнэ́ дро́га ёнэ, камэ́на дава́ тэ ґалён.
3. Саро́, со кэрэ́ла Рай Дэвэ́л, исын патывало и славу́тно, и Лэ́скиро чачипэ́н ячэ́лапэ пэ сарэ́ ве́ки.
4. Ёв кэрдя́ адя́кэ, со Лэ́скирэ ди́вы рипирэна. Рай Дэвэ́л исын лачхэ́-дескиро и тангинэла сарэ́н.
5. Ёв дэ́ла хабэ́н одолэ́нгэ, кон дарэ́ла Лэ́стыр, Ёв усады (сак) рипирэла Лэ́скиро Зако́но.
6. Ёв сыкадя́ зор Лэ́скирэ манушэ́нгэ Пэ́скирэ бутендыр, соб (кай) тэ дэн лэ́нгэ Наюдэнгирэ-нацыенгиро мэкно́ миштыпэ́н.
10. Рай [зорало́ ману́ш-р.с.] кэрэ́ла пир пэ́скири годы́ и лэ́ла пэ буты́ дуе́н: и дылынэс, и сваконэ манушэ́с, саво́ джа́ла пашы́л. Баро́ Дэвэ́л, Саво́ создыя́ саро́, дэ́ла дуенгэ мазу́ри (награда): и дылынэскэ и одолэ́скэ, кон кэрэ́ла фуипэ́н.
1. Тэды, рикирэнпэ зоралэ́с сыр вольна мануша́, пал-дова́ со Христо́со мэкця́ пэ во́ля амэн и, соб (кай) тумэ́ нэвэ́стыр тэ на урьен писхарискиро ґа́мо.
2. Шунэ́н! Мэ, сом Па́вли, пхэна́ва тумэ́нгэ, со, ко́ли тумэ́ обчхинэнапэ, на явэ́ла ни саво́ лачхипэ́н тумэ́нгэ Христосостыр.
3. И мэ допхэнава кажнонэ́ манушэ́скэ, со ёв (исын) банго́ (мусинэла) тэ рикирэ́л саро́ Зако́но.
4. Тумэ́ дуринэ Христосо́скирэ лачхипнастыр, ко́ли камэ́на тэ явэ́н приджиндлэ чачунэнца анги́л Дэвлэ́стэ пир Зако́но; тумэ́ ж отпынэ бахталыпнастыр.
5. Пал-дова́ со амэ пир Свэ́нто Ду́хо (Фа́но) ужакираса зоралэ́с, ке́ли Дэвэ́л приджиндя амэн чачунэнца пир патяибэ́н.
6. Пал-дова́ со, ке́ли амэ сам дро екхипэ́н Исусо́са Христосо́са, ни обчхиныбэн, ни наобчхыныбэн на мол ничы́, а саро́ смысло исын дро патяибэ́н, саво́ сыкавэ́ла пэс пир паты́в кэ яви́р мануша́.
7. Тумэ́ кэрдэ́ адя́кэ шука́р сы́рбы праста́ндынэ чачипна́са пир стадионо! Кон отрискирдя тумэн, соб (кай) тумэ́ тэ на кандэ́н чачипэ́н.
8. Кадасаво́ отрискирибэн нанэ Дэвлэ́стыр, Саво́ прикхардя тумэн.
9. Тыкны дрожджа (рошчына) ґаздэ́ла саро́ хумэр (тясто).
10. Мэ джино́м зоралэ́с, со тумэ́ адя́кэ думинэ́на, кон исын дро екхипэ́н Христосо́са, и кодолэ́скэ, кон ладжакирэла тумэн, явэ́ла ка́ра, на дыкхи́, кон бы ёв тэ на явэ́л.
11. Нэ палсо́ ж мануша́ традэ́на ман, пшала́лэ, ко́ли мэ роспхэнава лав пал обчхиныбэн? Тэды бар, со исын пашто́ пэ дром анги́л манушэ́ндэ, тэ патя́н дро зракхибэ́н пир Христосо́скиро трушу́л, исын кэдыно криг.
12. Мэ кама́м, соб (кай) мануша́, савэ́ ладжакирэна тумэн, аж тэ почхинэн пэ́скэ маса́.
13. Тумэ́, пшала́лэ, са́нас кхардэ́ тэ явэ́н вольна. Екх со, соб (кай) тумари́ вольныма тэ на дэл саштыпэн тэ кэрэ́н пир лочакирэ-налачхэ́ камибэна.
14. И саро́ Зако́но рикирлапэ пэ екх припхэныбэ́н: “Сыка́в паты́в пэ́скирэ пашатунэ́ манушэ́скэ, сыр кокоро́ пэ́скэ.”
15. А ко́ли тумэ́ кошэнапэ и ханапэ машки́р пэ́стэ, тэды ракхэ́нпэ, соб (кай) тумэ́ тэ на хасякирэ́н екх екхэ́с.
16. Нэ мэ пхэна́ва, дживэ́н пир Свэ́нто Ду́хо (Фа́но), и тумэ́ на явэ́на тэ кэрэ́н пир налачхэ́-лочакиро камибэн.
17. Пал-дова́ со лочакэ на трэй дова́, со Духоскэ трэй, и Духоскэ (Фаноскэ) трэй на дова́, со лочакэ трэй: кадалэ́ дуй камибэна исын вэ́рги екх екхэ́скэ; палдава́ тумэ́ на кэрэ́на дова́, со тумэн тырдэла,
18. нэ ко́ли Свэ́нто Ду́хо (Фа́но) лыджа́ла тумэн, то тумэ́ на сан тэл Зако́но.
19. Ѓа́да, со кэрэ́на мануша́ пир лочакирэ камибэна: ёнэ кэрэ́на биладжаипэ́н, дживэ́на джувле́нца би сэвлакиро, лыджа́на пэс сыр мурдала́ (жывотна);
20. мангэ́напэ идолэ́нгэ, човаханякирэна, на сыкавэ́на паты́в явирэ манушэ́нгэ, кошэнапэ, зэвлынэна, замарэна манушэ́н, причхувэна зор тэ явэ́н фэдэды́р явирэ манушэ́ндыр, роспэрнапэ холя́са пэ групы, кандэ́на хоханэ́ сыклякирибэна,
21. жалинэна лачхипэ́н явирэ́нгэ, пьена сыр матыбнарья, гулинэна бирипирибнаскирэс и бут яви́р; пал кадасавэндэ мэ пхэна́ва анги́л, сыр и ракирдём англэды́р, со, кон адя́кэ кэрэ́ла, на дорэсэ́ла паш дро Дэвлэ́скиро Кралипэ́н.
22. А пир Свэ́нто Ду́хо (Фа́но) мануша́ дживэ́на патыва́са кэ яви́р мануша́, радыма́са, спокойнымаса, длугонэ вырикирибнаса, лачхэ́-илыткимаса, лачхипна́са, чачипна́са;
23. ёнэ исын штыл (тиха), обрикирэна пэс, – кадасавэ́ манушэ́н притырдэла кэ пэ Зако́но.
24. И адалэ́ мануша́, савэ́ исын Христосо́скирэ, примардэ пэ́скири манушы́тко грэхи́тко натура пэ трушу́л пэ́скирэ налачхэ́ камибнаса и грэхоскирэ тырдыпнаса.
25. Ко́ли амэ дживаса пир Свэ́нто Ду́хо (Фа́но), амэ́нгэ трэй и тэ кэра́с пир Свэ́нто Ду́хо (Фа́но).
26. На ява́са тэ рикирас вучэ́с накх, на ява́са тэ дас зор холякэ екх пэ екхэ́стэ, соб (кай) тэ на дас якхало екх екхэ́с.
Romani Bible Baltic 2019
United Bible Societies for the Baltic Romani Mission