Bible in one year - Пэ Балтитко Романи чиб

Bible in one year September 28

1. “Джа́, бэш пэ пра́хо, патывалы́ тэрны́ джувлы́, чхай Вавилоноскири, бэш пэ пхув. Нанэ троно (крали́тко штэ́то), чхай Халдеенгири, на пхэнэ́на пал ту́тэ буты́р, со ту сан шука́р и барвалы.

2. Лэ жорны (вэлэдин) и мелин яржо́, злэ тыро́ дыкхло, ґа́здэ тыри́ подя (труюны), сыка́в тырэ́ ґэра́, джа́ пир рэ́ки (лэня́).

3. Одкэрлапэ тыро́ нангипэ́н, явэ́ла бицялы тыри́ ладж. Кэра́ва Мэ сэ́ндо, Мэ на потангинава никонэ́с.”

4. Амаро́ Зракхибнари исын Свэ́нто Израилёскиро, Лэ́скиро лав – Рай Дэвэ́л, болыбна́скирэ-янголэ́нгиро.

5. Бэш, на ра́кир ничи́, джа́ дрэ калыпэ́н (цёмныма), чхай Халдеенгири, буты́р на явэ́на тэ кхарэ́н тут раняса дро кралипэ́н.

6. Холясыём Мэ пэ Миро народо, хасякирдём Мирэ́ чхавэ́н, отдыём лэн дрэ тырэ́ васта́, Вавило́но, а ту на потангиндян лэн; пхуро́ ману́ш лыджия́ тыро́ пхарипэ́н.

7. Ту ракирэсас: ‘Саро́ джиибэ́н мэ ява́ва раняса,’ – а ту на прилыян тырэ́ годя́са, на думиндян, со дурэды́р явэ́ла.

8. Акана́ вышу́н дава́, роспестиндлы, биракхибнаскири, сави́ ракирэ́ла дро пэ́скиро ило́: ‘Мэ сом екх адасави, явирья нанэ; мэ на ячавапэ биромэскири (пивляса), мэ на хасякира́ва чхаворэ́н.’

9. Нэ ко́ли ту на ужакирэса, то саро́ кэ ту явэ́ла: и ромэс хасякирэса и чхаворэ́н дро екх дывэ́с; явэ́ла кэ ту биба́хт пхэрдэ́с, на зракхэ́ла тут чорахано джиныбэ́н и бари зор чораханы.

10. Ту́тэ сыс наде́я пэ тырэ́ налачхэ́ рэ́нды, ту пхэндя́н: ‘Нико́н ман на дыкхэ́ла.’ Тыри́ годы́ и тыро́ джиныбэ́н змардэ тут дромэ́стыр; ту ракирэсас дро тыро́ ило́: ‘Мэ сом, и буты́р нанэ никонэ́с апри́ч Ма́ндэ.’

11. Явэ́ла кэ ту чорипэ́н (биба́хт); ту на ґалёса, савэ́ рига́тыр ёй ґаздэ́лапэ; явэ́ла кэ ту би́да, и ту ла́тыр на нашэса; явэ́ла хасибэ́н, пал саво́ ту на думинэса.

12. Ячпэ тырэ́ чораханэ джиныбнаса, саво́ ту лыян тэ кэрэ́с ишчо (инкэ́) дро тэрныпэн, зракхпэ лэ́са бидатыр.

13. Ту кхиныян, пал-дова́ со прилыян бут годыпэ́н (советы); мэк тэ явэ́н одолэ́, кон ангилпхэнэла пир болыбэ́н, пир нэво́ чхон и чэргэня́, мэк тэ зракхэн ёнэ тут долэ́стыр, со явэ́ла.

14. Акэ, ёнэ исын сыр пхус, яг схачкирдя́ лэн, на зракхнэ́ ёнэ пэ́скиро джиибэ́н ягатыр; ничи́ на яця́пэ – ни вангар, соб (кай) тэ татёс, ни яг, соб (кай) тэ бэшэс на́бут паш ла́тэ.

15. Акэ, савэ́ ячнэ́ одолэ́, конэса ту кэрэсас буты́, конэса ту тимисякирэсас (таргинэсас) ишчо (инкэ́) дро тырэ́ тэрнэ́ бэрша́. Кажно гия́ пэ пэ́скири риг; нико́н на зракхэ́ла тут.

Isaiah 48:1-22

1. Шунэ́н дава́, кхэр Яково́скиро, сарэ́, кон кхарэ́лапэ Израилёскирэ лавэ́са, кон бия́ндыя Юда́скирэ родо́стыр, кон совлахала Ра́скирэ-Дэвлэ́скирэ лавэ́са и патя́ла Израилёскирэ Дэвлэ́скэ, мэк (хоць) ёв на патя́ла на пир патяибэ́н и чачипэ́н!

2. Ёнэ пхэнэ́на, со ёнэ исын свэнтонэ́ форо́стыр, со Дэвэ́л Израилёскиро, Конэ́скиро лав исын Рай Дэвэ́л, болыбна́скирэ-янголэ́нгиро, подрикирэ́ла лэн.

3. Мэ пхэнавас англэды́р (вагэдыр), ґара́ анги́л дава́, сыр саро́ явэ́ла; Мирэ́ уштэндыр выджа́лас лав, и Мэ ангилпхэнавас, и кэравас, ко́ли на ужакирнас, и саро́ дава́ кэрдя́пэ (сыс).

4. Мэ джиндём, со ту на камэ́са тэ кандэс, дрэ тыри́ мэн исын саструнэ́ жылы, тыро́ чэкат исын харкуно (медно).

5. Палдава́ Мэ пхэнавас ту́кэ ґара́ (ваго) анги́л дова́, сыр дава́ кэрэласпэ, Мэ сыкававас ту́кэ, соб (кай) ту тэ на пхэнэ́с: ‘Миро идоло кэрдя́ дава́, миро дэвлоро, саво́ васта́ кэрдэ́, припхэндя́, соб (кай) адя́кэ тэ явэ́л.’

6. Ту шундя́н; на дыкхи́ пэ саро́ дава́, со исын: ци тумэ́ дава́ на приджинэна? Акана́ Мэ пхэна́ва ту́кэ нэво́ и гарадо́, и ту на джиндян дава́.

7. Акана́ дава́ кэрдя́пэ, а наґара на пир дывэ́с, и; ту на шундя́н пал дава́, соб (кай) тэ на пхэнэ́с: ‘Акэ, мэ джиндём дава́.’

8. Ту на шундя́н, и на джиндян пал дава́, тыро́ кан на сыс откэрдо, пал-дова́ со Мэ джиндём, со ту отпэрэса: ту хохавэса и ту сан бунтяри (отгиибнари) ишчо (инкэ́) да́кирэ лочовя́тыр.

9. Ваш Миро лав Мэ пириячавас тэ холясовав, ваш Мири́ паты́в Мэ обрикиравас Пэс тэ хасякира́в тут.

10. Акэ, Мэ биладём (росплавиндём) тут, нэ на адя́кэ, сыр руп; Мэ пропатякирдём тут сыр дро бов пир барэ́ мэ́ньки.

11. Ваш Пэ́скэ Кокорэскэ, ваш Пэ́скэ Кокорэскэ Мэ кэра́ва дава́, соб (кай), сыр тэ на калякирэн Миро лав! Мири́ паты́в и барипэ́н Мэ никонэ́скэ на отда́ва.

12. Пошун Ман, Яково, шун, Израилё, кхардо Миро: Мэ сом Одова́, Саво́ сыс, Мэ сом пэ́рво (англатуно́) и палатуно́ (последнё).

13. Миро васт создыя́ пхув; Миро чачо́ (право) васт протырдыя́ болыбэ́н; ко́ли Мэ кхара́ва лэн, то ёнэ кхэтанэ́ явэ́на.

14. Скэдэ́нпэ сарэ́, пошунэн! Кон машки́р лэ́ндэ ангилпхэндя дава́? Ра́скэ-Дэвлэ́скэ яця́ пир ило́ ёв, (Кира); ёв кэрэ́ла пир Дэвлэ́скири во́ля дро Вавило́но, сыкавэ́ла Дэвлэ́скиро васт машки́р Халдеендэ.

15. ‘Мэ, Мэ пхэндём и кхардём лэс; Мэ лэс яндём, и лэ́скиро дром явэ́ла бахтало́.

16. Явэ́н кэ мэ, шунэ́н дава́ лав: ‘Мэ николи на ракиравас чораханэ́с и самонэ англыпна́стыр; долэ́ часостыр, сыр саро́ дава́ кэрэласпэ, Мэ одо́й со́мас, и акана́ бичхадя́ Ман Рай Дэвэ́л, Дэвэ́л и Лэ́скиро Ду́хо (Фа́но).’

17. Адя́кэ ракирэ́ла Рай Дэвэ́л, Саво́ выкиндя тут, ракирэ́ла Свэ́нто Израилёскиро: “Мэ сом Рай Дэвэ́л, Дэвэ́л тыро́. Мэ сыклякирава тут, Мэ лыджа́ва тут долэ́ дромэ́са, кай трэй ту́кэ тэ джас.

18. Нэ ко́ли б ту шундя́н Мирэ́ лава́! Тэ́ньци б рама́нё (миро) тыро́ тэ явэ́л сыр рэка (лэнь), чачипэ́н тыро́ – сыр рэ́ки (лэня́) барэ́.

19. И ро́до б тыро́ тэ явэ́л, сыр пра́хо; выджа́нас бы ту́тыр бут мануша́; на выкхосэласпэ, на хасёлас б тыро́ лав анги́л Ма́ндэ.”

20. Выджа́н Вавилоно́стыр, нашэ́н: явнэ́ Халдеи; радынэ́нпэ и пхэнэ́н пал дава́; пхэнэ́н дава́ лав пир сари́ пхув, ракирэ́н: “Рай Дэвэ́л выкиндя Пэ́скирэ писхари́с, Яково́с.

21. Ёв лыджа́ла лэн пэ чхучэ́ пхувья́, а ёнэ тэ пьен на камэ́на. Ёв дэ́ла лэ́нгэ пани́ барэстыр; Ёв пхагирэ́ла бэ́рга и пани́ чхувэ́лапэ.

22. А грэхитконэ́ манушэ́нгэ нанэ рама́нё (миро)”, – ракирэ́ла Рай Дэвэ́л.

Psalms 111:7-10

7. Ёв саро́ кэрэ́ла пир патяибэ́н и чачипэ́н; сарэ́ Лэ́скирэ припхэныбэна́ исын патяибнытка:

8. ёнэ чхудэ́ кхэтанэ́ пэ сарэ́ ве́ки, ёнэ дынэ́ пир патяибэ́н и чачипэ́н.

9. Ёв выракхця Пэ́скирэ манушэ́н, Ёв дыя́ Пэ́скиро Зако́но пэ сарэ́ ве́ки: свэ́нто аж кэ дар исын Лэ́скиро лав.

10. Кон лэ́ла тэ дарэл Ра́стыр-Дэвлэ́стыр, одова́ лэ́ла годы́ пэ́скэ, а сарэ́ндэ, кон дживэ́ла и кэрэ́ла пир Лэ́скирэ припхэныбэна́, исын лачхи́ годы́. Тэ шарэ́н Лэс пэ сарэ́ ве́ки.

Proverbs 26:11-12

11. Сыр джукэл рисёла кэ пэ́скирэ чхадыпэн, адя́кэ-паць и дылыно́ кэрэ́ла нэвэ́стыр пэ́скиро дылныпэ́н.

12. Ци дыкхця́н ту манушэ́с, саво́ гинэ́ла пэс годэ́ манушэ́са? Дылыниньконэ манушэ́стыр буты́р сашты́ тэ ужакирэс лачхипэ́н, сыр кадасавэ́ манушэ́стыр.

Galaťanenge 6:1-18

1. Пшала́лэ, ко́ли ману́ш исын ухтылдо дро вари-саво́ на́лачхо рэ́ндо (де́ло), тэды тумэ́, савэ́ дживэ́на пир ду́хо (фа́но), подэн васт (помогинэн) лэ́скэ тэ тэрдёл палэ пэ чачуно́ дром ковлэ́ илэ́са, и дыкхэ́н пал пэ́стэ, соб (кай) тумэ́ кокорэ́ тэ на пэрэ́н пэ пропатякирибэн.

2. Помогинэн екх екхэ́скэ тэ лыджа́н пхарипэ́н, и далэ́са тэды тумэ́ сполнинэна Христосо́скиро Зако́но.

3. А ко́ли вари-саво́ ману́ш гинэ́ла пэс вари-конэса, ке́ли ёв кокоро́ ничы́ на мол пэ́стыр, тэды ёв хохавэла пэс;

4. нэ мэк кажно ману́ш тэ дэл чол (тэ спробинэл пэс) пэ́скэ, тэды ёв явэ́ла тэ радынэ́лпэ кокоро́ пэ́скирэ кэрибнастыр, а на явирэ манушэ́ндыр.

5. Пал-дова́ со кажно ману́ш лыджа́ла пэ́скирэ джиибна́скиро пхарипэ́н.

6. Мэк ману́ш, саво́ сыклёла, тэ дэл паш пэ́скирэ миштыпна́стыр кодолэ́скэ, кон сыклякирэ́ла лэс.

7. На дэнпэ дукха́: Дэвлэ́с нашты́ тэ хохавэ́л; дова́, со ману́ш чхувэ́ла дрэ пхув, дова́-паць ёв и скэдэ́ла.

8. И кон чхувэ́ла дрэ пхув ваш пэ́скири лоч (плоть), одова́ чхинэла криг аплодостыр Духоскиро мэрибэ́н, а кон чхувэ́ла дрэ пхув ваш Ду́хо (Фа́но), кодова́ счхинэла аплодостыр ве́чно джиибэ́н Свэнтонэ́ Духо́стыр:

9. ке́ли амэ кэра́са шука́р, тэды амэ́нгэ тэ на кхинёвас, пал-дова́ со амэ ява́са тэ скэдас аплодо дро пэ́скиро часо, ко́ли амэ на пэраса дро ду́хо (фа́но).

10. Палдава́, ко́ли исын часо/саштыпэн, то ява́са тэ кэра́с лачхипэ́н сарэ́нгэ, и древа́н фэды́р кодолэ́нгэ, савэ́ исын пша́ла пир патяибэ́н.

11. Дыкхэ́н, савэ́ барэ́ буквэнца мэ чхиндём тумэ́нгэ мирэ́ вастэ́са.

12. А одолэ́, савэ́ камэ́на тэ сыкавэ́н пэс пир лоч манушэ́нгэ, зачхувэна тумэн тэ обчхинэнпэ, екх ваш дова́, соб (кай) лэн тэ на традэ́н пал Христосо́скиро трушу́л.

13. И ёнэ кокорэ́, савэ́ исын обчхиндлэ́, на рикирэ́на Зако́но, нэ ёнэ камэ́на, соб (кай) тумэ́ тэ обчхинэнпэ ваш дова́, соб (кай) тэ шарэнпэ, со ёнэ кэрдэ́ обчхиныбэн пэ тумэ́ндэ.

14. Нэ ма́нгэ тэ на шаравпэ нисоса, екх амарэ́ Ра́скирэ-Дэвлэ́скирэ, Исусо́скирэ Христосо́скирэ трушулэса, пир Конэ́стэ свэ́то исын примардо пэ трушу́л ваш ма́нгэ, и мэ адя́кэ-паць ваш дава́ свэ́то.

15. Пал-дова́ со, кон исын дро екхипэ́н Христосо́са, на значинэла нисо́: ни обчхиныбэн, ни наобчхиныбэн, а нэво́ ману́ш.

16. И кодолэ́нгэ, кон дживэ́ла пир дава́ упхэныбэ́н, тэ явэ́л пэ лэ́ндэ рама́нё (миро) и тангипэ́н (ла́ска) и пэ сарэ́ Дэвлэ́скирэ манушэ́ндэ.

17. Палдава́ адя́кэ: мэк нико́н тэ на пхарьякирэл ман, пал-дова́ со ма́ндэ исын Исусо́скиро шрамы (морима) пэ маса́.

18. Мэк бахталыпэ́н амарэ́ Ра́скирэ-Дэвлэ́скирэ, Исусо́скирэ Христосо́скиро тэ явэ́л тумарэ́ Духо́са, пша́ла. Ами́нь!

Romani Bible Baltic 2019

Maintained by the United Bible Societies for the Baltic Romani Mission