Beblia

1. Шунэ́н Ман, островы (пхувья́ пэ мо́рё (дэрья́в)). Шунэ́н, дуратунэ́ народы: Рай Дэвэ́л прикхардя ман, (Израилё), да́кирэ лочовя́тыр; Мэ ишчо (инкэ́) на бияндыём, а Ёв кхарэлас Ман пир лав.

2. И создыя́ Ёв Мирэ́ ушта́ сыр востро курта́ла; Лэ́скирэ вастэ́са Ёв учхакирэлас Ман; Ёв кэрдя́ Ма́ндыр востро марибны́тко буст (стрела), Ёв ракхэлас Ман дро Пэ́скиро колчано.

3. И пхэндя́ Ма́нгэ: “Ту сан писха́ри Миро, Израилё, Ту дэ́са Ма́нгэ паты́в и барипэ́н:

4. А Мэ пхэндём: “Ивья́ (напра́снэс) Мэ кэравас буты́, Мэ нашадём (хасякирдём) пэ́скири зор. Нэ миро чачипэ́н кэ Рай Дэвэ́л; Дэвэ́л миро отпарикирэла Ма́нгэ.”

5. Акана́ ракирэ́ла Рай Дэвэ́л, Саво́ кхардя́ Ман ишчо (инкэ́) дрэ дакири лочови́, соб (кай) тэ явав Мэ Лэ́скирэ дынариса, соб (кай) Мэ тэ прикхарав кэ Ёв Яково́с, и, соб (кай) Израилё кэ Ёв тэ скэдэлпэ. Мэ прилыём паты́в дрэ якха́ Ра́скирэ-Дэвлэ́скирэ; Дэвэ́л Миро исын Мири́ зор.

6. И Ёв пхэндя́: “Дава́ исын набаро́ рэ́ндо ваш Ту́кэ, со ту явэ́са Миро писха́ри, соб (кай) тэ дживэ́л ро́дыцо Яково́скиро, соб (кай) тэ рисёл ячаибэ́н Израилёскиро; нэ дава́ ишчо (инкэ́) нанэ саро́. Нэ кэра́ва Мэ Тут дудэса (свэтоса) ваш манушэ́нгэ, соб (кай) тэ джинэ́н Миро зракхибэ́н сарэ́ яго́ры (концы) пэ пхув.”

7. Адя́кэ ракирэ́ла Рай Дэвэ́л, Израилёскиро Свэ́нто, Саво́ выкиндя Израилё, адя́кэ ракирэ́ла кэ народо, савэ́с сарэ́ кошэна и традэ́на, саво́ исын писха́ри барэ́ рандэ: “Кра́лья дыкхэ́на и уштэна; тхага́рья (кня́зи) пэ чанга́ пэрна ваш Ра́скэ-Дэвлэ́скэ, Саво́ исын чачуно́, ваш Свэ́нто Израилёскиро, Саво́ Тут выкэдыя́.”

8. Адя́кэ ракирэ́ла Рай Дэвэ́л: “Дрэ лачхэ́ дывэса́ Мэ тут шундём; дро дывэ́с, ко́ли исын зракхибэ́н, Мэ подрикирдём Тут. Мэ ява́ва тэ ракхав Тут, кэра́ва Ту́тыр завето ваш манушэ́нгэ, соб (кай) пхув тэ отджидякирэс; соб (кай) тэ отлэс палэ росчордо мэкно́ миштыпэ́н, тэ рискирэс ла (пхув) прилыибнаскирэнгэ (наследникэнгэ);

9. соб (кай) тэ пхэнэ́с манушэ́нгэ дрэ бэшыбэн: ‘Выджа́н!’ – манушэ́нгэ, савэ́ исын дро калыпэ́н (цямлыпэ́н): ‘Сыкавэ́н пэс!’ Ёнэ пашы́л дром явэ́на тэ чаравэн, пир сарэ́ бэ́ргицы явэ́на лэ́нгирэ чаритка фэ́лды.

10. На явэ́на ёнэ тэ бокхалён, на явэ́на ёнэ би панескиро (трушалэ), кхам лэн на пэкэла; Кодова́, Кон тангинэла (жалинэла) лэн, лыджа́ла лэн и янэ́ла кэ пани́.

11. И сарэ́ Мирэ́ бэргэндыр Мэ кэра́ва дроморо; и дрома́ Мирэ́ ґаздэ́напэ (явэ́на ґаздынэ́).

12. Акэ, явэ́на мануша́ дурипнастыр, явэ́на паш-ратятыр (северостыр) и морёстыр (дэрьявэстыр), а яви́р явэ́на Синимоскиро пхувья́тыр.”

13. Ра́дынпэ, болыбэ́н, яв лошалёв (веселинпэ), пхув; бэ́рги, годлэн бахтятыр: подрикирдя Рай Дэвэ́л Пэ́скиро народо, потангиндя Пэ́скирэ манушэ́н, савэ́ страдынэнас.

14. А Сио́но ракирэ́ла: “Ячкирдя́ ман Рай Дэвэ́л; бистырдя ман Дэвэ́л миро!”

15. Ци забистрэла джувлы́ (манушны) пэ́скирэ биято́с, ци на потангинэла пэ́скирэ чхавэ́с? Нэ ко́ли ёй бистрэла, Мэ тут на бистрава.

16. Акэ, Мэ чхиндём тут пэ Мирэ́ васта́; ва́нты тырэ́ саро́ часо исын анги́л Ма́ндэ.

17. Тырэ́ чхавэ́ явэ́на тэ прастан кэ ту, джа́на ту́тыр одолэ́, кон пхагирэлас и обчорэлас тут.

18. Ѓаздэ тырэ́ якха́, подыкх пир рига́, – сарэ́ ёнэ скэдэ́напэ, джа́на кэ ту. Тэ джива́в Мэ, – ракирэ́ла Рай Дэвэ́л: – лэ́нца сарэ́нца ту укэдэсапэ, сыр гожонэ урибнаса; укэдэсапэ лэ́нца, сыр тэрны́.

19. Дрэ тырэ́ роспхагирдэ́ кхэра́, пэ тырэ́ чхучэ́ пхувья́ и пэ тыри́ обчорды пхув на явэ́ла штэ́то, соб (кай) тэ дживэ́н одолэ́, кон халас тут, джа́на криг ту́тыр.

20. Бияты, савэ́ выбарьёна ту́тэ, ко́ли явирэ чхаворэ́н ту хасякирэса, пхэнэ́на ту́кэ: ‘Нанэ ма́нгэ штэ́то, дэ ма́нгэ лэс, соб (кай) мэ тэ джива́в.’

21. И пхэнэ́са ту дро пэ́скиро ило́: “Кон бияндя́ лэн ваш ма́нгэ? Ма́ндэ на сыс чхаворэ́, мэ на биянавас, залынэ ман дро пле́но дур адатхы́р, а кон лэн барьякирдя? Акэ, мэ со́мас екхджины кокори, а кай ёнэ сыс?”

22. Адя́кэ ракирэ́ла Рай Дэвэ́л: “Акэ, Мэ ґазда́ва Миро васт кэ народы, Мэ сыкава́ва Миро стяго (флаго) родыцэнгэ и янэ́на пэ васта́ тырэ́ чхавэ́н, а чхае́н тырэ́н – пэ псикэ́.

23. И явэ́на кра́лья тэ чалякирэн тут; кралицы лэ́нгирэ тут чалякирэна. И явэ́на тэ пэрэ́н анги́л ту́тэ пэ чанга́ и тэ хан пра́хо тырэ́ ґэрэндыр. Тэ́ньци уджинэса ту, со Мэ сом Рай Дэвэ́л; со на ладжана мануша́, конэ́стэ исын пэ Ма́ндэ наде́я.”

24. Ци отлэна зоралэстыр дова́, со ёв дорэстя? Ци залэна зоралэ́ манушэ́стыр одолэ́н, конэ́с ёв залыя дро пле́но?

25. Адя́кэ ракирэ́ла Рай-Дэвэ́л: “И отлэна пленнонэ манушэ́н, конэ́с лыя́ дро пле́но зорало́ халадо; отлэна дорэсыбэ́н тираностыр (зобаростыр) и зракхэна лэн, пал-дова́ со Мэ ла́ва тэ маравпэ, тырэ́ вэргэнца, и Мэ зракха́ва тырэ́ чхавэ́н.

26. И одолэ́, кон пэ ту́тэ ґаздыя́пэ, явэ́на тэ хан пэ́скири лоч (плоть); и явэ́на тэ пьен пэ́скиро рат, сыр тэрны́ мол (вино), и кажно лоч (плоть) ґалёла, со Мэ сом Рай Дэвэ́л, Зракхибнари тыро́, Саво́ Тут выкиндя, Зорало́ Яково́скиро.”

1. Адя́кэ ракирэ́ла Рай Дэвэ́л: “Кай исын лыл пал дова́, со тумари́ дай розгия́пэ ромэса, кай исын дава́ лыл, савэ́са Мэ отмэкцём ла? И конэ́скэ Мэ бикиндём тумэн? Акэ, бикиндлэ тумэн пал тумарэ́ грэ́хи, пал чорипэ́н тумаро́ сыс отмэкны тумари́ дай.

2. Со́скэ на сыс никонэ́с, ко́ли Мэ явавас, и нико́н на отпхэндя́, ке́ли Мэ кхардём? Ци Миро васт буты́р на зракхэ́ла, ци нанэ Ма́ндэ зор, соб (кай) тэ зракхав? Акэ, Мирэ́ страхаса Мэ шутькирава мо́рё (дэрья́в), кэра́ва чхучи́ пхув рэкэндыр (лэнорьендыр); мачхэ́ дрэ лэ́ндэ кирнёна и мэрэ́на, пал-дова́ со нанэ пани́.

3. Мэ учхакирава болыбэ́н калыпнаса и сыр жалобнонэ гонэстыр праскаса Мэ кэра́ва учхакирибэн ваш болыбэ́н.”

4. Рай Дэвэ́л дыя́ ма́нгэ чиб годьварэ́ манушэ́ндыр, соб (кай) Мэ лавэ́са тэ подрикирав кодолэ́с, кон буты́р на вырикирэ́ла; тася́рлэс (ра́нэс) Ёв джингавэла Ман, джингавэла кан Миро, соб (кай) Мэ тэ шунав, сыр сыкляибны́тко.

5. Рай Дэвэ́л откэрдя Ма́нгэ кан, и Мэ на со́мас проти, Мэ на гиём палэ.

6. Мэ отдыём Миро думо, соб (кай) тэ марэ́н Ман; Мирэ́ чама (шчоки), соб (кай) тэ пэкавэн; муй Миро Мэ на закэрдём кошыбнастыр и чунгардыпнастыр.

7. И Рай Дэвэ́л дэ́ла васт (помогинэла) Ма́нгэ, палдава́ Мэ на ладжава, палдава́ Мэ рикирава Миро муй сыр бар, и Мэ джино́м (джина́в), со Мэ на ячавапэ ладжакирдо́.

8. Пашылэды́р исын одова́, кон пхэнэ́ла чачипэ́н пал Ма́ндэ: кон камэ́ла тэ марэ́лпэ Ма́нца? Тэрдёваса кхэтанэ́! Кон камэ́ла тэ сэндякирэлпэ Ма́нца? Мэк ёв тэ подджа́л кэ Мэ.

9. Акэ, Рай Дэвэ́л дэ́ла васт (помогинэла) Ма́нгэ: кон сэндякирэ́ла Ман? Акэ, сарэ́ ёнэ исын, сыр и́дя: пхурьёна, хасёна.

10. Кон тумэндэр дарэ́ла Ра́стыр-Дэвлэ́стыр, кандэ́ла Лэ́скирэ-Писхарискири (Рабоскири) зан? Кон псирэ́ла дро калыпэ́н (мрако) би дудэскиро (би свэтоскиро), мэк ёв тэ рикирэлпэ Ра́скирэ-Дэвлэ́скирэ лавэ́са, мэк ёв тэ чхувэ́л пэ́скиро ило́ дрэ пэ́скирэ Дэвлэ́стэ.

11. Акэ, сарэ́ тумэ́, кон хачкирэ́ла яг, конэ́стыр джа́на хачкирдэ́ искры сыр марибны́тка бустя́ (стре́лы)! Джа́н дрэ яг и искры тумарэ́ стрелэндыр! Дава́ прилэ́на тумэ́ Мирэ́ вастэ́стыр, дрэ мэ́ньки (биба́хт) тумэ́ хасёна (мэрэ́на).

1. Аллилуя. Бахтало́ исын ману́ш, Саво́ дарэ́ла Ра́стыр-Дэвлэ́стыр, Саво́ бахталёла зоралэ́с Лэ́скирэ припхэныбнэндыр.

2. Лэ́скирэ чхавэ́ дживэ́на миштэ́с пэ дая́ пхув, а чачипнаскирэ ро́ды, со явэ́на дурэды́р, явэ́на бахталэ́.

3. Миштыпэ́н и барвалыпэ́н явэ́на дро лэ́скиро кхэр и лэ́скиро чачипэ́н ячэ́лапэ пэ сарэ́ ве́ки.

4. Дуд (свэ́то) ґаздэ́лапэ дро калыпэ́н (цямлыпэ́н) ваш чачипнаскирэнгэ, и кадава́ ману́ш исын лачхэ́-дескиро и чачипна́скиро, и ёв тангинэла лачхэ́ манушэ́н.

13. Кирнэ-масэ́нгиро ману́ш ракирэ́ла: “Холынакиро шчэр (ле́во) исын пэ дром. Мижэх шчэр исын пэ вули́цы (га́сы).”

14. Сыр вуда́р рисёла пэ пэ́скирэ завесы (зачхудэ), адя́кэ-паць и кирнэ-масэ́нгиро рисёла пэ пэ́скиро чхуибэ́н.

15. Кирнэ-масэ́нгиро ману́ш чхувэ́ла пэ́скиро васт дро чаро́, нэ лэ́скэ исын пхаро́ тэ лыджас палэ васт кэ пэ́скиро муй.

1. Павли́стыр, Исусо́скирэ Христосо́скирэ Апостолостыр, савэ́с Кокоро́ Дэвэ́л выкэдыя́, Свэнтонэ́ манушэ́нгэ, савэ́ дживэ́на кэ Эфе́со, и патя́на дрэ Исусо́стэ Христосо́стэ:

2. Мэк тэ явэ́л бахталыпэ́н и рама́нё (миро) тумэ́нгэ Дэвлэ́стыр Дадэ́стыр амарэстыр, и Ра́стыр-Дэвлэ́стыр, Исусо́стыр Христосостыр.

3. Мэк тэ явэ́л бахтякирдо́ Дэвэ́л и Дад амарэ́ Дэвлэ́скиро Исусо́скиро Христосо́скиро, Саво́ бахтякирдя́ амэн дро екхипэ́н Христоса кажнонэ́ Духо́скирэ бахтякирибна́са дро Болыбна́скиро свэ́то

4. Ёв выкэдыя́ амэн дрэ Лэ́стэ англэды́р, сыр создыя́ свэ́то, соб (кай) амэ тэ явас свэ́нта пир екхипэ́н Христосо́са и бидошакирэ анги́л Лэ́стэ пир паты́в кэ яви́р мануша́;

5. Ёв выкэдыя́ амэн пир Исусо́стэ Христосо́стэ, соб (кай) амэ тэ явас Лэ́скирэ чхавэ́ пир Пэ́скиро выкэдыибэн и во́ля,

6. соб (кай) тэ славинас Лэ́скиро шука́р бахталыпэ́н, саво́ Ёв дыя́ амэ́нгэ пир Пэ́скирэ Дрогонэ́ Чхавэ́стэ:

7. дрэ Савэ́стэ и пир Савэскиро Рат амэ сам выкиндлэ (выракхнэ), амарэ́ грэ́хи исын отмэкнэ пир Лэ́скиро барвало́ бахталыпэ́н;

8. Саво́ Ёв би тангипнаскиро дыя́ амэ́нгэ сарэ́ годя́са и джиныбнаса,

9. пир Пэ́скиро цэлё/рэс (чачипэ́н) Дэвэ́л отчхакирдя́ амэ́нгэ Лэ́скирэ-воля́киро чораханыбэн, саво́ Ёв ґарэдыр задуминдя тэ кэрэ́л пир Христосо́стэ,

10. ваш дова́, ке́ли явэ́ла пхэрдо́ часо, соб (кай) тэ кхэтанякирэл саро́, со исын пэ болыбэ́н и пэ пхув, пир Христосо́стэ,

11. пир екхипэ́н Лэ́са и амэ яця́м Дэвлэ́скирэ манушэ́нца пир Лэ́скири мысля, ке́ли Ёв выкэдыя́ амэн и Саво́ кэрэ́ла саро́ дро свэ́то пир Пэ́скири во́ля самонэ англыпна́стыр,

12. соб (кай) амэ, савэ́ пэ́рва дорэсцям (долыям) лачхо́ ужакирибэ́н Христосостыр, тэ шарас Дэвлэ́скири сла́ва;

13. дрэ Лэ́стэ и тумэ́ адя́кэ-паць шундлэ́ чачуно́ лав, бахталы́ зан (звесь) пал тумаро́ зракхибэ́н, сыр тумэ́ упатя́ндынэ дрэ Лэ́стэ. Тумэ́ндэ исын якхи́тко (печать), саво́ сыс Свэнтонэ́ Духо́стыр, Савэс тумэ́ ґара́ ужакирдэ,

14. Саво́ дэ́ла лав сыр сымады́ (залого) пал амаро́ англатуно́ джиибэ́н и Дэвлэ́скирэ-манушэ́нгиро выракхибэн ваш Дэвлэ́скири сла́ва.

15. Палдава́ и мэ адя́кэ-паць, ке́ли амэ шундём пал тумаро́ патяибэ́н дрэ Исусо́стэ и пал ла́ска кэ сарэ́ свэ́нта,

16. ние́кхвар мэ на пириячава тэ парикира́в Дэвлэ́скэ пал тумэ́ндэ, и мэ рипирава тумэн, ке́ли мэ мангавапэ Дэвлэ́скэ пал тумэ́ндэ,

17. соб (кай) Дэвэ́л амарэ́ Ра́скирэ-Дэвлэ́скиро, Исусо́скиро Христосо́скиро, славу́тно Дад, тэ дэл тумэ́нгэ пир Ду́хо (Фа́но) годы́ и тэ сыкавэ́л, соб (кай) тумэ́ фэды́р тэ уджинэ́н Лэс,

18. и соб (кай) Дэвэ́л тэ ковлякирэл тумарэ́ илэ и тэ отчхакирэл тумэ́нгэ якха́, соб (кай) тумэ́ тэ уджинэ́н дова́ лачхо́ ужакирибэ́н, кэ саво́ Ёв тумэн кхардя́, и саво́ барвало́ исын мэкно́ миштыпэ́н пир дыно́ лав, Лэ́скирэ славакиро, ваш свэнтонэнгэ,

19. и саво́ бимеракиро исын Лэ́скиро барипэ́н зоралыпнаскиро ваш амэ́нгэ, саво́ Ёв дэ́ла сарэ́ свэнтонэнгэ, савэ́ патя́на дро Лэ́скирэ-зоралыпнаскиро кэрибэн,

20. Саво́ Ёв сыкадя́ дрэ Христосо́стэ, ке́ли Ёв отджидякирдя́ Лэс мулэ́ндыр и чхудя́ пир чачуны́ риг Пэ́стыр дро Болыбна́скиро Раё,

21. вучэды́р барэ́ рандыр, сарэ́ зорьендыр и кажнонэ́ зорья́тыр дро дава́ свэ́то и кажнонэ́ лавэ́стыр, со исын на екх дро дава́ ве́ко, нэ и дро ве́ко, саво́ анги́л явэ́ла;

22. и Дэвэ́л чхудя́ саро́ тэлэ́ тэл Исусо́скирэ ґэра́, и чхудя́ Лэ́скэ зор тэ явэ́л Шэрэ́ Хула́са пэ саро́, Шэралэса ваш Кхангири́.

23. Сави́ исын Лэ́скирэ маса́, Лэ́скиро пхэрдыпэн, Саво́ пхэрдякирэла Пэ́са саро́.

Romani Bible Baltic 2019

United Bible Societies for the Baltic Romani Mission