Beblia

1. ““Шунэ́н Ман одолэ́, кон родэ́ла чачипэ́н, родэ́ла Рас-Дэвлэ́с! Дыкхэ́н акана́ пэ бэ́рга, савья́тыр тумэн вычингирдэ, пэ хорипэ́н дро рово (хохо́й), каты́р тумэн дорэснэ́.

2. Подыкхэн пэ Авраамостэ, тумарэ́ дадэ́стэ и пэ Саратэ, сави́ тумэн бияндя́! Мэ кхардём лэс екхэ́с, дыём лэ́скэ бахтякирибэ́н, дыём лэ́скэ бут чхаворэ́н.

3. Чачо́, Рай Дэвэ́л подрикирла Сио́но, подрикирла лэ́скирэ роспхагирдэ́ кхэра́; а чхучи́ пхув лэ́скири Ёв кэрэ́ла сыр раё, и мал (степ) лэ́скири пирикэрэла сыр у́нта (садо) Раскири-Дэвлэ́скири; ра́дыма и весёлыма (лош) одо́й явэ́на, парикирибэн и багаибэн.

4. Пошунэн Ман, Миро народо и кхэри́тко ро́до Миро! Пошунэн Ман тумарэ́ канэнца! Ма́ндыр выджа́ла Зако́но, и сэ́ндо Миро чхува́ва сыр дуд (свэ́то) ваш народы.

5. Пашылэды́р исын Миро чачипэ́н; и джа́ла упрэ́ Миро зракхибэ́н и васт Миро сэндякирэ́ла народы. Островы явэ́на тэ рикирэ́н наде́я пэ Ма́ндэ, и явэ́ла наде́я пэ Миро васт.

6. Ѓаздэн тумарэ́ якха́ кэ болыбэ́н и подыкхэн тэлэ́ пэ пхув: болыбэ́н хасёла сыр тхув, а пхув кэрлапэ сыр пхураны и́дя, мануша́ пэ ла́тэ вымэрэна, а Миро зракхибэ́н исын ве́чно; чачипэ́н Миро на хасёла.

7. Пошунэн Ман, кон джинэ́ла чачипэ́н, народо, савэ́стэ дро ило́ исын Миро Зако́но! На дарэ́н, ко́ли традэ́на тумэн мануша́, на дарэ́н лэ́нгирэ налачхэ́ лавэ́ндыр!

8. Пал-дова́ со ёнэ хасёна; кирмо схала лэн, сыр вы́лна (шэрсь), а чачипэ́н Миро явэ́ла ве́чно, зракхибэ́н Миро николи на пириячэ́ла.”

9. Ѓаздэпэ, ґаздэпэ, яв зорало́, васт Ра́скирэ-Дэвлэ́скиро! Ѓаздэпэ сыр дрэ пхуранэ́ бэрша́, ко́ли ґаратуно ро́до дживэлас! Ци на ту хасякирдян Раавос, хасякирдян крокодилос?

10. Ци на ту вышутькирдян мо́рё (дэрья́в); шутькирдян пани́, саво́ исын дро лю́но (адо) хор тэла́л; кэрдя́н мо́рё (дэрья́в) дромэ́са, соб (кай) тэ джа́н мануша́, савэ́н выкиндя Рай Дэвэ́л?

11. И рисёна одолэ́, савэ́н зракхця́ Рай Дэвэ́л, и явэ́на пэ Сио́но багаибнаса, ра́дыма лэ́нгири николи на пириячэ́ла; ёнэ явэ́на бахталэ́ и весе́ла (лошалэ́); ясва и бибахталэ́ ґондя́ (ўздохи) отджана.

12. “Мэ, Мэ Кокоро́ подрикирава тумэн. Кон ту сан, ко́ли дарэса манушэ́стыр, саво́ мэрэ́ла, дарэса манушэ́скирэ чхавэстыр, саво́ исын адасаво́, сыр чар?

13. Кон ту сан, ко́ли бистрэса Рас-Дэвлэ́с, Саво́ тут создыя́, Саво́ протырдыя́ болыбэ́н и дыя́ джиибэ́н пхувьякэ? Кажно дывэ́с ту дарэса тырэ́-вэргоскирэ холя́тыр, адя́кэ, сы́рбы вэ́рго исын пашы́л ту́тэ, саво́ камэ́ла тэ хасякирэ́л тут. Нэ кай исын лэ́скири холы́?

14. Сы́гэс выджа́ла запхандло ману́ш (дро пле́но) пэ во́ля, и ёв на мэрэ́ла дрэ ґанби́н (яма), и явэ́ла лэ́стэ маро́.

15. Мэ сом Рай Дэвэ́л, Дэвэ́л тыро́, Саво́ ґаздэ́ла мо́рё (дэрья́в) адя́кэ, со ёв годлэла (ревинэла); Рай Дэвэ́л, болыбна́скирэ-янголэ́нгиро исын Лэ́скиро лав.

16. Мэ чхува́ва андрэ́ Мирэ́ лава́ дрэ тырэ́ ушта́, зэрьяса (тенёса) Пэ́скирэ вастэ́стыр Мэ учхакирава тут, соб (кай) тэ кэра́в болыбэ́н, и тэ дав зор пхувьякэ, и тэ пхэна́в кэ Сио́но: ‘Ту сан Миро народо.’”

17. Ушты́, ушты́, ґаздэпэ, Ерусалимо, ту, саво́ выпиян Ра́скирэ-Дэвлэ́скирэ вастэ́стыр тахта́й (чаша) холя́са, ту выпиян тахта́й пибнаса, саво́ матякирэла, выпиян лэс сарэ́са.

18. На сыс конэ́скэ тэ лыджа́л лэс, сарэ́ чхавэ́ндыр, савэ́ бия́ндынэ лэ́стыр, на сыс конэ́скэ тэ подрикирэ́л пал васт, сарэ́ чхавэ́ндыр, савэ́н ёв барьякирдя.

19. Явнэ́ кэ ту дуй биды, кон тут потангинэла (пожалинэла): чхучипэн (пустота) и хасякирибэн, бокх и курта́ла; конэса Мэ тут тэ подрикирав?

20. Тырэ́ чхавэ́ ячнэ́ бизорья́кирэ, ёнэ исын паштэ́ пэ сарэ́ вули́цы (га́сы), пхандлэ сыр мирга (серна) дрэ фэлы́ (петля); пэ лэ́ндэ пхэрдия Тырэ́ Ра́скирэ-Дэвлэ́скири холы́; Тырэ́-Дэвлэ́скиро годлыпэн.

21. Палдава́, вышу́н дава́, бибахтало́, и мато на моля́тыр (виностыр)!

22. Адя́кэ ракирэ́ла тыро́ Рай Дэвэ́л, и Дэвэ́л тыро́, Саво́ отхала (отдэ́ла палэ) пал Пэ́скиро народо: “Акэ, Мэ ла́ва тырэ́ вастэ́стыр тахта́й (чаша) пибнаса, саво́ матькирэла; рошчына (дрожджы) Мирэ́ тахтастыр холя́са; Ту буты́р одотхы́р на пьеса.

23. И Мэ да́ва лэс (тахта́й) тырэ́ вэргэ́нгэ, савэ́ тут мэнчынэнас; Мэ да́ва тахта́й дрэ лэ́нгирэ васта́. Мэ да́ва лэс одолэ́нгэ, савэ́ ракирнас: ‘Пэр тырэ́ мо́са, соб (кай) тэ джас пир ту́тэ”, – и думо тыро́ явэ́лас сы́рбы пхув и га́са, соб (кай) тэ джа́н.’”

1. Ушты́, ушты́, прилэ́ тыри́ зор, Сио́но! Ури тырэ́ и́ди, Ерусалимо, и́ди, савэ́ дэ́на ту́кэ паты́в, свэ́нто фо́ро! Буты́р на заджа́ла кэ ту наобчхиндло и магирдо́ ману́ш.

2. Тринскир пэ́стыр пра́хо, ушты́, Ерусалимо, саво́ сыс дрэ наволя, злэ зандир (ланцо) тырэ́ мэнятыр, чхай Сионо́скири дро пле́но!

3. Адя́кэ ракирэ́ла Рай Дэвэ́л: “Биловэнгиро тумэн бикиндлэ, бирупэскиро тумэн выкинэна.”

4. Адя́кэ ракирэ́ла Рай Дэвэ́л: “Миро народо псирэлас англэды́р дро Еги́пто, соб (кай) тэ дживэ́л одо́й; Асуро (Асирийцы) ни палсо́ притасавэлас лэн.

5. Какана́, со исын Ма́ндэ ада́й?” – ракирэ́ла Рай Дэвэ́л: “Дова́, со ивья́ (напра́снэс) залынэ Миро народо; лэ́нгирэ барэ́ рая холясона,” – ракирэ́ла Рай Дэвэ́л, – “и кажно мо́ло, кажно дывэ́с ёнэ на дэ́на паты́в Мирэ́ лавэ́скэ.

6. Палдава́ уджинэла Миро народо Миро лав, палдава́ уджинэла дро дова́ дывэ́с, со Мэ сом Одова́, Кон пхэндя́: Акэ, Мэ сом!”

7. Савэ лачхэ́, савэ́ гожа исын пэ бэ́рги одолэ́-манушэ́скирэ ґэра́, саво́ пхэнэ́ла лачхи́ зан (звесь), саво́ пхэнэ́ла пал ра́дыма, роспхэнэ́ла пал зракхибэ́н, саво́ ракирэ́ла Сионоскэ: “Прилыя́ кралипэ́н тыро́ Дэвэ́л!”

8. Акэ, ґаздынэ́ зан тырэ́ ракхибна́рья, ґаздынэ́ зан, ёнэ радынэ́нпэ кхэтанэ́, пал-дова́, со дыкхэ́на пэ́скирэ якхэ́нца, сыр Рай Дэвэ́л рисёла дро Сио́но.

9. Радынэ́нпэ, бага́н кхэтанэ́, штэ́ты Ерусалимо́скирэ: подрикирдя Рай Дэвэ́л Пэ́скиро народо, выкиндя Ерусалимо.

10. Сыкадя́ сарэ́нгэ Рай Дэвэ́л Пэ́скиро свэ́нто васт, соб (кай) тэ дыкхэ́н сарэ́ народы; сарэ́ пхувья́кирэ яго́ры (концы) дыкхэ́на амарэ́ Дэвлэ́скиро зракхибэ́н.

11. Джа́н, джа́н, выджа́н одотхы́р, на лэнпэ пал магирдо́, уджан лэ́стыр, жужакирэн пэс одолэ́, кон лыджа́ла кхорэ́ (сасу́ды) Ра́скирэ-Дэвлэ́скирэ.

12. Тумэ́нгэ на явэ́ла трэй сы́гэс тэ джа́н, тумэ́ на попрастана; пал-дова́ со Рай Дэвэ́л анги́л тумэ́ндэ явэ́ла, Дэвэ́л Израилёскиро явэ́ла тумарэ́ ракхибнариса пала́л пал тумэ́ндэ.

13. Акэ, писха́ри Миро бахтякирдо́ явэ́ла, ґаздэ́лапэ дрэ паты́в, явэ́ла шардо, и прилэ́ла барипэ́н.

14. Кицы́ мануша́ дивинэнаспэ, ке́ли дыкхнэ́ пэ Ту́тэ! Ёв адя́кэ парудяпэ марибнастыр, со на сыс Лэ́стэ манушы́тко муй, адя́кэ Ёв выдыкхэлас, со и на сыс Лэ́стэ манушы́тко патри́н (о́бразо)?

15. Адя́кэ бут народы дивинэнаспэ Лэ́стыр; кра́лья закэрна (пхандэна) пэ́скирэ ушта́ анги́л Лэ́стэ, пал-дова́ со ёнэ дыкхэ́на и джинэ́на дова́, со ёнэ на шундлэ́, со николи лэ́нгэ на ракирдэ́.

5. Лачхо́ ману́ш и дэ́ла пэ паты́в ловэ́ лэ́нгэ, ёв лыджа́ла пэ́скирэ рэ́нды пир Зако́но.

6. Пал-дова́ со ёв на пэрэ́ла, чачипнаскирэ манушэ́с явэ́на ўса́ды (сак) тэ рипирэ́н.

7. Ёв на явэ́ла тэ дарэл чорэ́ малвэндыр, дро лэ́скиро ило́ исын зорало́ патяибэ́н дрэ Растэ-Дэвлэ́стэ.

8. Лэ́скиро ило́ исын твардо, ёв на дарэ́ла, пака ёв дыкхэ́ла вэргэ́н, со ёнэ исын тэл ґэра́.

9. Ёв роздыя саро́ илэ́стыр, ёв дыя́ одолэ́нгэ, конэ́стэ исын трэ́бима, лэ́скиро чачипэ́н усады (сак) ячэ́лапэ: лэ́скири зор уса́ буты́р скэдэ́ла паты́в.

10. Фуй ману́ш явэ́ла тэ дыкхэ́л и лэ́скиро ило́ явэ́ла тэ калёл; ёв явэ́ла тэ скрежынэл дандэнца и тэ нашавэл зор; а дова́, со ёв ужакирдя, хасёла криг.

16. Кирнэ-масэ́нгиро ману́ш думинэ́ла пэ́скэ, со ёв исын годэдыр эфта́ (битринэ́нгиро дэш) манушэ́ндыр, савэ́ отпхэнэна барэ́ годыпнаса.

1. И тумэн, савэ́ са́нас мулэ́ пал тумарэ́ налачхэ́ рэ́нды и грэ́хи,

2. дрэ савэ́ тумэ́ англэды́р адя́кэ дживдэ́, пир дава́ свэтоскиро ве́ко, пир кхенингоскиро упхэныбэ́н, саво́ сыс хула́й дро фа́но (воздухо), пир ду́хо (фа́но), саво́ хулаинэла сарэ́нца, кон на кандэ́ла Дэвлэ́с:

3. амэ адя́кэ-паць сарэ́ вари-ке́ли и са́мас кадасавэ́ и дживдям пир на́лачхо лочакиро (плотякиро) тырдыпэ́н и кэрдя́м дова́, со амэ́нгэ подпхэнэла на́лачхо камибэн и со явэ́ла пэ годы́, и амэ са́мас пир бияныпэ́н сы́рбы чхавэ́, пэ конэ́стэ пэрэ́ла Дэвлэ́скири холы́, сыр и яви́р мануша́:

4. нэ Дэвэ́л, Саво́ исын барвало́ тангипнаса, и Саво́ пир бари Пэ́скири ла́ска, савья́са Ёв притырдыя амэн,

5. амэн, савэ́ сыс мулэ́ пал амарэ́ налачхэ́ рэ́нды, Ёв отджидякирдя́ дро екхипэ́н Христосо́са, пир бахтякирибэ́н, савэ́са тумэ́ сан зракхнэ́,

6. и Ёв отджидякирдя́ амэн пир амаро́ екхипэ́н Христосо́са и дыя́ амэ́нгэ штэ́то дро Болыбна́скиро Раё Исусо́са Христосо́са,

7. соб (кай) тэ сыкавэ́л дрэ ве́ки, савэ́ анги́л явэ́на, най барэды́р барвалыпэ́н Пэ́скирэ бахтякирибнастыр пир тангипэ́н кэ амэ дрэ Христосо́стэ Исусо́стэ.

8. Палдава́ со тумэ́ сан зракхнэ́ бахталыпнаса пир патяибэ́н, и дава́ исын на долэ́стыр, со тумэ́ причхувэна зор, дава́ тумэ́нгэ исын дыно́ Дэвлэ́стыр;

9. зракхибэ́н дэ́ла Дэвэ́л на пал рэ́нды (де́лы), пал-дова́, соб (кай) нико́н тэ на могинэл тэ шарэлпэ.

10. Пал-дова́ со амэ сам кадасавэ́, савэ́нца Дэвэ́л создыя́ амэн дро амаро́ екхипэ́н Исусо́са Христосо́са ваш дова́, соб (кай) амэ тэ кэра́с лачхэ́ рэ́нды, савэ́ Дэвэ́л ґарэдыр выкэдыя́ ваш амэ́нгэ.

11. Палдава́ рипирэ́н, со тумэ́ пир бияныпэ́н сан На́юды, савэ́н кхардэ́ наобчхиндлэнца одолэ́, савэ́ исын обчхиндлэ́ манушытконэ́ обчхиныбнаса, саво́ кэрэ́лапэ вастэ́нца;

12. тумэ́ и са́нас дро дова́ часо би Христосо́скиро, тумэ́ на са́нас кхэтанэ́ Израилёскирэ манушэ́нца, тумэ́ндэ на сыс паш дро Завето, тумэ́ндэ на сыс лачхо́ ужакирибэ́н, тумэ́ са́нас би Дэвлэ́скиро дро свэ́то:

13. нэ какана́ тумэ́ сан дро екхипэ́н Христосо́са Исусо́са, тумэ́, савэ́ ґарэдыр са́нас дур, ячнэ́ пашы́л, пир Христосо́скиро Рат, саво́ сыс прочхудо пал тумэ́ндэ.

14. Пал-дова́ со Ёв исын амаро́ рама́нё (миро), Саво́ кэрдя́ дуендыр екх и роскэдыя ва́нта, сави́ сыс тэрды машкира́л амэ́ндэ.

15. И Ёв Пэ́скирэ мэрибнаса пэ трушу́л парудя Законо́скирэ упхэныбэна́ сыклякирибнаса ваш дова́, соб (кай) дуендыр тэ кэрэ́л дрэ Кокорэ́ Пэ́стэ екхэ нэвонэ́ манушэ́с, и далэ́са тэ янэл манушэ́нгэ рама́нё (миро),

16. соб (кай) дуе́н (Юдэ́н и Наюдэн) дро екх маса́ тэ примиринэл Дэвлэ́са пир трушу́л, хасякири кажно вэргима пэ Лэ́стэ,

17. и ке́ли Христо́со явдя́, Ёв роспхэндя́ бахталы́ зан (звесь) пал рама́нё (миро) сарэ́нгэ тумэ́нгэ, на дыкхи́ пэ дова́, кон сыс Лэ́стыр дур ци пашы́л,

18. пал-дова́ со пир Лэ́стэ амэ Юды и На́юды сам домэкнэ дро екх Ду́хо (Фа́но) кэ Дад.

19. Палдава́ тумэ́ на сан буты́р чу́жа, и тумэ́ на сан мануша́, савэ́ на ґара́ явнэ́, нэ тумэ́ сан пал екх Свэнтонэ́ манушэ́нца, и тумэ́ сан екх Дэвлэ́скири сэ́м΄я(ири́),

20. савэ́н чхудэ́ пэ Апостолэнгиро и пророкэнгиро сыклякирибэ́н, и савэ́ндэ Кокоро́ Ису́со Христо́со исын вэнглытко бар ваш дава́ фунда́менто,

21. Саво́ сы́рбы рикирла саро́ кхэр кхэтанэ́, барьёла дрэ свэ́нто кхангири́ Ра́скирэ-Дэвлэ́скири,

22. дро екхипэ́н Лэ́са и тумэ́ явэ́на кхэтанэ́ явирэнца тэ дживэ́н дро Дэвлэ́скиро Кхэр пир Свэ́нто Ду́хо (Фа́но).

Romani Bible Baltic 2019

United Bible Societies for the Baltic Romani Mission