Bible in one year September 7Isaiah 5:1-301. Багава Мэ Мирэ́-Дрогонэскэ гилы́ Мири́, сави́ исын дрогоноскири пал Лэ́скиро винагра́днико. Сыс винагра́днико Мирэ́-Дрогонэскиро пэ бэргитко вучипэ́н.2. Ёв обкэрдя (облыджия) лэс тыноса, жужакирдя лэс барэндыр, чхудя́ дрэ лэ́стэ лачхэ́ винаградоскирэ кашта́, кэрдя́ кхэр дрэ лэ́стэ, выґанадя одо́й штэ́то, соб (кай) тэ тасавэн винаградо, и ужакирэлас, со янэ́ла ёв лачхо́ барьякирдо́ (пло́до), а ёв яндя́ барьякирдо́ на́лачхо.3. “Какана́, россэндякирэн Ман, мануша́лэ, савэ́ дживэ́на кэ Ерусалимо, мурша́ Юдэя́кирэ Мирэ́ винаградникоса.4. Со ишчо (инкэ́) трэиндя́ тэ кэра́в ваш лэ́скэ, со Мэ лэ́скэ на кэрдём? Со́скэ ёв яндя́ налачхэ́ му́ри, ко́ли ужакиравас лэ́стыр лачхо́ барьякирдо́?5. Палдава́ пхэна́ва тумэ́нгэ, со кэра́ва Мэ Мирэ́ винаградникоса: Мэ лав Пэ́скэ лэ́стыр тыно, и явэ́ла ёв чхучо́, Мэ роспхагирава лэ́скирэ ва́нты, и явэ́на тэ пхагирэн лэс.6. Дасавэса Мэ лэс ячкирава: на явэ́на тэ обчхинэн лэс, на явэ́на тэ обґанавэн лэс, забарьёла ёв налачхэ́ чарьяса, Мэ припхэнава болыбнаскэ, соб (кай) ёв тэ на дэл брышы́нд лэ́скэ.”7. Ра́скирэ-Дэвлэ́скиро, болыбна́скиро-янголэ́нгиро винагра́днико исын кхэр Израилёскиро, а мурша́ Юдэя́тыр – дро́го Лэ́скиро барьякирдо́, саво́ Ёв барьякирдя. Ужакирэлас Ёв, со явэ́ла чачуно́ сэ́ндо, нэ акэ – рат чхувэ́лапэ, ужакирэлас чачипэ́н, нэ акэ – годлэна.8. Бида тумэ́нгэ, кон кинэла екх кхэр пал яви́р, екх фэ́лда пал яви́р фэ́лда, адя́кэ, со нанэ штэ́то ваш явирэ манушэ́нгэ, адя́кэ, со, сы́рбы тумэ́ сан екхджинэ пэ пхув.9. Рай Дэвэ́л, болыбна́скиро-янголэ́нгиро, пхэндя́ дрэ мирэ́ кана́: “Далэ́ кхэра́ явэ́на чхучэ́ (пуста), барэ́ и гожа явэ́на, нэ нико́н на явэ́ла тэ дживэ́л одо́й.10. Дэш делянки дро винагра́днико янэ́на екх бато зя́рки, нэ екх хомеро, зя́рки, со чхувэнапэ дрэ пхув на́бут со (ледзь) янэ́ла екх эфа.”11. Бида одолэ́нгэ, кон тасярлатыр пэ зло́ко (пэ ра́нко) родэ́ла бравинта и кэ рат хачкирэ́ла пэс моляса (виноса).12. Исын башаибэн и мол пэ лэ́нгирэ свэ́нки, а пэ Ра́скирэ-Дэвлэ́скирэ рэ́нды ёнэ на дыкхэ́на, на думинэ́на пал дова́, со кэрэ́на Лэ́скирэ васта́.13. Пал саро́ дава́ джа́ла миро народо дро пле́но, ко́ли нико́н лэ́стыр дава́ на ужакирэлас; лэ́скирэ раё явэ́на бокхалэ́, лэ́скирэ барвалэ́ закамэна тэ пьен (явэ́на трушалэ).14. Пал саро́ дава́ буґлыя лю́но (адо), и откэрдя пэ́скиро муй; зджа́ла одори́к лэ́нгиро пхутькирибэ́н, лэ́нгиро барвалыпэ́н, лэ́нгиро шумо и саро́, со радынэла лэн.15. Пэрэ́ла ману́ш пэ чанга́, поддэлапэ мурш, пхутькирдэнгирэ якха́ змэкэнапэ тэлэ́ зачхакирэнапэ.16. А Рай Дэвэ́л, болыбна́скирэ-янголэ́нгиро, ґаздэ́лапэ пэ сэ́ндо, Свэ́нто Дэвэ́л сыкавэ́ла дро чачипэ́н, со Ёв исын свэ́нто.17. Бакря́ явэ́на тэ чаравэнпэ кокорэ́ пир пэ́стэ, чу́жа мануша́ явэ́на тэ хан барвалэнгирэ фэлдатыр.18. Бида одолэ́нгэ, савэ́ тырдэна кэ пэ грэ́хо би ракхибнаскирэ шэлэнца, тырдэна кэ пэ грэ́хо сы́рбы симиренца пэ рота.19. Савэ ракирэ́на: “Мэк Ёв тэ джал сыгэды́р, мэк тэ кэрэ́л Пэ́скири буты́, соб (кай) амэ тэ дыкхас. Мэк тэ явэ́л, мэк тэ сыкавэ́л, со дава́ исын – Свэнтонэ́-Израилёскиро годыпэ́н, соб (кай) амэ тэ ґалёвас!”20. Бида одолэ́нгэ, савэ́ налачхипэн кхарэ́н лачхипна́са, а лачхипэ́н – налачхипнаса; и пхэнэ́на пэ калыпэ́н, со дава́ исын дуд, а пэ свэ́то – со дава́ исын калыпэ́н; пхэнэ́на пэ кирко, со дава́ исын гудло́, а пэ гудло́ пхэнэ́на – киркипэн!21. Бида одолэ́нгэ, савэ́ исын годьварэ́ дрэ пэ́скирэ якха́, годьварэ́ кокорэ́ анги́л пэ́стэ.22. Бида одолэ́нгэ, савэ́ на дарэ́на тэ пьен мол (вино), и савэ́ исын зоралэ́ тэ кэрэ́н ла.23. Савэ пал ловэ́ отмэкэна одолэ́с, кон исын банго́, а манушэ́с, саво́ исын чачуно́, обчорэна.24. Пал-дова́, со сыр яг ха́ла пхус и сыр ха́ла яг кхас, адя́кэ кирнёла лэ́нгиро кашт, лулуди́ (цвэто) лэ́нгиро роспхурдэлапэ сыр пра́хо, пал-дова́, со ёнэ зачхурдынэ Ра́скирэ-Дэвлэ́скиро, болыбна́скирэ-янголэ́нгиро Зако́но, и на шундлэ́ ёнэ лав Свэнтонэ́ Израилёскиро.25. Пал дова́ захачола Ра́скирэ-Дэвлэ́скири холы́ пэ Лэ́скиро народо, протырдэла Ёв Пэ́скиро васт пэ лэ́ндэ, и Ёв чилавэ́ла лэн адя́кэ, со бэ́рги издрана, а лэ́нгирэ тру́пы явэ́на вычхурдынэ пэ вули́цы (га́сы) сыр гнэё. И на пириячэ́ла Лэ́скири холы́, и васт Лэ́скиро явэ́ла протырдыно.26. И Ёв ґаздэ́ла сцяго (дэ́ла припхэныбэ́н) кэ народы, савэ́ дур дживэ́на, выкхарэла одолэ́с, саво́ дживэ́ла пэ пхувья́киро яго́ро (краё), и, акэ – ёв локхэс и сы́гэс явэ́ла.27. На явэ́ла лэ́стэ одолэ́с, кон кхиныя, кон исын бизорья́киро, ни екх на засовэла, на закэрэла пэ́скирэ якха́; на злэлапэ лэ́стыр кусты́к, на рискирнапэ лэ́скирэ тривики.28. Курта́ла лэ́скири кэрды ваш марибэ́н, пэталы лэ́скирэ грэ́ндэ исын сыр бар, ро́ты лэ́скирэ – сыр балва́л.29. Годлэла ёв, сыр шчэрица (левица), годлэла сыр шчэр (ле́во); загодлэла, ухтылэ́ла дорэсыбэ́н, и нико́н на отлэла.30. Загодлэла пэ лэ́стэ дро дова́ дывэ́с сы́рбы мо́рё (дэрья́в), саво́ холя́сыя; подыкхэла ёв пэ пхув, акэ: – калыпэ́н, би́да, мурдия дуд (свэ́то) пэ болыбэ́н.Isaiah 6:1-131. Дро дова́ бэрш, ко́ли мыя́ кра́ли Ози́я, мэ дыкхцём Рас-Дэвлэ́с, Саво́ бэшэлас пэ вучо́ крали́тко штэ́то, а яго́ро (краё) пэ урибэ́н Лэ́скиро пхэрдякирдя́ сари́ Кхангири́.2. Пашы́л Лэ́стэ сыс тэрдэ́ серафимы: кажнонэ́стэ лэ́ндыр сыс шов пхака́ (крылы); дуе пхакэнца кажно закэрэлас пэ́скиро муй, ишчо (инкэ́) дуе пхакэнца закэрэлас пэ́скирэ ґэра́, а дуе пхакэнца вурнялас.3. Ёнэ кхарэнас екх екхэ́с и ракирэ́нас: “Свэ́нто, Свэ́нто исын Рай Дэвэ́л, болыбна́скирэ-янголэ́нгиро, сари́ пхув исын пхэрды́ Лэ́скирэ барипнаса!”4. Заиздранас вудара́ лэ́нгирэ занендыр, кхэр пхэрдия кучонэ́ тхувэса.5. Мэ пхэндём: “Бида ма́нгэ! Хасиём мэ, пал-дова́, со мэ сом ману́ш нажужэ́ уштэ́нца, мэ джива́ва машки́р манушэ́ндэ нажужэ́ уштэ́нца, и якха́ мирэ́ дыкхэнас Крали́с, Рас-Дэвлэ́с, болыбна́скирэ-янголэнгирэс.”6. Тэ́ньци вурняндыя кэ мэ екх серафимэндыр, а дро лэ́скиро васт сыс хачкирдо вангар, саво́ ёв лыя́ алтарёстыр.7. Ёв чиладя́ мирэ́ ушта́ и пхэндя́: “Акэ, дава́ чиладя́ тырэ́ ушта́, на́лачхо рэ́ндо тыро́ исын лыно́ криг ту́тыр, и грэ́хо тыро́ исын жужакирдо.”8. Мэ шундём Ра́скирэ-Дэвлэ́скири зан. Ёв пхэнэлас: “Конэ́с Ма́нгэ тэ бичхавав? Кон подджа́ла ваш Амэ́нгэ?” Мэ пхэндём: “Акэ, мэ сом, бичха́в ман.”9. Ёв пхэндя́: “Джа́, пхэн далэ́ народоскэ: ‘Явэ́на тэ шунэ́н – и на ґалёна, явэ́на тэ дыкхэ́н якхэ́нца – и на роздыкхэна [дыкхэ́на-р.с.].’10. Пал-дова́ со наковло яця́ далэ́-народоскиро ило́, пхарэ́с лэ́нгэ тэ шунэ́н закэрдэ якхэ́нца, и на дыкхэ́на якхэ́нца, и на шунэ́на канэнца, и на ґалёна илэ́са, и на обрисёна, соб (кай) Мэ тэ высастякирав лэн.”11. Мэ пхэндём: “Ци ґара́ (длу́гэс) дава́ явэ́ла, Раё, Дэ́вла?” Ёв пхэндя́: “Пириячэ́ла, ко́ли далэ́ фо́рья явэ́на чхучэ́, нико́н на явэ́ла тэ дживэ́л дрэ лэ́ндэ, ко́ли джа́на мануша́ далэ́ кхэрэндыр, ко́ли дая́ пхув явэ́ла сарэ́са чхучи́.12. Отбичхавэла Рай Дэвэ́л манушэ́н, никонэ́с на ячкирэ́ла пэ дая́ пхув.13. И ко́ли ячэ́лапэ дэ́што паш пэ ла́тэ и рисёла, усае́кх явэ́ла пхув чхучи́, нэ сыр теревинфостыр и дэмбостыр, ко́ли ёнэ исын чингирдэ тэлэ́, исын ячаибэ́н, адя́кэ свэ́нто ячаибэ́н ячэ́лапэ.”Psalms 105:23-2623. Израилё адя́кэ-паць явдя́ дро Еги́пто и Яково адя́кэ-паць притрадыя пэ Хамоскири пхув.24. И Дэвэ́л дыя́ бут чхавэ́н лэ́скирэ манушэ́нгэ, и Ёв кэрдя́ адя́кэ, со ёнэ ячнэ́ зоралэды́р пэ́скирэ вэргэ́ндыр.25. Ёв рискирдя́ Египто́скирэ-манушэ́нгирэ илэ зоралэ́с тэ на дэн паты́в Лэ́скирэ манушэ́нгэ, тэ отлыджанпэ фрэнтымаса Лэ́скирэ дынарье́нца.26. Дэвэ́л бичхадя́ Мойза́с, Пэ́скирэ писхари́с, и Аронос, конэ́с Ёв выкэдыя́,Proverbs 24:28-2928. На яв хохано́ якхи́тко (лжэсвидетелё) пэ пэ́скирэ пашатунэстэ би причынакиро, со́скэ тэ хохавэс пэ́скирэ уштэ́нца.29. На ра́кир: “Мэ кэра́ва адя́кэ лэ́скэ, сыр ёв кэрдя́ ма́нгэ. Мэ отда́ва палэ манушэ́скэ пал лэ́скири буты́.”1 Korinťanenge 15:29-5829. Со ж тэды кэрэ́на адалэ́ мануша́, савэ́ болэнапэ пал мулэ́ндэ? Ко́ли мулэ́ мануша́ на отджидёна сарэ́са, со́скэ ж ёнэ тэды далэ́ мануша́ болэнапэ пал мулэ́ндэ?30. Со́скэ ж амэ со дывэ́с пэраса тэл дар?31. Мэ со дывэ́с мэра́ва: мэ совлахава, со дава́ чачипэ́н шарибнаса, со исын ма́ндэ, пал тумаро́ патяибэ́н дрэ Исусо́стэ Христосо́стэ, амарэ́ Растэ-Дэвлэ́стэ.32. Ко́ли мэ пир манушы́тко годы́ мериндёмпэ зорья́са рискирибна́скирэ мурдалэ́нца дро Ефесо, тэды сави́ исын льго́та (ко́фо) ма́нгэ, ко́ли мулэ́ мануша́ на отджидёна? А ко́ли исын адя́кэ, со ж тэды джа́са тэ хас и тэ пьяс, пал-дова́ со усае́кх амэ мэраса атася́.33. На хохавэнпэ: налачхэ́ кампании розмэкэна лачхэ́ характеры.34. Лэнпэ пал годы́, сыр исын трэй и на кэрэ́н грэ́хи; мэ пхэна́ва тэ ладжакирав тумэн, со вари-савэ́ тумэ́ндыр на джинэ́на Дэвлэ́с.35. Нэ вари-кон пхэнэ́ла сыр мулэ́ мануша́ отджидёна? Савэ маса́ явэ́на лэ́ндэ?36. Бигодякиро ту сан: одова́, со ту чхувэ́са дрэ пхув, на отджидёла, пака на мэрэ́ла.37. И дова́, со ту чхувэ́са дрэ пхув, нанэ чачуны́ зя́рка, а дая́ исын нанги зя́рка: ци дава́ тэ явэ́л джов, ци дава́ тэ явэ́л парно́ гив, ци тэ явэ́л вари-сави́ яви́р зя́рка:38. и Дэвэ́л дэ́ла ла́кэ форма, сыр Ёв Кокоро́ камэ́ла, и дрэ кажно зя́рка исын пэ́скири форма.39. Лоча́ (пло́ти) исын ра́зна: манушэ́стэ исын екх лоч (маса́), мурдалэ́ндэ исын яви́р лоч, чириклендэ ишчо (инкэ́) исын яви́р лоч, и мачхэндэ исын яви́р лоч.40. И исын болыбны́тка формы и исын пхувитка формы, а ра́зна исын болыбнытконэ́-формэ́нгири го́жыма и пхувитконэ́-формэ́нгири го́жыма:41. кхамэстыр исын пэ́скири гожыма, чхонэстыр-яви́р гожыма, чэргэнендыр-яви́р гожыма: екх чэргэнятыр нанэ дасави́ гожыма, сыр явирьятыр.42. Адя́кэ-паць явэ́ла, сыр мулэ́ явэ́на тэ отджидён. Тру́по чхувэ́лапэ дрэ пхув тэ кирнёл, ке́ли ёв отджидёла, то явэ́ла тэ дживэ́л ве́чнэс.43. Ке́ли тру́по чхувэ́лапэ дрэ пхув, ёв исын джунгало́ (брыдко) и бизорья́киро, ке́ли отджидёла, явэ́ла шука́р и зорало́.44. Чачуно́ тру́по чхувэ́лапэ дрэ пхув, а ке́ли отджидёла, ёв явэ́ла сы́рбы дэвлыкано и Духоскиро.45. Адя́кэ, сыр исын чхиндло́: “Пэ́рво ману́ш Адамо сыс создыно́ сыр джидо́ ди, палатуно́ Адамо яця́ отджидякирибнытконэ духо́са.”46. Нэ анги́л на Ду́хо, а чачуно́ ману́ш, а Ду́хо коригэды́р (позжэ):47. пэ́рво ману́ш сыс создыно́ пхувья́кирэ прахостыр, а яви́р ману́ш исын Рай Дэвэ́л, Болыбна́скирэ Раёстыр.48. Саво́ исын пэ́рво пхувья́киро ману́ш, дасавэ́-паць исын пхувья́кирэ мануша́, саво́ исын Болыбна́скиро Ману́ш, дасавэ́-паць исын Болыбна́скирэ мануша́.49. И, сыр амэ́ндэ сарэ́ндэ исын пхувья́кирэ-манушэскири патри́н (о́бразо), адя́кэ-паць амэ́ндэ явэ́ла Болыбна́скирэ-Манушэскири патри́н (о́бразо).50. Нэ мэ пхэна́ва тумэ́нгэ, пшала́лэ, дова́, со исын лоча́тыр и ратэ́стыр, на заджа́ла дро Дэвлэ́скиро Кралипэ́н дро Болыбна́скиро Раё; и амарэ́ маса́, савэ́ кирнёна, на явэ́на тэ дживэ́н ве́чнэс.51. Ѓа́да, мэ пхэна́ва чораханыбэн тумэ́нгэ: амэ на сарэ́ мэраса, нэ сарэ́ парудёваса,52. Екха́тыр, сыр фэ́ни якх марэла, ке́ли башавэла палатуно́ ро́го (горно), мулэ́ отджидёна, соб (кай) ние́кхвар буты́р тэ на мэрэ́н, а амэ сарэ́ парудёваса.53. Пал-дова́ со дова́, со кирнёла, исын банго́ (мусинэла) тэ парудёл дро дова́, со на кирнёла, и дава́, со мэрэ́ла, банго́ тэ парудёл дро дова́, со на мэрэ́ла.54. А ке́ли дава́, со кирнёла, парудёла дро дова́, со на кирнёла; и дава́, со мэрэ́ла, парудёла дро дова́, со на мэрэ́ла, тэды кэрэ́лапэ кэ ко́нцо/яго́ро (сполнинэлапэ) зачхиндло́ лав: “Збердыма (победа) пиризорьякирэла мэрибэ́н.”55. Кай исын тыри́ дукх, мэрибэ́н? Мэрибэ́н, кай исын тыри́ збердыма?56. Мэрибэ́н лэ́ла дукх грэхостыр, а грэ́хо лэ́ла зор Законо́стыр;57. нэ парик Дэвлэ́скэ, Саво́ дыя́ збердыма амэ́нгэ пир амарэ́ Растэ-Дэвлэ́стэ, Исусо́стэ Христосо́стэ.58. Адя́кэ, мирэ́ дро́га пшала́лэ, явэ́н зоралэ́ дро ду́хо (фа́но) тумаро́, на кунинэнпэ, усады (сак) (всегда) кэрэ́н миштэ́с Ра́скирэ Дэвлэ́скири буты́, пал-дова́ со тумэ́ джинэ́на, со тумари́ буты́ на ивья́ (напра́снэс). Romani Bible Baltic 2019 Maintained by the United Bible Societies for the Baltic Romani Mission