Bible in one year September 8Isaiah 7:1-251. Сыс дрэ долэ́ дывэса́, ко́ли Аха́зо, Иофамо́скиро чхаво́, Ози́яскиро чхаво́ сыс кра́ли пэ Юдэ́я, о Рецыно, Сирия́киро кра́ли, о Факеё, Ремалиёскиро чхаво́, кра́ли Израилёскиро, гинэ́ марибна́са пэ Ерусалимо, нэ на лынэ́ лэс.2. Сыс пхэндло́ кэ Давидо́скиро кхэр, сыс откэрдо: “Сирияни исын тэрдэ́ пэ Ефремо́скири пхув”, издрандыя лэ́скиро ило́, лэ́скирэ-народоскиро ило́, сыр издрана кашта́ дро вэш, ко́ли пхурдэла балва́л.3. И пхэндя́ Дэвэ́л Исаёскэ: “Выджа пэ́скирэ чхавэ́са, Шэарясувоса кэ Аха́зо, одори́к, кай лэ́на пани́, пэ дром кэ фэ́лда, кай макхэна бакрэнгири вы́лна (шэрсь).4. Пхэн лэ́скэ: ‘Дыкх и яв штыл, на андырша, мэк тэ на дарэл тыро́ ило́ дуе далэндыр дэстэндыр, савэ́ хачона, Рецыноскирэ и Сириянэнгирэ и Ремалияскирэ чхавэ́скирэ холя́тыр, сави́ лыя́ тэ хачол пэ ту́тэ.’5. Сирия, Ефре́мо и Ремалииноскиро чхаво́ камэ́на тэ кэрэ́н ту́кэ чорипэ́н, ёнэ пхэнэ́на:6. “Джа́са марибна́са пэ Юдэ́я, газдаса ла, заласа, чхуваса Тавеилоскирэ чхавэ́с ла́кирэ крали́са.7. Нэ Рай Дэвэ́л пхэнэ́ла адя́кэ: “На явэ́ла пир тумаро́.8. Сирия́киро шэро́ исын Дама́ско, Дамаскоскиро шэро́ исын Рецыно, а ко́ли проджа́на шовдэша́ и пандж бэрш, Ефре́мо пириячэ́ла тэ явэ́л народоса.9. А Ефремоскиро шэро́ исын Сама́рия, а Самариякиро шэро́ исын Ремалияскиро чхаво́. Ко́ли тумэ́ на патя́на, то тумэ́ кэрэнэ адя́кэ, палдова́, со тумэ́ на упатя́ндынэ.”10. Ишчо (инкэ́) ракирэ́лас Рай Дэвэ́л кэ Аха́зо и пхэндя́:11. “Манг пэ́скэ ґерты́к (знаме́ниё) тырэ́ Ра́стыр-Дэвлэ́стыр, манг дро хорипэ́н ци дро вучипэ́н.”12. Пхэндя Аха́зо: “Мэ на ява́ва тэ мангав, на ява́ва тэ пропатякирав Дэвлэ́с.”13. Тэ́ньци пхэндя́ Исаё: “Шун, кхэр Давидо́скиро! Мануша́ кэрэ́на ваш тумэ́нгэ пхарэ́ буты́, а тумэ́ камэ́на, соб (кай) миро Дэвэ́л адя́кэ ваш тумэ́нгэ тэ кэрэ́л?14. Нэ кокоро́ Рай Дэвэ́л дэ́ла ґерты́к/ досыкаибэн тумэ́нгэ: акэ, э патывалы́ тэрны́ джувлы́ прилэ́ла и биянэ́ла чхавэ́с, и дэ́на Лэ́скэ лав: Эмануило.15. Ёв явэ́ла тэ хал тхуд и авги́н кэ долэ́ дывэса́, ко́ли высыклёла, сыр тэ отчхурдэл налачхипэн и тэ выкэдэл лачхипэ́н.16. Пал-дова́, со англэды́р, сыр дава́ чхаворо́ высыклёла тэ отчхурдэл налачхипэн и тэ выкэдэл лачхипэ́н, пхув, савья́тыр ту дарэса, ячкирэна дуй ла́кирэ кра́лья.17. Нэ янэ́ла Рай Дэвэ́л кэ ту, кэ тыро́ народо, кэ тырэ́-дадэ́скиро кхэр дасавэ́ дывэса́, савэ́ на сыс, долэ́ часостыр (цыростыр), сыр отгия́ Ефре́мо Юдэя́тыр; Ёв янэ́ла Асирия́кирэ крали́с.”18. И явэ́ла дро дова́ дывэ́с: выкхарэла Рай Дэвэ́л матля (муха), сави́ вурняла пашы́л Египто́скирэ рэка (лэнь) и бырля (пчола), сави́ вурняла пэ Асириякири пхув.19. Ёнэ привурняна, бэшэна сарэ́ ёнэ пэ лэнги, савэ́ исын чхучэ́, пэ бэ́рги, пэ сарэ́ пхусадытка чарья́; пэ сарэ́ кашта́ (дрэвы).20. Дро дова́ дывэ́с обмуравэла Рай Дэвэ́л мурадлуняса (бритваса), сави́ Ёв залыя долэ́ бутярнэндэ палэ рэка (лэнь), Асирия́кирэ крали́стэ шэро́ и бала́ пэ ґэра́, обчхинэла чхора (брода).21. И явэ́ла дро дова́ дывэ́с: конэ́стэ исын гурувны и дуй бакря́,22. одова́ явэ́ла тэ хал ксил, пал-дова́ со ёнэ дэ́на бут тхуд; ксил и авги́н явэ́на тэ хан сарэ́, кон яця́пэ пэ доя́ пхув.23. Явэ́ла дро дова́ дывэ́с: пэ кажно штэ́то, кай барьёлас тысёнцо (бар) винаградоскирэ кашта́ пэ тысёнцо рупувэ́ мардэ́, явэ́на тэ барьён пхусадытка чарья́.24. Явэ́на тэ псирэ́н одори́к марибнытконэ́ бустенца (стрелэнца) и лукэнца, пал-дова́, со сари́ пхув явэ́ла учхакирды пхусадэ́ чарьенца.25. На пэ екх бэ́рга, савэ́ англэды́р обкэрэнас мотыгаса, ту на подджаса, пал-дова́ со ту явэ́са тэ дарэс пхусадытконэ чарьендыр: одори́к явэ́на тэ вытрадэн гурувэ́н, тыкно́ мурда́л явэ́ла тэ марэл (тэ тасавэл) ґэрэ́нца далэ́ чарья́.”Isaiah 8:1-221. И пхэндя́ ма́нгэ Рай Дэвэ́л: “Лэ пэ́скэ бари папиря (сви́тко), чхин одо́й манушытконэ́ чхиныбнаса: Магер – шелал (шалал) – хаш – баз.”2. Мэ лыём пэ́скэ чачунэ́ якхитконэн (свидетелен), савэ́ сыс: Урияс, раша́с, и Захарияс, Варахииноскирэ чхавэ́с.3. Лыём пэ́скэ джувля́ пророчыца дрэ ромня́тэ, ёй бияндя́ ма́нгэ чхавэ́с. И пхэндя́ ма́нгэ Рай Дэвэ́л: “Дэ лэ́скэ лав ‘Магер – шелал – хаш – баз.’4. Пал-дова́ со англэды́р, сыр бия́то высыклёла тэ пхэнэ́л: ‘Да́до Миро, Даё Мири́’ – барвалыпэ́н Дамаскостыр, дорэсыбэ́н Самариятыр лыджа́на анги́л Асирия́кирэ крали́стэ.”5. Ишчо ракирэ́лас кэ мэ Рай Дэвэ́л и пхэндя́:6. “Пал дова́, исын на пир ило́ далэ́ народоскэ исын пани́ Силоамоскиро, саво́ штылэ́с тхадэ́ла, а шарэла Рецынос и Ремалииноскирэ чхавэ́с,7. то янэ́ла кэ ёв Рай Дэвэ́л баро́ пани́ – Асирия́кирэ крали́с лэ́скирэ барипнаса; и ґаздэ́лапэ дава́ пани́, выджа́ла пэ́скирэ брэгэндыр.8. И проджа́ла ёв пир Юдэ́я, вучэ́с дой ґаздэ́лапэ, доджа́ла кэ мэн и росчхурдэла пэ́скирэ пхака́ (крылы) дро саро́ Тырэ́-пхувья́киро буглыпэн, Эмануиле!”9. Марэ́нпэ, народы, нэ дарэ́н, шунэ́н, сарэ́ пхувья́, савэ́ исын дур адатхы́р! Лэн курта́ла пэ марибэ́н, нэ дарэ́н, лэн курта́ла, нэ дарэ́н!10. Задуминэн вари-со тэ кэрэ́н, нэ задуминыбэн роспхагирэлапэ, ракирэ́н лав, нэ ничи́ на выджа́ла далэ́стыр, пал-дова́ со Дэвэ́л исын амэ́нца!”11. Адя́кэ ракирэ́лас ма́нгэ Рай Дэвэ́л, ке́ли рикирэлас пэ ма́ндэ зорало́ васт, и Ёв припхэнэлас, соб (кай) мэ тэ на джав далэ́-народоскирэ дромэ́са, и адя́кэ пхэндя́:12. “На кхарэ́н чораханэ зракирибнаса дава́, со дова́ народо кхарэ́ла чораханэ зракирибнаса, на дарэ́н долэ́стыр, со́стыр ёв дарэ́ла, и на страхадён.13. Дэн свэ́нто паты́в Ра́скэ-Дэвлэ́скэ, болыбна́скирэ-янголэнгирэскэ, Ёв исын тумари́ дар, Ёв исын тумаро́ трашаибэ́н!14. Ёв явэ́ла свэнтонэса ваш тумэ́нгэ, и барэса, савэ́стыр пэрэ́на, бэргаса, савья́тыр пириячэна тэ патя́н дуй кхэра́ Израилёскирэ, фэляса (петляса) и кхудяса (сетяса), савэ́нца ухтылэна Ерусалимоскирэн манушэ́н.15. Бут кон лэ́ндыр пэрэ́ла, розмарэлапэ, запэнтынэлапэ и явэ́на ухтылдэ́ адасавэ́ мануша́.”16. Запхандэ допхэныбэ́н и гарав пэ чэргэнори́ (печать) дава́ сыкадыипэн (откэрибэн) анги́л Мирэ́ сыкляибнытконэндэ.17. Палдава́ мэ допатява Ра́скэ-Дэвлэ́скэ, Саво́ гарадя Пэ́скиро муй Яково́скирэ (Израилёскирэ) кхэрэ́стыр, мэ патя́ва Лэ́скэ.18. Акэ, мэ пэ́скирэ чхаворэнца, савэ́н дыя́ ма́нгэ Рай Дэвэ́л, сыр припхэныбэ́н и ангилпхэныбэ́н дро Израилё Ра́стыр-Дэвлэ́стыр, болыбна́скирэ-янголэскирэстыр, Саво́ дживэ́ла пэ бэ́рга Сио́но.19. И ко́ли пхэнэ́на тумэ́нгэ: “Джа́ кэ одолэ́, кон выкхарэла мулэн, кон исын човахано, кон зумавэла”, – тэ́ньчи тумэ́ пхэнэ́н: “Ци на трэй, соб (кай) народо тэ родэ́л пэ́скирэ Дэвлэ́с? Ци пхучэна мулэ́ндыр пал джидэ́ манушэ́ндэ?”20. Пропатякирэн лэн пир сыкадыипэн дро Зако́но и откэрибэн. Ко́ли ёнэ (кон выкхарэла мулэн) на ракирэ́на адя́кэ, сыр дава́ лав, тэ́ньчи нанэ дрэ лэ́ндэ дуд (свэ́то).21. Ёнэ явэ́на тэ псирэ́н пир пхув, обчордэ и бокхалэ́, а дрэ бокхалэ́ дывэса́ явэ́на тэ холясон, явэ́на тэ кошэн пэ́скирэ крали́с и пэ́скирэ Дэвлэ́с.22. Явэ́на тэ дыкхэ́н упрэ́ и подыкхэна пэ пхув: акэ, би́да, калыпэ́н; явэ́на чхурдынэ́ дро калыпэ́н, нэ на явэ́ла калыпэ́н сарэ́ дывэса́ одо́й, кай ёв акана́ скэдыяпэ.Psalms 105:37-4537. Тэ́ньци Ёв лыджия́ лэн криг рупэ́са и сувнака́са, и на сыс нико́н, саво́ тэ явэ́л бизорья́киро машки́р кадалэ́ екхэ́-чиба́кирэ / чанга́ (колены).38. Еги́пто сыс радо, со ёнэ гинэ́, пал-дова́ со пэ лэ́ндэ пыя́ дар Юдэндыр.39. Дэвэ́л росчхудя́ о́блоко тэ гаравэн лэн, и яг тэ явэ́л лоса́са (свэ́то чхонэстыр) лэ́нгэ раты́.40. Ёнэ помангнэ и Ёв дыя́ перепёлэн лэ́нгэ и чалякирдя чалэ́с лэн марэ́са болыбна́стыр.41. Ёв отчхакирдя́ бэ́рга-ска́ла, и паня́ дынэпэ тэ тхадэн, потхадынэ сыр рэка (лэнь) пир шукэ́ штэ́ты.42. Пал-дова́ со Ёв рипирдя лэ́скиро свэ́нто лав, Саво́ Ёв дыя́ Аврамоскэ, Лэ́скирэ дынари́скэ;43. и Ёв вылыджия́ Лэ́скирэ манушэ́н радыма́са, Лэ́скирэ выкэдынэ́ манушэ́н радыма́са;44. Ёв дыя́ лэ́нгэ пхувья́ Наюдытконэ́ нацые́ндыр и ёнэ дорэснэ́ сыр мэкно́ миштыпэ́н далэ́ манушэ́нгирэ обкэрдэ фэ́лды:45. соб (кай) ёнэ могинэ́нас тэ рикирэнпэ зоралэ́с кэ Лэ́скирэ стату́ты (уставы), и тэ рикирэнпэ кэ Лэ́скирэ зако́ны. Аллилуя Ра́скэ-Дэвлэ́скэ.Proverbs 24:30-3430. Мэ гиём набутитконэ-манушэ́скирэ фэлдаса и пир винаграды́тко фэ́лда, кай набарэ́-годя́киро ману́ш исын;31. и одо́й ёв сыс забарино пхусадытконэ бустенца. Лэ́скири фэ́лда сыс учхакирды цукнудяса (стракиваса), лэ́скири баруны ва́нта сыс пхагирды тэлэ́.32. Ке́ли мэ дыкхцём, мэ ґалыём, со дава́ сыс куч, мэ подуминдём и дорэсцём сыклякирибэ́н:33. на́бут соибэн, на́бут линдра (дрёма), на́бут счхув ва́нта тэ откхинён!34. И тыро́ чорорипэн явэ́ла сы́рбы марибны́тко пирангачо и тыри́ трэ́бима явэ́ла сы́рбы ману́ш мардытконэса.1 Korinťanenge 16:1-241. Пал дова́, сыр тэ кэдэн ловэ́ ваш свэнтонэнгэ, кэрэ́н адя́кэ, сыр мэ упхэндём пир Галатиякирэ кхангирья.2. Дро пэ́рво куркитко дывэ́с мэк кажно тумэ́ндыр тэ отчхувэл дрэ риг и тэ ракхэ́л ада́кицы ловэ́, пэ кицы́ лэ́скиро миштыпэ́н выбарьёла, соб (кай) тумэ́ тэ на кэдэн ловэ́, ке́ли мэ ява́ва кэ тумэ́.3. И ке́ли мэ ява́ва, тэды кодолэ́ манушэ́н, савэ́н тумэ́ выкэдынэ́, мэ бичхава́ва лылэнца тэ лыджа́н тумарэ́ ловэ́, со исын скэдынэ́ пир тумари́ лачхэ́-илы́ткима дро Ерусалимо:4. и ко́ли дава́ явэ́ла куч, соб (кай) адя́кэ-паць и ма́нгэ тэ явав, тэды ёнэ могинэ́на тэ джа́н ма́нца.5. Нэ мэ ява́ва кэ тумэ́, ке́ли мэ проджава пир Македония; пал-дова́ со мэ джа́ва пир Македония.6. Нэ ма́нгэ здэлапэ, со мэ ява́ва тэ джива́ва на́бут (куты́) кэ тумэ́, ци аж ячавпэ пэ ивант (зима), и тэды тумэ́ пролыджана ман, карик ма́нгэ трэй тэ джав.7. Пал-дова́ со мэ на кама́м тэ дыкхавпэ тумэ́нца сы́рбы пир дром, пал-дова́ со мэ ужакирава лачхипэ́н тэ ячавпэ кэ тумэ́ пэ вари-саво́ часо, ко́ли явэ́ла пэ дава́ Ра́скирэ-Дэвлэ́скири во́ля.8. Нэ мэ ячавпэ кэ Эфесо кэ Духоскиро свэ́нко.9. Пал-дова́ со баро́ и бугло вуда́р сы́рбы псирадыя ваш мири́ буты́, а исын бут вэ́рги.10. Ко́ли Хима (Тимофеё) явэ́ла кэ тумэ́, кэрэ́н, сыр исын фэды́р, соб (кай) ёв тэ явэ́л би дара́киро кэ тумэ́, пал-дова́ со ёв кэрэ́ла буты́ ваш Ра́скэ-Дэвлэ́скэ, адя́кэ-паць, сыр и мэ.11. Мэк нико́н тэ на дыкхэ́л пэ лэ́стэ барэ́ минаса, а бичхавэн лэс раманёса, соб (кай) ёв тэ явэ́л кэ мэ; пал-дова́ со мэ ужакирава лэс пшалэ́нца.12. Ѓа́да, пал пшалэ́стэ Аполосостэ, мэ бут мангавас лэс тэ джал пшалэ́нца кэ тумэ́, нэ ёв ишчо (инкэ́) нанэ скэдыно́ дро ду́хо (фа́но) тэ джал, а явэ́ла тэды, ке́ли лэ́стэ явэ́ла лачхи́ ваканцыя (случаё).13. Ракхэ́нпэ, рикирэ́н патяибэ́н; явэ́н муршканэ́, явэ́н зоралэ́.14. Мэк саро́ тэ кэрэ́лпэ тумэ́ндэ ласка́са и патыва́са.15. Мэ манга́ва тумэн, пшала́лэ, тумэ́ ж джинэ́на Стэхфаноскири сэ́м΄я (ири́), савэ́ исын пэ́рва патяибнаскирэ дрэ Ахайя, и со ёнэ отдынэ́ пэс, соб (кай) тэ дынаринэ́н свэнтонэнгэ;16. соб (кай) тумэ́ тэ кандэ́н лэн и кажнонэ́ манушэ́с лэ́ндыр, кон лэ́нца кэрэ́ла буты́ и дынаринэла.17. Мэ радынавпэ, со явнэ́ Стехвано, Фартунато и Ахаико; пал-дова́ со ёнэ сы́рбы парудэ тумэн, ке́ли на сыс тумэн.18. Пал-дова́ со ёнэ подрикирдэ сыр миро адя́кэ-паць и тумаро́ ду́хо (фа́но): кутякирэн (патывакирэн) кадасавэн.19. Пиридэна “рама́нё” тумэ́нгэ кхангирья́кирэ скэдыибэна Леиятыр. Акила и Прискила пиридэна “рама́нё” сарэ́ илэ́стыр Ра́са-Дэвлэ́са лэ́нгирэ кхэритконэ́ скэдыибнаса.20. Сарэ́ пша́ла пиридэна “рама́нё” тумэ́нгэ. Пиридэ́н “рама́нё” екх екхэ́скэ свэнтонэ́ чамудыпнаса.21. Мэ чхиндём пэ́скирэ вастэ́са “рама́нё” тумэ́нгэ ма́ндыр.22. Ко́ли вари-кон на рикирэ́ла сыр Дро́гима Рас-Дэвлэ́с дро пэ́скиро ило́, Исусо́с Христосо́с, тэ явэ́л лэ́скэ Анафема (Мара-Тафа).23. Мэк бахталыпэ́н амарэ́ Ра́скирэ-Дэвлэ́скирэ, Исусо́скирэ Христосо́скиро тэ явэ́л тумэ́нца.24. Мэк мири́ паты́в кэ яви́р мануша́ пир Христосо́стэ Исусо́стэ тэ явэ́л сарэ́нца тумэ́нца. Ами́нь. Romani Bible Baltic 2019 Maintained by the United Bible Societies for the Baltic Romani Mission