Beblia

1. Дро англатуно́ часо (цы́ро) сыс тэлякирды Завулоноскири пхув и пхув Нефалимоскири; нэ дова́ часо, саво́ явэ́ла, ґаздэ́ла барипнаса дром пашы́л мо́рё (дэрья́в), пал Иорданоскири пхув, Галиле́я, кай Наюды́тка мануша́ дживэ́на.

2. Народо, саво́ псирэ́ла дро калыпэ́н, явэ́ла тэ дыкхэ́л дуд; кэ одолэ́, кон дживэлас дрэ калыпэ́н (цёмныма) сыр мэрибэ́н, захачола дуд.

3. Ту ґаздэса ду́хо (фа́но) дро народо, и дэ́са лэ́скэ бари ра́дыма. Радыпнытко Ёв явэ́ла тэ радынэ́лпэ анги́л ту́тэ, сыр радынэ́напэ мануша́, ко́ли скэдэ́на маро́, ко́ли розлэна дорэсыбэ́н.

4. Пал-дова́ со ґа́мо, пхарипэ́н лэ́скиро, дэсто́, саво́ лэс марэлас, Ту пхагирэса сыр дро Мадиамоскиро дывэ́с.”

5. Пал-дова́, со кажнонэскирэ-халадэскирэ тыраха марибнастыр, урибэ́н лэ́скиро, саво́ исын дро рат, схачкирэна, отдэна, соб (кай) яг тэ схал лэн.

6. Пал-дова́ со Бия́то бия́ндыя амэ́нгэ, чхаво́ исын дыно́ амэ́нгэ; Ёв лэ́ла зор дро Пэ́скиро васт, и дэ́на Лэ́скэ лав: Лачхо́ Годыпнари, зорало́ Дэвэ́л, Дад, конэ́стэ исын ве́чно джиибэ́н, далэ́-свэтоскиро Тхага́ри (Князё).

7. Зор Лэ́скири и рама́нё (миро) на пириячэ́ла пэ Давидо́скиро троно дро Лэ́скиро кралипэ́н, соб (кай) Ёв (Дэвэ́л) тэ подрикирэ́л лэс сэндоса и чачипна́са далэ́ дывэсэ́стыр и пэ саро́ ве́ко. Зэвлыныпэн Ра́скирэ-Дэвлэ́скиро кэрэ́ла дава́.

8. Рай Дэвэ́л бичхавэ́ла лав кэ Яково, и пэ Израилё Ёв зджа́ла.

9. Соб (кай) тэ джинэ́л саро́ народо, Ефре́мо и Самариякирэ мануша́, савэ́ ракирэ́на барипнаса и исын пхутькирдэ́ илэ́са:

10. “Пынэ́ бара́ – ла́са яви́р бара́, исын вычхингирдэ сикоморы – запаруваса лэн пэ кедры.”

11. Ѓаздэла Рай Дэвэ́л пэ лэ́стэ (Ефремостэ) Рецыноскирэ вэргэ́н, и Ёв дэ́ла курта́ла одолэ́нгэ, савэ́ холясона пэ лэ́стэ.

12. Сирияни вастоко́стыр, Филистимля́ни западостыр; и ёнэ явэ́на тэ хан Израилё пхэрдэ́ мо́са. И на проджа́ла ишчо (инкэ́) Лэ́скири холы́, и васт Лэ́скиро исын протырдыно.

13. Нэ народо на обрисёла кэ Одова́, Кон марэла лэс, на родэ́ла Рас-Дэвлэ́с, болыбна́скирэ-янголэнгирэс.

14. Отчингирэла Дэвэ́л Израилёстыр шэро́ и пори, пальма и дэсто́ дро екх дывэ́с.

15. Пхуро́ и барвало́ – дава́ исын шэро́, а проро́ко – хохаибнари – дава́ исын пори.

16. Далэ́-народоскирэ шэралэ́ хохавэна одолэ́н, и кон исын кхэтанэ́ лэ́нца, одолэ́ хасёна.

17. Палдава́ на явэ́ла тэ радынэ́лпэ Рай Дэвэ́л пал лэ́скирэ тэрнэ́ манушэ́ндэ, на потангинэла лэ́скирэ бидадэскирэн и биромэскирэн пал дова́, со сарэ́ ёнэ исын хохаибнарья и чора, ушта́ лэ́нгирэ пхэнэ́на налачхэ́ лава́. Палдава́ на проджа́ла Лэ́скири холы́ и васт Лэ́скиро исын протырдыно.

18. Пал-дова́ со грэ́хо росхачия, сыр яг ха́ла пхусадэ́ чарья́, хачола дрэ вэша́, и тхув ґаздэ́лапэ стылбоса.

19. Ра́скирэ-Дэвлэ́скири, болыбна́скирэ-янголэнгири холы́ хачкирэ́ла пхув, народо кэрэ́лапэ сы́рбы хабэ́н ваш яг, на потангинэла ману́ш пэ́скирэ пшалэ́с.

20. Явэ́на тэ чхинэн пир чачи́ риг – а бокхалэ́ ячэ́напэ, явэ́на тэ хан пир ле́во (зэ́рво) риг – на чалёна; кажно явэ́ла тэ хал кокоро́ пэс.

21. Мана́сия ха́ла Ефремос, Ефре́мо ха́ла Манасияс, а кхэтанэ́ ёнэ ха́на Юдас. И на пириячэ́ла Лэ́скири холы́, и васт Лэ́скиро исын протырдыно.

1. Бида одолэ́нгэ, савэ́ дэ́на на чачунэ́ зако́ны, савэ́ зачхинэна захалэ припхэныбэна́.

2. Соб (кай) тэ залэн чорорэндыр чачуно́ сэ́ндо, соб (кай) тэ обчорэн подрикирибэ́н назоралэ манушэ́ндыр Мирэ́ народо́стыр, соб (кай) тэ залэн ваш пэ́скэ джувле́н, савэ́ исын биромэскирэ (пивлен), соб (кай) тэ обчорэн бидадэскирэ чхаворэ́н (пиротэн).

3. Со тумэ́ явэ́на тэ кэрэ́н дро дывэ́с, саво́ явэ́ла, ко́ли явэ́ла дура́л тумаро́ хасибэ́н? Кэ кон подджана тумэ́ тэ подэн васт, кай ячкирэна тумаро́ барвалыпэ́н?

4. Би Миро тумэ́ бандёна машки́р манушэ́ндэ, савэ́н залынэ дро бэшыбэн, пэрэ́на машки́р домардэ́ манушэ́ндэ. Пир саро́ дава́, Лэ́скири холы́ на пириячэ́ла и васт Лэ́скиро исын протырдыно.

5. “О, Асуре, дэсто́ Мирэ́ холя́тыр! Чхупны дро лэ́скиро васт исын Мири́ холы́!

6. Мэ бичхава́ва лэс пэ грэхоскиро народо, пэ народо, со прилыя́ Мири́ холы́; Мэ да́ва лэ́скэ припхэныбэ́н, соб (кай) тэ чорэл барэ́ чорибнаса, соб (кай) тэ дорэсэл дорэсыбэ́н, соб (кай) тэ кэрэ́л далэ́ народо́стыр бла́та пэ вули́ца (га́са).

7. Нэ ёв на адя́кэ подуминэла, на адя́кэ явэ́ла тэ мыслинэл лэ́скиро ило́ лэ́стэ: ‘Сыр бы тэ обчорэл, тэ замарэ́л бут народы?’

8. Ёв пхэнэ́ла: ‘Ци на сарэ́ кра́лья исын мирэ́ тхага́рья (кня́зи)?

9. Ци на Халнё, ци на дова́, со исын Кархемисо, ци Емафо на дова́, со исын Арпадо? Ци Сама́рия на дова́, со исын Дама́ско?

10. Ко́ли залыя Миро васт идолытка кралипэна́, кай буты́р исын и́долы, сыр исын дро Ерусалимо и дрэ Сама́рия.

11. Ци на кэра́ва Мэ адя́кэ Ерусалимоса и лэ́скирэ кэрдэ́ муенца (изваяниенца), сыр кэрдём Мэ Самарияса и ла́кирэ идолэнца?’”

12. Явэ́ла адя́кэ: ко́ли Рай Дэвэ́л кэрэ́ла саро́ Пэ́скиро рэ́ндо пэ бэ́рга Сио́но, и дро Ерусалимо, ёв пхэнэ́ла: “Подыкхава Мэ пэ Асирия́кирэ крали́стэ, пэ пхутькирдо лэ́скиро ило́, пэ якха́ лэ́скирэ, савэ́ исын вучэ́с ґаздынэ́.

13. Ёв пхэнэ́ла: “Мирэ́ зорья́са, мирэ́ годя́са кэрдём мэ да́ва, пал-дова́, со мэ сом годьваро́: Мэ парувава народонэнгирэ рига́ (ме́жы), чорава лэ́нгиро кучипэ́н, Мэ чхурдава тэлэ́ троностыр, сыр зорало́ ману́ш.”

14. Васт миро заухтылдя народонэнгиро барвалыпэ́н, сыр залэна чириклэнгирэ парнорэ, адя́кэ мэ залыём сари́ пхув, и нико́н на ґаздыя́ пхак, на откэрдя муй, на пхэндя́ ничи́.”

15. Ци шарэлапэ пэ́са товэр анги́л одолэ́стэ, кон чингирэла лэ́са? Ци пхутёла ризил (пила) анги́л одолэ́стэ, кон чхинэла ла́са? Ци ґаздэ́лапэ дэсто́ пэ одолэ́стэ, кон лэс ґаздыя́, ци ґаздэ́лапэ дэсто́ пэ одолэ́стэ, кон исын на кашт?

16. Палдава́ кэрэ́ла Рай Дэвэ́л, болыбна́скирэ-янголэ́нгиро адя́кэ, со тхулэ вышутёна, а машки́р барэ́ лэ́скирэ манушэ́ндэ росхачкирэла яг, хачкирэ́ла сы́рбы яг.

17. Дуд (свэ́то) Израилёскиро явэ́ла яга́са, и Свэ́нто лэ́скиро – долэ́ яга́са, сави́ схачкирэ́ла и схала лэ́скирэ пхусадэ́ чарья́ дро екх дывэ́с.

18. Лачхо́ вэш лэ́скиро, лэ́скири у́нта (садо), схала ёй сарэ́са, ди и маса́, и явэ́ла ёв, сыр исын насвало́, саво́ мэрэ́ла.

19. Адя́кэ на́бут ячэ́лапэ каштэндыр, со бия́то лэн погинэла.

20. Явэ́ла дро дова́ дывэ́с: Израилёскиро ячаибэ́н и одолэ́; кон зракхцяпэ Яково́скирэ кхэрэ́стыр, на явэ́на тэ допатян буты́р одолэ́скэ, кон домардя́ лэн, нэ ёнэ явэ́на тэ патя́н Ра́скэ-Дэвлэ́скэ, Свэнтонэ́-Израилёскирэ Дэвлэ́скэ сарэ́ илэ́са.

21. Ячаибэ́н обрисёла, Яково́скиро ячаибэ́н рисёла кэ зорало́ Дэвэ́л.

22. Ко́ли б тэ явэ́л ту́тэ, Израиле, ада́кицы манушэ́н, кицы́ исын пра́хо пэ мо́рё (дэрья́в), обрисёла екх ячаибэ́н: хасибэ́н явэ́ла пир чачипэ́н, пир чачипэ́н пхэндло́, со явэ́ла хасибэ́н.

23. Хасибэ́н дэ́ла Рай Дэвэ́л, Дэвэ́л, болыбна́скирэ-янголэ́нгиро, пэ сари́ пхув.

24. Палдава́ адя́кэ пхэнэ́ла Рай Дэвэ́л, Рай Дэвэ́л, болыбна́скирэ-янголэ́нгиро: “Народо Миро, саво́ дживэ́ла пэ Сио́но, на дар Асуростыр. Ёв выджа́ла пэ ту́тэ, ґаздэ́ла пэ ту́тэ пэ́скиро дэсто́, сыр Еги́пто.

25. Ишчо (инкэ́) на́бут, сарэ́са на́бут и проджа́ла Мири́ холы́, обрисёла Мири́ холы́, соб (кай) тэ хасякирэ́л лэн.”

26. Ѓаздэла Рай Дэвэ́л, болыбна́скирэ-янголэ́нгиро, чхупны пэ лэ́стэ, сыр тэ́ньчи, ко́ли сыс розмардо Мадиамо пашы́л бэ́рга Орива, ци ко́ли сыс дэсто́ протырдыно пэ мо́рё (дэрья́в), и Ёв ґаздэ́ла лэс сыр пэ Еги́пто.

27. Явэ́ла дро дова́ дывэ́с – злэлапэ пхарипэ́н тырэ́ мэнятыр, пэрэ́ла пхарипэ́н тхулэ масэстыр.

28. Ёв джа́ла пэ Аиафо, проджа́ла Мигроно, ёв чхувэ́ла пэ́скиро дорэсыбэ́н дро Михмасо.

29. Ёв проджа́ла вэнсконэ дромэ́са, дрэ Гева ёнэ ратькирэна; издрала Ра́ма, праста́ндыя кэ Гива́ Саулоскири.

30. Ѓодлэ дэ тырэ́ заня́са, Галимоскири чхай, мэк тэ шунэ́л тут Лаисо, чороро́ Анафофо!

31. Мадмена роспрастандыяпэ, одолэ́, кон дживэ́ла кэ Гевимо, сы́гэс уджана.

32. Ишчо (инкэ́) дывэ́с явэ́ла тэрдо́ ёв кэ Нова [Ноб-ю.о.]; сыкавэ́ла пэ́скирэ вастэ́са би́да Сионоскэ, Ерусалимо́скирэ бэргакэ.

33. Акэ, Рай Дэвэ́л, Рай Дэвэ́л, болыбна́скиро-янголэ́нгиро, счхинэла даранэ зорья́са вэ́тки каштэндыр, пхутькирдэ́ явэ́на чингирдэ, вучэ́ пэрэ́на пэ пхув.

34. И Ёв почингирэла вэшытко ґэнстыма састырэса, пэрэ́ла Лива́но Сарэзорьякирэстыр, Конэ́стэ исын зор саро́ тэ кэрэ́л.

1. Аллилуя. Шарэ́н Рас-Дэвлэ́с, парикирэ́н Ра́скэ-Дэвлэ́скэ пал Лэ́скиро лачхипэ́н, и со Лэ́скири лачхэ́-илы́ткима ячэ́лапэ пэ сарэ́ ве́ки.

2. Кон могинэ́ла тэ выпхэнэл Дэвлэ́скиро зоралыпэ́н, тэ пиридэл лавэ́нца саро́ шарибэ́н Лэ́скэ.

3. Бахталэ́ исын одолэ́, савэ́ кандэ́на Лэ́скирэ припхэныбэна́ и савэ́ кэрэ́на пир чачипэ́н кажно мо́ло.

4. Ри́пир ман, Раё Дэ́вла, пир Тыри́ ла́ска кэ Тырэ́ мануша́, на бистыр ман, сыр Ту явэ́са тэ зракхэс лэн:

5. соб (кай) ма́нгэ тэ дыкха́в лачхипэ́н Тырэ́ манушэ́нгиро, соб (кай) ма́нгэ тэ радынавпэ Тырэ́-манушэ́нгирэ радыма́тыр, соб (кай) мэ тэ явав барикано Тырэ́ манушэ́нца.

1. Адалэ́ исын адя́кэ-паць Соломоно́скирэ притчы, савэ́ зачхиндлэ́ Езэкияскирэ мануша́. Езэки́я сыс кра́ли пир Юдэ́я.

2. Дава́ исын барипэ́н Дэвлэ́скэ тэ гаравэл дова́ рэ́ндо, со на трэй тэ джинэ́н манушэ́нгэ; нэ барипэ́н кральенгиро исын дрэ дова́, соб (кай) тэ розґалёл саро́ пал дава́ рэ́ндо.

1. Павли́стыр, Исусо́скирэ Христосо́скирэ Апостоло́стыр пир Дэвлэ́скири во́ля, и Хима́стыр (Тимофеёстыр), пшалэ́стыр, Дэвлэ́скирэ кхангирья́кэ, со исын дро Коринфо, сарэ́ свэнтонэ́нца пир сари́ Ахая.

2. Мэк Дэвэ́л Дад амаро́ и Рай Дэвэ́л Ису́со Христо́со тэ дэн тумэ́нгэ бахталыпэ́н и рама́нё (миро).

3. Тэ явэ́л бахтякирдо́ Дэвэ́л и амарэ́ Ра́скирэ-Дэвлэ́скиро Дад, Саво́ дэ́ла тангипны́тко (жалосно) ило́; Дэвэ́л, Саво́ подрикирэ́ла дро саро́;

4. Саво́ подрикирэ́ла амэн дрэ сарэ́ амарэ́ пиридживипэна ваш дова́, соб (кай) амэ могинасас тэ подрикирас одолэ́н, дро саво́ пхарипэ́н ёнэ тэ на явэ́н, подрикирибнаса, саво́ амэ кокорэ́ дорэсцям Дэвлэ́стыр:

5. Пал-дова́ со, сыр амэ буты́р мэнчынасапэ пал Христосо́стэ, адя́кэ-паць амэ буты́р дорэсаса подрикирибэ́н Лэ́стыр.

6. Ко́ли амэ пиридживаса, амэ пиридживаса ваш тумаро́ подрикирибэ́н и зракхибэ́н; ко́ли Дэвэ́л подрикирэ́ла амэн, тэды и амэ подрикираса тумэн, ке́ли тумэ́ пирилыджана дасавэ́-паць мэ́ньки, савэ́ амэ вырикираса,

7. и амаро́ лачхо́ ужакирибэ́н пал тумэ́ндэ исын зорало́: ко́ли Дэвэ́л подрикирэ́ла амэн, дава́ исын ваш тумаро́ подрикирибэ́н и зракхибэ́н: амэ джина́са, ко́ли тумэ́ пирилыджана дасавэ́-паць мэ́ньки, сыр и амэ, тэды Дэвэ́л подрикирэ́ла тумэн, адя́кэ-паць сыр и амэн.

8. Палдава́ амэ камаса, соб (кай) тумэ́ тэ джинэ́н, пшала́лэ, со амэ пиридживдям дрэ Асия, кай амэ́нгэ сыс одо́й адя́кэ пхаро́ на пир зор, со амэ хасякирдям лачхо́ ужакирибэ́н тэ ячаспэ джидэ́нца.

9. А амэ чуиндям пэс сы́рбы амэ сам приракирдэ кэ мэрибэ́н, соб (кай) амэ тэ на розгинас пэ кокорэндэ, а пэ Дэвлэ́стэ, Саво́ отджидякирэла мулэн,

10. Саво́ зракхця́ амэн мэрибнытконэ́ дара́тыр (дарьятыр), и Кон зракхэ́ла; пэ Лэ́стэ амэ чхудям амаро́ лачхо́ ужакирибэ́н, со Ёв ишчо (инкэ́) адя́кэ-паць зракхэ́ла;

11. пал-дова́ со тумэ́ адя́кэ-паць мангэ́напэ Дэвлэ́скэ ваш дова́, соб (кай) бут мануша́ парикирэнас Дэвлэ́скэ пал амаро́ бахтякирдо́ зракхибэ́н пир патерья (молитвы) Дэвлэ́скэ бутэ́ манушэ́ндыр.

12. Пал-дова́ со амэ радынасапэ далэ́стыр, ке́ли амари́ ладж патякирэла амэн, со амэ свэнтымаса и Дэвлытконэ́ чачипна́са на пир манушы́тко годы́, а пир Дэвлэ́скиро бахталыпэ́н дживдям пэ дава́ свэ́то, и буты́р сарэ́стыр, сыр амэ отлыджиямпэ кэ тумэ́.

13. Палдава́ амэ чхинаса екх дава́, со тумэ́ джинэ́на и ґалёна; и мэ ужакирава лачхипэ́н, со тумэ́ ґалёна хор;

14. и адя́кэ-паць, сыр тумэ́ сы́рбы ґалынэ́ паш, со тумэ́ могинэ́на тэ радынэ́нпэ пал амэ́ндэ, адя́кэ-паць, сыр и амэ радынасапэ пал тумэ́ндэ дро дывэ́с, ке́ли Рай Дэвэ́л Ису́со явэ́ла нэвэ́стыр.

15. Палдава́ ма́ндэ сыс дасаво зорало́ патяибэ́н тэ явав ґарэдыр кэ тумэ́, соб (кай) тумэ́ могиндлэ́ тэ прилэ́н бахталыпэ́н яви́р мо́ло;

16. соб (кай) мэ тэ джав кэ Македония пир тумарэ́ штэ́ты, и нэвэ́стыр Македониятыр тэ явав кэ тумэ́, и соб (кай) тумэ́ тэ лыджа́н ман дурэды́р кэ Юдэ́я.

17. Палдава́, ко́ли мэ адя́кэ камамас тэ кэра́в, ци мэ лыджиём пэс балвали́ткэс? Ци дова́, со мэ скэдавпэ тэ кэра́в, мэ кэра́ва кокоро́ пэ́стыр сы́рбы мэ ракира́ва усае́кх “нэ, нэ”, и “над, над”?

18. Нэ Дэвэ́л исын патяибны́тко, амаро́ лав “нэ”, исын на дова́-паць, со лав “над.”

19. Пал-дова́ со Дэвлэ́скиро Чхаво́, Ису́со Христо́со, пал Конэ́стэ амэ пхэнасас лав тумэ́нгэ – мэ, Силуано, Тимофеё (Хи́ма) – на сыс Одова́, Конэ́стэ лав “нэ” исын дова́-паць, со и лав “над”; а Лэ́стэ сыс лав “нэ”:

20. Ёв кэрэ́ла кэ ко́нцо/яго́ро (сполнинэлас) саро́, со Ёв ракирдя́. Пал-дова́ со Дэвлэ́скирэ дынэ́ лава́ сполнинэнапэ пир Лэ́скиро “нэ”, пир Лэ́стэ амэ ракираса “ами́нь” ваш Дэвлэ́скири сла́ва.

21. Дава́ исын Кокоро́ Дэвэ́л, Кон чхувэ́ла зоралыпэ́н машки́р амэ́ндэ дро екхипэ́н Христосо́са и Кон свэнцякирэла амэн,

22. дава́ исын Дэвэ́л, Кон сы́рбы чхудя́ чэргэнори́ (печать), со амэ сам Лэ́скирэ, и дыя́ Ду́хо (Фа́но) амэ́нгэ сы́рбы сымады́.

23. Нэ мэ ява́ва тэ кхарав Дэвлэ́с тэ допхэнэл, со исын пэ миро ило́, со мэ ваш тумаро́ миштыпэ́н на псирдём дро Коринфо.

24. Амэ на рикираса упралыпэ́н пэ тумаро́ патяибэ́н, нэ амэ кэра́са буты́ кхэтанэ́ ваш тумари́ ра́дыма, пал-дава́ со тумаро́ патяибэ́н исын зорало́.

Romani Bible Baltic 2019

United Bible Societies for the Baltic Romani Mission