1. Moya wa Morena Mong a bohle o mo go nna, gobane Morena o mpeetše go begela babotlana taba tše dibotse; o nthometše go alafa ba dipelo tše robegilego, gore ba ba thopilwego ke ba goelele khunologo, ke goelele ba ba tlemilwego go gololwa,
2. ke goelele ngwaga wa kgahlego wa Morena, le tšatši la tefetšo ya Modimo wa rena, gore go homotšwe bohle ba ba nyamilego,
3. gore ballela Tsione ke ba anegele gore, bakeng sa molora ba fiwe mphapahlogo, bakeng sa manyami ba fiwe makhura a lethabo, bakeng sa pelo ntsho ba fiwe diaparo tša botšhepi, gore ba tle ba thwe: Le mere ya toko mešengwa ke Morena, ya go mo retiša.
4. Ba tlo tsoša marope a kgale, marako a matala; ba tlo mpshafatša metse ye e phušotšwego, marope a bogologolo.
5. Ba mathoko ba tlo ema mme ba diša mehlape ya lena; ba go le lemela mašemo le dirapa tša merara e tlo ba ba mehuta e šele.
6. Ge e le lena ba tlo re le baperisita ba Morena, bahlanka ba Modimo wa rena. Le tlo ja menono ya bantle; le tlo itumiša ka bokwala bja bona.
7. Tše ba le lešitšego hlong ka tšona, ba tlo di lefa gabedi; mo ba bego ba le goboša, bjalo ba tlo goloka. Dinageng tša bona le tlo fiwa kabelo tše pedi; mme lethabo la lena e tlo ba la neng le neng.
8. Gobane nna Morena ke rata toko; ke gana ge dihlabelong go na le leruo lebe. Batho ke ba nea tše di ba swanetšego ruri; mme kgwerano ye ke e dirago le bona ke ya neng le neng.
9. Mme bana ba bona ba tlo tsebja ditšhabeng, le tlogolo tša bona di tlo tsebja merafong. Bohle ba ba ba bonago ba tlo dumela ba re ke mohuta wa go šegofatšwa ke Morena.
10. A nke ke thabele Morena; moya wa ka a o hlalele yena Modimo wa ka. O nkapešitše diaparo tša phološo, o nthweša kobo ya toko, bjalo ka motšei a itlhama boka mphamodimo, bjalo ka motšewa a apere dipheta tša gagwe.
11. Gobane Morena Mong a bohle o tlo mediša toko le go retwa pele ga ditšhaba tšohle, boka naga e tšweletša tše melago, boka tšhemo e mediša peu e bjetšwego mo go yona.
1. Ke ka baka la Tsione ge ke sa homole; ke ka baka la Jerusalema ge ke sa iketle, gore toko ya gona e be e tšwelele bjalo ka phadimo, phološo ya gona e be e gotetšege bjalo ka lebone.
2. Ditšhaba di tlo bona toko yago; magoši ohle a tlo bona bokwala bja gago; o tlo bitšwa ka leina le lefsa le le tlogo bolwa ke molomo wa Morena.
3. O tlo ba mphapahlogo wa bothakga atleng tša Morena, le seala sa bogoši sa go swarwa ke Modimo wa gago.
4. O ka se hlwe o bitšwa sešuana, mme naga ya gago ba ka se hlwe ba e re ke marope; ba tlo re o Monkgahli; naga ya gago ba tlo re ke Monyalwa; gobane Morena o tlo go thabela, mme naga ya gago e tlo ba le mong wa yona.
5. Yena e a go agilego o tlo go tšea boka lesogana le tšea kgarebe. Modimo wa gago o tlo go thabela bjalo ka monyadi ge a thabela monyalwa.
6. Hee Jerusalema, merakong ya gago ke beile bahlapetši ba ba ka se kego ba homola mosegare le bošego. Hee lena baeletši ba Morena, le se ke la homola.
7. A se ke a ba a kwa le homotše, a be a age Jerusalema, a be a go dire motse wa go retwa lefaseng.
8. Morena o enne ka tsogo lagwe le letona, ka tsogo la gagwe le maatla, a re: Nka se ke ka ba ka leša mabele a gago manaba; batho ba mathoko ba ka se buše ba nwa morara wa gago wo o itiretšego wona.
9. Mabele a tlo lewa ke ba ba a bunnego, ba reta Morena; bafudi ba morara ke bona ba tlogo o nwa malapeng makgethwa a ka.
10. Fetang! Fetang! Le yo bula kgoro. Bulelang setšhaba tsela! Lekelelanyang, lekelelanyang mmila! Kgolang maswika! Tsemelang ditšhaba sefoka!
11. Le tsebe ge Morena a kwaditše foko lagwe la yo fihla mo lefase le gomago; o re: Botšang morwedi wa Tsione le re: Mophološi wago šo o etla; šo o etla a na le tša go go šetša; o etwa pele ke moputso wagwe.
12. Bona ba tlo thwe ke setšhaba se sekgethwa, banamolelwa ba Morena; mme ba tlo re o Monyakiwa, motse o sa tlogelwego.
9. Baisiraele ba bota Morena; wa go ba thuša, wa go ba kotse ya bona ke yena.
10. Ba leloko la Arone ba bota Morena; wa go ba thuša, wa go ba kotse ya bona ke yena.
11. Ba ba boifago Morena ba mmote, yena Morena wa go ba thuša, wa go ba kotse ya bona.
12. Morena ga a re lebale, o a šegofatša; o šegofatša ba leloko la Isiraele; o šegofatša ba leloko la Arone.
13. O šegofatša ba ba mmoifago, ba banyenyane le ba bagolo.
24. Mohloi o ikgakanya ka molomo, mo pelong o loga maanomabe.
25. Se mo dumele ge a kwatša botho; pelong ya gagwe go ne tšhila tše šupago.
26. Le ge lehloyo le ka khuta ka kaketšo, bobe bya gagwe bo tlo utologa phuthegong.
1. Lena bana! Kwang batswadi ba lena Moreneng, gobane ke gona go loka.
2. Godiša tatago le mmago, ke wona molao wa pele o nago le kholofedišo ya go re:
3. O tle o be le mahlatse, o phele galelele lefaseng.
4. Le lena botatagobana! Le se ke la befediša bana ba lena; sa lena a e be go ba etetša ka go ba ruta le go ba eletša tša Morena.
5. Lena bahlanka! Ba e lego beng ba lena ka thoko ya mmele le ba kweng ka poifo le ka tšhogo le ka pelo-thereši bjalo ka ge le ekwa Kriste.
6. E se be go ba hlankela mahlong ka mokgwa wa bakgahlabatho; a e be ka mokgwa wa bahlanka ba Kriste ba ba dirago thato ya Modimo ka pelo e ratago.
7. Le ba hlankele ka go ithapa, eke le direla Morena, e sego batho.
8. Le tsebe gore se botse se motho a kago se dira, se tlo mmoela se etšwa go Modimo, le ge e le mohlanka, le ge e le mohunologi.
9. Le lena beng ba bona, le ba dire ka mokgwa woo: Le lese go kgalema; le fele le tseba gore mong wa lena le wa bona o kua legodimong; gomme Yena ga a bebe motho.
10. Bjale bana bešo! Nke ke fetše ka go re: Tiang Moreneng le thateng ya maatla a gagwe.
11. Aparang ditlhamo tšohle tša Modimo, gore le kgone go fenya dipogo tša Diabolo.
12. Gobane tlhabano ya rena ga se ya go lwa le madi le nama; re lwa le mebušo le ba maatla le balaolamafase ba leswiswi; re lwa le meoya ya bobe e lego sebakeng sa godimo.
13. Ke gona itlhameng ka marumo ohle a Modimo, gore ka mohlamobe le kgone go phema, le šale le eme le fentše tšohle.
14. Emang ge le itlemile matheka ka therešo, le apere sephemasefega sa toko,
15. dinaong le dule le itlemeletše go phafogela Ebangedi ya khutšo.
16. Gagologolo le sware kotse ya tumelo, ye le kgonago go tima mesebe e tšhumago ya yena e mobe ka yona.
17. Le rwale kefa ya phologo, le sware tšhoša ya Moya e lego lentšu la Modimo.
18. Le be barapedi ba go tliša dithapelo tšohle le kgopelo tšohle ka mabaka ohle ka Moya; modiro woo le o phakgamele ka go kgotlelela ruri, le ka go rapelela bakgethwa ka moka.
19. Le nna le nthapelele, gore ge ke ahlama molomo ke fiwe lentšu, gore phihlo ya Ebangedi ke e kwalakwatše ka mafolofolo,
20. ke le motseta wa yona ke tlemilwe, gore ke e hlatsele ka mafolofolo, ka mo go ntshwanetšego ge ke bolela.
21. Tša bophelo bja ka, le tše ke di dirago, go rata gore le di tsebe. Le tlo di tsebišwa ke Tigiko ngwana borena morategi, modiredi e a botegago Moreneng.
22. Ke mo rometše go lena ka baka lona leo gore le tsebe tša bophelo bja rena, a homotše dipelo tša lena.
23. Khutšo a e be le lena bana bešo, le lerato le nago le tumelo, le le tšwago go Modimo Tata wešo le go Morena Jesu Kriste.
24. Kgaugelo a e tlele bohle ba ba ratago Mong wa rena Jesu Kriste ba sa thiše. Amene.