2. Ngwana motho! Go be go na le basadi ba babedi, bana ba mosadi o tee.
3. Ba sa le kua Egipita ba be ba dira bootswa e sa le ba bafsa; gona kua ba swarakwa matswele, ba phopholwa matswele e sa le dikgarebe.
4. Maina a bona, e mogolo e be e le Ohola; monyanana e be e le Oholiba. Ya ba baka; ba ba ba belega barwa le barwedi. Maina a bona, Ohola e be e le Samaria, Oholiba e be e le Jerusalema.
5. Ohola, mola e le wa ka, a otswa, a kganyoga baratwa ba gagwe ba Baasuri, ge ba tla go yena,
6. Ba apere tša mebala e mebotse, e le matona le babuši, e le masogana a ditsoro ka moka ga bona, e le banamedi ba dipitši.
7. A ba seotswa le bona bao bohle ba dilete tša Baasuri; mme go bohle ba a bego a ba kganyoga a itšhilafatša ka medimo ya bona,
8. A se lese maotswa ala a a bego a a dira Egipita, gobane ba mo sentše e sa le o mofsa, ba mo swaraka matswele e sa le kgarebe, ba feletša dikganyogo mo go yena.
9. Ke ka baka leo ke mo gafetšego matsogong a bona baratwa ba gagwe, e lego Baasuri, ba a bego a ba kganyoga kudukudu.
10. Bona ba mo apola bofela, ba mo amoga barwa le barwedi; yena ba mmolaya ka lerumo. A šala a bolelwa ke basadi ba mo lahla.
11. Oholiba monyanana wa gagwe, le ge a di bone, kganyogo ya gagwe ya tukela pele go fetiša Ohola; le maotswa a gagwe a fetiša maotswa a mogol -- wagwe.
12. A kganyoga Baasuri ba bakgoma le babuši ba go mmatamela ba apere tša botšhepi, ba nametše dipitsi, e le masogana a ditsoro.
13. Ka mmona a tšhilafetše, ba ile ka tsela e tee bobedi bja bona.
14. Fela, yena Oholiba a phala yola ka bootswa, gobane e be e re ge a bona lebotong go na le diswantšho tša banna ba Kaladea, di ngwadilwe ka letsoku,
15. Ba itlemile matheka ka mehlantšho, ba rwele dikefa tše di širago, ka moka ba etša matona, e le ba Babelekaladea, ba tswaletšwe gona kua;
16. Ya re ge a bona diswantšho tšeo, a ba kganyoga, a ba a roma batseta ba ya Kaladea.
17. Ke ge ba Babele ba etla, ba tsena go yena malaong a go ratana, ba mo tšhilafatša ka bootswa bja bona. Yena, a itšhilafaditše ka bona, a kwa ba mo tenne.
18. Bootswa bja gagwe ge bo bonala, a apotše bofela bja gagwe, pelo ya ka ya kgaogana le yena, bjalo ka ge e kgaogane le mogolwagwe.
19. Yena, a ile le maotswa a gagwe, a gopola tša mehla yela a sa le kgarebe, a sa dira bootswa a le nageng ya Egipita.
20. A kganyoga baratwa ba gagwe bala ba ditšhika tša pokolo, le mekgwa ya pitsi.
21. A boela bononyaneng bja gagwe bja mola e sa le e mofsa, bja mola ba mo swaraka matswele kua Egipita, e sa le matswele a kgarebe.
22. Hee Oholiba! Bjale Morena Mong wa bohle o re: Tseba gore ke tlo hlohleletša bona bao baratwa ba gago ba ba go tennego, ka ba tliša ba go dika,
23. Ba Babele le bohle ba Kaladea, ba Pekota le ba Soa le ba Koa, le bohle ba Asuri ba na nabo, masogana a ditsoro, le matona, le babuši, balaodi le balaki, ba nametše dipitsi ka moka ga bona.
24. Ba a go tlela; mešito ya dipitsi le ya makoloi; ba bantle ba a go bokanela, dikotse le diphemo le dikuane; ba go tiela gare. Ke tlo ba lesa ba go sekiša, ba go ahlolela ka moahlolelo wa bona.
25. Ke tlo go rolela lehufa la ka, ge bona ba go dira ka sehlogo, ba go kgaola dinko le ditsebe; se se go šaletšego se tlo fišwa ka mollo.
26. Ba tlo go apola diaparo, ba go amoga dilwana tša gago tša botšhepi.
27. E tlo ba gona go kgaotša bononyana bja gago, le bootswa bja gago bjo o bo thomilego le Baegipita, wa se sa tlo ba lebelela, wa se sa tlo gopola tša Egipita.
28. Gobane Morena Mong wa bohle o re: O tsebe gore ke tlo go gafela matsogong a bao ba go hloilego, matsogong a bao o tenegilego ka bona.
29. Ba tlo go dira ka lehloyo, ba tlo go amoga tšohle tše o di ruilego; ba tlo go tlogela o le fela, gore dihlong tša bootswa bja gago, le ditšhila tša gago, le bononyana bja gago, di šale, di le pepeneneng.
30. Ba tlo go dira ka mokgwa woo, gobane bantle bao o ba šetšego nthago ka go otswa, wa itšhilafatša ka medimo ya bona.
31. O swere ka tsela ya mogolwago; ke ka baka leo ke go nošago senwelo sa gagwe.
32. Morena Mong wa bohle o re: O tlo nwa senwelo sa mogolwago se segolo se se tlaraletšego, wa tlo ba wa go segwa le go kwerwa; se tlo ba se tletše tše ntši.
33. O tlo buiwa ka sona wa hora bohloko; e tlo ba sa kgakanego le sa tšhogo, sona senwelo seo sa Samaria mogolwago.
34. O tlo se nwa, wa se minola, wa se latswa le ditshetla; o tlo ingwara matswele; ka gobane ke boletše. O realo Morena Mong wa bohle.
35. Ke tšona tše Morena Mong wa bohle a di bolelago ge a re: Ke lefetša ka gobane o ntebetše, mme wa mphularela. Bjale rwala bononyana bja gago le maotswa a gago.
36. Morena Mong wa bohle o mpoditše a re: Ngwana motho, a ga o sekiše Ohola le Oholiba? Bola makgapha a bona ba a tsebe.
37. Gobane ba hladile; diatla tša bona di na le madi. Ba hladile ka medimo ya bona, ba ba ba lahla bana ba bona ba ba ba tswaletšego nna, ba ba fiša ka mollo, ya ba dijo tša medimo.
38. Se sengwe se ba ntirilego sona sese: Ba tšhilafaditše Ntlokgethwa ya ka mohla woo; ba gobošitše disabatha tša ka.
39. Ba itše go hlaba bana ba bona ba ipega go medimo, ba nape ba tla Ntlongkgethwa ya ka, ba e goboša mohla woo. Ke tšona tše ba di dirilego Ngwakong wa ka.
40. Le banna ba kgole o romile wa ba bitša; bona bao ba biditšwe ke batseta, ba tla. Mme wena wa hlapa, wa tlola mahlo, wa apara tša botšhepi,
41. Wa ala magogwa wa dula; gwa tlišwa megopo ya dijo, wa bea dinoko tša ka le ditlolo tša ka;
42. Gwa napa gwa kwala mašata a mabotho a a thabilego; gwa laletšwa le banna ba matagwa ba lešoka e le ba bantši; ba rwešwa maseka matsogong, le diala tša matsaka dihlogong.
43. Nna ka re: Yena e wa go onala ka maotswa, a ba sa tlo dira bootswa nae, le yena yo?
44. Gomme ba tsena go yena, bjalo ka mola go tsenwa go mosadi wa seotswa; ba tsena go Ohola le go Oholiba, go basadi bao ba dihlola.
45. Fela, ba tlo sekišwa ke banna ba ba yago ka molao; ba tlo ba ahlolela ka mo go loketšego basadi ba diotswa, ka mo go loketšego dinokwane; gobane ke diotswa, mme diatla tša bona di na le madi.
46. Gobane Morena Mong wa bohle o re: Rapang batho, ba ba bokanele, ba otlwe ba hlakolwe.
47. Lešaba le ba thume ka maswika, le ba kgabutle ka marumo; barwa ba bona le barwedi ba bona ba bolawe; nywako ya bona e tšhungwe ka mollo.
48. Gore ke kgaotše bohlola mo nageng; basadi ka moka ba eletšege, ba se ke ba dira ka bohlola bjalo ka bona.
49. E tlo ba go le rolela mabohlola a lena, le lefetšwa dibe tša medimo ya lena; la tlo kgona go lemoga ge Morena Mong wa bohle e le nna.
1. Ka letšatši la lesome la kgwedi ya lesome ya ngwaga wa senyane, lentšu la Morena le ntletše la re:
2. Ngwana motho! Ngwala ina la letšatši la lehono, ka gobane la lehono le ke lona letšatši le kgoši ya Babele a fihlago motseng wa Jerusalema ka lona.
3. Mme moloko woo wa dinganga o o kaele sefela, o re: Morena Mong a bohle o re: Hlahlega pitša! E hlahlege o e hladie.
4. O e kgabele digoba; e be digoba tše dibotse tšohle tša dirope le matsogo; o e tlatše ka marapo a a hlaotšwego.
5. O tšee yona namanama ya diruoruo, o tsebo bešeletša ka dikgong, e bele. -- E a bela; e tla butšwa e na le marapo a yona.
6. Ke tšona tše Morena a di boletšego; o re: Joo, motse wa madi! Joo, pitša ya kgwara! Ye kgwara ya yona e sa tlogego! Ntšha digoba mo go yona ka setee; o se di hlaole.
7. Gobane madi a motse wo a sa le mo go wona; o a tšholletše lwaleng; ga wa ka wa a tšhollela mmung, wa a tšheletša ka mmu.
8. Ge ke lesa madi a wona a tšhollwa lwaleng, a se ke a tšheletšwa, ke dira gore mo go nna go tsoge kgalefo ya go tlo lefetša.
9. Bjale Morena Mong wa bohle o re: Joo, motse wa madi! Le nna ke kgobela dikgong tša go goteletša.
10. Rwalela dikgong tše ntši, o bešetše, mollo, o buduše dinama, moro o felele, di swe le marapo a tšona.
11. O buše o hlahlege pitša magaleng e le fela, tshipi ya yona e hubale, go swe ditšhila tše di lego mo go yona; le kgwara e tšwe.
12. Nna e mpaletše, e bile e ntenne; kgwara ya yona e sa le e ntši, ga e tšwe, e dula e le kgwara le mollong.
13. Ditšhila tša gago di befile; ke go hlatswitše, wa se hlatswege. Bjale ditšhila tša gago di ka se tšwe go wene.
14. Nna Morena ke boletše. Di tlo tla di phethwa ke nna; nka se lese, nka se setše, nka se thiše. O tlo otlwa ka mo go loketšego ditsela tša gago le tiro tša gago. O realo Morena.
15. Lentšu la Morena le ntletše la re:
16. Ngwana motho! Tseba gore o tlo tšhoga ke go amogile thabo ya mahlo a gago ka lehu. Mme wena o se ke wa lla, o se ke wa ntšha megokgo.
17. O fegelelwe teng; o se hlatloše sello; o rwale kefa le dieta; o se ipipe maledu; o se je bogobe bja mahlobogo.
18. Ya re ke sa tšo botša batho taba tše ka moswana, ka mantšiboa mosadi wa ka a hwa. Ka la ka moswana ka dira ka mo ke laetšwego ka gona.
19. Batho ba mpotšiša ba re: A o ka se re botše se o re rutago sona ka tše o di dirago?
20. Nna ka fetola ka re: Lentšu la Morena le ntletše la re:
21. Botša ba moloko wa Isiraele, o re: Morena Mong wa bohle o re: Tsebang gore Ntlokgethwa ya ka ke tlo e senya, yona le kgantšhago maatla ka yona, lona thabo la mahlo a lena, sellelwa sa dipelo tša lena. Gomme barwa ba lena le barwedi ba lena, bao le ba šiilego, ba tlo fela ka lerumo.
22. Se nna ke se dirilego, se tlo dirwa ke bolena; le ka se ke la ipipa maledu, le ka se ke la ja magobe a mahlobogo.
23. Le ka se role dikefa dihlogong, le ge e le dieta dinaong. Le ka se ke la hlatloša sello la golola; le tla fo fegelwa seng, le felela le dibeng tša lena.
24. Ke mo Hesekiele yo, a tlogo ba seka sa lena ka tšohle tše a di dirilwego, la tlo dira bjalo mohla di tšwelela, la tlo lemoga ge Morena Mong wa bohle e le nna.
25. Gomme wene ngwana motho, o tsebe gore mohla woo ge ke ba amoga sebo se ba se kgantšhago, le botšhepi bjo ba bo thabelago, le thabo la mahlo a bona, le sellelwa sa dipelo tša bona, le barwa ba bona le barwedi ba bona.
26. Mohla woo o tlo tlelwa le mophonyokgi, a go sebela ditsebeng.
27. Ka lona leo molomo wa gago o tlo hunologa, ge go tsena mophonyokgi eo, wa bolela o se hlwe o homola. Ke mo o tlogo ba seka mo go bona, ba kgona go tseba ge Morena e le nna.
1. Ngwako wa se agwe ke Morena, baagi ba wona ba itapiša ka lefela. Motse wa sa dišwa ke Morena, mohlapetši o phakgama ka lefela.
2. Ke ka lefela ge le tsoga e sa le bošego, le diega go yo dula, le eja bogobe bja majapelo; gobane Morena baratwa ba gagwe o ba nea ba robetše.
3. Ka kgonthe, bana ba motho ke neo ya Morena; kenyo ya mmele ke mpho.
4. Ba etša mesebe diatleng tša mogale; ba bjalo bana ba ba tswaletšwego motho a sa le e mofsa.
5. Wa lehlogonolo ke monna wa kgotlopo e tletšego bona bao; a ka se dumale ge a sekišana le manaba mo kgorong.
24. Mohlakolatatagwelemmagwe, a re: Ga se sebe, ke wa gabosehlola.
1. Ge e le tumelo ke kholofelo ye e tiilego ya go holofela tše di letetšwego; ke go bota tše di sa bonwego ka mahlo.
2. Ba bogologolo ba ithuetše bohlatse bja yona tumelo.
3. Tumelo re tseba ka yona ge legohle le hlodilwe ke lentšu la Modimo; tše di bonwago tša tšwelela di etšwa go tše di sa bonwego.
4. Tumelo ke ka yona Abele a ipegilego go Modimo ka sedimo se se phadilego sa Kaine; ke ka yona ge a hlatselwa dibego tša gagwe gwa thwe: o lokile. Modimo a hlatsela dibego tša gagwe; ke ka tšona ge a bolela le ge a hwile.
5. Tumelo ke ka yona ge Henoge a tlošwa a se bone lehu; gobane mola a sešo a tlošwa o hlatsetšwe gore o be a kgahla Modimo.
6. Gomme go kgahla Modimo ga go kgonege ge go se tumelo. E a batamelago Modimo o swanetše go dumela gore Modimo o gona, le gore ba ba mo nyakago o a ba putsa.
7. Ke ka tumelo ge Noa a dirile polokelo a laetšwe ke Modimo, a botšwa tše di bego di sešo tša bonwa, a phološa ba lapa la gagwe. Ke ka yona ge a sola lefase; gomme ya ba yena mojabohwa ka toko ye e tšwelego tumelong.
8. Ke ka tumelo ge Aborahama a ekwa go bitšwa, a khuduga a ya felo fao a tlogo go fiwa gore e be legae la gagwe; a tsoga a sepela a sa tsebe mo a yago.
9. Ke ka tumelo ge a diilela nageng yeo a e holofedišitšwego, gwa ba bjalo ka eke ga se naga ya gagwe, a dula merakeng; le Isaka, le Jakobo ba dira ka mokgwa woo, e le bona ba go tlo ja bohwa bjoo ba holofedišitšwego bjona.
10. Gobane o be a letetše motse wo o tlogo thewa wa tia, woo mothei le moagi wa wona e lego Modimo.
11. Ke ka tumelo ge Sara a fiwa maatla a ba mmago setšhaba, le ge a šetše a fetilwe ke lebaka; gobane o be a re: E a nkholofedišitšego o a botega.
12. Ke ka baka leo mothong o tee yo, e bego e le wa mmele wo o hwilego, go tšwelego bontši bjo bo kakago bja dinaledi tša legodimo le lešabašaba le le sa balwego la lešing la lewatle.
13. Bona bao ka moka ba hwile ba dumetše, ba sešo ba amogela tše ba di holofedišitšwego. Ba di bone di le kgole ba di thabela, ba ipolela ba re: Re baeng le ba ba diiletšego lefaseng.
14. Gobane ba realo go ba šupetša gore naga ya gabobona ba sa e nyaka.
15. Ba be ba sa bolele naga yela ba tšwelego go yona; gobane sebaka sa go boela go yona, ba be ba na naso.
16. Se ba bego ba se holofetše ke legae le le botse; gomme lona le kua legodimong. Ke gona Modimo a sa itšimeletšego go bitšwa Modimo wa bona; gobane o ba agetše motse.