1. Isiraele ke mo ratile mola a sa le sogana; morwa wa ka ke mmiditše kua Egipita.
2. E sa le mola ba bitšwa, ba fela ba fulara, ba ya ba ipega go boBaali le medimo ya diswantšho, ba iša diorelo,
3. Mola e le nna ke bego ke tataidiša Efuraimi, ke mo swere ka diatla, mme bona ba se tsebe ge ke le Moreku wa bona.
4. Ka mo goga ka manti a setho, ka lerala la lerato. Se ke ba dirilego sona e be e le go ba rola joko molaleng, ka inama ka ba nea dijo.
5. Nageng ya Egipita a ka se ke a boela. Kgoši ya bona ke Asuri, ka gobane ba ganne go boa.
6. Metse ya bona e tlo dikologwa ke lerumo; le tlo thokga mapheko la a metša, gwa pala maano a bona.
7. Tšhaba sa ka se lemetše go ntlhanogela; ge o ba bitša wa re ba tsoge, ga go tsoge motho.
8. Efuraimi, a nka go lahla? Isiraele, a nka go hlala? A nka go dira tša Adema? A nka go bapetša le Tseboima? (Gen. 14:2). Pelo ya ka e a gaoga; e bela ka go ba kwela bohloko.
9. Ga ke dire ka bogale bja sehlogo; nka se ke ka buša ke thosanya Efuraimi; gobane ke Modimo, ga ke motho; ke na le wene ke le Mokgethwa; ga ke tle ke galefile.
10. Ba tlo ba ba latela Morena; o tlo bopa boka tau. Ge a bopa, bana ba kua lewatleng, ba tlo tla ba tšhogile.
11. Ba tlo tšwa Egipita, ba tlo tla ba tšhogile wa nonyana; ba tlo tšwa Asuri ba tšhogile wa leeba: gomme ke tlo ba dudiša mo nywakong ya bona. O realo Morena.
1. Ba Efuraimi ba ntika ka maaka; ba moloko wa Isiraele ba ntika ka bofora; Juda yena o sa hlahlatha, a na le Modimo Mokgethwa Mmotegi.
2. Efuraimi o ja phefo, o latela phefo ya bohlabela, o hlwa a hlatlaganya maaka le go senya; ba gwerana le Asuri, makhura a išwa Egipita.
3. Le Juda Morena o na le taba le yena; o tlo otla Jakobo a eya ka tsela tša gagwe; o tlo mo lefetša a eya ka tiro tša gagwe.
4. Yena eo wa go swara mogolwagwe ka serethe ba sa belegwa, a ema senna a katana le Modimo,
5. A katana le Morongwa a fenya a lla a mo rapela. A mo hwetša kua Bethele; a le moo a bolela le rena,
6. Yena Morena Modimo wa mašaba, yo leina la gagwe e lego Jehofa.
7. Bjale wena, boela go Modimo wa gago, o tiiše lerato le molao, o dule o botile Modimo wa gago.
8. Morekiši o swere seelo sa go fora; o rata go fora.
9. Bjale Efuraimi o re: Nna ke humile, ke ruile leruo le legolo. Mo go tšohle tše e lego tša ka go ka se hwetšwe molato wo e lego sebe.
10. Ge e le nna Morena Modimo wa gago go tloga nageng ya Egipita, ke tlo buša ke go dudiša mešašeng boka mehleng ya menyanya.
11. Ke nna ke boletšego le baporofeta; ke nna ke atišitšego dipono, ka bua ka diswantšho ka baporofeta.
12. Bjale Gileada e le ga dibe, gona ba tlo ba lefela. Ge kwa Giligala ba ipega ka dipholo, gona dialetare tša bona di tlo šala e le mekgobo ya maswika mašemong.
13. Jakobo mola a tšhabetše nageng ya Arama, yena Isiraele o bile molata a nyaka mosadi, a diša e le go nyaka mosadi.
14. Morena a ntšha Isiraele kua Egipita ka moporofeta, mme ba dišwa ke baporofeta.
17. Gomme nna, tše di lego mo pelong ya gago, wena Modimo, di mpaletše ruri; ke tše ntšintši di sa balwego.
18. Ge nka re ke a di bala, di feta mohlaba go ata. Ge ke re ke feditše, ke hwetša ke sa na le wena.
19. Modimo, o kabe o bolaya bakgopo! Lena batho ba madi, ntlogeleng!
20. Ke bona bao ba go bolelago ka tše mpe; ba ikgodiša ka tša lefela, e le manaba a gago.
21. Morena, a nka se hloye ba ba go hloyago? A nka se hlaswe ba go tsogelago?
22. Ke ba hloile ke gaketše, ke manaba a ka.
23. Modimo, mphetleke, o tsebe pelo ya ka; o nteke o tsebe dikgopolo tša ka.
24. O mpone ge nka ba wa tsela e mpe, o nkiše tseleng e sa felego.
22. Motho wa sebefedi o tsoša diphapang; setlalwakepelo se senya gantši.
1. Juda Mohlanka wa Jesu Kriste ngwanabo Jakobo, o ngwalela babidiwa ba ba kgethilwego ke Modimo Tatawešo, ba ba boloketšwego Jesu Kriste.
2. Kgaugelo le khutšo le lerato a di ate mo go lena.
3. Ke be ke re ke tla rapa maatla, gore ke le ngwalele tša phološo ye re lego batee ka yona, ka hwetša go swanetše ge ke le ngwalela ka le kgothatša go hlabanela tumelo ye bakgethwa ba e filwego gatee ya ba moka.
4. Gobane go na le batho ba ba le khukhunetšego, bao ditaba tša bona di ngwadilwego kgale tša re ba tlo wela molatong woo, e le ba ba sa boifego Modimo, ba ba retollago tše Modimo wa rena a re gaugetšego ka tšona ba di dira tša maipshino, mme ba se dumele Modimo le Jesu Kriste Mmuši a nnoši Mong wa rena.
5. A nke ke le eletše ka tše le di tsebago tšohle, tša ge Modimo a thomile go phološa setšhaba nageng ya Egipita, mme a buša a fediša bao ba sa kago ba dumela.
6. Le Barongwa bala ba sa kago ba lotola bogoši bja bona mme ba tloga madulong a bona, o ba tlemile ka ditlemo tša neng le neng tša leswiswing, a ba bolokela kahlolo ya mohlamogolo.
7. Le Sodoma le Gomora le metse ya mathoko ao, ye e dirilego ka mokgwa wa batho bao ya otswa ya ba ya latela nama e šele, e dula e beetšwe go swantšhetša batho kotlo ya mollo wo o sa timego.
8. Le bona balori ba ba tšhilafatša mmele ka mokgwa woo, ba nyatša magoši, ba goboša tše e lego tša letago.
9. Hleng le Mikaele Morongwa e mogolo, mola a elwa le diabolo mola ba bakišana setopo sa Moshe a šiile go mmea molato ka leroga, a fo re: Morena o tlo go kgalema!
10. Mme batho ba ba fo goboša tšohle tše ba sa di tsebego; gomme tše ba sa di tsebego sebopego, tše di etšago diphoofolo di se nago tlhaologanyo, ba itshenya ka tšona.
11. Kotlo e tlo ba wela, gobane ba ile ka tsela ya Kaine, ba itahletše go forwa ke moputso wa Bileama, ba loba ka bonganga bja Kora.
12. Ke bona ba tlišago tšhila menyanyeng ya lena ya lerato, ge ba ja le lena ba gara ba sa šie, ba re: Re a fula. Batho bao ke maru a se nago pula a fefolwago ke diphefo; ke dihlare tša marega tše di se nago dienywa, tše di hwilego gabedi, tša medu ye e omegilego.
13. Ke maphoto a lewatle a go gašana a seloga a ntšha ditšhila tša ona; ke dinaledi tša didumaedi tše si sobeletšego leswiswing la go ya go ile.
14. Ke bona ba ba boletšwego ke Henoge monna wa go šupa go tloga ka Adama, ge a porofeta a re: Tsebang, Morena o etla a na le bakgethwa ba gagwe ba diketekete;
15. O tla go sekiša bohle; ba ba ba sa dumelego o tlo ba lahla bohle ka baka la mediro ya bona ka moka ya go se dumele, ye ba sentšego ka yona, le ka baka la dipolelo tše thata ka moka tše badiradibe bao ba mmoletšego ka tšona.
16. Ke batho ba go hlwa ba tsota, ke bagaladi, ba ba yago ka dikganyogo tša bona, mme melomo ya bona e bolela ka go ikgogomoša; ba reta motho a le gona, gore ba hwetše tše di ba holago.
17. Ge e lena barategi, le se lebale ditaba tše di boletšwego kgale ke baapostola ba Mong wa rena Jesu Kriste.
18. Ba le boditše ba re: Mabakeng a bofelo go tlo ba le bakweri, bao tsela ya bona e tlogo ya mo ba išwago ke dikganyogo tša bona tša go se dumele.
19. Ke bona ba go hlola diphapang, ba go ya ka maikutlo ba se na Moya.
20. Mme lena barategi le be ba ba ikagetšego godimo ga motheo wa tumelo ya lena e kgethwakgethwa, le rapele le le ba Moya o Mokgethwa.
21. Le dule le ipatile ka lerato la Modimo le letetše kgaugelo ya Mong wa rena Jesu Kriste ye e išago bophelong bjo bo sa felego.
22. Ge go na le ba ba dikadikago, le ba eletše,
23. le ba phološe bjalo ka ge le ubula motho mollong. Le ba gaugele le boifa. Le ila le seaparo se se tšhilafaditšwego ke tša mmele.
24. Gomme yena a nago le maatla a go le diša gore le se ušwe, e a kgonago go le emiša la lebana le letago la gagwe le se na bosodi le hlaletše,
25. Yena Modimo Rabohlale a nnoši Mophološi wa rena, letago ke la gagwe; le bogolo, le maatla, le pušo ke tša gagwe neng le neng, mehleng yeno le go iša mehleng yohle ya go ya go ile. Amene.