Bibele ka selemo se le seng Mots'eanong 121 Samuele 26:1-251. Go Saulo motseng wa Gibea gwa tla Basifi, ba re: O tsebe gore Dafida o iphihlile thabaneng ya Hakila, kua go bataganego le lehanata.2. Saulo a tsoga a fologela lešokeng la Sifi a na le banna ba masogana a Baisiraele ba dikete tše tharo, a yo tsoma Dafida lešokeng la Sifi.3. Mošaša wa Saulo wa hlongwa thabaneng ya Hakila, kua go bataganego le lehanata, hleng ga tsela. Dafida yena o be a dutše lešokeng; a bona gore Saulo o mo latetše a tla lešokeng;4. ka gobane Dafida o be a romile dihlodi, a tseba ge Saulo a tlile ruri.5. Dafida a tsoga a tla mo mošašeng wa Saulo, a bona felo mo Saulo a robetšego, le Abenere morwa wa Nere molaodi wa dira tša Saulo. Saulo o be a robetše mo gare ga mošaša; gomme batho ba be ba letše ba mo dikaneditše.6. Dafida a bolela le Ahimeleke Mohethe, le Abisai morwa wa Tseruya ngwanabo Joaba, a re: Ke mang e a fologago le nna, ra ya kua go Saulo mošašeng? Abisai a re: Nna ke tla ya le wena.7. Ke moka, Dafida le Abisai ba tla go setšhaba e le bošego; ba hwetša Saulo a robetše mošašeng, lerumo la gagwe le tsemilwe fase hlogong ya gagwe; gomme Abenere le batho ba be ba robetše ba mo dikaneditše.8. Abisai a bolela le Dafida a re: Lehono Modimo o gafetše lenaba la gago seatleng sa gago. Lesa ge ke mo hlabe ka lerumo le phololetše le tsene fase, gatee fela, ke se sa boeletša.9. Dafida a re: O se ke wa mmolaya. Ke motlotšwa wa Morenta; ke mang e a kago mo iša seatla, mme a se otlwe?10. A re: Morena o gona. Morena a ka se lese go mo otla ge letšatši la gagwe le tlile a hwa, goba a tšwela ntweng ya mo gogola.11. Nna Morena a a ntšhegele gore motlotšwa e wa Morena ke se mo iše seatla sa ka. Bjale tšea lerumo leo le tsemilwego fao hlogong ya gagwe, le kgapana ya meetse, re tsebo sepela.12. Gomme Dafida a tšea lerumo le kgapana hleng le hlogo ya Saulo, a tsebo ikela; gwa se be le e a ba bonego, le e a kwelego selo a phafoga; gobane ka moka ba be ba ile le boroko, e le boroko bjo bogolo bjo bo bego bo ba wetše bo etšwa go Morena.13. Gomme Dafida a selela mošola a sepela sebaka, a ema kgole ntlheng ya thaba,14. a goeletša setšhaba le Abenere morwa wa Nere, a re: Abenere! O reng o sa arabe! Abenere a fetola a re: Ke wena mang o hlodiago kgoši?15. Dafida a rera Abenere a re: A ga o monna? Mo go Isiraele moka wena ke mang? Bjale o reng o sa lete kgoši; ka gobane moo go be go tlile motho e mongwe gore a bolaye kgoši mong wa gago.16. Ga o a dira gabotse. Ka bophelo bja Morena, le be le swanetše go bolawa ka moka, ka gobane le sa ka la leta mong wa lena motlotšwa wa Morena. O ko lebelele, lerumo la kgoši le kgapana ya meetse, tše di bego di le ka hlogong ya kgoši, šedi.17. Ke mo Saulo a tsebilego lentšu la Dafida, a re: A ga se lentšu la gago, Dafida morwa wa ka? Dafida a re: Ke lentšu la ka, Kgoši, Mongaka!18. A iša pele a re: Mongaka! O reng o hlomara mohlanka wa gago? Ke sentšeng? Bokgopo seatleng sa ka ke bofe?19. Bjale Kgoši Mongaka! Theetša hle se nna mohlanka wa gago ke se bolelago. Ge e ka be le Morena e a go tutuetšago wa ntlhoya, gona a kwišwe bose bja sebego. Fela, ge e le bana ba batho, gona a ba tšwiwe pele ga Morena, ka gobane lehono ba nthaka ba ntlhokiša legae mo nageng ya Morena, ka gobane ba re: Tloga o yo direla medimo e šele!20. Fela, madi a ka a se ke a tšhollelwa fase ke le kgole le sefahlogo sa Morena; gobane kgoši ya Isiraele e tšwile go tsoma letsetse letee bjalo ka e ke go tsongwa kgwale dithabeng.21. Saulo a re: Ke sentše! Dafida morwa wa ka, boa! Nka se ke ka hlwa ke go beka, ka gobane bophelo bja ka o bo hlomphile lehono. Ge e le nna ke dirile tša bošilo; ke timetše gagologolo.22. Dafida a fetola a re: Šele lerumo la kgoši. A e mongwe wa masogana a tle a le tšee.23. Gomme Morena o tlo bušetša motho bothakga le go botega; gobane Morena lehono o be a go gafetše seatleng sa ka; mme nna ka gana go iša motlotšwa wa Morena seatla.24. Gomme bjalo ka ge nna lehono bophelo bja gago ke bo semile selo se segolo, le nna bophelo bja ka a Morena a bo seme selo se segolo, a mphološe mahlomoleng ka moka.25. Saulo a fetola a re: Dafida morwa wa ka! Anke o atlege! Ruri o tlo dira; o tlo kgona ruri. Gomme Dafida a tšea ka tsela ya gagwe; Saulo yena a boela gae.1 Samuele 27:1-121. Dafida ka mo pelong ya gagwe a re: Seatla sa Saulo se tlo ba sa nkiša lehung. Go kaone ge ke široga ka tšhabela nageng ya Bafilisita, gore Saulo a holofologe, a se hlwe a ntsoma mo dinageng tša Isiraele; e be gona go mo phonyokga.2. A tsoga a na le banna ba makgolo a selelago, a selela go Akise morwa wa Maoko kgoši ya Bathe.3. Gona moo go Akise motseng wa Gathe Dafida a dula a na le banna ba gagwe ka moka ka malapa a bona. Dafida o be a na le basadi ba gagwe ba babedi, Ahinoama wa Jeseriele, le Abigaile mosadi yola wa Nabala wa Karamele.4. Bjale Saulo ge a tsebišwa gore Dafida o tšhabetše Gathe, a se ke a hlwa a mo tsoma.5. Dafida a tla a bolela le Akise a re: Ge mahlo a gago a ntebeletše ka botho, gona mphe bodulo motseng o mongwe nageng ya gago, ke dule ntshe; ka gobane nna molata wa gago ke reng ke dula nago motseng wa mošate?6. Ke mo Akise a mo neilego motse wa Tsikilaga mohla woo. Ke ka baka leo motse woo wa Tsikilaga e lego wa magoši a Juda le nankhono.7. Lebaka le Dafida a le feditšego a dutše moo nageng ya Bafilisita ke ngwaga o tee le dikgwedi tše nne.8. Dafida le banna ba gagwe ba fela ba hlagela nageng ya Bagesuri, le ya Bagirisi, le ya Baamaleke; ka gobane e be e le bona beng ba naga yeo go tloga kgaleng, go fihla kua Suri le kua nageng ya Baegipita.9. Dafida ge a hula metse ya naga yeo, ga a ka a lesa monna goba mosadi a phela; o thopile dinku, le dikgomo, le dipokolo, le dikamela, le diaparo; a fela a boela go Akise.10. Gomme ge Akise a re: Le tšo hula kae lehono? Dafida a fetola a re: Re tšwa kua thoko ya borwa go la Juda, le thoko ya borwa go ba Jeramiele, le thoko ya borwa go Bakeni.11. Ge Dafida a sa ka a lesa monna goba mosadi a phela a tla Gathe, o dirile gore ba se tšame ba mo kwatša ba re: Dafida o dirile sekete le sekete. O dirile ka mokgwa woo ka mehla ge a sa dutše nageng ya Bafilisita.12. Akise a mo kgolwa a re o lwile le setšhaba sa gabo sa Isiraele, bjale o tlo dula e le mohlanka wa ka ka mehla.Lipesaleme 60:6-126. Nna ke hlalalela se Modimo a se boletšego Sekgethweng sa gagwe a re: Ke tlo aba la Sikeme; ke tlo ela la moedi wa Sukothe;7. La Gileada ke la ka; la Manase ke la ka; la Efuraimi ke kuane ya ka ya go phema hlogo; la Juda ke molamo wa ka wa bogoši;8. La Moaba ke sehlapelo sa ka; la Edomo ke la go lahlela seeta sa ka; la Bafilisita le tlo nkgobela mogobo.9. Ke mang a tlogo nkiša motseng o tiilego? Ke mang a tlogo ntlhahla ka ya Edomo?10. A ga se wena Modimo, o re hlahlilego? A ga se wena Modimo o sa kago wa tšwa dira le rena?11. Phalala o re hlabanele manabeng; gobane go lwelwa ke batho ke ga lefela.12. Ka Modimo re tlo kgona ntweng; ke yena a tlogo gatakela manaba a rena.Liproverbia 16:4-54. Dilo tšohle di ne se Morena a di bopetšego sona; le yo mobe o mmopetše tšatši la dikotsi.5. Morena o nyenya baipoti bohle. Kgang še: Nna ke re: Ba ka se hloke kotlo.John 2:1-251. Ka tšatši la boraro go be go na le monyanya wa lenyalo motsaneng wa Kana wa Galilea. Le mmago Jesu o be a le moo.2. Jesu le yena a biletšwa monyanyeng, le barutiwa ba gagwe.3. Gomme ge beine e hlaela, mmago Jesu a mmotša a re: Ga ba na beine.4. Jesu a fetola a re: A ke tša ka le tša gago, wena Mosadi? Nna nako ya ka ga e ešo ya tla.5. Mmagwe a botša bahlanka a re: Se a tlogo le botša le se dire.6. Mme lapeng leo go be go beilwe dinkgo tše seletšego tša mabje, e le go ya ka mokgwa wa Bajuda wa go hlapa; nkgo e bjalo e be e tlala ka meetse a meeta e mebedi le ge e le e meraro.7. Jesu a botša bahlanka a re: Tlatšang dinkgo tšeo meetse. Ba di tlatša ba gomiša ka melomo.8. A ba laela a re: Bjalo gang le iše go makgetla. Bona ba iša.9. Makgetla ge a lekile meetse ao a fetogilego beine, a sa tsebe mo e tšwago gona, go tseba bahlanka fela ba go ga meetse, a bitša monyadi.10. A bolela le yena a re: Batho ka moka ba thoma go tliša beine e botse, e botšwa ba e tliše ge batho ba kgotšwe. Ge e le wena, beine e botse o e boloketše bjalo.11. Mohlolo wo wa pele Jesu o o dirile motseng wa Kana wa Galilea, a bonagatša letago la gagwe; mme barutiwa ba gagwe ba mo dumela.12. Ka moso Jesu a fologela motseng wa Kaperenaume a na le mmagwe le bana babo le barutiwa ba gagwe; ba dula gona matšatši a sego makae.13. Paseka ya Bajuda e be e le kgauswi; mme Jesu a rotogela Jerusalema.14. A hwetša Ntlongkgethwa go dutše babapatši ba dikgomo le ba dinku le ba maeba, le ba ba rekanyago ditšhelete.15. Jesu a dira tshelane ka dithala, a ba raka Ntlongkgethwa ka moka ga bona, le dinku le dikgomo, a tšholla ditšhelete tša barekanyi ba tšona, a uša dithalana tša bona.16. Babapatši ba maeba a ba laela a re: Tlošang dilo tše. Ngwako wa Tate le se ke la o dira borekelo.17. Barutiwa ba gagwe ba elelwa ge go ngwadilwe gwa thwe: Ke llwe ke lehufa ka baka la Ngwako wa gago.18. Bajuda ba tla ba mmotšiša ba re: Bohlatse bja go re o ka dira tše bjalo o ka re bontšha ka mohlolo ofe?19. Jesu a fetola a re: Phušolang Ntlokgethwa ye, ke buše ke e tsoše ka matšatši a mararo.20. Ke mo Bajuda ba itšego: Ntlokgethwa ye, ba feditše nywaga e masome a mane e metšo e selelago ba e aga, mme wena o re o tlo e tsoša ka matšatši a mararo?21. Gomme Jesu o be a era Ntlokgethwa ya mmele wa gagwe.22. Mehleng ya ge a tsogile bahung, ke mo barutiwa ba gagwe ba eletšwego taba ye a e boletšego ye, ba dumela mangwalo le lentšu le Jesu a le boletšego.23. Mehleng yeo ya monyanya wa Paseka, a le motseng wa Jerusalema, ba bantši ba dumela leina la gagwe, ge ba bona mehlolo ye a bego a e dira.24. Ge e le Jesu ga a ka a ikholofetša ka bona, ka gore a tseba bohle.25. Gobane Jesu e be e se wa go lemoga motho ka go kwa bohlatse bja e mongwe, gobane a hlatha se se lego mothong. Sotho Bible 1951 © Bible Society of South Africa. All rights reserved