Alkitab dalam satu tahun - Alkitab Suci

Alkitab dalam satu tahun Agustus 10

1. ”Moal diwalonan eta obrolan Ayub teh? Seja dihaminan bae catur anu sakitu panjangna teh?

2. ***

3. Ayub, dikira eta kasauran teh mo aya nu bisa ngabantah? Dikira nu lian baris kapeupeuh mun anjeun baceo?

4. Anjeun ngarasa bener sorangan, ngarasa beresih di payuneun Allah.

5. Teuing ku hayang, Allah ku manten kersa ngawaler ka anjeun!

6. Muga-muga ka anjeun nerangkeun, yen kapinteran teh rupa-rupa, tur rea anu teu katepi ku uteuk manusa, ku jero-jerona. Mun dibanding jeung gedena dosa anjeun, eta hukuman ti Mantenna teh teu sabaraha.

7. Na sanggup anjeun neuleuman wawatesan kaagungan jeung kakawasaan Allah?

8. Dalah langit nu ku urang teu kahontal, ku Allah mah katepi kasungsi. Mantenna awas ka alam kubur, urang mah henteu.

9. Kaagunganana ngungkulan legana jagat, ngungkulan legana samudra.

10. Upama anjeun ku Mantenna didakwa sarta didoja, saha anu bisa ngahalang-halang?

11. Allah mah teges, mana jalma anu taya harga, awas kana sagala lampah jahatna.

12. Jalma bodo kakara bisa mimiti pinter, engke lamun kalde jarah geus lindeuk ti barang borojol.

13. Sing pasrah ka Allah, masing muntang ka Mantenna.

14. Kadorakaan, kaluluputan, jauhkeun ti rumah tangga,

15. sangkan teuneung sarta tanggah ngalawan paneka dunya.

16. Lamun kitu sagala kasusah baris ngiles tina ingetan. Mun caah mah geus eureun, mo kainget-inget deui.

17. Nya hirup kari mencrangna, leuwih ti batan srangenge wanci manceran, nu tadina poek mongkleng, baris ngagebray lir cahya pajar.

18. Moal teu ngarasa aman turta pinuh ku harepan, ku Allah baris diraksa, dipaparin katengtreman.

19. Teu kudu rempan sieun aya musuh, malah loba nu baris marenta tulung.

20. Sabalikna nu jarahat bati culang-cileung jeung tagiwur, teu maranggih panglumpatan, nasibna kari sarupa, nya tiwas jadina.”

Ayub 12:1-25

1. ”Atuh nu kitu mah geus lumrah. Nu kawas kitu mah mun jelemana paeh kanyahona oge paeh.

2. ***

3. Kuring ge kanyaho teh loba, teu beda ti anjeun, kalah ka kumaha ge moal eleh. Nu dicaturkeun bieu ku anjeun, sarerea ge geus nyaho.

4. Behna mah sobat-sobat ge bet nyeungseurikeun. Tur kuring teh sakitu benerna, teu boga salah. Tapi iraha-iraha ge panyambat kuring ku Allah tangtu didangu.

5. Kena-kena keur sarenang, wani ngulinkeun ka kuring, sasat ngalelepkeun nu titeuleum.

6. Tapi biasa, bangsat jeung jalma-jalma nu teu baroga Allah mah, najan miallahna teh ngan kana kakuatan sorangan, sok teu burung hirupna sarenang.

7. Aranjeun mah ka bangsa manuk jeung margasatwa ge, perlu keneh diajar.

8. Pek tatanya ka mahluk darat jeung laut tina hal pangartina.

9. Kabeh ge nyarahoeun, yen maranehna beunang ngadamel panangan Allah.

10. Memang Allah anu ngatur kahirupan mahluk-Na, hirupna tiap manusa aya dina kawasa Mantenna.

11. Ceuli teh gunana pikeun ngadengekeun omongan, cara letah pikeun ngarasakeun ngeunahna kadaharan.

12. Jalma nu geus karolot baroga hikmat, tapi Allah mah nya kagungan hikmat nya kagungan kakawasaan, jalma anu geus karolot baroga paham, ari Allah mah paham kagungan, wewenang kagungan.

13. ***

14. Nu diruag ku Allah taya nu bisa ngadegkeun deui. Anu dikurung ku Allah, taya anu bisa ngaleupaskeun.

15. Mun Mantenna nahan hujan, heug halodo. Mun cai ku Mantenna dibedahkeun, ger caah.

16. Mantenna digjaya, salalawasna unggul. Nu hianat, nu dihianat, duanana aya dina kakawasaana-Na.

17. Kapinteran pangagung dirampas, para pamingpin disina barodo.

18. Raja-raja dirorod didamel sakitan.

19. Imam-imam jeung nu ngasta kawasa direndahkeun.

20. Jalma-jalma nu dipake pananggeuhan dibungkem, pangarti jalma karolot dirorod.

21. Jalma nu ngasta kawasa dihina, para pangagung dieuweuhkeun kakuatanana.

22. Tempat anu poek mongkleng ku Mantenna sina caang.

23. Mantenna nu ngersakeun bangsa-bangsa jembar digjaya, Mantenna keneh anu ngapeskeunana.

24. Pamingpinna disina barodo. Sina kapaider sararasab.

25. Gupuy-gapay di nu poek, tingjarigjeug siga nu mabok.

Mazmur 94:1-11

1. Nun PANGERAN, Gusti teh Allah nu nyepeng wawales. Tembongkeun wawales ti Gusti!

2. Gusti teh hakim sakumna manusa, bales jalmi nu sarombong teh masing satimpal!

3. Sabaraha lamina deui nu daroraka senang-senang? Sabaraha lamina deui, nun PANGERAN?

4. Sabaraha lamina deui nu jarahat sarombong, aragul ku kajahatanana?

5. Maranehna ngekecek umat Gusti, nun PANGERAN, ngagencet umat kagungan Gusti.

6. Randa sareng barudak pahatu diparaehan, kitu deui anu ngalumbara di ieu tanah.

7. Carek maranehna, ”Moal kanyahoan ku PANGERAN, Allahna Israil teh moal malire.”

8. He rahayat, ku naon barodo-barodo teuing? Iraha rek daraek diajar?

9. Allah nu ngadamel ceuli urang, moal enya teu ngadangu? Mantenna nu ngadamel panon urang, moal enya teu ningali?

10. Allah anu nyeuseul bangsa-bangsa, moal enya moal ngahukum? Mantenna guru sakumna manusa, moal enya taya kauninga-Na?

11. PANGERAN uninga kana pikiran maranehna, kauninga yen kabeh ge mubadir.

Amsal 22:24-25

24. Ulah nyobat jeung jelema nu galede ambek, nu kalasar tabeatna,

25. bisi ari katepaan hese miceunna deui.

Roma 10:1-21

1. Dulur-dulur, pohara gedena kahayang sim kuring supaya bangsa sim kuring disalametkeun. Jeung sim kuring teh bener-bener neneda ka Allah, sangkan hal eta kajadian.

2. Sim kuring wani nyebutkeun, maranehna teh kacida garetolna ibadah ka Allah. Hanjakal ibadahna henteu nurutkeun pituduh anu bener.

3. Henteu nyarahoeun jalan anu ti Allah supaya manusa bisa diangken bener. Maranehanana marake jalan sorangan bae, henteu marake jalan anu ti Allah.

4. Hukum Agama teh kapan enggeus rengse ditedunan ku Kristus, jadi sing saha anu percaya ka Anjeunna tangtu ku Allah diangken deui.

5. Hal manusa bisa diangken bener ku Allah ku jalan nedunan Hukum Agama, kieu diseratkeunana ku Musa, ”Saha-saha anu nurut kana Hukum Agama, tangtu hirup.”

6. Hal manusa bisa diangken bener ku Allah ku jalan percaya, Kitab Suci nyebutkeun kieu, ”Teu perlu maraneh nanya di jero hate, ’Saha nu baris naek ka sawarga?’ (Maksudna pikeun ngalungsurkeun Kristus ka dunya.)

7. Atawa, ’Saha nu baris turun ka jero kubur?’ (Maksudna ngangkat Kristus tina maot.)”

8. Eta kieu maksudna, ”Warta ti Allah teh geus kacida santekna ka aranjeun, geus dina biwir, di jero hate aranjeun.” Eta warta teh nya eta warta anu ngeunaan hal percaya tea, anu keur diwawarkeun ku sim kuring sapara kanca.

9. Lamun aranjeun ngaku jeung percaya yen Yesus teh Gusti, anu ku Allah geus digugahkeun tina maot, tangtu aranjeun salamet.

10. Ku jalan percaya, urang bisa diangken bener ku Allah, sarta ku jalan ngaku ka Anjeunna urang tangtu salamet.

11. Ceuk ungel Kitab Suci, ”Sakur anu percaya ka Anjeunna moal kaduhung.”

12. Ieu teh pikeun sarerea, pikeun urang Yahudi jeung bangsa-bangsa sejen, taya nu dibeda-beda. Allah teh hiji, Pangeran sarerea, anu pitulung-Na tanpa wangenan pikeun sakur anu sasambat ka Mantenna.

13. Sakumaha ungel Kitab Suci, ”Saha-saha anu sasambat neda pitulung ka Mantenna tangtu disalametkeun.”

14. Tapi ari henteu percaya mah rek kumaha bisa sasambat menta tulung? Jeung kumaha rek bisa percaya lamun tacan ngadenge warta tina hal eta? Jeung kumaha eta warta bisa kadenge lamun henteu diwawarkeun?

15. Jeung kumaha rek diwawarkeunana lamun teu aya anu diutus? Dina Kitab Suci kaungel, ”Aya ku matak resep utusan daratang marawa warta anu pikabungaheun!”

16. Tapi anu daek narima eta Injil Kasalametan teh henteu kabeh. Saur Yesaya ge, ”Gusti, saha nu bade percaya kana warta anu diwawarkeun ku abdi-abdi?”

17. Jadi, percaya kana eta warta teh kudu ngadenge heula wartana, ari wartana katarimana ti jelema-jelema anu ngawawarkeun hal Kristus.

18. Tapi sim kuring rek nanya, ”Naha enya maranehanana tacan ngadarenge eta warta? Puguh enggeus, sakumaha ungel Kitab Suci, ’Soarana parat ka saampar jagat, ucapanana tepi ka tungtung-tungtung bumi.’ ”

19. Sakali deui sim kuring rek nanya: Naha teu ngalartieun kitu urang Israil teh? Musa ku anjeun anu bakal ngawaler pangheulana, ”Kieu timbalan Allah, ’Umat Kami sina sirik ka hiji bangsa anu teu kaasup umat, sina arambekeun ku hiji bangsa anu taya kanyahona.’ ”

20. Yesaya mah nyaurkeunana leuwih wani deui, ”Kami ngahaja sina kapanggih ku jelema-jelema anu henteu nareangan, nembongan ka jelema-jelema anu tara naranyakeun Kami.”

21. Ari ngeunaan Israil mah saurna teh, ”Sapoe jeput Kami nyodoran leungeun ngahiap-hiap hiji bangsa anu wangkelang jeung bantahan.”

Sundanese Bible 1991

Indonesian Bible Society