Bible Verses On A Topic: Bad Character: [Jealousy]

Topics

Bad Character: [Jealousy]

Jumanacajj janchin munañanacaparuquiw sarnakasipcta, ucatwa jumanac taypin envidiasiñanacasa, ch'ajjwañanacasa, jaljtañanacasa utjasqui. Ucanac lurasajj alek jakenacaquïsipctawa, mayninacar uñtataraquiw cunsa lurasipctajja.

1 Corintios 10:13

Take yant'anactï jumanacajj t'akhesipcta ucanacajja, cunjämtï mayninacajj t'akhesipqui uqhamaraquiquiwa. Jumanacajj Diosaruw catuyasipjjañamajja, jupasti janiw jumanacarojj jach'a jan atipcaya yant'anacjja churapcätamti. Cunapachatï yant'ajj jutcani ucqhajja, Diosajj cunjämatsa uca yant'ar atipjañjja yanapapjjaraquïtamwa, uqhamatwa atipjapjjäta.

1 Corintios 13:4

Qhitintejj munasiñajj utjqui ucajj llamp'u chuymaniwa, suma jakewa, janiw envidiasirïquiti, janiw jach'a jach'a tucurïquiti.

Eclesiastés 4:4

Uñjaractwa irnakañanacansa, uqhamarac suma lurañanacansa envidiasiñaquiw utji mayninac toke, ucasti inamayawa, thayarusa catthapï siscsna uqhama.

Santiago 4:11

Jilatanaca, jan jumanacjjatjja jan walinacjja parlaquipasipjjamti. Qhititejj mä jilatat jan wali parlqui ucajja, uqhamarac taripqui ucasa, jan walwa leyjjatjja parli uqhamarac uca leyirojj tariparaquiwa. Leyirutejj jumajj taripstajja, taripiriw tuctajja leyir ist'añat sipansa.

Proverbios 14:30

Samarañ chuymanïñajj cuerporojj jacañwa churi, ucampis envidiasiñajj ch'aqhatpachwa jakerojj tucji.

Proverbios 27:4

Colerasiñajj jan wali tucjiriwa, ucampis envidiasiñajja ucat sipansa juc'amp jan waliwa.

Salmos 143:8-9

[8] Willjtanacajj munasiñam ist'ayita, take chuymamp jumar iyawsatajj laycu. Sarañajjäqui uca thac uñachayita, jumar almajj catuyasitajj laycu. [9] Tatay, nayamp timasirejjat khespiyita, jumaruw imantasiñatac thaksma.

Romanos 12:21

Jan ñankhampejj atipjayasimti, ucatsipan ñankharojj asquimpi atipjam.

Santiago 4:2-3

[2] Jumanacajj cunsa jicjjatañpun munapjjtajja, jan jicjjatirjamäsinsti jiwayapjjtawa. Cunatsa envidiasipjjapuntawa, jan jicjjatirjamäsinsti ch'ajjwañanacaru, nuwasiñanacaruraquiw uscusipjjtajja. Janiw cuntejj munapcta ucjja jicjjatapctati Diosat jan mayipjjatam laycu. [3] Mayipcta ucas janiw catokapctati jan wali mayipjjatam laycu. Jumanacan munañanacaman tucjañataquiquiw mayipjjtajja.

Gálatas 5:22-23

[22] Ucampis Kollan Ajayun luräwipajja acanacawa: munasiña, cusisiña, samaraña, llamp'u chuymanïña, takempis sumancaña, qhuyapayasirïña, take cunansa phokherïña, [23] llamp'u chuymanïña, janchin munañapar atipjaña. Acanac contrasti janiw cuna leyis utjquiti.

1 Pedro 2:9

Ucampis jumanacajj ajllit jakenacäpjjtawa, reyir sirviri tucuyat sacerdotenacäpjjaractawa; mä k'oma marcäpjjtawa; Diosan ajllisit marcapäpjjaractawa. Acasti lurasiwa, jumanacajj Diosan muspharcañ luräwinacap yatiyapjjañamataqui. Uca Diosaraquiw jumanacarojj ch'amacat irpsusinjjapjjtam, suma muspharcañ khanapar mantjjapjjañamataqui.

1 Corintios 1:27-29

[27] Ucampis Diosajj jakenacan pisi amuyunit uñt'at jakenacaruw ajllisi jach'a amuyuninacar p'enkachañataqui. Uqhamaraquiw Diosajj ajllisi jakenacan pisi ch'amanit uñt'atanacaru, uqhamat jila ch'amaninacar p'enkachañataqui. [28] Diosajj ajllisiw jan yäkatäquis ucanacaru, uqhamarac jisc'achatäquis ucanaca, qhitinacatejj jach'achatäqui ucanacar p'enkachañataqui. [29] Uqhamata jan qhitis Diosan nayrakatapan jach'a jach'a tucuñapataqui.

Filipenses 2:3

Jan cunsa lurapjjamti purapat ch'ajjwasajja, ni jach'a jach'a tucuñ munasasa, jan ucasti alt'at chuymampi lurapjjam, maynit mayniru uñjasipjjam, maynejj jupat juc'amp sumäcaspas uqhama.

Salmos 37:1-3

[1] Ñankha lurir jakenacar uñjasajj jan k'apisimti, janirac ñankha luririnacarus yatjjäsimti, [2] janc'aquiw jupanacajj alinacjam pharsupjjani, ch'ojjña korjamaw wañsupjjaraquini. [3] Tatiturojj take chuymamp alcatam, asc luraraquim, oraken jacasim, chekaparac jacam;

Santiago 3:14-16

[14] Ucampis jumanacatejj chuymanacamjja envidiasiñanacampi c'allc'u tucuyapjjtajja, ucatsti mä cuna laycuqui cunsa lurasipctajja, uqhamajja janiw jach'a jach'a tucupjjañamäquiti uca yatiñanacamatjja, uc lurasinjja jumanacpachaw c'arintasisipcta, ucatsti cunatejj chekäqui uc apanucusipcaractajja. [15] Uca casta yatiñasti janiw Diosat jutquiti, jan ucasti acapach yatiñ cancañaquiwa, jaken amuyt'apaquiraquiwa, pachpa supayat jutaraqui. [16] Cawqhantejj envidiasiñas, jiwasataquic munañas utjqui ucqhanjja, pejjtusiñanacampi jan walt'añanacampiquiw utji.

Cantar de los Cantares 8:6-7

[6] ¡Nayarojj chuymamar kellkantasita, uqhamarac amparamar kellkantasita! Munasiñasti jiwañar uñtata jan p'acjcayawa; jumar munañasti jiwañar uñtata jan camachcayawa. ¡Munasiñasti ninar uñtatawa akaraqui, ucasti kollana ninawa! [7] Take kotanacan umapasa janiw uca munasiñjja jiwt'aycaspati; janiraquiw jawiranacas jiwaraycaspati. Qhititejj kamir cancañapa churañ munaspa aca munasiña laycojja, jupajj jisc'achataquiw uñjasjjaspa.

Santiago 4:7-8

[7] Diosaruy jaysapjjam, Supayataquisti sayt'asipjjaraquim, uca Supayasti jumanacatjja jaltawayjjaraquiniwa. [8] Diosar jac'achasipjjam, jupasti jumanacarojj jac'achasiraquiniwa. Juchararanaca, amparanacam k'omachasipjjam. Jumanaca qhitinacatï acapachampiru, Diosampiru munasipcta ucanacasti chuymanacam k'omachasipjjaraquim.

Gálatas 5:14-15

[14] Takpach leyejj aca mä sapa camachir tucutaquiwa: “Jake masimarojj juma quicparjam munasim” sasa. [15] Ucampis jumanacatejj achjasipjjäta mank'antasipjjaraquïta maynit maynicama ucajja, acatjja amuyasipjjam, jan jumanaccama tucjasipjjañamataqui.

Proverbios 6:34

Uca warmin chachapasti colerasisinjja mä ninjamaw naqhani, ucatsti uqhamat uqhama phoksusiñ horasansti janiw perdoncaniti;

Colosenses 1:11

Mayipjjaractwa jupa quipca jumanacarojj alajjpach ch'amapampi, ch'amani tucuyañapataqui, uqhamata take cunsa llamp'u chuymampi cusisiñampiraqui lurapjjañamataqui,

Ezequiel 16:42

Ucapachaw nayan colerasiñajjajj samarjjani, jumataqui colerasiñajjas tucusjjaraquini; llamp'u chuymanëjjaraquïwa, janiraquiw juc'ampi colerascjjäti.

1 Timoteo 3:10

Nayrakatajj yant'atäpjjañapawa, ucat jan cuna juchanïpcchi ucajja, diácono cancañjj luraspawa.

Hebreos 10:36

Jumanacajj llamp'u chuymanïñanacamawa, Diosan munañapa lurañataquejja, ucat cuntejj arsuwaycän uc catokañataqui.

Aymara Bible 1997