Bible Verses On A Topic: Good Character: [Kindness]

Topics

Good Character: [Kindness]

[4] Qhitintejj munasiñajj utjqui ucajj llamp'u chuymaniwa, suma jakewa, janiw envidiasirïquiti, janiw jach'a jach'a tucurïquiti. [5] Janiw cuna jan walsa lurquiti, janiraquiw cunsa jupataquiqui munirïquiti, janiw colerasquiti, janiraquiw colerasitapsa imjjäsisquiti. [6] Janiw cunatejj jan walïqui ucatjj cusisiñ yatquiti, jan ucasti cunatejj chekapäqui ucat cusisiñ yati. [7] Take cun t'akhesi, take cun iyawsi, take cun llamp'u chuymampi suyt'araqui.

Efesios 4:29

Jan wali arunacjj jan parlapjjamti, jan ucasti suma arunacamp parlapjjam, uqhamata ist'irinacamajj jiltañana yanapt'atäñapataqui, uqhamarac bendicitäñapataqui.

Miqueas 6:8

Jake, Tatitojj sistamwa, cunatejj asquïqui ucjja, uqhamarac cuntejj jupajj jumatjja suyqui ucsa; jumajj chekapäqui uc luram, qhuyapayasiriraquim, uqhamarac Tatit Diosamarus alt'at chuymamampirac jaysam.

Colosenses 3:12

Diosajj jumanacarojj munapjjtamwa, jupancapjjañamataquiw ajllisipjjtam. Uqhamajj qhuyapayasiñampi, suma jakëñampi, jisc'ar tucuñampi, llamp'u chuymanïñampi isthapitay sarnakapjjam.

Efesios 2:7

Acsti luriwa khepa pachanacan uñacht'ayañataqui, cunja jach'a munasiñapampis munistu ucata, uqhamarac qhuyapayasiñapas jiwasatac utjatapata Cristo Jesús laycu.

Mateo 5:24

jumajj uca ofrendama altar nayrakatar jaytawayasinjja, jilamampi sumancthapiri saram, ucatsti cuttanim uca ofrendam altaran churañataqui.

Romanos 2:4

¿Jan ucajj Diosan munasiñapjja, jan tucusquir llamp'usiñapsa janich yäkcta? Chekpachansa uca Diosan llamp'u tucutapajja juman take ucanac arrepientisisa apanucuñamataquiwa.

Gálatas 5:22

Ucampis Kollan Ajayun luräwipajja acanacawa: munasiña, cusisiña, samaraña, llamp'u chuymanïña, takempis sumancaña, qhuyapayasirïña, take cunansa phokherïña,

Salmos 141:5

Asqui jakejj mutuyitpan, suma jakejj tokenoketpan, ucanac catokañataquejj janiw jaltcäti; mutuycatpachas Tatitut mayisiscaquïwa.

Isaías 54:8

Colerasiñajjanjja mä juc'ataquiquiw jumatjja imantastjja, ucampisa wiñay munasiñampiw jumatjja qhuyapayasta.” Khespiyiri Tatitumajja uqham siwa.

Proverbios 19:22

Mä jakenjja suma chuymanïñapawa munasi; apjasiri jakëñata sipansa, juc'amp asquiwa pobre jakëscaña.

1 Pedro 4:8

Ucat sipansa jumanacanjja munasiñajj utjapunpan, munasiñasti walja juchanacwa perdonaraqui.

2 Pedro 1:5-7

[5] Ucatpï ch'amacht'asipjjañamajja iyawsatanacamarojja suma luräwinacampi yapjjatapjjañamataqui; suma luräwinacarusti amuyt'asiñampi; [6] amuyt'asiñarusti, jumanacpach suma sarnakañampi; jumanacpach suma sarnakañarusti, llamp'u chuymampi; llamp'u chuymanïñjjarusti, Diosar munañampi; [7] Diosar munañarusti, jilapurjam sarnakañampi; jilapurjam sarnakañarusti, munasiñampi.

Ester 2:9

Aca tawakosti walicjamaquïnwa Hegai sat chachataquejja, ucatsti munasiñapwa jicjjatäna. Ucampis Hegai chachajj churänwa k'apquir kollanaca jiwaquïñapataqui, uqhamaraquiwa suma mank'anaca churaraquïna, ucjjarusti real sat palacion uywata pakallko warminaca churaraquïna, jupanacampiraquiw irpayaraquïna warminacan palaciopancqui uca suma utanacaru.

Efesios 4:32

Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.

Gálatas 6:10

Ucatpï, sapa cuti asqui lurañajj utjchi ucqhajja, takeniruw asqui lurañäni, juc'ampis iglesianquir jilatanacasaru.

Lucas 6:35

Ucampis jumanacajj uñisirinacamarojj munapjjañanacamawa, asqui lurapjjañamaraquiwa, uqhamarac mayt'apjjañamaw jan cuns catokañampi. Uqhamatwa jumanacan catokañanacamajj jach'äni, jumanacasti Alajjpach Dios Awquin wawanacapäpjjätawa. Diosajj qhuyapayasiriraquiw, jupar jan yuspagaririnacatsa, juchararanacatsa.

Proverbios 31:26

Jupajj yatiñampiwa parli, ucatsti munasiñampiw yaticharaqui.

1 Pedro 3:9

Jan ñankhat ñankhjja cutt'ayapjjamti, ni jan wali arut jan wali arsa cutt'ayapjjaraquimti. Jan ucasti asqui arumpi cutt'ayapjjam, Diosasti bendición catokapjjañamataquiw jumanacarojj jawsapjjtam.

Rut 2:20-21

[20] Noemí warmisti juparojj saraquïnwa: —¡Diosasti juparojj bendizpan! Jupasti jichhajj jiwasarojj sum uñjistu, cunjämatï nayrajj jiwirinacampi lurcäna uqhama. Uca jakesti jiwasan familiasawa, ucatwa jiwasaru khespiyañapajj wact'i. [21] Rut warmejj ucjjarojj sänwa: —Jupasti nayarojj situwa: ‘Irnakascaquim uywatanacajjampi chica cosecha apthapiñcama’ —sasa.

Rut 3:10

Booz chachasti juparojj sänwa: —¡Diosasti jumarojj bendispan! Jichhasti nayarojj uñacht'ayistaw cunja munasiñamas utji jiwquis uca chachamataquejja. Jumasti chachasiñ munasajj nayat juc'amp wayna jake thakasisamänjja, jan cunanïpasa, kamirsa; ucampis janiw jumajj uqham lurctati.

Nehemías 9:17

Janiw jupanacajj ist'aña munapcänti, ni cuna jach'a luräwinactejj jupanac laycu lurcta ucsa amtañ munapcänti. Jupanacajj chuymanacapa kalarayasisajja mä jilïrwa ajllisipjjäna Egiptoru wastatampi esclavöñaru irpañapataqui. Ucampis jumajj juchanac pampachasiri Diosätawa, mä suma qhuyapayasiriraqui, c'achaquiraqui colerasiñataqui, uqhamarac wali munasiriraqui, ucatjja janiw jaytanucctati jupanacarojja.

Salmos 31:21

Tatitojj jach'añchatäpan, jupajj llaquisiñ urunacajjanjja, munasiñapampiw muspharcañanac lurarapitu.

Salmos 117:1-2

[1] Tatitur jach'añchapjjam, takpach jakenaca, jupar art'asipjjam, takpach marcanaca: [2] qhuyapayasiñapajj jiwasanacatac wali jach'awa, asqui cancañapajj wiñayawa. ¡Tatitojj jach'añchatäpan!

Salmos 119:76

Munasiñamajj chuymachitpan, nayatac arscäyätajj ucarjam phokhasiñapataqui.

Isaías 54:10

Jach'a kollunacajj yakha chekarusay sartasipcpan, kollunacas aynacharusay jutasipcpan, ucampis munasiñajjajj jumataquejj janipuniw tucuscaniti, uqhamaraqui sumar mantäwi arust'äwejjajj janiw t'unjatäcaniti.” Uqham siwa jumar qhuyapayiri Tatitojja.

Jeremías 2:2

“Saram, ucatsti Jerusalén marcaru parlanim; jach'at art'am sum ist'apjjañapataqui: ‘¡Aqham siw Tatitojja! Amtasisctwa, cunapachatejj tawaköcäyätajj ucapachajj take chuymaw nayataquïyätajja, cunapachatejj jumajj nayan warmejja tucjjäyätajja ucapachasti nayarojj wali munasiraquïyästajja, wasaranjamracwa nayarojj arcanïyästajja, cawqhantejj jan cunas achqui uca orakenjama.

Joel 2:13

¡Jumanacasti Tatitu Diosamar cuttjjapjjam, isinacama ch'iyanokcamayjja, chuymanacamaya ch'iyanokapjjamjja! Tatitojj munasiriwa, qhuyapayasiriraquiwa, paciencia chuymaniwa, munasiñapas jach'araquiwa; cuna mutuyäwetejj utjqui ucsa, jiwasatjja jayar apanucjjañataquisa.

Jonás 4:2-3

[2] Ucatsti, oracionapanjja Tatitumpiw parläna aqham sasa: — Uñtam, Tata, nayajj cunapachatï orakejjancascäyäta ucqhajj aqham pasañapjja yatipuniyätwa. Ucatwa Tarsis marcaru jaltjjayätjja, ucampis nayajj yattwa jumajj qhuyapayasiri Diosätama, janirac janc'a colerasirïtamsa, wali munasiñanïtam laycojja; mä mutuyäwi apayaniñataquisa yatiycta ucasa amthapisjjtawa uca mutuyäwejj jan lurasjjañapataqui. [3] Ucatwa, Tatay, mayt'assma jacañajj apakjjañamataqui. Jiwjjañaw sumajja jacañat sipansa.

Hechos 28:2

Uca islan jaquirinacasti wali sum catokapjjetu. Jupanacasti mä jach'a ninwa phichapjjäna, thayampi jallumpi puritap laycu. Ucatsti takeniruw jawsapjjetu: “Jutapjjam, ninar jac'achasinipjjam junt'urasipjjañamataqui” sasa.

Génesis 24:14

Cawquïr tawakorutejj nayajj siscä: ‘Wacullamat umay umt'ayita’ sasa, ucatsti jupajj saraquitani: ‘Acajj umt'ascaquim, camellonacamarus umart'ayaraquï’ siscani, ucäniw jumajj Isaac sirvirimataqui ajllcta uca warmejja. Uqhamatwa nayajj yatëjja uywirejjar jumajj qhuyapayatamjja” sasa.

Josué 2:12

ucatwa jichhajj mayipjjsma, Dios nayrakatana juramentompi sawayapjjeta familiajjaru munasiñampi uñjapjjañamataqui, cunjämtï nayajj jumanacat qhuyapayasipjjsma uqhama,

2 Corintios 6:6

Take ucanacsti uñacht'ayapjjaractwa suma sarnakatanacajjampi, cunatejj chekäqui uc uñt'apjjatanacajjampi, llamp'u chuymanïpjjatajjampi, suma chuymanïpjjatajjampi, uqhamarac Kollan Ajayojj nanacampïtap laycu chekpach munasiñanïpjjatajj laycuraqui,

Tito 3:4

Ucampis cunapachatejj Khespiyir Diosajj qhuyapayasiñapa, munasiñapsa take jakenacaru uñacht'ayistojja,

Génesis 24:12

ucatsti Diosat mayisïna: “Abraham uywirejjan Tatitu Diosapa, jichhajj jumaquiy yanapt'ita, uywirejjampisti sumaqui uñjayita.

Aymara Bible 1997