Beblia

Bible Verses On A Topic

Topics

Life: [Focus]

Ucatpï jiwasanacajja, ajanunacasajj jan uca velompi imantatäjjatap laycojj mä espejor uñtatjamaw Tatitun jach'a cancañapatjja c'ajtanjja. Uqhamaraquiw jiwasajj juc'ampi juc'ampi Cristjama tucusctan juc'ampi khanapajj jiwasancatap laycu. Ucwa Ajayüquis uca Tatitojj jiwasanacataquejj luri.

Filipenses 4:8

Ucjjarojj, jilatanaca, lup'ipjjam cunatejj chekäqui, cunatejj maynïr asqui uñjañäqui, cunatejj wali sumäqui, cunatejj k'omäqui, cunatejj muncañäqui, cunatejj aytat luräwinacäqui. Lup'ipjjam, take cunatejj sumäqui yupaychañataquïqui ucanacata.

Salmos 101:3

ñankha amtäwinacarojj janiw nayranacajjamp uñtcäti. Diosat saraktirinacarojj janiw uñcatcäti, janipuniw jupanacampejj jac'achayascäti.

Romanos 12:2

Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.

1 Pedro 1:13

Ucatpï jilatanaca, jumanacajj wali amuyt'asipjjam cuntï lurapcäta ucanacatjja, uqhamarac mä suma jacañan sarnakapjjaraquim. Take chuymaraqui suyt'apjjam cuntejj Diosajj qhuyapayasiñapanjja jumanacar churañataqui waquichasqui Jesucristojj jutcani ucqhajja.

Proverbios 4:25

Nayrakatarupuni uñtam, nayräjjat uñtaraquim.

Romanos 12:10

Maynit maynicamaw munasipjjañama jila purjam take chuymampi, suma aytat sarnakañansti purapat suma ajjsartañampi uñjasisa.

Colosenses 3:2

Alajjpach yänacat lup'ipjjam, jan acapach yänacatjja.

Hebreos 3:1

Uqhamajj Diosar catuyat jilatanaca, jumanacasti qhitinacarutï Diosajj jupatac jawsapctam ucanacäpjjtawa. Wal amuyapjjam Cristo Jesusatjja, jupasti iyawsañan arcäwisanjja mä apostolowa jilïri sacerdoteraqui.

Filipenses 4:13

Criston ch'amapampejj take cunaruw saycatirista.

Hebreos 12:1-2

[1] Ucatwa jiwasanacajj walja iyawsañani jakenacampi muyuntatätan, cunatejj jarc'quistu ucjja maysaru apanucuñäni, uqhamarac jiwasar apnakquistu uca juchsa, ucatsti ch'amañchasisa jalañäni cunatejj nayrakatar jalañasäqui ucanjja. [2] Jesusaruy uñtañäni, jupatwa iyawsañasajj juti, juparaquiw uca iyawsañasjja phokhachani. Jesusasti crusanwa t'akhesi, jan uca casta jiwañaru p'enkasisa. Jupajj yatisïnwa uca t'akhesitapatjja khepürunjja cusisiñ jicjjatañapata; ucatsti Diosan tronopan cupëjjaparuw kont'asi.

1 Pedro 5:8

Wali amuyt'asirïpjjam, janc'aquïpjjaraquim, jumanacar uñisir Supayasti mä leonar uñtataw warart'asisa sarnakasqui qhitiru mank'antañataquisa.

Romanos 12:16

Jumanac taypinjja mä amtaniqui jacasipjjam. Janiraqui jach'a jach'a tucupjjamti, jan ucasti alt'at chuymani tucupjjam. Janiraqui wali yatiñanjamas tucupjjaraquimti.

2 Corintios 10:4-5

[4] Nanacan nuwasiñanacajjataquejj janiw acapach armanacati uscutäquejja, jan ucasti nanacan armanacajjajj pachpa Diosan ch'amapawa, cunanacatejj ch'amanïqui ucanacar tucjañataqui. [5] Uqhampï nanacajj t'unjapjjtjja Dios contra jan wali parlanac utjatapjja, uqhamarac Diosan arunacapajj jan uñt'atäñapataqui jarc'quis uca arunacarusa. Take jakenacan amtatanacapsa Cristoruquiw catuyapjjta, ucanacajj juparu ist'apjjañapataqui.

Filipenses 3:12-14

[12] Janiw: “Take acanacjja jicjjatjjtwa” siscti, ni ucampejj: “Wali k'omätwa” sañs muncaractti, jan ucasti nayrakataruw sarantascta Cristo Jesusar jicjjatañcama. Jupajj niyaw nayarojj jicjjatjjetu. [13] Jilatanaca, janiw nayajj ucampejj sañ munapcsmati niyas jicjjatquirista uqhama, jan ucasti cunatejj khepancqui ucjja, armanuctwa, nayrancquis uc jicjjatañcamaw ch'amañchasiscta, [14] cawqharutejj puriñasäqui, ucar puriñataqui, alajjpachan chürawi catokañataqui, cunataquitejj Diosajj Cristo Jesús tokejj jawsquistu uc catokañataqui.

Aymara Bible 1997 Qullan Arunaca