Beblia

Tiitooɗe

Allah: [Yiɗde nde alaa sarɗi]

[16] Ngam non enen en andi yidde nde Allah waɗani'en en njaɓiinde. Allah o yidde, fuu kolloowo yidde e mo jooɗodii e Allah won ɗon, nden Allah maa e jooɗodii e maako. [17] To en ngiɗi yimɓe e goonga, en ngaɗa jonde no Yeesu jooɗorii nder duuniyaaru, en kulataa Nyalnde Jaango. [18] To neɗɗo e andi Allah e yiɗimo, o daroto yeeso Allah ɓernde go'o, ngam yidde nde Allah holli'en e riiwa kulol. Ngam to neɗɗo e hula kiita Allah hollii o faamaayi yidde nde Allah yiɗimo. Non hollii yidde nde Allah waɗantamo nde huwataa kuuɗe ɗe o yiɗi huutirkimo.

Ko ɓuri koo ɗume woni, ngiɗindiree naa' seɗɗa, ngam yidde e waɗa ɗum yaafoo hakkeeji ɗuɗɗi.

Ko ɓuri ɗu'um fuu woni ngiɗindiron, ngam yidde hawtii ko'e meeɗen no haani.

On kisii ngam yidde Allah barka hoolaaki Yeesu. Naa' on kisu ngam goɗɗum ɗum ngaɗɗon, ammaa ɗum caahu Allah,

Onon worɓe, ngiɗee rewɓe mooɗon no Almasiihu yiɗiri kawtal tokkuɓemo hokki yonki muuɗum ngam maɓɓe.

Ngam yidde nde Allah yiɗi duuniyaaru haa o hokkii Ɓiɗɗo maako bajjo, ngam koo moye kooliiɗomo to' halka ammaa heɓa yonki ki re'ataa.

E mo munya nder koo ɗume. Hoolaare maako, e kammunde maako, e munyal maako re'ataa.

Too, jooni e woodi fii tatum, waato hoolaare, e kammunde, e yidde, ammaa yidde woni ko ɓurii mangu.

Ndaaree no Nyaako Mo Dow yiɗiri'en, haa e ɗum noddira'en ɓiɓɓe Allah, non boo ngontindirɗen. Ko waɗi yimɓe duuniyaaru ndu'u andaa'en ngam ɓe andaamo.

Ɗu'um woni no andirɗen ko woni yidde: Yeesu hokkii yonki muuɗum ngam meeɗen. E haani enen maa kokken yonki meeɗen ngam bandiraaɓe meeɗen.

Fuu mo walaa yidde, o andaa Allah, ngam Allah o yidde.

“Koo moye jogiiɗo ko mbiimi ɗum waɗa tokkiɗum, kanko woni giɗɗoyam. Fuu giɗɗoyam Nyaako am yiɗaymo, nden min maa mi yiɗaymo mi wanginanaamo hoore am.”

[12] Ko nginmi ngaɗon woni ngiɗindiron non no ngiɗirmi'on. [13] Walaa yidde ɓurnde nde'e, waato neɗɗo hokka yonki muuɗum ngam higooɓe muuɗum.

“Ammaa e mi wi'a'on onon nanooɓe ko mbi'aymi: Ngiɗee ganyooɓe mooɗon, ngaɗanee wanyuɓe'on ko wooɗi,

Koo moye neɗɗo waɗi hakke woɗɗitake ko Allah yiɗi o waɗa.

[5] Kammunde nden semtintaa'en, ngam Allah holli'en e mo yiɗi'en nder ɓerɗe meeɗen barka Ruuhu maako, ɗum o hokki'en. [6] Nder carel ngel tampuɗen, Almasiihu maayii ngam gaɗooɓe hakke nder carel ngel Allah suɓi. [7] E ɗum saɗi goɗɗo maaya ngam aadiliijo. Sey ni ɗum gaɗotooɗum goɗɗo waɗa sembe ɓernde maaya ngam neɗɗo mo ngikku boɗɗum. [8] Ammaa laawol ngol Allah hollii'en yidde maako woni, carel ko ngonɗen nder hakke, Almasiihu maayii ngam meeɗen.

Ɗume waawata senda'en e yidde nde Almasiihu yiɗi'en? Ɗum torra kalluka, koo bone, koo halleende yimɓe, koo weelo, koo ciya kolte, koo nganyaandi yimɓe, koo mayde?

[9] Kollee yimɓe yidde nde goonga. Nganyee koo iri ndeye halleende, njogee ko wooɗi sembee. [10] Njogootiree, ngiɗindiree bo bandiraaɓe, kokkee yimɓe mangu bo ɓe ɓurii'on.

[4] Ammaa nde Allah Kisnoowo'en wangini yurmeende e yidde muuɗum, [5] o hisnii'en, naa' ngam kuuɗe boɗɗe ɗe ngaɗuɗen, ammaa ngam yurmeende maako. O hisnu'en barka lootuki ɓerɗe meeɗen ki Ruuhu maako waɗi wartirii'en yimɓe hesɓe.

[9] Allah hollii'en yidde muuɗum nde o liloyi Ɓiɗɗo maako go'oto tan mo o woodi nder duuniyaaru, ngam keɓen yonki ki re'ataa barka Ɓiɗɗo on. [10] Raa no yidde nde goonga wa'i, naa' enen ngiɗi Allah, ammaa Allah yiɗi'en o liloyi Ɓiɗɗo maako ngam warta cakkiri yaafaaki hakke meeɗen.

[34] Jooni raa goɗɗum kesum ɗum ngiɗumi ngaɗon: ngiɗindiree. Non no ngiɗirmi'on, onon maa sey ngiɗindiron. [35] To on ngiɗindirii, non waɗay koo moye anda onon on tokkuɓeyam.”

[4] Gooduɗo yidde e woodi munyal, e ngikku boɗɗum. O walaa lawliiru, o mantitataako, o walaa mangu hoore. [5] Gooduɗo yidde waɗataa ko semtinii, o ɗaɓɓitataa ko wallatamo kanko tan. O yaawaa monnuki, o jogitataako fii kalluɗum ɗum goɗɗo waɗanimo. [6] Gooduɗo yidde nanataa belɗum halleende, ammaa e mo nana belɗum goonga. [7] E mo munya nder koo ɗume. Hoolaare maako, e kammunde maako, e munyal maako re'ataa.

[43] “On nanii ɗum wi'ii, ‘Yiɗu bandiraawo maaɗa, wanyu ganyo maaɗa.’ [44] Ammaa e mi wi'a'on, ngiɗee ganyooɓe mooɗon, ngaɗanee torrooɓe'on do'aare, [45] ngam ngarton ɓiɓɓe Nyaako Mo Dow. Ngam e mo waɗa naange maako yeynoo dow yimɓe kalluɓe e yimɓe gaɗooɓe ko wooɗi, nden e mo waɗa ndiyam toɓa dow aadili'en e ɓe ngalaa aadilaaku. [46] To yiɗuɓe'on tan ngiɗɗon, ɗume barka keɓoton? Koo jaɓooɓe ceede leydi maa e ngiɗi yiɗuɓeɓe. [47] To bandiraaɓe mooɗon tan kownoton, ɗume ngaɗoton ɓurɗum ɗum woɓɓe ngaɗata? Yimɓe naa' Yahuudanko'en naa' e ngaɗa non? [48] Ngam non, ngartee keewuɓe no Nyaako mooɗon Mo Dow o kewɗo.

[1] Min, Bulus mo Allah suɓi warta lilaaɗo Yeesu Almasiihu e bandiraawo meeɗen Sastaanis mbindi ɗerewol ngo'ol. [2] Min mbindanngol kawtal yimɓe Allah wonɓe Korinti, ɓe Allah noddi ngarta yimɓe muuɗum. Min mbindanngol yimɓe fuu gonɓe koo toye gaɗooɓe do'aare nder inde Yeesu Almasiihu Joomiraawo meeɗen. Kanko woni Joomiraawo meeɗen e maɓɓe fuu. [3] Allah Nyaako meeɗen Mo Dow e Yeesu Almasiihu Joomiraawo barkiɗina'on hokka'on jam. [4] Koo ndeye e mi yetta Allah ngam mooɗon ngam barka e yidde ɗum o hokki'on ngam sumpootirki mooɗon e Yeesu Almasiihu. [5] Sumpootirki mooɗon e maako ɗum barkiɗinii'on e koo ngole laawol, waato nder meto fuu e andal fuu, [6] ngam ɗum tabbitinanii'on wa'aju ɗum min nga'ajinani'on dow Almasiihu ɗum goonga. [7] Ngam non, on ndullaayi koo ngale dokkal ngal Ruuhu Allah hokkata, on keɗii on kaaɓii gartol Yeesu Almasiihu Joomiraawo meeɗen. [8] O waɗay ka sembiɗinki'on haa yaaki re'irde, ngam ngarton ɓe ngalaa ko ɗum huɗirta'on nyalnde nde o wartoyta. [9] Allah o gaɗoowo ko o wi'i. Kanko noddi'on ngam cumpootiron e Ɓiɗɗo maako Yeesu Almasiihu Joomiraawo meeɗen. [10] E mi toroo'on bandiraaɓe ngam inde Joomiraawo meeɗen Yeesu Almasiihu, on fuu njaɓee ko mbi'oton warta go'o ngam to' ɗum heɓa feerootirol hakkunde mooɗon, ammaa nyumo mooɗon e ɓerɗe mooɗon warta go'o. [11] Bandiraaɓe am, yimɓe wuro Kuluuwi kokkiiyam habaru e woodi ciya famfamtirki hakkunde mooɗon. [12] Ko ngiɗumi mi wi'a woni, goɗɗo mooɗon e wi'a, “Min Bulus tokkumi.” Goɗɗo e wi'a, “Min Afoolos tokkumi,” on ni e wi'a, “Min Biiturus tokkumi.” On ɗaa'e boo e wi'a, “Min Almasiihu tokkumi.” [13] Too, Almasiihu e sendii won ɗon? Koo Bulus waraa dow gaafaangal ngam mooɗon? Koo e inde Bulus ɗum waɗirani'on baptisma?

Fulfulde Caka Nigeria 2010