Versos bíblicos sobre o tema: Bo personaxe: [Compaixón]

Temas

Bo personaxe: [Compaixón]

Pa' a bɑ Si ci wɔ, dɔnyə́ wɔ, ŋkhúŋ wɔ a, po ghə tʉm cɔmmtso, tʉm nwə pɑpúŋ, gə nə fi' nɑ́ hɑ́ si, tʉ́m bwatə pwatə gə nə kyəp tʉ̌m.

33:19

Po yɔ́: Pyə̌ go'tə pɔ pyə́ wap nthɔm tʉ́m tsap nə cwə ghəghʉɔ a. Po lě ju' mcuŋ Yob nə nə́ tɔm tʉ̌m biŋ jɔ ywə yə Cyəpɔ lə bɑwə shəŋ a nə pa' tʉ̌m Cyəpɔ bɑ ǎ ghu', e piŋ gə cɔ́mmtso.

Nə pa' e gɔm bi Mosɛ gɑ: Gɑ̌ gɔ sɔ' cɔmmtso mo yə́ gɑ̌ gɔ cɔmmtso myə a, zhwiŋ nə mo yə gɑ gɔ zhwiŋ nə e a.

2 KORINTO 1:3-4

[3] Byanyə bi Si, Tá Cyəpɔ yɔk pɑ Yeso Kristo, Tá cɔ́mmtso biŋ bɑ Si gɛ zhwyə́tə. [4] E jwyətə wɔk pɑ̀ nə ghəghʉɔ, gə́ gɑ́ pɑ ku' nə zhwyətə guŋ pɔ awɛ pyə wap nthʉm ghəghʉɔ, shyə m̀ nə zhwyə́tə yə kwa' wɔk pɑ̀ ŋkwi bi Si a.

FILIPO 2:1-3

[1] A pɑ́ gɑ Kristo nyəŋ gʉ' nə pɔ, bɑ gɑ ŋkhuŋnyə hɑ kaktʉɔ bi po, bɑ gɑ zhwenyə tamtə wɔ, bɑ gɑ po ghə cɔ̌mmtso cəcɑ̌ po, [2] a pɑ nə po po'o, po kwi' yɑ ŋwɛnyə shyə m nə́ nə vɔk nə ta' ŋkhɛ. Po ghə pɑ́ ta' ŋkhuŋnyə yɑmu', gə pɑ́ ta' tʉ̌m; po cəŋ nthamtə; [3] ka po lɑ twɔ'nyə nə gə sɔmywə kɑ ŋǎ'nɑ lə; da' gɑ́ po cyə́ m nə nə fi'nɑ hɑ si bɑ jɔ pyə shɑ pɔ pa' pɔ pyə wap m̀ dzə̌ po a.

MATIO 9:35-38

[35] Yeso lə́ giŋ nə guŋ mtisuŋ pu a m nə guŋ mla' awɛ, bɑ ji'tə pɔmnəŋ dyə sinagogə pú, bɑ siŋ cuŋ pɑpuŋ nə Nəfò, biŋ bɑ́ jɛ́ guŋ mghɛ gho pu a guŋ mkhʉm awɛ. [36] Yeso lə nə yɔ pɔmnəŋ, mtso map kú e nə pa' a lə bɑ wap pwa, gʉ' lə piŋ jɑ nə pú, wap pɑwə shwə pa' jʉ̀jʉ̀ tə gɛ pyap wap a. [37] A pɑ́ po'o, Yeso ghɔm bi pɑkhʉ pyə gɑ: Tsə́ lɑ nyəŋ dyə yɔm pe, mghɛ fa' kɔk. [38] Po cwyɛ'nyə Ta tsə dɑlɑ gɑ e cya mghɛ fa' nə tsə dɑlɑ tsyə́.

103:1-5

MATIO 20:29-34

[29] Yeso lə́ nə́ təm Yeriko vəŋ pɔ yap jʉ̀m e. [30] Shɑ́ mghɛ fʉ̀ pɑ́pʉ́ə pyə a lə́ bɑ wap cwə kəŋ məjyə̀ a lə́ nə yu' gɑ́ Yeso nə wə shyə̀, shwe gɑ: Cyəpɔ Mu David cɔmmtsò mɔk! [31] Pɔmnəŋ lə́ pɑ shɑnyə wap gɑ wap lɛtə, wap piŋ shwe tɑ thə gɑ: Cyəpɔ Mu David cɔmmtso mɔk [32] Yeso lə́ tiŋnyə̀, ŋkhe wap gɔm bi pu gɑ: Po shəŋ gɑ gə gɑ kɑ́ bi pǒ? [33] Wap ghɔm bi e gɑ: Cyəpɔ, gɑ mnyə mɔk ghyɛ'. [34] Mtso map lə kǔ Yeso, e co' pǔ nə mnyə map. Wap wuŋ jɔ tsʉ' biŋ jap jʉ̀m e.

MATIO 29:34

MATIO 14:13-21

[13] Yeso lə nə yu' mcuŋ bɔ, dɑ kənu' nə gɔ nə mu' ghakgo, tsʉ' tsiŋ, pɔmnəŋ lə nə yu', nthəm nə mtisuŋ jyəjyə̀ jap jʉ̀m e, giŋ mkwə̀. [14] E lə̀ nə təm kənu', jɔ mɑ du pɔ mtsò map kú e, e piŋ bɑ jɛ́ mŋkho'tə. [15] A lə kú' bwadzʉ̌, pɑkhʉ̌ Yeso ghɔ bəŋ e, gɔm bi e gɑ: Tsɔ'ɔ yəŋ yə pɑ nɑ a wə bɑ ghakghak tsʉ', ya'dzʉ̌ piŋ bɑ́ bà ǎ cyə̀; zhəŋ pɔmnəŋ wap ghɔ nthʉm la' jó ywətsʉ. [16] Da' gɑ Yeso ghɔm bi pu gɑ: A ka kwitə̀ gɑ̀ wap ghɔ tsʉ'u. Kwa' wɔ hɑ ywətsʉ bi pú. [17] Wap ghɔm bi Yeso gɑ: Pyə ghə da' msɛ́ mta' tɔ biŋ gə bapgu duŋ pʉə tsɔ'ɔ. [18] Yeso ghɔm gɑ: Po hɑ bəm. [19] E lə ghɔm gɑ́ pɔmnəŋ cwə́tə́ dəm mghě, biŋ kwi msɛ́ mta' tɔ ba bapgu duŋ pʉə, bʉ' mnyə myə́ de thə́ nyəŋ byanyə nə́. Bo' msɛ cwəlɔ, hɑ bi pɑkhʉ̌ pyə, wap hɑ bi pɔmnəŋ. [20] Guŋ yap awɛ lə pfɑ, jwyə. Pu piŋ daktə bo' myə́ a lo nə msap shwɔppʉə mghǎm. [21] Pɔ̀ pyə́ wap lə pfɑ a, lə́ bɑ́ gwɛ a pɔ̀ sha'tɔ, tə̀ sɛ pɑ jwǐ pu a pǒ mkəcɔk pó.

MATIO 15:29-39

[29] Yeso lə́ lǔ tsʉ'u bɔ, gɔ kəŋ shyə́ lɑpʉə Galilea. Ŋkwɔ' dəm kúŋ gǒ, shwəsi. [30] Pɔmnəŋ pɑ́ sɔ' bi é kwa' du é pú a mŋkho'tə, mfʉ̀, mkhʉ̌m, mtə́ghɔm, ba shɑ mthi tə́ jɔm, è pɑ́ jɛ wap. [31] Nwə pɑ́ sya pɔmnəŋ nə́ yɔ pa' mtə́ghɔm ghɔm, mkhʉ̌m zhi pɔ mtʉɔ, mko'tə ghiŋ dəŋdəŋ mfʉ yɔ tsʉ'; wap pɑ́ gu'tə Si Israɛl. [32] Yeso lə́ ke pɑkhʉ̌ pyə gɔm bi pu gɑ: Mtsò vəŋ pɔ pɔ̌ gɑ wə ŋkhú a, nə pa' a cwəlɔ̀ tyɛ'dzʉ tá pa' wap pɑ́ bəŋ m̀ a; bɑ wap ka nəŋ gə ywətsʉ, bi a pɑ́ dɑ nəŋ jəŋ wap, bwɔk gɑ wap kɑ kǒ məjyə bvʉ́. [33] Pɑkhʉ pyə ghɔm bi é gɑ: Msɛ̌ gɔ fɑ́ hɑ́ dəŋ ywə́ bi pyə́ ghakgo tsɔ'ɔ tə́ pyə nə ŋkhim dəŋ vəŋ pɔ pɔ̌? [34] Yeso ghɔm bi pu gɑ: Pǒ wim msɛ́ mta' sʉ'ʉ? Wap ghɔm bi e gɑ: mta' sɔmbʉə, gə po mduŋ bapgu ŋkho'ŋkho' [35] Yeso ghɔm bi pɔmnəŋ gɑ́ wap cwətəsi, [36] ŋkwi msɛ́ mtá sɔmbʉə ba bapgu, biŋ shwyɛ'nyə Si, bo'tə́ hɑ bi pɑkhʉ̌ pyə́, pɑkhʉ pyə́ hɑ bi pɔmnəŋ. [37] Guŋ pɔ awɛ pfɑ tə́ jwyə́; pu piŋ daktə́ bvʉ' mbó' myə́, a ló nə msap sɔmbʉə. [38] Pɔ pyə wap lə́ tsʉ̌ ywə a, lə bɑ́ pɑ́bɛ́ pɔ sha'pfʉə, tə́ sɛ pɑjwǐ ba pǒ mkəcɔk po. [39] Yeso lə́ la'nyə pɔmnəŋ cwəlɔ, ŋkho nthʉm kənu' dɑ m nthʉm guŋ Magadan.

MATIO 6:30-44

[30] A bi a Si pɑ ŋkwa dzə nə mghě myə a bɑ cwəlɔ, dzʉ̌ pɑ́ gɔ lɔ pu to mɔk a dəŋ po'o, bɑ e tə gɔ ghə nə po cyə pa' e gə nə mghě a pɑ a? Wɔ pɑ ghə múywə piŋnthʉm. [31] Ka po pɑ dzɔp nɑ tsɔ gɑ: Pyə gɔ tsʉ́ kɑ? Pyə gɔ nwə́ kɑ? Pyə gɔ kwa kɑ́ nə pyə? [32] Guŋ tsə ba awɛ ba pɑ́ tə pɑ́ pɑ́ Yudea shəŋ yap yá tə pwa; bɑ Tá yɔ kɛbəŋ nəŋ jyə́ gɑ́ tsə bǎ bɑwə shəŋ bi po. [33] Po ləŋdzə shəŋ Nəfo pu a dəŋdəŋ Si tɑ pu kwi' tsyə bǎ nə́. [34] Ka po pɑ́ dzɔp nɑ tsɔ nə yǒ: Yǒ gɔ ti nyatə nɑ e. Yə dəŋ go' bǎ ya tyɛ'dzʉ a ŋkhu' pɑ nə e. [35] Ka po pɑ ji pɑ fyɛ̀', po'o gɑ pu kɑ fyɛ' wɔ; [36] nə pa' pu gɔ sɔ' lə pɑ nthi fyɛ' yə po nə fyɛ' a nə fyɛ' wɔ, lɑ pɑ fo' yə po nə fo' a nə fo' wɔ. [37] Nwə kɑ́ o lé ghəgha' ywə yə a bɛtsə́ fɑ o a tɑ tə zhyə́ gɑ nthyə̀ bɛtsə o? [38] Kɑ́ o gɔ ghə m gɑ́ kɑ tə ghɔm bi fɑ o gɑ́ tiŋnyə nthé ghəgha' ywə yə a bɛtsə́ o a tə́ nthyə̀ pɑ bɛtsə o? [39] Wə mo dzɛbǔ, ləŋdzə nthé nthyə̀ bɛtsə́ o tɑ̀ jɔ tsʉ' pɑpúŋ nə nthé ghəgha' ywə bɛtsə́ fɑ o. [40] Ka po hɑ ywə dɔlɔ̌ bi mbvʉ̌, kɑ nə ma' mtɔkcyə mo bi pǒ gənɔm lɑ́, bwɔk gɑ wap kɑ́ nəŋtə biŋ fɛ nɑ tsap syatə wɔ. [41] Po ló, pú gɔ hɑ bi po; po cə́ŋ, pǒ gɔ yɔ, po ko'tə jyədyə̌, pu gɔ hé bi po. [42] Nə pa' mo yə e ló a ŋkwi, mo yə e cəŋ a yɔ, pu pɑ́ hé bi mo yə e ko'tə a. [43] A po'o bi a ya mo pɑ́ nə po yə mú e lo e ywətsʉ bɑ e gɔ hɑ gwɔ' bi a? [44] Kɑ bi a e lo e bapgu bɑ e gɔ hɑ́ nɔk bi é?

LUKASI 15:11-32

[11] E lə kwi' gɔm bi pu gɑ: Mu' mbɛ lə ghə pǒ pyə pɑpʉə. [12] Yə mo ŋkho' ghɔm bi tap e gɑ: Tá hɑ tsɑ tsə tsyə o bɑ gɔ la'tə hɑ bəm a. E lə ghɔm po'o ta yap ghaptə tsə tsyə́ bi pu. [13] A lə nə cyə po mtyɛ'dzʉ, yə mo ŋkho' cu'tə tsə tsyə gɔ nə mu' guŋ tə gʉə sʉəsʉə, sim tsə tsyə bɔ nə vɔk tə ŋkhɛ. [14] Cwə yə e lə pɔptə́ tsə bɔ tə a mi a, mu' mɑ kəya' vʉ nthʉm gúŋ. E cʉ' bə̌ŋ. [15] E lə ghɔ jɔ mu' yə́ guŋ bɔ, dɑ fa' bi e, e təm e gó gɑ e ghɔ bɑ byap mgənɔm pyə. [16] E lə bɑwə shəŋ nə pɑ dzʉ tsyə nə ywətsʉ mnɔm, da' gɑ la' sɔmmo pɑ hɑ ywətsʉ mnɔm m bi e. [17] E lə ghəmnɑ e gɔm gɑ: Mghɛ fa' ta á pɑ́ sʉ'ʉ shəŋtə dzʉywə tə́ nthak bvʉ'? Sɔ' m nə m, gɑ̌ yəŋ tsɔ'ɔ bɑwə pfʉ́ jikǔ'. [18] Gɑ gɔ lusi ghɔ bəŋ ta á ghɔm bi e gɑ: Ta ŋ de hɔnwə nə kɛbəŋ ba m bú. [19] Ŋ kha piŋ ŋkhu' pá' bi a pɑ o ké a gɑ mú o a. Lɑ a pa' mu' gɛfa' o a. [20] E lə lusi cwəlɔ gɔ nə yɔ tap e. E lə yɑ gʉə sʉəsʉə tap e yɔ e, mtso myə́ kú e, e kʉdʉ̌ nthɛtə nthuŋ e, nuŋ mgho' myə́. [21] Mu é bɔ ghɔm bí e gɑ: Ta ŋ dě hɔnwə nə kɛbəŋ ba m bǔ, ŋ kha piŋ ŋkhu'nyə nə pa' bi a pɑ pu ke a gɑ mu o a. [22] Tə́ tap e ghɔm bi mghɛ fa' pyə gɑ: Po lo'nyə dé kwa' dzə pɑpuŋ nə sɔ' ŋkwa nə é, biŋ jwe kwɛ nthə pu e, biŋ su ba mthap mkwə e. [23] Po lɑ mu hùŋ mhə̌m sɔ' jwə e, pɑ pfɑ́, ŋwɛnyə; [24] nə pá' mu a yəŋ gɑ lə pfʉ̌, e piŋ sɔ̌' nə vɔk, e lə pǐ, pu piŋ jɔ é. Wap lə to' nə ŋwɛnyə. [25] A lə nə pɑ po'o shyə̀dzə é pɑ m pě. E lə pɑ bɑnyə, sɔ' tə ŋkhəm be dyə̌, jʉ' pa' pu dyə jwɔp lə́ nəŋ a, [26] ŋkhe mu' gɛfa', həŋtə é ywə yə a bɑ ya a. [27] E ghɔm bi e gɑ: Fɑ o bɑ ě pɑnyə; pa' e nə sɔ' bɑ pɑ́ nthʉɔ a tɔ ɔ zhwə mú hùŋ mhə̌m. [28] E lə yu' po'o, luŋ e yɛ, e lə kuŋ nə ko dyə. Tap e tə́m byɛ'tə e. [29] E ghɔm bi tap e gɑ. Pa' bɑ fa' bu a, a cwəlɔ mgu' jɔmyɔ̌m, ŋ də m nthʉɔthə́ bu; tə o la m hɑ mu dzə́ bəm gɑ pyə a mso pɑ nə ŋwɛnyə. [30] Tə mu o yɑ yə é sɔ' a, yʉ yə́ e lə sǐm tsə́ tsǔ pu a pɑ mcʉ'ma' a, o zhwə́ mú hùŋ mhə̌m nə e! [31] Tap e ghɔm bi e gɑ: Mú a, pu nə́ bɑ guŋ mcwə awɛ, guŋ ywə yə gɑ gə a, a pɑ yǔ. [32] Tə́ a bɑwə shəŋ gɑ pu ŋwɛnyə nə pá' fɑ o yɑ lə́ pfʉ̌ e piŋ jam nə vʉ̌, e lə pǐ, pu piŋ ho é.

Galacian Bible 2002