Hera odhil e weche duto, kendo kata ang’o ema otimore, to pod en gi yie, gi geno, kod kinda.
Keturu parruok duto ma un-go kuome, nikech oparou.
To Ruoth Nyasaye nowacho ni Samuel niya, “Kik ing’i wang’e kata borne, nikech asedage. Ruoth Nyasaye ok ng’ichi kaka dhano ng’icho. Dhano ng’iyo ringruok, to Ruoth Nyasaye ng’iyo chuny.”
Yie ema telonwa, to wengewa ok telnwa.
to nowachona niya, “Mich ma amiyi kuom ng’wonona oromi, nikech kama nyawo nitie ema teko tiyoe moloyo.” Emomiyo amor ahinya pakora nikech nyawona, mondo teko mar Kristo odag kuoma.
Kik ubed joma ohero pesa, to gik ma un-go ema mondo oromu, nikech Nyasaye owuon osewacho niya, “Ok anaweyi, kata jwang’i ok anajwang’i ngang’.”
E higa mane ruoth Uzia othoe, ne aneno Ruoth Nyasaye ka obet e kome moting’ore malo kendo moluor, ka lawe morwako opong’o Hekalu.
Kik uluor gimoro nikech an kodu. Kik kibaji gou, nimar an e Nyasachu. Amiyou teko, kendo akonyou, bende asirou gi bada ma korachwich ma alochogo.
Ng’ama Duong’ Moloyo, ma nyinge Ng’ama Ler, kendo mosiko nyaka chieng’ wacho kama: “Adak kama ler kendo man malo, gi joma chunygi obolore kendo muol, mondo aduog chuny joma muol, kendo ajiw teko mar joma obolore.
An awuon ema ang’eyo gima achanonu. En gima ber to ok gima rach, kendo abiro kelonu gik mabeyo duto mugeno. An Ruoth Nyasaye ema awacho kamano.
Nyasaye nohero piny ahinya kama, omiyo nochiwo Wuode ma miderma mondo ng’ama oyie kuome kik lal, to obed gi ngima ma nyaka chieng’.
“Nyasaye oseimo wang’gi, kendo osemiyo wigi odoko mapek. Ka dine ok otimo kamano, to dikoro gineno gi wengegi, kendo dikoro giparo gi wigi, mi gilokre mondo ochanggi.”
Bang’ mano Yesu nowachonigi niya, “Kik chunyu parre. Yieuru kuom Nyasaye, to kuoma bende yieuru.
Kue ema koro aweyonu. Adier, kue mara awuon ema amiyou. En kue ma pinyni ok nyal chiwo. Kik chunyu parre, kendo kik ubed maluor.
Asenyisou wechegi duto mondo kubedo kuoma, to uyud kue. Unune malit e piny, to beduru modhil, nimar an aseloyo piny!”
Enoywe pi wang’gi duto, kendo tho kata ywak kata nduru kata rem ok nochak obedie nikech gik machon noserumo.”
Wang’eyo ni Nyasaye omiyo gik moko duto tiyo kaachiel mondo joma ohere oyud gueth. Jogo gin joma oseluongo kaka odwaro.
Kik uluw timbe mag pinyni, to lokreuru mondo parou odok manyien, eka ubiro ng’eyo gik ma Nyasaye dwaro. Gin gik mabeyo kendo malong’o ma Nyasaye oyiego.
Chunyi e kama ngimani ochakoree, emomiyo rite ka mwanduni migenoe moloyo.
[5] Gen kuom Ruoth Nyasaye gi chunyi duto, to kik igen kuom riekoni iwuon. [6] Par Ruoth Nyasaye e gik moko duto mitimo, eka obiro nyisi yo makare monego iluw.
[19] Koso ok ung’eyo ni ringreu en Hekalu mar Roho Maler modak e iu, mane Nyasaye omiyou? Un ok un mau uwegi, to un mag Nyasaye. [20] Ne oseng’iewou, mochulo nengou, omiyo miyeuru duong’ gi ringreu.
[6] omiyo kik upar gimoro, to nyisuru Nyasaye gik moko duto muchando, kulemo kendo ka chunyu goyone erokamano. [7] Eka kue mar Nyasaye modhiero ji ng’eyo norit chunyu gi parou, kubedo kuom Kristo.
[28] “Biuru ira, un duto mujony kendo mugangoru mapek, mondo amiu yueyo. [29] Rwakuru lodi ma amiyou e ng’utu, kendo puonjreuru kuoma, nikech chunya muol kendo dembore. [30] Kamano unuyud yueyo e chunyu, nnimar lodi ma amiyou yom, kendo misika yot.”
[1] Pile abiro goyo ni Ruoth Nyasaye erokamano, kendo ok nawe pake ndalo duto. [2] Abiro dende kuom gik ma osetimo, mondo ji duto ma ithiro owinji kendo obed mamor. [3] Konyauru hulo duong’ mar Ruoth Nyasaye. Adier! Wapakuru nyinge kaachiel! [4] Ne aywak ni Ruoth Nyasaye, mi odwoka, kendo ne otiekona luoro duto mane omaka. [5] Joma ithiro geno yudo konyruok kuome, mi omiyogi mor kendo ok owe mak okonyogi. [6] Joma ok nyal konyore kendgi ywakne mondo okony, kendo owinjogi. Ee, okonyogi e chandruok duto ma gin-go. [7] Malaika mar Ruoth Nyasaye rito joma oluoro Ruoth Nyasaye kendo resogi. [8] Neye kendi kaka Ruoth Nyasaye ber! Ng’at ma ogeno kuome en jahawi. [9] Un jo-Ruoth Nyasaye duto, luoreuru, nimar joma oluore yudo gik moko duto ma gidwaro. [10] Kata mana sibuoche bende chando gik ma gicham, mi kech hew, to joma oluoro Ruoth Nyasaye ok chand gimoro amora maber. [11] Un osiepena ma pod yot, biuru uwinj gima awacho. Abiro puonjou luoro Ruoth Nyasaye. [12] Donge duher bedo mamor? Koso donge dudwar dak aming’a gi mor? [13] Ka kamano, to nyaka ugeng’ lewu kuom weche maricho, kendo dhou kik wach miganga. [14] Weuru timo richo, to timuru mana gik mabeyo. Dwaruru kue e kinde duto, mi uluw. [15] Ruoth Nyasaye rango joma kare gi ng’wono, kendo pile oyie winjo ywakgi. [16] To omon gi joma timo richo, kendo omiyo nyinggi rumo e piny. [17] Ji morito chik Ruoth Nyasaye ywakne, kendo owinjogi. Ogologi e chandruok duto ma gi-go. [18] Ruoth Nyasaye chiegni gi joma chunygi onyosore, kendo owaro joma chunygi osea chuth. [19] Ng’at maber yudo chandruok mang’eny, to Ruoth Nyasaye rese kuom mago duto, [20] Kendo orite maber chutho, ma kata mana chok dende achiel ok tur. [21] Richo biro nego joma timo richo, kendo jogo ma mon gi joma kare biro yudo kum. [22] Ruoth Nyasaye waro jotichne, kendo ji duto mogeno kuome notony.
Luo Bible 1976
Dholuo DC Bible Bible Society of Kenya and Bible Society of Tanzania, 1976