Ne akwaye nyathini, kendo koro osemiyago kaka nakwaye.
Kutimo kamano to eka anabed wuonu, kendo unubed yawuota gi nyiga. An Ruoth Nyasaye Manyalo Gik Moko Duto ema awacho kamano.”
To ong’ado bura kare ni mond liete, kendo ni nyithi kiye. Ohero jodak, kendo omiyogi chiemo gi lewni.
Jo-Asuria ok nyal resowa, bende ok wanadwar geche mag lweny mondo waidhi. Ok wanachak wawach ni gik mwaseloso gi lwetwa niya, ‘Un e nyisechewa.’ A Ruoth Nyasaye, in ema itimo ng’wono ni joma onge ng’ama konyogi.”
To joma ogeno kuom Ruoth Nyasaye, tekogi noduogi. Ginihu ka ongo, mana ka gima gin gi buombegi, kendo giniringi, to ok giniol, bende giniwuothi, to tekregi ok norum.
Lemo mar adier kendo maler e nyim Nyasaye Wuoro, en limo nyithi kiye gi mond liete e chandruokgi, kendo bende gi ritruok kuom richo mag piny.
An awuon ema ang’eyo gima achanonu. En gima ber to ok gima rach, kendo abiro kelonu gik mabeyo duto mugeno. An Ruoth Nyasaye ema awacho kamano.
Eka Ruoth nodwokgi ni, ‘Awachonu adier ni gimoro amora mane utimo ni ng’at achiel matinie moloyo kuom owetenagi, to an ema nutimona.’
Ka gima igeno ok otimore, to chunyi ol, to ka gima igeno otimore, to chunyi duogo.
Ng’aduru bura kare ni joma odhier kod nyithi kiye, kendo konyuru jochan gi joma ok nyal konyore kendgi.
Orito jopinje mamoko modak e piny joge, bende okonyo mond liete gi nyithi kiye, to orocho gik ma joricho ochano timo!
[5] Nyasaye modak e Hekalu mare maler rango nyithi kiye, kendo rito mond liete. [6] En ema omiyo joma piny ochamo mier mondoo odagie, kendo ogonyo joma otue, oketo kama ber. Joma odage to nodag mana e piny motwo.
[8] Kik iwe mak ichwako joma odhier ma ok nyal konyore kendgi. [9] Ee, nyaka iwuo mondo ong’adnigi bura kare.”
[12] To ji duto mane orwake, mi oyie kuome, nomiyo teko mar doko nyithind Nyasaye. [13] Ne onywolgi kuom Nyasaye, to ok kuom anywola, kata kuom gombo mar ringruok, kata kuom dwaro mar dhano.
[4] To kane ndalo mowinjore ochopo, Nyasaye nooro Wuode owuon. Wuodeno, dhako ema nonywolo, mi odak e bwo Chik Musa, [5] mondo owar joma nie bwo Chik, eka wabed yawuot Nyasaye.
[14] Ji duto ma Roho mar Nyasaye otelonigi gin nyithind Nyasaye. [15] To Roho ma useyudo ok loku wasumbini mondo uchak ubed maluor. Ooyo, Rohono lokowa nyithind Nyasaye, omiyo ng’ato ka ng’ato kuomwa ywak ni Nyasaye, ka luonge ni, “Baba! Wuora!” [16] Roho owuon oriwore gi chunywa kanyisowa ni wan nyithind Nyasaye. [17] To ka wan nyithind Nyasaye kamano, to wayudo mich ma osesingorenwa bende. Adier, wayudo michgo kaachiel gi Kristo! Chutho, ka wayie neno masira kode, to wanayud duong’ kode bende.
[14] To adier ineno joma chandore kendo mokuyo, bende pile iikori mar konyogi. Ng’at ma ok nyal konyore chiwore e lweti, nikech pile isebedo kikonyo jochan gi nyithind kiye. [15] A Nyasaye, keth teko mar joricho kod joma acheje. Kumgi kuom timbegi maricho, nyaka chop girum chuth. [16] Ruoth Nyasaye, in e ruoth mochwere nyaka chieng’, kendo joma ok ong’eyi biro lal nono e pinyi. [17] A Ruoth Nyasaye, ichiko iti ni lemo mag joma obolore, kendo itego chunygi. [18] Bende iwinjo ywak joma ithiro, gi ywak nyithi kiye, kendo ing’adonigi bura kare, mondo kihondko kik chak mi giring giwe miechgi.
Luo Bible 1976
Dholuo DC Bible Bible Society of Kenya and Bible Society of Tanzania, 1976