Adier, asando ringra kendo amiyo owinjo wachna, mondo kik bed ni an ma asepuonjo jomoko, yud ka an awuon arem.
Onge tem ma useyudo mopogore gi tem ma ji duto yudo. Nyasaye en jaadiera, omiyo ok noyie mondo uyud tem mohingo tekreu, to nomiu yo ma uwuokgo e tem moro amora, kendo nomiu teko mar dhil gi tem go.
nikech gik moko duto manie piny, kaka gombo mag ringruok gi gombo mar wang’, kod sunga ma ji sungorego kuom gik ma gin-go, ok a kuom Wuoro, to gin mana mag pinyni.
Osiepena, akwayou ni kaka un welo kendo jodak e pinyni, beduru motang’ gi gombo mag ringruok makedo gi chunyu pile.
Beduru mabor gi terruok. Richo moko duto ma ng’ato timo ok keth ringre. Ng’ama terore to ketho ringre owuon.
Nyaka iring ia e gombo mag yawuowi, to ibed e kanyakla mar joma sayo Ruoth gi chuny maradier, kendo madwaro bedo joadiera, kendo madwaro tim makare gi hera kod kue.
To gima awachonu e ma: Wuothuru kuom Roho, eka ok unutim gik ma ngima mar dhano gombo,
to joma timo gik ma Roho dwaro, paro mana weche mag Roho, kendo mano kelo ngima kod kue.
To rwakreuru gi Yesu Kristo kaka okumbau, kendo weuru keto chunyu kuom paro gik ma ringruok gombo.
[13] To ng’at ma itemo kik wach ni Nyasaye teme, nikech onge richo manyalo temo Nyasaye, kendo en owuon ok otem ng’ato. [14] To ng’ato ka ng’ato gombone owuon ema temo kendo yondho.
[19] Timbe mag ngima dhano nenore ratiro. Gin terruok, tim ma ok ler, anjawo, [20] lamo nyiseche manono, jwok, sigu, dhaw, nyiego, mirima, ichlit, miero, pogruok e kanyakla, [21] gombo, mer, dwanyruok, kod gik moko machal kamago. To asiemou, kaka nasiemou chon ni, joma timo gik ma kamago ok noyud gueth mar Loch Nyasaye.
[3] Dichwo nyaka tim ni chiege gik moko duto kaka owinjore otimne, kendo dhako bende nyaka tim ni chwore kamano. [4] Dhako ok oloyo ringre owuon, to mak mana chwore ema oloyo. Kamano, dichwo bende ok oloyo ringre owuon, to mak mana chiege ema oloyo. [5] Kik utuonru gima owinjore, mak mana ka uwinjoru e kindu uwegi kuom kinde matin mondo uyud thuolo mar lemo. Eka bang’e uchak ubed kaachiel, nono to Satan otemou nikech ok unyal ritoru.
[3] Nyasaye dwaro ni mondo ubed joma ler, omiyo nyaka uwe terruok. [4] Ng’ato ka ng’ato kuomu mondo ong’e rito ringre owuon e yo maler kendo mipako. [5] Kik umi gombou thuolo kaka joma ok oyie Nyasaye timo.
[27] “Usewinjo ni ne owachi e ndalo machon ni, ‘Kik iterri.’ [28] An to awachonu ni, ka ng’ato orango dhako, mi ogombo, to oseterore kode e chunye. [29] Kuom mano, ka wang’i ma korachwich ema teri e richo, to gole oko iwite kucha, nikech ber wito fuoni achiel, moloyo wito dendi duto e mach mak tho. [30] To ka lueti ma korachwich ema miyo itimo richo, to ng’ade oko iwite kucha, nikech ber wito fuoni achiel, moloyo wito dendi duto e mach mak tho.
Luo Bible 1976
Dholuo DC Bible Bible Society of Kenya and Bible Society of Tanzania, 1976