Bible Verses On A Topic: Mysteries: [Dinosaurs]

Topics

Mysteries: [Dinosaurs]

Дро дова́ дывэ́с чингирэла Рай Дэвэ́л пэ́скирэ куртала́са, сави́ исын пхари́, бари и зоралы́ Левиафонос (драконос), сапэс, саво́ маму́й (прямэс) прастала, и Левиафонос, сапэс, саво́ выкрэнцынэлпэ (диндькирэлапэ), и мулякирэ́ла Рай Дэвэ́л долэ́ даранэ рупучос, саво́ дживэ́ла дро мо́рё (дэрья́в).

Genesis 1:21

И создыя́ Дэвэ́л барэн морёскирэ (дэрьявэ́скирэ) мачхэн, и каждо джидо́ ди, саво́ кхарэ́лапэ, савэ́нца паня́ исын пхэрдэ́ пир пэ́скиро ро́до, и ра́зна чирикля́ пхакэнца пир пэ́скиро ро́до. И дыкхця́ Дэвэ́л, со дава́ сыс шука́р.

Psalms 104:26

Акэ, па́рмы (корабли) джа́на пир дава́ мо́рё (дэрья́в), и, ґа́да, Левиафано, со Ту создыян, соб (кай) лэ́скэ тэ броинэл одо́й.

Rimanenge 1:18

Пал-дова́ со болыбна́стыр зджа́ла Дэвлэ́скири холы́ пэ кажно бидэвлыткима и пэ манушэ́нгиро хохаибэ́н, савэ́ пэ́скирэ начачипнаса хасякирэна чачипэ́н.

Genesis 1:24-31

[24] И пхэндя́ Дэвэ́л: “Мэк пхув тэ дэл джиибэ́н джидэ́ дескэ пир пэ́скиро ро́до; кхэритконэ́ мурдалэ́нгэ (скотоскэ) и цапненгэ, ползучонэ джидыпнэнгэ и мурдалэ́нгэ пир пхув, кажнонэ́скэ пир пэ́скиро ро́до.” И яця́ адя́кэ. [25] И создыя́ Дэвэ́л пхувитконэ мурдалэ́н пир лэ́нгиро ро́до, и кхэритконэ́ мурдалэ́н пир лэ́нгиро ро́до, и кажнона цапня пэ пхув пир пэ́скиро ро́до. И дыкхця́ Дэвэ́л, со дава́ сыс шука́р. [26] И пхэндя́ Дэвэ́л: “Создаса манушэ́с, соб (кай) ёв тэ удэлпэ пир Амари́ патри́н (о́бразо), соб (кай) ёв тэ явэ́л кадасаво́-паць сыр Амэ сам; и мэк ёв тэ хулаинэ́л пэ морёскирэ (дэрьявэ́скирэ) мачхэндэ, пэ болыбна́скирэ чириклендэ, и пэ кхэритконэ́ мурдалэ́ндэ и пэ сари́ пхув, и пэ сарэ́ цапнендэ, савэ́ ползынэна пир пхув.” [27] И создыя́ Дэвэ́л манушэ́с пир Пэ́скири патри́н (о́бразо), пир Дэвлэ́скири патри́н (о́бразо) Ёв создыя́ лэс: муршэ́с и джувля́ создыя́ Ёв. [28] И бахтякирдя́ Дэвэ́л лэн, и Дэвэ́л пхэндя́ лэ́нгэ: “Биянэн и тэ явэ́н тумэн бут-бут, и пхэрдякирэн пхув и тэ лэн зор пэ ла́тэ, и тэ хулаинэн тумэ́ пэ морёскирэ (дэрьявэ́скирэ) мачхэндэ, и пэ болыбна́скирэ чирикле́ндэ и пэ кажнонэ́ мурдалэ́стэ, саво́ кхарэ́лапэ пир пхув.” [29] И пхэндя́ Дэвэ́л: “А́кэ, Мэ дыём тумэ́нгэ кажно чар, сави́ дэ́ла семи (вирингли), со исын пэ пхув, и кажно кашт (дрэ́во), дро саво́ исын каштуно семё, саво́ дэ́ла барьякирдэ́ (пло́ды): дава́ явэ́ла хабэ́н тумэ́нгэ. [30] И кажнонэ́ мурдалэскэ пэ пхув и кажнонэ́ болыбна́скирэ чириклякэ, и кажнонэ́ цапнякэ, сави́ ползынэла пир пхув, и дрэ савэ́ндэ исын джидо́ ди Мэ дыём кажно зэлэны (зэлэно) чар тэ хан.” И яця́ адя́кэ. [31] И дыкхця́ Дэвэ́л, со Ёв создыя́ и, акэ, дава́ сыс древа́н шука́р. И сыс бэльвэ́ль, и сыс зло́ко (ра́нко) – шо́вто дывэ́с.

Job 40:15-24

[15] [19] Бэ́рги, кай броинэна сарэ́ фэлды́тка мурдала́, дэ́на хабэ́н лэ́скэ. [16] [20] Ёв пасёла тэл лотоскирэ кашта́, кай гаравэна лэс тришчына (троснико) и дрич (болото). [17] [21] Лотоскирэ кашта́ учхакирэна лэс пэ́скирэ зэрьяса, лэс обчхувэна вербы паш рэкицы. [18] [22] Мэк рэка (лэнь) ґаздэ́лапэ пане́са, нэ ёв исын штыл: ёв исын зоралэ́с тэрдо́, мэк кокоро́ Иорда́но (Ёрдано) тэ чхувэлпэ дро лэ́скиро муй. [19] [23] Кон дэ́ла ра́да тэ лэл лэс анги́л лэ́скирэ якха́? Ци кон пусавэла лэ́скэ дро накх фэлякирэ спицаса? [20] [24] Ци вытэрдэса ту Левиафанос нанглэса, и ци притасавэса ту лэ́скири чиб шэлэса? [21] [41.1-ю.о.] Ци дэ́са ра́да ту тэ вчхувэс шэло тришчынатыр дрэ лэ́скирэ рутхуня (ноздри)? [22] [2] Ци явэ́ла дава́ Левиафано бут тэ мангэ́л тут, соб (кай) ту тэ потангинэс Лэс? Ци явэ́ла ёв тэ ракирэ́л ковлэс ту́са? [23] [3] Ци явэ́ла ёв тэ кэрэ́л штама (доракирибэ́н) ту́са? Ци лэ́са ту лэс сыр писхари́с пэ усады (сак)? [24] [4] Ци явэ́са ту тэ броинэс лэ́са сыр чирикляса? Ци дэ́са ра́да ту тэ пхандэс лэс ваш пэ́скирэ-штубакирэ раклорьенгэ?

Job 41:1-10

[1] [8] Дыкх! Нанэ мол тэ ужакирэл, со ману́ш лэ́ла лэс. Ци на пэрэ́ла ману́ш фэ́ни екхэ лэ́скирэ дыкхибнастыр? [2] [9] Ние́кх нанэ дасаво муршкано́, соб (кай) тэ джангавэл Левиафанос: и, кон тэды дэ́ла ра́да тэ тэрдёл анги́л Ма́ндэ? [3] [10] Кон пхэнэлас ма́нгэ, соб (кай) Мэ лэ́скэ тэ плэскирав палэ? Саро́ тэл болыбэ́н исын фэ́ни (то́ка) Миро. [4] [11] Мэ на ява́ва штыл, соб (кай) тэ на пхэна́в пал лэ́скирэ ґэра́ и васта́, ци пал Левиафаноскири бари зор ци пал лэ́скирэ гожонэ-масэнгирэ барипэ́н? [5] [12] Кон дэ́ла ра́да тэ отлэл лэ́скири упратуны и́дя (флика) явре́стыр? Кон дэ́ла ра́да тэ явэ́л пашы́л кэ ёв дуитконэ савариса (уздечкаса)? [6] [13] Кон сашты́ могинэ́ла тэ псиравэл Лэ́скиро муй, со исын сы́рбы вудара́ лэ́скирэ трашанэ дандэнца трусця́л? [7] [14] Лэ́скиро думо сы́рбы пхутёла шчытэндыр, савэ́ исын пхандынэ зоралэ́с сы́рбы чэргэнорьяса (печатяса): [8] [15] адя́кэ со екх исын пашы́л явирэ́стэ, со фа́но (воздухо) на проджа́ла машки́р лэ́ндэ; [9] [16] ёнэ исын дро екхипэ́н екх екхэ́са адя́кэ зоралэ́с, со нашты́ тэ роскэрэс пэ паша́ лэн. [10] [17] Ке́ли дава́ Левиафано дэ́ла чиха (чыхинэла), дуд зяинэла сыр блискавица, а лэ́скирэ якха́ исын сы́рбы злокоскирэ цымблы (ресницы).

Joshua 10:1-10

[1] И сыс адя́кэ: ке́ли Адониседэко, Ерусалимоскиро кра́ли, шундя́, со Ису́со лыя́ Гаё и отдыя́ лэс совлахакэ (прокошыбнаскэ), и со адя́кэ-паць кэрдя́ Гаёса и лэ́скирэ крали́са, сыр кэрдя́ Ерихоноса и лэ́скирэ крали́са, и со Гаваоноскирэ мануша́ кэрдэ́ рама́нё (миро) Израилёса и ячнэ́пэ тэ дживэ́н машки́р лэ́ндэ, [2] то тэды ёв зоралэ́с страхадыя, пал-дова́ со Гавао́но фо́ро сыс баро́, сыр екх крали́скирэ форье́ндыр, и сыс барэды́р Гаёстыр, и сарэ́ мануша́ лэ́скирэ сыс муршарья. [3] Палдава́ о Адониседэко, кра́ли Ерусалимоскиро, бичхадя́ кэ Гогамо, Хевроноскиро кра́ли, и кэ Фирамо, Иармуфоскиро кра́ли, и кэ Яфиё, Лахисоскиро кра́ли, и кэ Девиро, Еглоноскиро кра́ли, соб (кай) тэ пхэнэ́н: [4] “Явэ́н кэ мэ, и дэн васт ма́нгэ тэ хасякира́в Гавао́но, пал-дова́, со ёв кэрдя́ рама́нё (миро) Исусо́са и Израилёскирэ чхавэ́нца”. [5] Ёнэ скэдынэ́пэ, и гинэ́ пандж Аморее́нгирэ кра́лья: Ерусалимо́скирэ кра́ли, Хевроноскиро кра́ли, Иармуфоскиро кра́ли, Лахисоскиро кра́ли, Еглоноскиро кра́ли, ёнэ и сарэ́ лэ́нгирэ мануша́, и тэрдинэ́ стано́са пашы́л Гавао́но, соб (кай) тэ джа́н марибна́са проти лэ́стэ. [6] Мануша́ Гаваоноскирэ бичхадэ́ кэ Ису́со дро ста́но Израильёскиро, дро Галга́ло, тэ пхэнэ́н. “На отлэ васт тыро́ тырэ́ писхарьендыр, яв кэ амэ сыгнэдыр, зра́кх амэн и помогин амэ́нгэ; пал-дова́ со скэдынэ́пэ проти амэ́ндэ сарэ́ Аморее́нгирэ кра́лья, савэ́ дживэ́на пэ бэ́рги”. [7] Ису́со гия́ Галгалостыр кокоро́, и лэ́са сарэ́ мануша́, савэ́ сыс лачхэ́ кэ марибэ́н, и сарэ́ мурша́ муршканэ́. [8] И пхэндя́ Рай Дэвэ́л Исусо́скэ: “На дар лэ́ндыр, пал-дова́ со Мэ отдыём лэн дрэ тырэ́ васта́: нико́н лэ́ндыр на вытэрдёла анги́л муй тыро́”. [9] И явдя́ пэ лэ́ндэ Ису́со наужакирдэс, пал-дова́ со сари́ рат гия́ ёв Галгалостыр. [10] Рай Дэвэ́л яндя́ лэн дро дар анги́л Израильтянэндэ, и ёнэ домардэ́ зоралэ́с лэн дрэ Гавао́но, и традынэ лэн пир дром кэ Вефороноскиро вучипэ́н, и мардэ́ лэн кэ Азеко и кэ Македо.

Romani Bible Baltic 2019

Maintained by the United Bible Societies for the Baltic Romani Mission